Mädd- da meäʹcctäälminister Sari Essayah kuõʹssji sueʹvet 23.9.2023 Aanrest da Uccjooǥǥâst tobdstõõttmen ääiʹjpoddsaž kueʹllšeeʹllemaaʹššid. Sääʹmteeʹǧǧ eeʹttǩeeʹj saǥstõʹlle ministerin vueiʹnnlõõttmõõžžâst Sajoozzâst jm. Teän kueʹllšeeʹllemvuâkkõõzzâst, šmâʹǧǧluõzzâst da kueʹllšeeʹllemlääʹjj muuttâstaarbin säʹmmlai beäʹlnn.

Snimldõk: Sääʹmteʹǧǧ / Niina Siivikko.

– Leäm rämmai tõʹst, što dialoog ministerin lij alttuum tâʹlskani halltõspââʹj aalǥâst, da što son lij leämmaž ouddmiârkkân šmâʹǧǧluõzz aaʹššin aktiivlaž. Näkam raajji vuârrmainstummuž da õhttsažtuâjj säʹmmlaivuiʹm lij ǩeeʹrjuum še Orpo halltõsprograʹmme, särnn saaǥǥjååʹđteeʹjj Tuomas Aslak Juuso. – Leäi vääžnai, što vuõǯǯaim ääiʹjpoddsai Tiânnu kuõskki aaʹšši lââʹssen kaggâd õuʹdde še jeeʹres säʹmmlai kueʹllšeeʹllemvuõiggâdvuõđid da õõutverddsažvuõʹtte kuõskki teemaid, juätkk Juuso.

Teän kueʹllšeeʹllemvuâkkõõzz da šmâʹǧǧluõzz lââʹssen še jeeʹres kueʹllšeeʹllemääʹšš õuʹdde valddumnalla.

Saǥstõõllmõõžžid jieʹlleš vââʹlljest jeäʹrben Taarrin saǥstõllum Teän kueʹllšeeʹllemvuâkkõõzzâst da tõn väʹǯǯlõs aaʹššin. Sääʹmteeʹǧǧ eeʹttǩeeʹj mušttʼte, što jiâ säʹmmlai vuõiggâdvuõđ da luõzz suõjjlummuž leäkku nuuʹbbeez vuâsttlõs täävtõõzz.

– Teän kueʹllšeeʹllemvuâkkõshäämas ij leäkku obbvuõđstes oʹnnstam, ij-ǥa tõn õõlǥči vuâllaǩeeʹrjted. Tõn sâjja tõt õõlǥči saǥstõõllâd samai oʹđđest säʹmmlai vuâđđlääǥǥlaž vuõiggâdvuõđid ciʹsttjeeʹjen, mõõnniäiggsaž vuõiggâdvuõttvueʹjj linjjõõzzid lokku vääʹldeeʹl, tuâtt I väärrsaaǥǥjååʹđteeʹjj Anni Koivisto.

Õõutsââʹjest tuʹmmješ lââʹssen, mäʹhtt ainsmââttčeš, što šmâʹǧǧluõzz vuäitčeš pääiklažtääʹzzest juätkast še äuʹǩǩeed tuâsttamtååimai lââʹssen. Teän-obbvuõđ lââʹssen Sääʹmteʹǧǧ kaaggi õuʹdde oođeem taarbid še Vuõccu säʹmmlai da Njauddâmjooǥǥ kueʹllšeeʹllemvuâkkõõzz beäʹlnn.

– Vuõccu säʹmmlai kueʹllšeeʹllemvuõiggâdvuõđi vueʹǩǩ ij leäkku seämma ärvvsaž da õõlǥat teevvmõõžžid. Âʹlddääiʹjest leʹčči ääiʹjpoddsaž še saǥstõõllâd oʹđđest Njauddâmjooǥǥ kueʹllšeeʹllemsuåppmõõžžâst Taarrin, särnn II väärrsaaǥǥjååʹđteeʹjj Leo Aikio.

Sääʹmteeʹǧǧest vueiʹnnlõõttmõʹšše vuässõʹtte saaǥǥjååʹđteeikååʹdd lââʹssen halltõõzz vuäzzla Veikko Feodoroff da Anne Nuorgam, jieʹllemvueʹǩǩ- da vuõiggâdvuõttluʹvddkååʹdd saaǥǥjååʹđteeʹjj Asko Länsman di saaǥǥjååʹđteeʹj vieʹǩǩteeʹjj Niina Siivikko. Minister Essayah mieʹldd kuõʹssjeʹmmen leʹjje skååttrdemtällõsduumšeǩ Vesa Ruusila di spesiaalvieʹǩǩteeʹjj Sonja Falk.

