Saamelaisparlamentaarikkojen konferenssin ryhmäkuva. Kuva: Kent Norberg

Sámeparlamentarihkkárat čoahkkanedje ságastallat ruoná nuppástusa váikkuhusain sámeealáhusaide 

/in , /by

Čihččet sámeparlamentarihkkáriid konferánsa lágiduvvui Ruoŧa Árviesjávrries 30. – 31.5.2023. Konferensii oassálaste sámeparlamentarihkkárat Norggas, Ruoŧas ja Suomas. Dán jagi temán ledje ruoná nuppástus ja biebmosorjjasmeahttunvuohta. Konferánssas gullojedje ee. áššedovdilogaldallamat bieggafámu, meahcceindustriija ja ruvkedoaimma váikkuhusain.

Saamelaisparlamentaarikkojen konferenssin ryhmäkuva. Kuva: Kent Norberg.
Sámeparlamentarihkkáriid konferánssa joavkogovva. Govva: Kent Norberg 

Sámedikki ságajođiheaddji Tuomas Aslak Juuso lea duđavaš, ahte sámeparlamentarihkkárat besse fas čoahkkanit ja ságastallat oktasaš áššiin ja hástalusain, mat laktásit ruoná nuppástussii, dasgo dat áššit eai leat čuolmmaheamit sámeguovllu luondduriggodagaid geavaheami geahččanguovllus.  

– Ruoná nuppástusa ja dasa gullevaš doaimmaid galgá válmmaštallat vuorrováikkuhusas Sámedikkiin, vai vahátlaš váikkuhusaid sámeservodahkii sáhttit vuhtiiváldit ja eastadit. Sámiin galgá eamiálbmogin leat duođalaš vejolašvuohta váikkuhit mearrádusaid dahkamii, dadjá Juuso. 

Lassin Árviesjávrrie konferánsa dohkkehii julggaštusa, mii gieđahallá sámiid árbevirolaš ássanguovlluid luondduriggodagaid ávkkástallama ja biebmosorjjasmeahttunvuođa. Dan mielde sámeguovllu luondduriggodagaid ii oaččo atnit ávkin sámiid áššáigullevaš miehtama haga. Julggaštusas gáibiduvvo buot sámeguovllus doaibmi oassebeliid ráhkadit olmmošvuoigatvuođastandárddaid ja –politihka, vai sámiid eamiálbmotvuoigatvuođat suodjaluvvojit ja gudnejahttojuvvojit. Lassin julggaštus gáibida, ahte Davviriikkat ráhkadit lágalaš ja čađahuvvon riektelaš suoji sámiid sosiála buresbirgemii. 

Sámi parlamentáralaš ráđi doaibmaplána mielde sámeparlamentarihkkáriid konferánsa lágiduvvo juohke goalmmát jagi, ja dasa oassálastet Suoma, Norgga ja Ruoŧa Sámedikkiid lahtut ja Ruošša bealde sámiid ovddasteaddji. Jagi 2020 konferánsa dollojuvvui Anáris pandemiija dihte easkka jagi 2022. Čuovvovaš konferánssa leat plánen lágidit jagi 2026. Sámi parlamentáralaš ráđđi vástida sámeparlamentarihkkáriid konferánssa geavada ordnemiin. 

Lassidieđut:

Tuomas Aslak Juuso 
Ságajođiheaddji 
040 687 3394 
tuomas.juuso@samediggi.fi  

Inka Saara Arttijeff 
Riikkaidgaskasaš áššiid čálli 
050 574 7629 
inka-saara.arttijeff@samediggi.fi  

Kuvassa vasemmalta Saamelaiskäräjien sosiaali- ja terveyssihteeri Anne Länsman-Magga ja WHO:n pääjohtaja Tedros Adhanom Ghebreyesus. Kuva: Anu Rantalaiho.

WHO dohkkehii loahppaárvalusa eamiálbmogiid dearvvasvuođas – Sámediggi oassálasttii loahppaárvalusa válmmaštallamii

/in , , /by

Máilmmi dearvvasvuođaorganisašuvdna WHO dohkkehii loahppaárvalusa eamiálbmogiid dearvvasvuođas 76.  oktasaščoahkkimis Geneves 30.5.2023. Loahppaárvalus lea WHO:s vuosttas loahppaárvalus, mii lea dohkkehuvvon eamiálbmogiid oasil. Sámediggi oassálastii loahppaárvalusa válmmaštallamii.

