Eennâm- já meccituáluminister Sari Essayah kollij lávurduv 23.9.2023 Anarist já Ucjuuvâst uáppáásmin äigikyevdilis kuálástemaššijd. Sämitige ovdâsteijeeh savâstâllii ministerijn teivâdmist Sajosist ei. Tiänu kuálástemnjuolgâdusâst, ruošâluosâst já kuálástemlaavâ nubástustáárbuin sämmilij uáinust.

Kove: Sämitigge / Niina Siivikko.

– Mun lam ilolâš tast, ete vuárusavâstâllâm ministerijn lii álgám tállân haldâttâspaje aalgâst, já ete sun lii lamaš ovdâmerkkân ruošâluosâääšist aktiivlâš. Tággáár positiivlâš savâstâllâm já oovtâstpargo sämmilijguin lii čallum meid Orpo haldâttâsohjelmân, muštâl saavâjođetteijee Tuomas Aslak Juuso. – Lâi tehálâš, ete mij ožžuim Tiänun lohtâseijee äigikyevdilis aašij lasseen pajediđ oovdân meid eres teemaid, moh lohtâseh sämmilij kuálástemvuoigâdvuođáid já oovtviärdásâšvuotân, juátká Juuso.

Tiänu kuálástemnjuolgâdus já ruošâluosâ lasseen meid eres kuálástemaašijd oovdâst

Savâstâlâim ennuv eromâšávt Taažáin ráđádâllum Tiänu kuálástemnjuolgâdusâst já ton čuolmâsoojijn. Sämitige ovdâsteijeeh muštottii, ete sämmilij vuoigâdvuođah já luosâ suojâlem iä lah nubijdis vuástáluvâi orroo mittomereh.

– Tiänu kuálástemnjuolgâdushammiittâs lii ollásávt feilim, ige tom koolgâ vuáláčäälliđ. Ton sajan kolgâččii ráđádâllâđ tom ollásávt uđđâsist tienuuvt, ete tot kunnijât sämmilij vuáđulavâlijd vuoigâdvuođâid, väldimáin huámmášumán majemui aaigij riehtivuáháduv linjiimijd, pááhud I värisaavâjođetteijee Anni Koivisto.

Oovtâst suogârdii meid, ete maht puávtáččii visásmittiđ, ete páihálii tääsist puávtáččii puátteevuođâst meid ávhástâllâđ ruošâluosáin tuástumtooimâi lasseen. Tiänu-olesvuođâ lasseen Sämitigge pajedij oovdân uđâsmittemtáárbuid meid Vuáču sämmilij já Njiävđámjuuvâ kuálástemnjuolgâdus uásild.

– Vuáču sämmilij kuálástemvuoigâdvuođâi tile lii uáli epitäsiárvusâš já váátá rievdâdmijd. Forgâpalij ličij äigikyevdilis meid ráđádâllâđ uđđâsist Njiävđámjuuvâ kuálástemsopâmušâst Taažáin, muštâl II värisaavâjođetteijee Leo Aikio.

Sämitiggeest teivâdmân uásálistii saavâjođetteijei lasseen stiivrâ jesâneh Veikko Feodoroff já Anne Nuorgâm, iäláttâs- já vuoigâdvuotâlävdikode saavâjođetteijee Asko Länsman sehe saavâjođetteijee išedeijee Niina Siivikko. Minister Essayah fáárust lijjii pivdotuáluräđiolmooš Vesa Ruusila sehe sierânâsišedeijee Sonja Falk.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi

Anni Koivisto
I värisaavâjođetteijee
040 415 5969
anni.koivisto@samediggi.fi

Leo Aikio
II värisaavâjođetteijee
040 621 6505
leo.aikio@samediggi.fi

Iävtuttum Tiänujuuvâ kuálástemnjuolgâdus luávkkáá sämmiláid vuáđulaavâst torvejum vuoigâdvuođâid nuuvt merhâšittee vuovijn, ete ton ij koolgâ vuáláčäälliđ.  Sämitigge iävtut, ete kuálástemnjuolgâdus ráđádâlloo uđđâsist.  Sämitigge haldâttâs meridij Tiänu kuálástemnjuolgâdusân kyeskee ciälkkámušâst 5.9.2023.

