Saamelaiskäräjien puheenjohtaja Tuomas Aslak Juuso.

Sämitigge uásálist OA algâaalmugij pisováá foorum 22. čuákkimân

Sämitige saavâjođetteijee Tuomas Aslak Juuso uásálist OA algâaalmugij pisováá foorumân (UNPFII) New Yorkist 19.-27.4.2023. Foorum 22. čuákkim teeman láá algâaalmugeh, ulmui tiervâsvuotâ, planetaarlâš já kuávlui tiervâsvuotâ sehe šoŋŋâdâhnubástus: vuoigâdvuođáid vuáđuduvvee aldanemvyehi (Indigenous Peoples, human health, planetary and territorial health and climate change: a rights-based approach).

Sämitige delegaation kuullâv saavâjođetteijee lasseen Sämitige jeessân já kulttuurlävdikode saavâjođetteijee Pirita Näkkäläjärvi sehe aalmugijkoskâsij aašij čällee Inka Saara Arttijeff. Toos lasseen nuorâirääđi ovdâsteijen määđhist lii Rosa-Máren Juuso.

– Mist lii tárguttâssân pajediđ oovdân aašijd, moh láá teháliih sämmiláid, tego šoŋŋâdâhnubástus vaikuttâsah mielâtiervâsvuotân já psykososiaallii torjuu ohtâduv pargo tehálâšvuotâ.  Tai lasseen mun halijdâm pyehtiđ oovdân sämitiggelahâproosees já maht Suomâ juátká sämmilij olmoošvuoigâdvuođâi rikkom, iätá saavâjođetteijee Juuso.

Saavâjođetteijee Juuso uásálist lasseen 20.4. epivirgálii kulâmân, mii kuáská algâaalmugij uásálistemvuoigâdvuođâ pyeredem OA:st (Enhanced Participation of Indigenous Peoples) já 27.4. Arktâsii kuávlu vuárusavâstâlmân (Arctic Regional Dialogue).

OA algâaalmugij pisovâš foorum

OA algâaalmugij pisovâš foorum (The United Nations Permanent Forum on Indigenous Issues, UNPFII) lii ive 2000 vuáđudum OA ekonomia- já sosiaalrääđi (Economic and Social Council, ECOSOC) vuálásâš raavâadeleijee toimâorgaan, moos kuleh 16 jiečânâs äššitobdeejesânid. Haldâttâsah nomâtteh käävci jesânid já algâaalmugeh käävci jesânid.

Foorum pargon lii pajediđ savâstâlmân algâaalmugáid kyeskee koččâmušâid eromâšávt ekonomâlii já sosiaallii ovdánem, kulttuur, pirâskoččâmušâi, škovlim, tiervâsvuođâ já olmoošvuoigâdvuođâi syergist. Pisovâš foorum addel avžuuttâsâid sehe tuáimá tehálâš foorumin staatâi, algâaalmugij já OA sierânâsseervij koskâsii vuárusavâstâlmân. Tot čokkân ohtii ivveest OA váldusaajeest New Yorkist.

UNPFII Twenty-Second Session: 17-28.4.2023

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Inka-Saara Arttijeff
aalmugijkoskâsij aašij čällee
010 839 3198 / 050 574 7629  
inka-saara.arttijeff@samediggi.fi

Sämitigge uásálistij Barents kuávlu Sámi Summit -njunoščuákkimân Brysselist

Sämitige delegaatio uásálistij 22.-24.3.2023 uárnejum Barents kuávlu algâaalmugij njunoščuákkimân (Summit of Barents Euro-Arctic Indigenous Sámi People). Suomâ Sämitigge já Suomâ Barents euroarktâsii rääđi saavâjođetteijeeh oovtâstpargoost Euroop parlamentijn uárnejii sämmilâšnjunoščuákkim.