Govas gurut bealde Sámedikki sosiála- ja dearvvasvuođačálli Anne Länsman-Magga ja WHO váldohoavda Tedros Adhanom Ghebreyesus. Govva: Anu Rantalaiho.
Govas gurut bealde Sámedikki sosiála- ja dearvvasvuođačálli Anne Länsman-Magga ja WHO váldohoavda Tedros Adhanom Ghebreyesus. Govva: Anu Rantalaiho.

Dohkkehuvvon loahppaárvalusa vuođul válmmaštallo Globála doaibmaplána (a Global Plan of Action) 79. WHO: a dievasčoahkkimii.

– Dearvvasvuođa ovddideami áššiin galgá guovddážis leat eamiálbmogiid vejolašvuohta oassálastit mearrádusbargamii. Dál álggahuvvon bargu máilmmi dearvvasvuođaorganisašuvnnas addá ođđalágan vejolašvuođa giddet fuopmášumi ON:id eamiálbmotjulggáštusa duohtan dahkamii sosiála- ja dearvvasvuođabálvalusain, lohká Sámedikki ságajođiheaddji Tuomas Aslak Juuso.

Sámedikki sosiála- ja dearvvasvuođačálli oassálastá WHO:a deavasčoahkkimii Geneves 21.-30.5.2023. – Lea dehálaš, ahte Sámedikkis lea vuosttas háve vejolašvuohta oassálastit WHO:a deavasčoahkkimii Suoma delegašuvnna oassin, dadjá Sámedikki sosiála- ja dearvvasvuođačálli Anne Länsman-Magga.

Suoma álbmotlaš sáhkavuorru doarjjui loahppaárvalusa dohkkeheami

Suopma bajidii sáhkavuorus ovdan iežasgielat ja kulturvuđot bálvalusaid ja maiddái erenomážit mielladearvvasvuođabálvalusaid mearkkašumi. Dálkkádatrievdan boahtá maiddái váikkuhit sápmelaččaide máŋgga láhkai.

Suopma maiddái deattuhii sáhkavuorus, ahte eamiálbmogiid galgá váldit mielde mearrádusbargamii ja ságastallamii. Suoma sáhkavuoru mielde maiddái dieđubuvttadeami galggašii bargat ovttas eamiálbmogiiguin.

Loahppaárvalus eamiálbmogiid dearvvasvuođas (evttohus)

Lassidieđut:

Tuomas Aslak Juuso
Ságajođiheaddji
040 687 3394
tuomas.juuso@samediggi.fi 

Anne Länsman-Magga
Sosiála- ja dearvvasvuođačálli
040 182 9998
anne.lansman-magga@samediggi.fi

Inka-Saara Arttijeff
Riikkaidgaskasaš áššiid čálli
050 574 7629
inka.saara.arttijeff@samediggi.fi

Saamelaiskäräjien puheenjohtaja Tuomas Aslak Juuso.

Sámediggi oassálastá ON:id eamiálbmogiid bissovaš foruma 22. čoahkkimii

/in , /by

Sámedikki ságajođiheaddji Tuomas Aslak Juuso oassálastá ON:id eamiálbmogiid bissovaš forumii (UNPFII) New Yorkis 19.-27.4.2023. Foruma 22. čoahkkima temán leat eamiálbmogat, olbmuid dearvvasvuohta, planetáralaš ja guovlluid dearvvasvuohta ja maiddái dálkkádatnuppástus: vuoigatvuođaid vuođul áššiide lahkoneapmi (Indigenous Peoples, human health, planetary and territorial health and climate change: a rights-based approach).

Sámedikki delegašuvdnii gullet ságajođiheaddji lassin Sámedikki lahttu ja kulturlávdegotti ságajođiheaddji Pirita Näkkäläjärvi ja maiddái riikkaidgaskasaš áššiid čálli Inka Saara Arttijeff. Nuoraidráđi ovddasteaddjin lea mátkkis maiddái Rosa-Máren Juuso.