Lââʹssteâđaid:

Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi

Anni Koivisto
I väärrsaaǥǥjååʹđteeʹjj
040 415 5969
anni.koivisto@samediggi.fi

Leo Aikio
II väärrsaaǥǥjååʹđteeʹjj
040 621 6505
leo.aikio@samediggi.fi

Eʹtǩǩuum Teänjooǥǥ kueʹllšeeʹllemvuâkkõs neuʹrrad säʹmmlaid vuâđđlääʹjjest staanum vuõiggâdvuõđid nuʹtt miârkteei naaʹlivuiʹm, što tõn ij õõlǥ vuâllaǩeeʹrjted. Sääʹmteʹǧǧ eʹtǩǩad, što kueʹllšeeʹllemvuâkkõõzz saǥstõõlât oʹđđest. Sääʹmteeʹǧǧ halltõs tuʹmmii Teän kueʹllšeeʹllemvuâkkõõzz kuõskki ceälkkmõõžžâst 5.9.2023.

Ceäʹlǩǩemnalla åårrai Teän kueʹllšeeʹllemvuâkkõshämstõs neuʹrrad sääʹmkulttuur sueʹj, säʹmmlai jeällmõš-sueʹj di jiõččmieʹrreemvuõiggâdvuõđ. Hämstõõzzâst ij še leäkku säʹmmlai luõvâs, tiõttu vuâđđõõvvi õuddmiâsttmõš. Sääʹmteeʹǧǧ mieʹldd kueʹllšeeʹllemvuâkkõõzz âlgg saǥstõõllâd oʹđđest.

– Riikksuåvtõs uuʹdi saǥstõõllâmväʹlddõskååʹdd šiõtteem õhttvuõđâst ceälkkmõõžž, kååʹtt kaaggi luõssnääʹl jeällʼjem staanmõõžž di säʹmmlai vuõiggâdvuõđi õõudummuž. Säʹmmlai vuõiggâdvuõđ lie kuuitâǥ pijjum čorru kueʹllšeeʹllemvuâkkõshämstõõzzâst, ij-ka Sääʹmteʹǧǧ vueiʹt priimmâd vuâkkõõzz tän häämast, särnn sääʹmteeʹǧǧ saaǥǥjååʹđteei Tuomas Aslak Juuso.

Kueʹllšeeʹllemvuâkkõshämstõs câgg tuejjeem tääʹzzest Teän vuuʹd säʹmmlai vuõiggâdvuõđ harjjted äʹrbbvuõđlaž šeellmõõžžâs Teän čääʹccvuuʹdest. Vuâkkõs uuʹccad miârkteei nalla sääʹmǩiõl luâđlaž ââʹnnempirrõõzz da lij vaarrân ǩeeuheed sääʹmǩiõl luõss-šeellmõʹšše kuulli terminologia di tõn mieʹldd siʹrddi äʹrbbvuõđlaž teâđ.

Hämstõõzzâst ij leäkku valddum lokku võõrâs vuõiǥâsnääʹll da vuâđđlääʹǩǩ

Kueʹllšeeʹllemvuâkkõshämstõõzzâst jie leäkku nokk puârast valddum lokku alggmeer säʹmmlai vuâđđ- da ooumažvuõiggâdvuõđ, jie-ka tõid kuulli vuâđđlääʹǩǩvälljkååʹdd pieʹllvälddmõõžž. Vuâkkõõzzâst ij še leäkku valddum lokku mââimõsäiggsaž vuõiǥâsnääʹlest rajjum linnjõõzzid säʹmmlai kueʹllšeeʹllemvuõiggâdvuõđin da sääʹmkulttuur harjjtem sueʹjest Teänjooǥǥ čääʹccvuuʹdest.