Kove: European Union 2023 – Source : EP

Njunoščuákkim saavâjođetteijen tooimâi Sämitige 1. värisaavâjođetteijee Anni Koivisto, kote oovdâst Suomâ Sämitige Barents euroarktâsii rääđi (BEAC) algâaalmugij pargojuávhust. Sämitige delegaatiost lijjii meid stiivrâ jeessân Anne Nuorgam, kulttuurlävdikode saavâjođetteijee Pirita Näkkäläjärvi, iäláttâs- já vuoigâdvuotâlävdikode saavâjođetteijee Asko Länsman, škovlim- já oppâmateriaallävdikode sehe kielâräädi saavâjođetteijee Tauno Ljetoff, lahâčällee Kalle Varis, aalmugijkoskâsij aašij čällee Inka-Saara Arttijeff sehe saavâjođetteijee išedeijee Niina Siivikko.

– Lii eromâš tehálâš, ete mij tuálvup sämmilij saavâ Euroop union táásán vijđes juávhoin já lasettep ibárdâs tast, mon maaŋgâpiälásávt EU-miärádâsah vaigutteh mii argâpiäiván. Mun tuáivum, ete taat njunoščuákkim iššeed mii puátteevuođâst vuáđudiđ fastâ ohtâvuođâ parlamentijdân kooskâ, iätá värisaavâjođetteijee Anni Koivisto.

Ohjelmist lijjii sárnon Euroop komissio ja parlament jesâneh sehe sämmilij já sierâ staatâi ovdâsteijeeh. Njunoščuákkim lekkâmsahâvuáru toolâi Euroop parlament saavâjođetteijee Roberta Metsola, kote muštottij, ete parlamenttáálu kulá meid sämmiláid. Njunoščuákkim lekkâmuásist tiervâttemsahâvuáru toolâi meid Suomâ uáiviminister Sanna Marin, kote pajedij oovdân tehálâš äššin ei. sämmilij tuotâvuotâ- já sovâdâttâmkomissio pargo sehe sämitiggelaavâ uđâsmittem. Säämi parlamentaarlâš rääđi adelij sunjin siämmást áánnum, mii kuoskâi sämmilij jiešmeridemvuoigâdvuođâ naanoodmân. Lopâttemsahâvuáru toolâi Euroop parlament värisaavâjođetteijee Heidi Hautala, kote muštottij ei., ete ruánáá sirdâšume ij uážuččii tovâttiđ olmoošvuoigâdvuođáid vaahâg, mon ij pyevti tivvoođ.

Kooveest čižetpeln Sämitige I värisaavâjođetteijee Anni Koivisto, Euroop parlament saavâjođetteijee Roberta Metsola sehe täsiárvukomissaar Helena Dalli. Kove:  European Union 2023 – Source : EP

Sämitige delegaatio teeivâi njunoščuákkim ooleest meid maaŋgâid syemmilijd Euroop parlament jesânijd sehe lasseen komissaar Jutta Urpilaisii, Etyj ucceeblohováldálii toimâttuv ovdâsteijeid já Suomâ fastâ EU-ovdâstus. Teivâdmijn savâstâllii oovtâst ei. vuovijn nanodiđ sämmilij uásálistemvuoigâdvuođâ Euroop parlamentist sehe táárbust EU siskáldâs algâaalmugpolitiikân. Meid Sämitige nuorâirääđi ovdâsteijeeh teivii njunoščuákkim ääigi EU-merideijeid.

– EU-tääsi miärádâsah kyeskih sämmiláid sehe njuolgist já epinjuolgist. Lii velttidmettum, ete sämmilij uásálistem miärádâstohâmân torvejuvvoo vâi sämmilij táárbuh já uáinuh váldojeh huámmášumán, juátká Koivisto.

Njunoščuákkim puáhtá keččâđ Euroop parlament siijđoin: 23.3.24.3.