– Mis lea dárkkuhussan bajidit ovdan sámiid dáfus áigeguovdilis áššiid, nugo dálkkádatnuppástusa váikkuhusaid mielladearvvasvuhtii ja psykososiálalaš doarjaga ovttadaga barggu dehálašvuođa. Háliidan buktit ovdan maiddái sámediggeláhkaproseassa ja man láhkai Suopma joatká sámiid olmmošvuoigatvuođaid rihkkuma, muitala ságajođiheaddji Juuso.

Ságajođiheaddji Juuso oassálastá lassin 20.4. eahpevirggálaš gullamii mii guoská eamiálbmogiid oassálastinvuoigatvuođa ovddideami ON:in (Enhanced Participation of Indigenous Peoples) ja 27.4. Árktalaš guovllu dialogiijai (Arctic Regional Dialogue).

ON:id eamiálbmogiid bissovaš forum

ON:id eamiálbmogiid bissovaš forum (The United Nations Permanent Forum on Indigenous Issues, UNPFII) lea jagi 2000 vuođđuduvvon ON:id ekonomiija- ja sosiálaráđi (Economic and Social Council, ECOSOC) vuollásaš ráđđeaddi doaibmaorgána, masa gullet 16 iehčanas áššedovdilahtu. Ráđđehusat nammadit gávcci lahtu ja eamiálbmogat gávcci lahtu.

Foruma bargun lea bajidit ságastallamii eamiálbmogiid guoski gažaldagaid erenomážit ekonomalaš ja sosiálalaš ovdáneami, kultuvrra, birasgažaldagaid, skuvlejumi, dearvvasvuođa ja olmmošrivttiid suorggis. Bissovaš forum addá ávžžuhusaid ja doaibmá guovddáš foruman stáhtaid, eamiálbmogiid ja ON:id spesiálaorganisašuvnnaid gaskasaš dialogiija várás. Dat čoahkkimastá oktii jagis ON:id váldobáikkis New Yorkis.

UNPFII Twenty-Second Session: 17-28.4.2023

Lassidieđut:

Tuomas Aslak Juuso
Ságajođiheaddji
040 687 3394
tuomas.juuso@samediggi.fi 

Inka Saara Arttijeff  
riikkaidgaskasaš áššiid čálli  
010 839 3198 / 050 574 7629  
inka-saara.arttijeff@samediggi.fi

Sámediggi oassálasttii Barents guovllu Sámi Summit -allačoahkkimii Brysselis

/in , /by

Sámedikki delegašuvdna oassálasttii 22.-24.3.2023 lágiduvvon Barents guovllu eamiálbmogiid allačoahkkimii (Summit of Barents Euro-Arctic Indigenous Sámi People). Sámi allačoahkkima lágidedje Suoma sámediggi ja Suoma Barents euroárktalaš ráđi ságajođiheaddjit ovttasbarggus Eurohpa parlameanttain.

Govva: European Union 2023 – Source : EP

Allačoahkkima ságajođiheaddjin doaimmai Sámedikki 1. várreságajođiheaddji Anni Koivisto, guhte ovddasta Suoma Sámedikki Barents euroárktalaš ráđi (BEAC) eamiálbmogiid bargojoavkkus. Sámedikki delegašuvdnii gulle lassin stivrra lahttu Anne Nuorgam, kulturlávdegotti ságajođiheaddji Pirita Näkkäläjärvi, ealáhus- ja vuoigatvuođalávdegotti ságajođiheaddji Asko Länsman, skuvlen- ja oahppamateriálalávdegotti ja giellaráđi ságajođiheaddji Tauno Ljetoff, láhkačálli Kalle Varis, riikkaidgaskasaš áššiid čálli Inka-Saara Arttijeff ja ságajođiheaddji veahkkebargi Niina Siivikko.

– Lea hui dehálaš, ahte mii doalvut sámiid sáni Eurohpa uniovnna dássái viiddes arenas ja lasihit áddejumi das, man máŋggabealagit EU-mearrádusat čuhcet min árgabeaivái. Sávan, ahte dát allačoahkkin veahkeha min boahttevuođas hukset bissovaš oktavuođa min parlameanttaid gaskii, gávnnaha várreságajođiheaddji Anni Koivisto.