Ciälkkámušâst leijee Tiänu kuálástemnjuolgâdushammiittâs luávkkáá sämikulttuur syeje, sämmilij omâdâhsyeje sehe jiešmeridemvuoigâdvuođâ.  Hammiittâsâst ij meiddei lah sämmilij rijjâ, tiätun vuáđuduvvee ovdâmiettâm.  Sämitige mieldi kuálástemnjuolgâdusâst kalga ráđádâllâđ uđđâsist.

– Statârääđi adelij ráđádâllâmkode asâttem ohtâvuođâst ciälkkámuš, mii tiäduttij luosânaalij iällám turvâstem sehe sämmilij vuoigâdvuođâi ovdedem.  Sämmilij vuoigâdvuođah láá kuittâg hilgom kuálástemnjuolgâdushammiittâsâst, ijge Sämitigge pyevti tuhhiittiđ njuolgâdus taan häämist, iätá Sämitige saavâjođetteijee Tuomas Aslak Juuso.

Kuálástemnjuolgâdushammiittâs iästá keevâtlávt Tiänu kuávlu sämmilij vuoigâdvuođâ hárjuttiđ ärbivuáválâš kuálástem Tiänu čácáduvvâst.  Njuolgâdus ucceed merhâšittee vuovvijn sämikielâ luándulâš kevttimpirrâs já uhked uásild kiävhudittiđ sämikielâ luosâpiivdon lohtâseijee terminologia sehe tom mield sirdâšuvvee ärbivuáválâš tiäđu.

Hammiittâsâst ij lah valdum huámmášumán vorâs riehtivuáháduv já vuáđulaavâ

Kuálástemnjuolgâdushammiittâsâst ij lah tuárvi valdum huámmášumán algâaalmug sämmilij vuáđu- já olmoošvuoigâdvuođâid, ijge taid lohtâseijee vuáđulahâváljukode uáivilijd.  Njuolgâdusâst ij meiddei lah valdum huámmášumán majemušáigásâš riehtivuáháduvvâst porgum linjiimijd sämmilij kuálástemvuoigâdvuođâin já sämikulttuur hárjuttem syejeest Tiänujuuvâ čácáduvvâst.

Alemus riehti lii ive 2022 adelâm ovdâmeridemijn  (AR:2022:25 já AR:2022:26) kuáđđám heiviithánnáá kuálástem Tiänujuuvâ čácáduvvâst kyeskee asâttâsâid vuáđulaavâ vuástásâžžân. Njuolgâdusâin teikkâ tom valmâštâllâm ohtâvuođâst ij lah iävtuttum vuáđustâsâid toos, ete ääših láá čovdum kuálástemnjuolgâdusâst nubenáál ko alemus rievti čuávduseh väätih.

– Lii čielgâs, ete vuáđulaavâ já vorâs riehtivuáháduv huámmášumettáá kyeđđim kuálástemnjuolgâdusâst tuálvu toos, ete maaŋgah njuolgâdus raijiittâsah láá sämmilij uásild pehtilettummeh, tane toh láá vuáđulaavâ vuástásiih.  Tággáár hiäjus tääsi valmâštâllâm ij lah kiängin uásipele hiätu, juátká Sämitige I värisaavâjođetteijee Anni Koivisto.

Eennâm- já meccituáluministeriö táátui Sämitiggeest ciälkkámuš hammiittâsâst Suomâ já Taažâ koskâsâš Tiänujuuvâ čácáduv kuálástemnjuolgâdusâst já tom vuáláčälimist.  Kuálástemnjuolgâdus lii ive 2007 čonnum Tiänu kuálástemsopâmuš lahtos, moin stivriđ kuálástem Tiänujuuvâst, já mon peividuvvojeh 5–7 ive ääigi.

Ive 2023 ääigi Sämitigge já Tiänu kyelituálukuávlu iä innig uásálistám kuálástemnjuolgâdusân kyeskee ráđádâlmáid, tastko keččii ráđádâllâmiävtui epiluhostum Taažâ staatâ iävtuttes luosâkiälduvátámuš tiet.