Njunoščuákkim päikkisiijđoh: https://www.samisummit.org/

Koveh njunoščuákkimist:

Lasetiäđuh:

Anni Koivisto
I värisaavâjođetteijee
040 415 5969
anni.koivisto@samediggi.fi

Inka-Saara Arttijeff  
aalmugijkoskâsij aašij čällee  
010 839 3198 / 050 574 7629  
inka-saara.arttijeff@samediggi.fi

Säämi parlamentaarlâš rääđi oovdânpuáhtá áánnum uáiviminister Marinân sämmilij jiešmeridemvuoigâdvuođâ peeleest

Säämi parlamentaarlâš rääđi (SPR) oovdânpuáhtá áánnum, ete uáiviminister Sanna Marin ovdedičij sämmilij jiešmeridemvuoigâdvuođâi olášume já algâaalmugvuoigâdvuođâi ibárdâs oovtâst Suomâ, Ruotâ já Taažâ staatânjunošijguin. Áánnum adelui Marinân tuorâstâhiiđeed Brysselist, ko sun kollij Barents kuávlu algâaalmugij njunoščuákkimist. SPR táttu meid mušteđ Ruošâ sämmilijd, ko suáti ain juátkoo.

Rääđi paajeed oovdân majemui aaigij ovdâmeerhâid hástusijn sämmilij jiešmeridemvuoigâdvuođâ olášuumeest jieškođe-uv staatâst, ovdâmerkkân Suomâst sämitiggelaavâ uđâsmittem ooleest. Rääđi táttu, ete staatah visásmitáččii ibárdâs sämmiláid tähidum algâaalmugvuoigâdvuođâin miärádâstoohâm puoh taasijn: páihálávt, aalmuglávt já Euroop unionist. Toos lasseen rääđi puáhtá oovdân huolâs Ruošâ sämmilij vaigâdis tiileest, ko Ruošâ volliittemsuáti ain juátkoo já táttu, ete sii pačarâs ij vájálduuččii.

Áánnum láá vuáláčáállám Sämitiigij saavâjođetteijeeh Tuomas Aslak Juuso, Silje Karine Muotka já Håkan Jonsson, kii tuáimá meid SPR saavâjođetteijen. Saavâjođetteijeeh Jonsson já Muotka adeláin áánnum Marinân oovtâst Suomâ Sämitige I värisaavâjođetteijee Anni Koivistoin.

Luuvâ Säämi parlamentaarlii rääđi áánnum eŋgâlâskielân tääbbin.

Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso(at)samediggi.fi

Anni Koivisto
I värisaavâjođetteijee
040 415 5969
anni.koivisto(at)samediggi.fi

Inka Saara Arttijeff
Aalmugijkoskâsij aašij čällee
050 574 7629
inka-saara.arttijeff(at)samediggi.fi

Barents kuávlu algâaalmugij njunoščuákkim Brysselist 

Suomâ Sämitigge já Suomâ Barents euroarktâsii rääđi saavâjođetteijeeh uárnejeh oovtâstpargoost Euroop parlamentijn algâaalmugij njunoščuákkim Brysselist 22.-24.3.2023. Čuákkim kuávdášteemah láá arktâsii kuávlu šoŋŋâdâhnubástus, Euroop union tave politiikân já sämmiláid lohtâseijee koččâmušah sehe ärbivuáválâš tiätu já kulttuurärbi sämisiärváduvâin.  

Säämi njunoščuákkim lii áinoošlajâsâš tilálâšvuotâ, mii puáhtá Suomâ, Ruotâ já Taažâ sämmilijd vuossâmuu tove oovtâst já stuorrâ juávkun Brysselân EU-merideijei juávkun. Ulmen lii ovdediđ sämitiigij já EU toimâorgaanij koskâsii savâstâllâm já oovtâstpargo sehe jyehiđ tiäđu já vuáttámušâid kilelis ovdánem toorjân. Njunoščuákkim sárnooh láá ei. ovdâskode sahâolmooš Matti Vanhanen, Suomâ Sämitige I värisaavâjođetteijee Anni Koivisto sehe Euroop parlament sahâolmooš Roberta Metsola. Njunoščuákkim paajeed oovdân meid sämikulttuur. Euroop parlamentist lii uáinimnáál taaiđâr Anders Sunna taaiđâčáitáldâh já čuákkim ohjelmist kuleh muusik Niko Valkepääst, Anna Morottajast já Ailu Valest. Njunoščuákkim ooleest Barents kuávlulâš nuorâirääđi (Barents Regional Youth Council, BRYC) uárnee nuorâitábáhtus oovtâstpargoost EU-Sámi Youth Idea Lab havváin.  