Prográmmas ledje hállamin Eurohpa komišuvnna ja parlameantta lahttut ja sámiid ja eará riikkaid ovddasteaddjit. Allačoahkkima  rahpansáhkavuoru doalai Eurohpa parlameantta ságadoalli Roberta Metsola, guhte muittuhii, ahte parlameantadállu gullá maiddái sámiide. Allačoahkkima rahpanoasis dearvvahansáhkavuoru geavahii maiddái Suoma oaiveministtar Sanna Marin, guhte buvttii ovdan dehálaš áššin ee. sámiid duohtavuođa- ja soabadankomišuvnna barggu ja sámediggelága ođastusa. Sámi parlamentáralaš ráđđi luobahii sutnje seammás ávžžuhusa, mii guoská sámiid iešmearridanvuoigatvuođa nannema. Loahpahussáhkavuoru doalai Eurohpa parlameantta várreságadoalli Heidi Hautala, guhte muittuhii ee. ahte ruoná sirdašuvvamis ii oččošii dagahit vahága olmmošvuoigatvuođaide, man ii sáhte máhcahit.

Govas gurut bealde Sámedikki I ságajođiheaddji Anni Koivisto, Eurohpa parlameantta ságadoalli Roberta Metsola ja dásseárvokomissára Helena Dalli. Govva: European Union 2023 – Source : EP.

Sámedikki delegašuvdna deaivvadii allačoahkkima oktavuođas maiddái máŋggaid Eurohpa parlameantta suopmelaš lahtuid, ja lassin komissára Jutta Urpila, Eurohpa dorvvolašvuođa- ja ovttasbargoorganisašuvnna vehádatáittardeaddji doaimmahaga ovddasteaddjiid ja Suoma bissovaš EU-ovddasteaddjiid. Deaivvademiin ságastallojuvvui ovttas ee. vugiin nannet sámiid oassálastinvuoigatvuođa Eurohpa parlameanttas ja dárbbus EU siskkáldas eamiálbmotpolitihkkii. Maiddái Sámedikki nuoraidráđi ovddasteaddjit deaivvadedje allačoahkkima áigge EU-mearrideaddjiid.

– Eu-dási mearrádusat gusket sámiid sihke njuolga ja eahpenjuolgadit. Lea vealtameahttun, ahte sámiid oassálastin mearrádusdahkamii dorvvastuvvo, vai sámiid dárbbut ja oainnut váldojuvvojit vuhtii, joatká Koivisto.

Allačoahkkima sáhttá geahččat Eurohpa parlameantta siidduin: 23.3. ja 24.3.

Allačoahkkima ruovttusiiddut: https://www.samisummit.org/

Govat allačoahkkimis:

Lassedieđut:

Anni Koivisto
I várreságajođiheaddji
040 415 5969
anni.koivisto@samediggi.fi

Inka-Saara Arttijeff  
riikkaidgaskasaš áššiid čálli   
010 839 3198 / 050 574 7629  
inka-saara.arttijeff@samediggi.fi

Sámi parlamentáralaš ráđđi doarjala oaiveministtar Marinii sámiid iešmearridanvuoigatvuođa beales

/in , /by

Sámi parlamentáralaš ráđđi (SPR) doarjala, ahte oaiveministtar Sanna Marin ovddidivčče sámiid iešmearridanvuoigatvuođa ollašuvvama ja eamiálbmotrivttiid guoski áddejumi ovttas Suoma, Ruoŧa ja Norgga stáhtanjunnošiiguin. Ávžžuhus luohpaduvvui Marinii duorastatiđida Brysselis su galledeami áigge Barents guovllu eamiálbmogiid allačoahkkimis. SPR bivdá maiddái muitit Ruošša sápmelaččaid soađi joatkašuvadettiin.