Ââʹlmõs vuõiǥâs lij eeʹjj 2022 uʹvddmes õuddtuʹmmstõõǥǥin (KKO:2022:25 da KKO:2022:26) kuâđđam suåvldekâni kueʹllšeellmõõžž Teänjooǥǥ čääʹccvuuʹdest kuõskki šiõtlmid vuâđđlääʹjj vuâsttsiʹžžen. Vuâkkõõzzâst leʹbe tõn valmštõõllâm õhttvuõđâst jie leäkku eʹtǩǩuum vuâđđtõõllmõõžž tõõzz, što ääʹšš lie čouddum kueʹllšeeʹllemvuâkkõõzzâst nuuʹbbnalla ko ââʹlmõs vuõiggâz čåuddmõõžž kaiʹbbje.

–  Õõlmâs lij, što vuâđđlääʹjj da võõrâs vuõiǥâsnääʹl lokkuväʹlddem kuâđđmõš kueʹllšeeʹllemvuâkkõõzzâst veekk tõõzz, što määŋg vuâkkõõzz rajjtõõzz lie säʹmmlai peäʹlnn viõǥǥteeʹm, tõn diõtt ko tõk lie vuâđđlääʹjj vuâsttsa. Näkam ǩeähn tääʹzz valmštõõllmõš ij leäkku ni õõut vueʹsspeäʹl pueʹrren, juätkk Sääʹmteeʹǧǧ I väärrsaaǥǥjååʹđteei Anni Koivisto.

Mädd- da meäʹcctäällministeria raauki Sääʹmteeʹǧǧest ceälkkmõõžž hämstõõzzâst Lääʹddjânnam da Taarrjânnam kõskksaž Teänjooǥǥ čääʹccvuuʹd kueʹllšeeʹllemvuâkkõõzzâst da tõn vuâllaǩeeʹrjtummšest. Kueʹllšeeʹllemvuâkkõs lij eeʹjj 2017 čuõlmmum Teän kueʹllšeeʹllemsuåppmõõžž meâlddõs, koin šiõttõõlât kueʹllšeellmõõžž Teänjooǥǥâst, da koonn peeiʹvtet 5–7 eeʹjj kõõski.

Eeʹjj 2023 ääiʹj Sääʹmteʹǧǧ da Teän kueʹlltäällvuʹvdd jie teänab leäkku vuässõõttâm kueʹllšeeʹllemvuâkkõõzz kuõskki saǥstõõllmõõžžid, tõn diõtt ko ǩiõʹčče saǥstõõllâmõudldõõzzi puuttâm Taarr riikk kõrr luõssǩiõldkaiʹbbjõõzz diõtt.

• Looǥǥ ciâlkâlm tääiʹben lääddas. 

Lââʹssteâđ:

Tuomas Aslak juuso
Saaǥǥjååʹđteei
040 687 3394
tuomas.juuso@samediggi.fi

Anni Koivisto
I väärrsaaǥǥjååʹđteei
40 415 5 969
anni.koivisto@samediggi.fi

Sarita Kämäräinen
Jieʹllemvueʹǩǩ- da pirrõslääʹǩǩpiisar
040 186 7258
sarita.kamarainen@samediggi.fi

Snimldõk: Hans Pieski

Sääʹmteʹǧǧ lij alttääm saǥstõõllmõõžžid mädd- da meäʹcctäällministeriain puäʒʒpråppeemlääʹjj tiuʹddepiijjmõõžž meâldlaž valmštõõllmõõžž kuõskeeʹl. Sääʹmteeʹǧǧ mieʹldd kuäivas-sââʹjjpuäʒʒjeällmõõžžin čoʹrstemvueʹǩǩnallšem puäʒʒhåiddameeʹjj 2021–2022 vueʹǩǩ teâudd lääʹjjšiõttummšest koʹrvvõõzz vuâđđan šiõttuum kriteeʹrid.  

– Sääʹmteʹǧǧ õõlǥat, što puäʒʒpråppeemlääʹjj meâldla koʹrvvõõzz puäʒʒhåiddameeʹjjest 2021–2022 šõddâm skääđain määuʹset vuõiggvuõđmeâldlânji tõid puäʒʒhoiʹddjeeʹjid, kook liâ skääđ jõuddam ǩiõrddâd – še tõin paalǥâskooʹddin, koin liâ leämmaž pâiʹl-lååǥǥ. Tän vuäinalm tuärjjad Tâʹvv-Lääʹddjânnam vaaldšemvuõiggâz eiʹdde puättam räʹtǩǩummuš jaukkeed JJP-kõõskõõzz tuʹmmstõõǥǥ heelǥeed puäʒʒpråppeemlääʹjj meâldlaž skääđai koʹrvveemooccmõõžžid Näkkälä paalǥâskååʹdd puäʒʒhoiʹddjeeʹji beäʹlnn tääʹlv 2019–2020 pråppummšid kuõskeeʹl, tuâtt Sääʹmteeʹǧǧ saaǥǥjååʹđteeʹjj Tuomas Aslak Juuso. 