Barents euroarktâsâš rääđi 

Barents euroarktâsâš rääđi (Barents Euro–Arctic Council, BEAC) vuáđudui Taažâ alguu vuáđuld ive 1993 adelum Kirkkonjaargâ julgáštussáin Suomâ, Taažâ, Ruotâ já Ruošâ koskâsii oovtâstpargofoorumin. Ruošâ volliittâssuáđi čuávumuššân oovtâstpargo Ruoššáin lii jiäŋudum puoh BEAC-kovteevstâin já juátkoo Suomâ toohâm ”Friends of the Presidency” -formaatist, moos kuleh EU já eres BEAC-jeessânstaatah, eereeb Ruošâ. 

Keevâtlii oovtâstpargo pargeh pargojuávhuin, moid kulá meid algâaalmugij pargojuávkku, mast lii raavâadeleijee orgaan sierânâssajattâh. Pargojuávhu ulmen lii algâaalmugij intressij turvim já oovdân pyehtim. Ko oovtâstpargo Ruoššáin lii jiäŋudum, te pargo lii jotkum Suomâ, Ruotâ já Taažâ sämmilij kooskâ. Sist lii tehálâš rooli meid njunoščuákkim valmâštâlmist. 

Lasetiäđuh  

Jari Vilén 
Barents euroarktâsii rääđi virgeolmooškomitea (CSO) saavâjođetteijee, Ambassadör 
+358 295 350 381 
jari.vilen@formin.fi  

Anni Koivisto 
Algâaalmugij pargojuávhu saavâjođetteijee, Sämitige 1. värisaavâjođetteijee 
+358 40 415 5969 
anni.koivisto@samediggi.fi  

https://www.samisummit.org/

Saavâjođetteijee Juuso: “Taažâ staatâ kalga kunnijâttiđ algâaalmugvuoigâdvuođâid”

Säminuorah láá čáittám mielâs Oslost Taažâ oljo- já energiaministeriöst Fosen pieggâvyeimirustigij vuástá. Mielâčááitus aalgij tuorâstuv kuovâmáánu 23. peeivi 500 peivid ton maŋa, ko Taažâ alemus riehti pahudij tuámustis, ete Fosen pieggâvyeimirustigeh láá huksejum vyeimist orroo toimâlovettáá rikkomáin sämmilij vuoigâdvuođâ eelliđ jieijâs kulttuur mield. Mielâčäitteeh väätih alemuu rievti tuámu olášuttem já 150 lavâttes pieggâvyeimiruustig raččom jieijâs kuávlust. Juuso siärvá Taažâ kuávlu sämmilij vátámâššáid tuámu olášutmist.

Saavâjođetteijee Tuomas Aslak Juuso. Kove: Sämitigge / Johanna Labba.

Sämitige saavâjođetteijee Tuomas Aslak Juuso ibbeerd pyereest sämmilij tušástume pieggâvyeimirustigáid lohtâseijee ääšist. – Mun tuárjum Taažâpele sämmilijd sii vátámâšâin. Sämmiláid algâaalmugân kullee vuoigâdvuođâid kalga kunnijâttiđ já tuođâi olášuttiđ. Fosen tábáhtusâst Taažâ haldâttâs kalga ájáttâlhánnáá olášuttiđ alemuu rievti čuávdus, iätá Juuso.

Mielâčáittus algâttii, ko tuámu addelmist lâi moonnâm 500 peivid iäge tábáhtum ollágin tooimah. Saavâjođetteijee Juuso imâštâl-uv, ete mondiet Taažâ staatâ ij lah olášuttâm jieijâs riehtilájádâs čuávdusijd. – Mun jiem ibbeerd tom, ige tot čääiti, ete Taažâ staatâ kunnijâttáččij algâaalmugvuoigâdvuođâid, Juuso paahud.