• Luuvâ ciälkkámuš tääbbin suomâkielân.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi

Anni Koivisto
I värisaavâjođetteijee
040 415 5969
anni.koivisto@samediggi.fi

Sarita Kämäräinen
Iäláttâs- já pirâslahâčällee
040 186 7258
sarita.kamarainen@samediggi.fi

Kove: Hans Pieski

Sämitigge lii ráđádâlškuáttám eennâm- já meccituáluministeriöin puásuivaahâglaavâ olášuttem miäldásii valmâštâlmist. Sämitige mield kuáttumtile peeleest spiekâstâhlii puásuituáluive 2021-2022 tile tiävdá kriterijd, moh láá asâttum lahâaasâtmist sajanmáávsu vuáđustâssân.  

– Sämitigge váátá, ete puásuivaahâglaavâ miäldásiih sajanmáávsuh puásuituáluive 2021-2022 šoddâm vahâgijn máksojeh vuoigâlávt toid puásuituálleid, kiäh láá killám vaahâg – meid tagarijn palgâsijn, main lii lamaš lijgeloho. Taam uáinu tuárju Tave-Suomâ haldâttâhrievti vorâs čuávdus komettiđ IJP-kuávdáá miärádâsâid hilgođ puásuivaahâglaavâ miäldásij vahâgij sajanmáksu-ucâmušâid Näkkäl palgâs puásuituállei uásild täälvi 2019-2020 hiävuin, paahud Sämitige saavâjođetteijee Tuomas Aslak Juuso. 

Puásuituáluive 2021-2022 sämmilij päikkikuávlu puásuituálleeh kuáhtájii uánihis ääigi siste jo nube spiekâstâhlávt hästee täälvi. Kuáttumtileh šoddii maaŋgâin kuávlu palgâsijn eromâš vaigâdin jo čohčâtäälvi 2021 eennâm oolâ jiäŋŋum muotâkeerdi já kuáppum kuátumij tiet.  

Eennâm- já meccituáluministeriö almottij njuhčâmáánu aalgâst 2022, ete Luánduriggodâhkuávdáš (Luke) ráhtá čielgiittâs täälvi 2021-2022 tiileest puásuituálukuávlust, ton maŋa, ko vittâ sämmilij päikkikuávlu paalgâs lijjii toohâm tiättunadelem eennâm- já meccituáluministeriön spiekâstâhlijn muotâ- já luándutiilijn. Meid Sämitigge ráđádâlâi ministeriöin ääši ooleest, já táátui ávus reiváin tallaa eennâm- já meccituáluminister Leppä algâttiđ puásuivaahâglaavâ miäldásii monâttâllâm puásuihiävui muuneeld estim várás.   

Luke pahudij čielgiittâsâstis, ete muottuu korrâ já jiäŋŋum vuáđukerdi sehe kuávlu šadoi ollâ kuopâmiirhâi tääsi tovâttii vädis kuáttumtiilijd uásist puásuituálukuávlu tälviv 2021-2022. Čielgiittâsâst árvuštâllii, ete spiekâstâhliih kuáttumtileh ulâttii ohtsis 19 palgâs kuávlun. Kuávlu ana sistees vijđes vijđoduv sämmilij päikkikuávlu palgâsijn sehe eromâšávt puásuituálun väridum kuávlust. Toos lasseen taid 19 palgâs kuávlust hoittájeh paijeel pele oles puásuituálukuávlu poccuin. 

Spiekâstmáin ovdebáá tovveest ko puásuivaahâglaahâ heiviittui, Luke čielgiittâs tievâsmittui kieldâi eennâmkuávluvirgeomâhái toohâm tarkkuumijguin. Sämitige finnim tiäđui mield táttum tarkkuumij aalgâtmân poođij kieldáid Laapi IJP-kuávdáást eskân njuhčâmáánu loopâst ive 2022, já tarkkuumeh sehe čáittusij nuurrâm tahhojii eskân tast maŋa. 