Ráđđi bajida ovdan maŋimuš áiggiid ovdamearkkaid hástalusain, mat gusket sámiid iešmearridanvuoigatvuođa ollašuvvama sierra riikkain, ovdamearkan Suomas sámediggelága ođastusa oktavuođas. Ráđđi bivdá, ahte stáhtat sihkkarasttášedje áddejumi, mii guoská sápmelaččaide dáhkiduvvon eamiálbmotrivttiid buot mearrádusbargama dásiin: báikkálaččat, sisriikkalaččat ja Eurohpa uniovnnas. Ráđđi maiddái ovdanbuktá iežas fuola Ruošša sápmelaččaid váttes dilis Ruošša fallehansoađi joatkašuvadettiin ja bivdá, ahte sin áŧestus ii vajáldahttošii.

Ávžžuhusa leat vuolláičállán sámedikki ságajođiheaddjit Tuomas Aslak Juuso, Silje Karine Muotka ja Håkan Jonsson, gii doaibmá maiddái SPR:a ságajođiheaddjin. Ságajođiheaddjit Jonsson ja Muotka luohpadeigga ávžžuhusa Marinii ovttas Suoma Sámedikki I várreságajođiheaddji Anni Koivistoin.

Loga Sámi parlamentáralaš ráđi ávžžuhusa eaŋgalsgilli dákko.

Lassidieđut:
Tuomas Aslak Juuso
Ságajođiheaddji
040 687 3394
tuomas.juuso(at)samediggi.fi

Anni Koivisto
I várreságajođiheaddji
040 415 5969
anni.koivisto(at)samediggi.fi

Inka Saara Arttijeff
Riikkaidgaskasaš áššiid čálli
050 574 7629
inka-saara.arttijeff(at)samediggi.fi

Barents guovllu eamiálbmogiid allačoahkkin Brysselis 

/in , /by

Suoma Sámediggi ja Suoma Barents euroárktalaš ráđi ságajođiheaddjit ordnejit ovttas Eurohpa parlameanttain eamiálbmogiid allačoahkkima Brysselis 22.-24.3.2023. Čoahkkima guovddáš temát leat árktalaš guovllu dálkkádatrievdan, Eurohpa uniovnna davvi politihkkii ja sámiide laktáseaddji gažaldagat ja maiddái árbevirolaš diehtu ja kulturárbi sámeservošiin. 

Sámi allačoahkkin lea áidnalunddot dilálašvuohta, mii buktá Suoma, Ruoŧa ja Norgga sápmelaččaid vuosttas háve ovttas ja stuorra čoahkkáibijuin Brysselii EU-mearrideaddjiid lusa. Mihttomearrin lea ovddidit sámedikkiid ja EU:a doaibmaorgánaid gaskasaš gulahallama ja oktasašbarggu sihke juohkit dieđuid ja vásáhusaid suvdilis ovdáneami doarjjan. Allačoahkkima hálliide gullet ee. riikkabeivviid ságajođiheaddji Matti Vanhanen, Suoma sámedikki I várreságajođiheaddji Anni Koivisto, ja maiddái Eurohpa parlameantta ságajođiheaddji Roberta Metsola. Allačoahkkin bajida ovdan maiddái sámi kultuvrra: Eurohpa parlameanttas leat oaidnin láhkai dáiddár Anders Sunna dáiddačájáhus ja čoahkkima prográmmas gullat musihka Niko Valkeapääs, Anna Morottajas ja Ailu Valles. Allačoahkkima oktavuođas Barents guvllolaš nuoraidráđđi (Barents Regional Youth Council, BRYC) lágida nuoraiddáhpáhusa ovttas EU-Sámi Youth Idea Lab prošeavttain. 

Barents euroárktalaš ráđđi 

Barents euroárktalaš ráđđi (Barents Euro–Arctic Council, BEAC) vuođđuduvvui Norgga álgagis jagi 1993 addon Kirkonjárgga julggaštusain Suoma, Norgga, Ruoŧa ja Ruošša gaskasaš oktasašbargoforuman. Ruošša fallehansoađi čuovvumuššan oktasašbargu Ruoššain lea jiekŋuduvvon buot BEAC-konteavsttain ja joatkašuvvá Suoma dahkan ”Friends of the Presidency” -formáhtas, masa gullet, earret Ruošša, buot eará BEAC-lahttoriikkat ja EU. 