Taažâ alemus riehti pahudij jieijâs tuámust, ete Taažâ staatâ rikko algâaalmug kulttuur syeijee OA aalmugláid já poolitláid vuoigâdvuođáid kyeskee almossopâmuš 27 artikkâl. Sopâmušâst lii meid Suomâst laavâvyeimi.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso(at)samediggi.fi

Etyjin vähemmistövaltuutettu Kairat Abdrakhmanov ja Saamelaiskäräjien puheenjohtaja Tuomas Aslak Juuso.

Sämitigge teeivâi Etyj ucceeblohováldálii Anarist 

Etyj ucceeblohováldálâš Kairat Abdrakhmanov kollij Anarist 15.-16.2.2023. Kollim ääigi ucceeblohováldálâš teeivâi Sämitige saavâjođetteijee Tuomas Aslak Juuso já nube värisaavâjođetteijee Leo Aikio. Toos lasseen Sämitige toimâorgaanijn anarâšaašij ráđádâllâmkodde já nuorâirääđi teivii ucceeblohováldálii. 

Etyj ucceeblohováldálâš Kairat Abdrakhmanov já Sämitige saavâjođetteijee Tuomas Aslak Juuso. Kove: Johanna Alatorvinen / Sämitigge. 

– Mun kijtám ucceeblohováldálii tehálii kolliimist. Muái savâstâláim sämmiláid äigikyevdilij aašijn, tego sämitiggelaavâ uđâsmittem tovâttem almolii já jiärástum tiileest. Toos lasseen ucceeblohováldálâš lâi perustum ei. šoŋŋâdâhnubástus vaikuttâsâst sämmilij ärbivuáváláid iäláttâssáid já kulttuurân, sehe Sämitige máhđulâšvuođâin vaiguttiđ miärádâstohâmân, iätá Sämitige saavâjođetteijee Tuomas Aslak Juuso. 

Aanaar kollim ääigi ucceeblohováldálâš teeivâi meid sämmilij päikkikuávlu kieldâi ovdâsteijeid, tuotâvuotâ- já sovâdâttâmkomissio ovdâsteijeid já sämiseervijd, sehe kuulâi sämmilij ärbivuáválij iäláttâsâi äigikyevdilis tiileest. 

Teivâmij lasseen ucceeblohováldálâš kollij Yle Säämi toimâttuvâst já anarâškielâlii kielâpiervâlist. Ucceeblohováldálâš kollij meid värisaavâjođetteijee Leo Aikio kulen já uápásmij pyerebeht puásuituálun. 

Varapuheenjohtaja Leo Aikio kertoo poronhoidosta vieraille. Kuvassa Aikion lisäksi vasemmalta vähemmistövaltuutettu Kairat Abdrakhmanov, sekä vähemmistövaltuutetun toimistosta Zhazira Kul-Mukhammed, Mitra Jalali ja Anton Thomsen.
Värisaavâjođetteijee Leo Aikio muštâl puásuituálust kuossijd. Kooveest Aikio lasseen čižetpeln ucceeblohováldálâš Kairat Abdrakhmanov, sehe ucceeblohováldálii toimâttuvâst Zhazira Kul-Mukhammed, Mitra Jalali já Anton Thomsen. Kove: Johanna Alatorvinen / Sämitigge. 

Etyj ucceeblohováldálâš viggá estiđ já kepidiđ čuolmâid, moh lohtâseh aalmugláid ucceeblovvoid Etyj kuávlust. Pargoost tiäduttuvvojeh joskis diplomatia já sierâ uásipeelij koskâsii oovtâstpargo tuárjum.   

Lasetiäđuh: 

Tuomas Aslak Juuso 
Saavâjođetteijee  
040 687 3394 
tuomas.juuso@samediggi.fi  

Leo Aikio 
II värisaavâjođetteijee 
040 621 6505 
leo.aikio@samediggi.fi 

Inka-Saara Arttijeff  
aalmugijkoskâsij aašij čällee 
010 839 3198 / 050 574 7629  
inka-saara.arttijeff@samediggi.fi 

Saamelaiskäräjien puheenjohtaja Tuomas Aslak Juuso.