Puäʒʒhåiddameeʹjjest 2021–2022 säʹmmlai dommvuuʹd puäʒʒhoiʹddjeei vuõiʹnne vuäʹnkõs ääiʹj seʹst juʹn nuuʹbb čoʹrstemvueʹǩǩnallšem väʹǯǯlõs tääʹlv. Kuäivas-sââʹjjpuäʒʒjeällmõõžžin määdd ool jiõŋŋâm muõtti da kuõppi peʹllstem kuäivas-sõõʹji diõtt aʹlǧǧe määŋgain vuuʹd paalǥâskooʹddin šõddâd samai vaiggân juʹn čõhččtääʹlvest 2021.  

Mädd- da meäʹcctäällministeria iʹlmmti pâʹsslâšttam-mannu aalǥâst 2022, što Luâttreeʹǧǧesvuõttkõõskõs Luke rääjj čiõlǥtõõzz tääʹlv 2021–2022 puäʒʒjeällmõõžžin puäʒʒhåiddamvuuʹdest, tõn mâŋŋa, ǥu vitt säʹmmlai dommvuuʹd paalǥâskooʹddin leʹjje tuejjääm teâttânouddmõõžž mädd- da meäʹcctäällministeriaaʹje čoʹrstemvueʹǩǩnallšem muõtt- da luâttåårrmõõžžin. Še Sääʹmteʹǧǧ jiõʹli ministeriain saǥstõõllmõõžžid ääʹššest, da nuäjjõõđi tâʹl åårrai mädd- da meäʹcctäällminister Leppääʹje puäʒʒpråppummši õõudbeäʹlnn cõggmõʹšše da puäʒʒskääđđlääʹjj meâldlaž mõõntõõllmõõžž jåʹttʼtem diõtt ääv ǩiiʹrjin.   

Luke tuõđi čiõlǥtõõzzâst, što muõtti kõõrâs da jiõŋŋâm vuâđđmuõtt di vuuʹd rääʹssvuõđ õlli kuõpptoksiin seʹst ââʹnnem šõddee vaiggâd kuäivas-sââʹjjpuäʒʒjeällmõõžžid pieʹǩǩest puäʒʒhåiddamvuuʹd tälvva 2021–2022. Čiõlǥtõõzzâst arvvtõʹlleš čoʹrstemvueʹǩǩnallšem kuäivas-sââʹjjpuäʒʒjeällmõõžžid vuällam õhttseʹžže 19 paalǥâskååʹdd voudda. Vuʹvdd ǩiõttʼtââll veiddsõs vuuʹd säʹmmlai dommvuuʹd paalǥâskooʹddin di jeäʹrben puäʒʒhoiddu vaʹrrjum vuuʹdest. Lââʹssen täi 19 paalǥâskååʹdd vuuʹdest hååidat pâʹjjel peäʹl veeʹzz puäʒʒhåiddamvuuʹd puõccuin. 

Nuuʹbbnalla ǥu oouʹdab vuâra puäʒʒpråppeemlääʹjj suåvldeen, Luke čiõlǥtõõzz tiuddeeš kooʹddi mäddvuʹvddjieʹllemvueʹǩǩveʹrǧǧniiʹǩǩi tuejjeem taʹrǩstummšin. Sääʹmteeʹǧǧ vuäǯǯmi teâđai mieʹldd raukkmõš taʹrǩstummši alttummšen kooʹddid puõʹđi Lapin JJP-kõõskõõzzâst eman pâʹsslašttâm-mannu looppâst eeʹjjest 2022, da taʹrǩstummuž di čuäjtõõzzi noorrmõš spraaʹveš eman tän mâŋŋa. 