Geavada oktasašbargu bargojuvvo bargojoavkkuin, maidda maiddái eamiálbmogiid bargojoavku, mii návddaša ráđđeaddi orgána sierrasajádaga, gullá.    Bargojoavkku mihttomearrin lea eamiálbmogiid intreassaid sihkkarastin ja ovdan buktin. Ruoššain dahkkon oktasašbarggu jiekŋudeami maŋŋá bargu lea jotkojuvvon Suoma, Ruoŧa ja Norgga sámiid gaskkas. Sis lea dehálaš rolla maiddái allačoahkkima válmmaštallamis. 

Lassidieđut 

Jari Vilén 
Barents euroárktalaš ráđi virgeolmmoškomitea (CSO) ságajođiheaddji, Ambassadevra 
+358 295 350 381 
jari.vilen@formin.fi  

Anni Koivisto 
Eamiálbmogiid bargojoavkku ságajođiheaddji, Sámedikki 1. várreságajođiheaddji 
+358 40 415 5969 
anni.koivisto@samediggi.fi  

https://www.samisummit.org/

Ságajođiheaddji Juuso: ”Norgga stáhta galgá gudnejahttit eamiálbmotvuoigatvuođaid”

/in , , /by

Sámenuorat leat čájehan mielaset Oslos Norgga oljo- ja energiijadepartemeanttas Fovsena bieggamillopárkkaid vuostá. Miellačájáhus álggii duorastaga guovvamánu 23. beaivve 500 beaivve dan maŋŋá, go alimus riekti gávnnahii duomus, ahte Fovsena bieggamillut leat huksejuvvon gustojeaddji doaibmalobi haga ja dat rihkkot sámiid rievtti hárjehit iežaset kultuvrra. Miellačájeheaddjit gáibidit alimus rievtti duomu ollašuhttima ja 150 lobihis bieggamillu burgima guovllusteaset. Juuso searvá Norgga guovllu sámiid gáibádusaide duomu ollašuhttimis.

Ságajođiheaddji Tuomas Aslak Juuso. Govva: Sámediggi / Johanna Labba.

Sámedikki ságajođiheaddji Tuomas Aslak Juuso ádde bures sámiid duššástuvvama áššis mii laktása bieggamillopárkii. – Doarjjun Norgga beale sámiid sin gáibádusain. Sámiide eamiálbmogin gullevaš rivttiid galgá gudnejahttit ja ollašuhttit eakti vuogi mielde. Fovsena dáhpáhusas Norgga stáhta galgá farggamusat ollašuhttit alimus rievtti čovdosa, dadjá Juuso.

Miellačájáhus álggahuvvui go duomu addimis lei gollan 500 beaivvi makkárge doaibmabijuid haga. Ságajođiheaddji Juuso imaštalláge, manin Norgga stáhta ii leat ollašuhttán iežas riekteásahusa čovdosiid. – Mu mielas dat lea áddemeahttun ášši, iige čájet, ahte Norgga stáhta gudnejahttá eamiálbmotvuoigatvuođaid, Juuso gávnnaha.

Norgga alimus riekti gávnnahii duomus ahte Norgga stáhta rihkku eamiálbmoga kultuvrra suddjejeaddji ON:id álbmot- ja politihkalaš rivttiid guoski oktasašsoahpamuša 27 artihkkala. Soahpamušas lea maiddái Suomas lága fápmu.

Lassedieđut:

Tuomas Aslak Juuso
Ságajođiheaddji
040 687 3394
tuomas.juuso(at)samediggi.fi 

Etyjin vähemmistövaltuutettu Kairat Abdrakhmanov ja Saamelaiskäräjien puheenjohtaja Tuomas Aslak Juuso.

Sámediggi deaivvadii Etyj vehádatáittardeaddjiin Anáris 

/in , /by

Etyj vehádatáittardeaddji Kairat Abdrakhmanov galledii Anáris 15.-16.2.2023. Guossástallama áigge vehádatáittardeaddji deaivvadii Sámedikki ságajođiheaddji Tuomas Aslak Juusoin ja nuppi várreságajođiheaddji Leo Aikioin. Vehádatáittardeaddjiin deaivvadedje Sámedikki doaibmaorgánain maiddái anárašáššiid ráđđádallangoddi ja nuoraidráđđi. 