Etyj ucceeblohováldálâš kuállee Anarist

Euroop torvolâšvuotâ- já oovtâstpargo-ornijdume Etyj ucceeblohováldálâš Kairat Abdrakhmanov kuállee Anarist 15.-16.2.2023. Ucceeblohováldálâš tiäivá kollim ääigi Sämitige ovdâsteijeid, tuotâvuotâ- já sovâdâttâmkomissio ovdâsteijeid, nuorttâlij sijdâčuákkim ovdâsteijeid, sämiseervijd sehe sämmilij päikkikuávlu kieldâi ovdâsteijeid. 

Saamelaiskäräjien puheenjohtaja Tuomas Aslak Juuso.
Sämitige saavâjođetteijee Tuomas Aslak Juuso. Kove: Johanna Alatorvinen / Sämitigge.

– Lii pyeri, ete sämiääših kiäsutteh Etyj eromâšávt, ko sämitiggelaahâ já ton tovâttem almos tile lii kollim vuáđđun. Etyj:st lii tehálâš rooli aalmuglij ucceeblovoi vuoigâdvuođâi suoijiimist, iätá Sämitige saavâjođetteijee Tuomas Aslak Juuso. 

Toos lasseen ucceeblohováldálâš uáppáásm kollim ääigi iäláttâsaššijd já kuállee Yle Säämi toimâttuvâst sehe anarâškielâlii kielâpiervâlist. 

Etyj ucceeblohováldálâš viggá estiđ já kepidiđ ruossâlâsvuođâid, moh lohtâseh aalmugláid ucceeblovvoid Etyj kuávlust. Pargoost tiäduttuvvojeh joskis diplomatia já sierâ uásipeelij koskâsii oovtâstpargo tuárjum.  

Lasetiäđuh: 

Tuomas Aslak Juuso 
Saavâjođetteijee  
040 687 3394 
tuomas.juuso@samediggi.fi  

Inka-Saara Arttijeff 
aalmugijkoskâsij aašij čällee 
010 839 3198 / 050 574 7629 
inka-saara.arttijeff@samediggi.fi  

Säämi parlamentaarlâš rääđi lii huolâstum sämitiggelaavâ ovdánmist

Säämi parlamentaarlâš rääđi (SPR) lii huolâstum tast, ete Suomâ haldâttâs ij lah vala toimâttâm sämitiggelaavâ ovdâskoodán. Rääđi váátá Suomâ táálái olmoošvuoigâdvuotâsopâmušrikkomij lopâttem já tárbulijd tooimâid sämmilij jiešmeridemvuoigâdvuođâ turviimân.

Taažâ, Ruotâ já Suomâ Sämitiigij koskâsâš parlamentaarlâš oovtâstpargo-orgaan, Säämi parlamentaarlâš rääđi ceelhij Suomâ haldâttâsân sämitiggelaavâ tiileest Suomâst. Ciälkkámuš láá vuáláčáállám Säämi parlamentaarlii rääđi já Ruotâ Sämitige saavâjođetteijee Håkan Jonsson, Säämi parlamentaarlii rääđi värisaavâjođetteijee já Taažâ Sämitige saavâjođetteijee Silje Karine Muotka sehe Säämi Parlamentaarlii rääđi värisaavâjođetteijee já Suomâ Sämitige saavâjođetteijee Tuomas Aslak Juuso.

Säämi parlamentaarlâš rääđi muštoot, ete OA algâalmugáid kyeskee julgáštus 33 artikkâl mield algâaalmugijn lii vuoigâdvuotâ meridiđ jieijâs identiteetist tâi jeessânvuođâst tavijdis já ärbivuovijdis mield sehe vuoigâdvuotâ meridiđ jieijâs toimâorgaanij ráhtusijd já valjiđ toi jesânijd nuávditmáin jieijâs monâttâlmijd.

Toos lasseen rääđi muštoot, ete OA olmoošvuoigâdvuotâkomiteanäliolgoštem meddâlistem kieđâvuššee komitea láá pahudâm, ete tááláš sämitiggelaahâ rikkoo olmoošvuoigâdvuotâsopâmušâid (CCPR/C/124/D/2668/2015CERD/C/106/D/59/2016).