Sääʹmteeʹǧǧ da mädd- da mädd- da meäʹcctäälministeria kõskksa Sääʹmteʹǧǧlääʹjj  9 § meâldla saǥstõõllmõõžž puäʒʒtääl kuõskki skääđai koʹrvvummšest uvddum lääʹjj (987/2011), leʹbe nk. puäʒʒpråppeemlääʹjj meâldlaž koʹrvvõõzzi mähssmõõžžâst altteeš vueʹssmannust 2023. Saǥstõõllmõõžž juätkkje påʹrǧǧmannust 2023, ǥu puk taarbšeei teâtt skääđai veeidsõsvuõđ da koʹrvvõõzzid taarbšeei mieʹrrtieʹǧǧ ärvvtõõllmõššân leät vuõǯǯum.  

• Sääʹmteeʹǧǧ teâđtõs 28.2.2022
• Tääʹlv 2021–2022 muõtt- da kuäivvampuäʒʒjeällmõõžž da tõi vaaiktõõzz puäʒʒhoiddu, Luke 2022

Lââʹssteâđ: 

Tuomas Aslak Juuso 
Saaǥǥjååʹđteeʹjj  
040 687 3394
tuomas.juuso@samediggi.fi  

Laura Olsén-Ljetoff 
Jieʹllemvueʹǩǩpiisar 
teʹl. 010 839 3123 / 040 617 5113
laura.olsen-ljetoff@samediggi.fi  

Sääʹm äimmõs-suåvtõõzz šiõtteet tuärjjeed sääʹm äʹrbbvuõđlaž teâđ lokku välddmõõžž äimmõspolitiʹǩǩe kuulli tuʹmmstõktuâjast. Sääʹm äimmõs-suåvtõs šâdd saaǥǥjååʹđteeʹjest, väärrsaaǥǥjååʹđteeʹjest da jäänmõsân lååi vuäzzlast. Ooʹccmõsân peäʹl äimmõs-suåvtõõzz vuäzzlain âʹlǧǧe leeʹd sääʹm äʹrbbvuõđlaž teâđ vaaldšeei. Sääʹmteʹǧǧ valmštââll eʹtǩǩõõzz äimmõs-suåvtõõzz norrõssân sääʹm äʹrbbvuõđlaž teâđ vaaldšeeʹjin.

Sääʹmteʹǧǧ räukk sääʹmõõutstõõzzâst eʹtǩǩõõzzid sääʹm äʹrbbvuõđlaž teâđ vaaldšeeʹjin sääʹm äimmõs-suåvtõʹsse. Eʹtǩǩõõzzid raaukât määŋgsuârǥlânji jeeʹres sääʹmjieʹllemvuõʹjji da –kulttuur siltteeʹjin, jeeʹres ââʹǩǩjoouki da sooǥǥpieʹli eeʹttkõʹsttjin, tâʹvvsääʹm, nuõrttsääʹm da aanarsääʹm ǩiõllvuuʹdin jeeʹres åʹrnn säʹmmlai dommvuuʹdest. Eʹtǩǩeed vuäitt õõut leʹbe mäŋggsab oummu. Nõõmeemeʹtǩǩõs âlgg vuâđđtõõllâd.

Nõõmeemeʹtǩǩõõzzid raaukât 21.5.2023 mõõneeʹst neʹttpooʹštin info@samediggi.fi leʹbe pååʹšt mieʹldd Saamelaiskäräjät, Sajos, 99870 Inari. Eʹtǩǩõõzzâst âlgg õlmmned jiijjâd nõmm di eʹtǩǩuum oummu õhttvuõtt-teâđ di teâtt suu njäälmlânji uvddum miâsttmõõžžâst nõõmummša.

Sääʹm äimmõs-suåvtõs

Sääʹm äimmõs-suåvtõs lij čõõnteʹmes äʹšštobddiorgaan, koʹst âʹlǧǧe leeʹd eeʹttkõsttum sääʹm äʹrbbvuõđlaž teâđ vaaldšeei di eeʹttkâsttmõš kõskksaž tiõđsuõʹrjin. Sääʹm äimmõs-suåvtõõzzâst šiõtteet ođđ äimmõslääʹjj (423/2022) 21 §:st da lääʹjj nuäjain uvddum asetõõzzâst (435/2023). Riikksuåvtõs šiõttat sääʹm äimmõs-suåvtõõzz saaǥǥjååʹđteei da vuäzzlaid neellj eeǥǥas vuârstes. Vuäzzliʹžžen vuäitt toiʹmmjed jäänmõsân kuõʹhtt toiʹmmpââʹj ǩeäččlõõžži. Sääʹm äimmõs-suåvtõõzz vuäzzlaid määuʹset eeʹǩǩpaʹlǩǩõõzz. Saaǥǥjååʹđteei paʹlǩǩõs lij 5 000 euʹrred, väärrsaaǥǥjååʹđteei 3 000 euʹrred da vuäzzla 1 500 euʹrred.