Etyj:a vehádatáittardeaddji Kairat Abdrakhmanov ja Sámedikki ságajođiheaddji Tuomas Aslak Juuso. Govva: Johanna Alatorvinen / Sámediggi. 

– Giittán vehádatáittardeaddji dehálaš galledeamis. Ságastalaimet sámiide áigeguovdilis áššiid birra, nugo sámediggelága ođasmahttima dagahan almmolaš dilis ja dan buktin ruossalasvuođain. Vehádatáittardeaddji lei maiddái beroštuvvan ee. dálkkádatnuppástusa váikkuhusas sámi árbevirolaš ealáhusaide ja kultuvrii, sihke Sámedikki vejolašvuođaide váikkuhit mearrádusbargamii, muitala Sámedikki ságajođiheaddji Tuomas Aslak Juuso. 

Anára galledeami áigge vehádatáittardeaddji deaivvadii maiddái sámiid ruovttuguovllu gielddaid ovddasteaddjiiguin, duohtavuođa- ja soabadankommišuvnna ovddasteaddjiiguin ja sámeservviiguin, ja maiddái gulai sámiid árbevirolaš ealáhusaid áigeguovdilis dilis. 

Deaivvademiid lassin vehádatáittardeaddji galledii Yle Sápmi doaimmahusas ja anárašgielat giellabeasis. Vehádatáittardeaddji galledii lassin várreságajođiheaddji Leo Aikio luhtte ja oahpásmii lagabut boazodollui. 

Varapuheenjohtaja Leo Aikio kertoo poronhoidosta vieraille. Kuvassa Aikion lisäksi vasemmalta vähemmistövaltuutettu Kairat Abdrakhmanov, sekä vähemmistövaltuutetun toimistosta Zhazira Kul-Mukhammed, Mitra Jalali ja Anton Thomsen.
Várreságajođiheaddji Leo Aikio muitala boazodoalu birra gussiide. Govas Aikio lassin gurot bealde vehádatáittardeaddji Kairat Abdrakhmanov, sihke vehádatáittardeaddji doaimmahagas Zhazira Kul-Mukhammed, Mitra Jalali ja Anton Thomsen. Govva: Johanna Alatorvinen / Sámediggi. 

Etyj:a vehádatáittardeaddji geahččala eastadit ja ložžet ruossalasvuođaid, mat laktásit álbmotlaš vehádagaide Etyj:a guovllus. Barggus deattuhuvvet jaskes diplomatiija ja sierra oassebeliid gaskasaš oktasašbarggu doarjun. 

Lassidiehtu: 

Tuomas Aslak Juuso 
ságajođiheaddji 
040 687 3394 
tuomas.juuso@samediggi.fi  

Leo Aikio 
II várreságajođiheaddji 
040 621 6505 
leo.aikio@samediggi.fi 

Inka-Saara Arttijeff  
riikkaidgaskasaš áššiid čálli 
010 839 3198 / 050 574 7629  
inka-saara.arttijeff@samediggi.fi 

Saamelaiskäräjien puheenjohtaja Tuomas Aslak Juuso.

Etyj:a vehádatáittardeaddji galleda Anáris

/in , /by

Eurohpá dorvvolašvuođa- ja oktasašbargoorganisašuvdna Etyj:a vehádatáittardeaddji Kairat Abdrakhmanov galleda Anáris 15.-16.2.2023. Vehádatáittardeaddji deaivvada galledeami áigge Sámedikki ovddasteaddjiiguin, duohtavuođa- ja soabadankommišuvnna ovddasteaddjiiguin, nuortalaččaid siidačoahkkima ovddasteaddjiiguin, sámeorganisašuvnnaiguin ja maiddái sámiid ruovttuguovllu gielddaid ovddasteaddjiiguin. 

Saamelaiskäräjien puheenjohtaja Tuomas Aslak Juuso.
Sámedikki ságajođiheaddji Tuomas Aslak Juuso. Govva: Johanna Alatorvinen / Sámediggi

– Lea buorre, ahte Etyj čájeha beroštumi sámeáššiid ektui erenomážit dál, go sámediggeláhka ja dan dagahan almmolaš dilli leat galledeami duogážin. Etyj:s lea dehálaš rolla álbmotlaš vehádagaid vuoigatvuođaid suodjaleamis, lohká Sámedikki ságajođiheaddji Tuomas Aslak Juuso. 