Rääđi vyeigee puástutiäđuid

Rääđi lii meid kiddim huámmášume Suomâst tiettum misinformaation valjâluvâttâllâmkriterij iäruin Suomâ, Ruotâ já Taažâ kooskâst. Almolâšvuođâst láá tiettum nágguseh, moi mield uđđâ lahâiävtuttâs miäldásiih kritereh liččii čovgâduboh, ko eres staatâin.

– Tuotâäšši lii, ete lahâiävtuttâs miäldásávt rievdâdum kritereh liččii siämmáásullâsiih Taažâ kriterijguin, sehe aaibâs tave-eennâmlii sämisopâmuš kriterij miäldásiih, rääđi saavâjođetteijeeh pahudeh ciälkkámušâstis. Puoh sopâmušuásipeleh (Suomâ, Ruotâ já Taažâ staatah sehe staatâi Sämitigeh) láá algâlávt nonnim sopâmuš.

Luuvâ Säämi parlamentaarlii räädi ciälkkámuš tääbbin eŋgâlâskielân.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi

Lasetiäđuh Säämi parlamentaarlii rääđist

Säämi parlamentaarlâš rääđi (SPR) lii Suomâ, Taažâ já Ruotâ Sämitiigij koskâsâš parlamentaarlâš oovtâstpargo-orgaan. Taažâ, Ruotâ já Suomâ Sämitigeh jođetteh rääđi ain 16 mánuppaijeed häävild. Čäällimkodden tuáimá tot Sämitigge, mast jođettemovdâsvástádâs ain kuás-uv lii. Sämitige čuákkim väljee ovdâsteijeid Säämi parlamentaarlii rááđán valjâpajan.

Saavâjođetteijee Juuso uásálistij Arctic Arts Summitân Yukonist 

Sämitige saavâjođetteijee Tuomas Aslak Juuso uásálistij Arctic Arts Summitân ađai Arktâsii taiđuu alemus čuákkimân 27.–29. kesimáánu 2022, mii uárnejui Whitehorse kaavpugist Yukonist Kanadast. 

Kuálmád tove ornimnáál tábáhtus nuurâi oohtân arktâsij staatâi já sirkumpolaarlii kuávlu algâaalmugij ovdâsteijeid. Arktâsii taiđuu alemuu čuákkim ulmen lii nanodiđ taiđuu já kulttuur tavveen sehe ovdediđ taiđuu já kreatiivlij suorgij sirkumpolaarlii oovtâstpargo. Ive 2022 tábáhtus teema lii Connection to Land (ohtâvuotâ enâmân).  

– Taaiđâ lii mijjân algâalmugáid ohtâ tehálâš vyehi olgospyehtiđ já savâstâllâđ äigikyevdilis aašijn. Maŋgii mii taiđust uáinoo nanosávt algâaalmugij árvumaailm sehe ohtâvuotâ mii ärbivuáváláid enâmáid já čassijd. Mun anam tehálâžžân, ete sirkumpolaarlii kuávlu algâaalmugij ovdâsteijein láá tágáreh tilálâšvuođah, main mij čokkânep oohtân taiđuu ooleest, paahud Sämitige saavâjođetteijee Juuso.  

Tábáhtus ääigi Juuso uásálistij meid puoh kuulmâ Sämitige sehe Taažâ já Ruotâ kulttuurraađij (kulttuurrådet) sehe taiđuu ovdedemkuávdáá teivâdmân, kost savâstâllui ei. puátteevuođâ oovtâstpargoost.  

Luuvâ lase tábáhtusâst: https://arcticartssummit.ca/  

Kove: Saavâjođetteijee Tuomas Aslak Juuso já Taažâ Sämitige räđijeessân Maja Kristine Jåma. 