Sääʹm äimmõs-suåvtõõzz tuâjjan lij uʹvdded ceälkkmõõžžid äimmõspolitiikk plaanin sääʹmkulttuur õõuʹdeem peäʹlnn da tõt vuäitt tuejjeed še jeeʹres äimmõsmuttsa di sääʹm kulttuuʹre da vuõiggâdvuõđid kuulli teâttvuâđ puuʹtʼtummuž kuõskki tuâjaid. Sääʹm äimmõs-suåvtõs meäʹrrad såbbrines da tooiʹmstes jiõččnes äimmõslääʹjj da riikksuåvtõõzz asetõõzz vuâđald. Orgaan toiʹmmjemvueʹjjest ij leäkku ääiʹjab šõddâm teâtt.

Sääʹm äimmõs-suåvtõõzz vuâđđummuž siâzztõʹlleš eeʹjj 2021 Lääʹdd aarktlaž politiikk strategiast. Sääʹm äimmõs-suåvtõõzz vuâđđummuž eʹtǩǩeeš še SAAMI – Säʹmmlai šiõttlõõvvmõš äimmõsmuttsa -haʹŋǩǩõõzz lopprapoortâst. Äimmõsmuuttâs lij čiõlggsânji aiccâmnalla säʹmmlai dommvuuʹdest.

Sääʹmteeʹǧǧ vaalpââʹj kõskksaž täävtõs teâuddai

Säʹmmlai äʹrbbvuõđlaž jieʹllemvuõʹjji tuärjjummuš äimmõsmuttsa šiõttlõõvvmõõžžâst pukin naaʹlin lij kõskksaž Sääʹmteeʹǧǧ vaalpââʹj 2020–2023 täävtõsân.

– Sääʹm äimmõs-suåvtõõzz vuâđđummuš lij leämmaž Sääʹmteeʹǧǧ vaalpââʹj õõuʹdmõs täävtõsân.  Muʹnne lij jõnn rämm, što vueiʹttep ååʹn raukkâd säʹmmlain nõõmeemeʹtǩǩõõzzid äimmõs-suåvtõʹsse, tuâtt sääʹmteeʹǧǧ saaǥǥjååʹđteei Tuomas Aslak Juuso.

Peäʹlstes äimmõs-suåvtõs lij vueʹǩǩ vaʹstteed äimmõsmuttâz sääʹmkulttuuʹre puʹhttem vaʹǯǯtõõzzid. Tät ođđ orgaan ravsmâtt säʹmmlai vuässadvuõđ Lääʹdd äimmõspolitiikkâst, ceälkk vs. pirrõspiisar Tiina Lovisa Solbär.

Sääʹmteʹǧǧ nåårr puättam eʹtǩǩõõzzi vuâđald nõõmeemeʹtǩǩõõzzâs sääʹm äʹrbbvuõđlaž teâđ vaaldšeeʹjen. Täävtõsân lij, što sääʹm äimmõs-suåvtõõzz šiõtteʹčeš vuõssmõs neellj eeʹjj pââjas  ǩieʹzz 2023 äiʹǧǧen. Vuäzzlai siltteem da tuâkkaz peäʹlnn põõrǥât määŋgpeällsaž di tääʹssteäddsaž norrõʹsse. Säʹmmlai dommvuuʹd juõʹǩǩ kååʹddest âlgg leeʹd ooʹccmõsân õhtt eeʹttkõʹstti.

Sääʹm äimmõs-suåvtõõzz vuäzzlai ooccâm aaʹlji | Pirrõsministeria

Lââʹssteâđ:

Tuomas Aslak Juuso
Saaǥǥjååʹđteei
40 687 3 394
tuomas.juuso@samediggi.fi 

Tiina Lovisa Solbär
vs. pirrõspiisar
50 5 999 725
tiinalovisa.solbaer@samediggi.fi

Snimldõk: Ville Fofonoff