Vehádatáittardeaddji oahpásmuvvá galledeami áigge maiddái ealáhusáššiide ja guossástallá Yle Sápmi doaimmahusas ja anárašgielat giellabeasis. 

Etyj:a vehádatáittardeaddji geahččala eastadit ja ložžet ruossalasvuođaid, mat laktásit álbmotlaš vehádagaide Etyj:a guovllus. Barggus deattuhuvvet jaskes diplomatiija ja sierra oassebeliid gaskasaš oktasašbarggu doarjun. 

Lassidieđut: 

Tuomas Aslak Juuso 
ságajođiheaddji 
040 687 3394 
tuomas.juuso@samediggi.fi  

Inka-Saara Arttijeff 
riikkaidgaskasaš áššiid čálli 
010 839 3198 / 050 574 7629 
inka-saara.arttijeff@samediggi.fi  

Sámi parlamentáralaš ráđđi lea fuolas sámediggelága ovdáneamis

/in , , /by

Sámi parlamentáralaš ráđđi (SPR) lea fuolas das, ahte Suoma ráđđehus ii leat vel doaimmahan sámediggelága riikkabeivviide. Ráđđi eaktuda Suoma dálá olmmošriekte-soahpamušrihkkumušaid heaittiheami ja dárbbašlaš doaimmaid sámiid iešmearridanvuoigatvuođa sihkkarastima várás.

Norgga, Ruoŧa ja Suoma Sámedikkiid gaskasaš parlamentáralaš oktasašbargoorgána, Sámi parlamentáralaš ráđđi celkkii Suoma ráđđehussii sámediggelága dilis Suomas. Cealkámuša leat vuollái čállán Sámi parlamentáralaš ráđi ja Ruoŧa Sámedikki ságajođiheaddji Håkan Jonsson, Sámi parlamentáralaš ráđi várreságajođiheaddji ja Norgga Sámedikki ságajođiheaddji Silje Karine Muotka sihke Sámi parlamentáralaš ráđi várreságajođiheaddji ja Suoma Sámedikki ságajođiheaddji Tuomas Aslak Juuso.

Sámi parlamentáralaš ráđđi muittuha, ahte ON:id eamiálbmogiid guoski julggaštusa 33 artikla mielde eamiálbmogiin lea vuoigatvuohta mearridit iežas identitehtas dahje lahttovuođas árbevieruid ja tradišuvnnaid mielde sihke vuoigatvuohta mearridit doaibmaorgánaid ráhkadusain ja válljet daid lahtuid iežas meannudemiid čuovvumiin.

Ráđđi maiddái muittuha, ahte ON:id olmmošriektekomitea ja nállevealaheami vuostásaš komitea leat gávnnahan, ahte dálá sámediggeláhka rihkku olmmošriektesoahpamušaid (CCPR/C/124/D/2668/2015 ja CERD/C/106/D/59/2016).

Ráđđi njuolgu boastto dieđuid

Ráđđi lea maiddái gidden fuopmášumi Suomas dihtton boastto informašuvdnii mii guoská válgalogahallankriteraid erohusaid Suoma, Ruoŧa ja Norggas gaskkas.  Almmolašvuođas leat leamaš čuoččuhusat, maid mielde ođđa láhkaevttohusa mieldásaš kriterat livčče čavgadut go eará riikkain.

– Duohta ášši lea, ahte láhkaevttohusa mielde divvojuvvon kriterat livčče seammá sullasaččat Norgga kriteraiguin, sihke ollásit davviriikkalaš sámesoahpamuša kriteraid mieldásaččat, ráđi ságajođiheaddjit gávnnahit cealkámušas. Buot soahpamuša oassebealit (Suoma, Ruoŧa ja Norgga stáhtat sihke riikkaid sámedikkit) leat álgomuttosaččat nannen soahpamuša.

Lassidieđut:

Tuomas Aslak Juuso
Ságajođiheaddji
040 687 3394
tuomas.juuso@samediggi.fi