Lasetiäđuh: 

Tuomas Aslak Juuso 
Saavâjođetteijee  
040 687 3394 
tuomas.juuso@samediggi.fi  

Suomâ lii rikkom OA jyehilágán näliolgoštem meddâlistmân kyeskee almossopâmuš 

OA näliolgoštem meddâlistem kieđâvuššee komitea (CERD) adelij vuossâmuu tove čuávdus, mast pahudii, ete Suomâ lii rikkom OA jyehilágán näliolgoštem meddâlistmân kyeskee almossopâmuš. Komitea almostitij čuávdusis 13. kesimáánu 2022 sämitige valjâluvâttâlmân tuhhiittum ulmuid kyeskee ääšist. Komitea vuárdá Suomâ haldâttâsâst, ete tot piejâ huápust joton ráđádâlmijd, main tärhističčii sämitiggelaavâ 3 §, mii kuáská sämmilâšmiäruštâlmân. 

Pahudum luávkkim kuáská alemuu haldâttâhrievti (AHR) tooimân ive 2015 sämitiggevaaljâin. Komitea ana, ete AHR čuávduseh láá puáhtám feilâlávt mutteđ jienâsteijeeráhtus já návt vaiguttiđ Sämitige máhđulâšvuotân tuođâi ovdâstiđ Sämiaalmug já ton hiäđuid. 

Tienuuvt toh AHR čuávduseh, moh čielgâ vuáđustâsttáá spiekâstii tolebáá tuhhiittum vyeimist orroo laavâ tulkkuumist, mon sehe AHR já Sämitige lijjii tubdâstâm, luávkkájii väidei vuoigâdvuođâ Sämiaalmug jesânin kollektiivlávt meridiđ sämitige jesânijn já uásálistiđ almolij aašij hoittáámân almossopâmuš vuovvijn, mon 5 (c) artikkâl syeijee.  

Komitea pahudij, ete AHR lii váldám ucemustáá 53:st 93 miärádâsâstis jienâsteijeid valjâluvâttâlmân ”oleskuorâttâllâm vuáđuld” čäitihánnáá, ete sij liččii tiävdám oovtâ objektiivlijn kriterijn, moh láá asâttum sämitiggeest adelum laavâ 3 §:st. 

Sopâmušluávkkim tivvoom várás komitea avžuut, ete Suomâ aalgât huápust tuođâlii ráđádâllâm sämitiggeest adelum laavâ 3 § täärhistmist. Ráđádâlmijd kalga toollâđ vâi visásmittoo, ete sämitige vaaljâin jienâvuoigâdvuotân kyeskee kritereh miäruštâllojeh tienuuvt, ete toh kunnijâteh sämmilij vuoigâdvuođâ adeliđ riijâ já tiätun vuáđuduvvee munemiettâm jieijâs jeessânvuotân já pooliitlii uásálistmân kyeskee aašijn. 

– Mun vuárdám, ete Suomâ staatâ ana tuođâlávt näliolgoštem meddâlistem kieđâvuššee komitea adelem laŋgâtteijee čuávdus já tuálvu sämitiggelaavâ uđâsmittem tääl moolân, iätá Sämitige saavâjođetteijee Tuomas Aslak Juuso. 

Näliolgoštem meddâlistem kieđâvuššee komitea čuávdus vuáđuduvá ive 1965 jyehilágán näliolgoštem meddâlistmân kyeskee aalmugijkoskâsii almossopâmušân. Almossopâmuš kiäldá olgoštem “nääli” vuáđuld já meid jyehilágán uáivildum tâi tuođâlii olmoošvuoigâdvuođâi luávkkim, mii vuáđuduvá etnisii algâpuátimân. 

Väideeh vaidii AHR 30.9.2015 já 13.1.2016 adelem miärádâsâin, moh kyeskih sämitige valjâluvâttâlmân merkkiimân. Väideeh onnii, ete väldimáin sämitige valjâluvâttâlmân occeid valjâlävdikode olášuttem laahân čallum objektiivlij kriterij árvuštâllâm vuástá, miärádâsah láá kaidâm sämmilij jieijâs taavij já ärbivuovij vuáđuld tuhhiittem kriterijn já láá sajanpiejâm taid alemuu haldâttâhrievti “oleskuorâttâlmáin”. 

Olgoministeriö tiäđáttâs 14.6.2022  

Komitea čuávdus 13.6.2022  

Lasetiäđuh: 

Tuomas Aslak Juuso  
Saavâjođetteijee   
040 687 3394  
tuomas.juuso@samediggi.fi