Sämitige já eennâm- já meccituáluministeriö koskâsijd Sämitiggelaavâ 9 § miäldásijd ráđádâlmijd puásuituálu vahâgij sajanmäksimist adelum laavâ (987/2011),  ađai nk. puásuivaahâglaavâ miäldásij sajanmáávsui mäksimist algâttii vyesimáánust 2023. Ráđádâlmeh juátkojii porgemáánust 2023, ko lijjii finnim puoh tárbulii tiäđu vahâgij vijđesvuođâ já sajanmávssoid tárbulii meriruuđâ árvuštâllâm várás. 

• Sämitige tiäđáttâs 28.2.2022
• Täälvi 2021–2022 muotâ- já kuáivumtile já toi vaikuttâsah puásuituálun, Luke 2022

Lasetiäđuh: 

Tuomas Aslak juuso 
Saavâjođetteijee  
040 687 3394
tuomas.juuso@samediggi.fi  

Laura Olsén-Ljetoff 
Iäláttâsčällee 
010 839 3123 / 040 617 5113 
laura.olsen-ljetoff@samediggi.fi  

Säämi šoŋŋâdâhrääđi asâttuvvoo tuárjuđ sämmilij ärbivuáválâš tiäđu huámmášumán väldim šoŋŋâdâhpolitiikân lohtâseijee miärádâstoohâmist. Säämi šoŋŋâdâhrääđist lii saavâjođetteijee, värisaavâjođetteijee já enâmustáá love jesânid. Ucemustáá pele jesânijn ferttejeh leđe säämi ärbivuáválâš tiäđu haldâšeijeeh. Sämitigge valmâštâl iävtuttâs šoŋŋâdâhrääđi jesânijn säämi ärbivuáválâš tiäđu haldâšeijei uásild.

Sämitigge táttu sämisiärváduvvâst iävtuttâsâid säämi ärbivuáválâš tiäđu haldâšeijein säämi šoŋŋâdâhrááđán. Iävtuttâsâid mij táttup nuuvt maaŋgâsyergilávt ko máhđulâš jieškote-uv sämiiäláttâsâi já -kulttuur mättein, jieškote-uv ahejuávhui já suhâpeelij ovdâsteijein, tavesämikielâ, nuorttâsämikielâ já aanaarsämikielâ kielâkuávluin sämmilij päikkikuávlu jieškote-uv oosijn. Puáhtá iävtuttiđ eenâb ko oovtâ ulmuu. Nomâttemiävtuttâs kalga agâstâllâđ.

Nomâttemiävtuttâsâid táttup majemustáá 21.5.2023 šleđgâpoostâ peht info@samediggi.fi teikkâ poostâ peht Saamelaiskäräjät, Sajos, 99870 Inari. Iävtuttâsâst ferttee leđe iävtutteijee jieijâs nommâ sehe iävtuttum ulmuu ohtâvuođâtiäđuh já tiätu suu njálmálâš mietâmist iävtukkâsân.

Säämi šoŋŋâdâhrääđi

Säämi šoŋŋâdâhrääđi lii jiečânâs äššitobdeeorgaan, mast kalgeh leđe ovdâstum säämi ärbivuáválâš tiäđu haldâšeijeeh sehe ovdâstem kuávdáš tieđâsuorgijn. Säämi šoŋŋâdâhrääđist asâttuvvoo uđđâ šoŋŋâdâhlaavâ (423/2022) 21 §:st  já laavâ vuáđuld adelum asâttâsâst (435/2023).  Statârääđi aasât säämi šoŋŋâdâhrääđi saavâjođetteijee já jesânijd neelji ihán häävild.  Jesânin puáhtá toimâđ enâmustáá kyehti toimâpaje maŋaluvâi. Säämi šoŋŋâdâhrääđi jesânáid máksojeh ihepälkki.  Saavâjođetteijee pälkki lii 5 000 eurod, värisaavâjođetteijee 3 000 eurod já jeessân 1 500 eurod.

Säämi šoŋŋâdâhrääđi pargon lii adeliđ ciälkkámušâid šoŋŋâdâhpolitiik vuáváámijn sämikulttuur ovdedem uásild já tot puáhtá porgâđ eres-uv šoŋŋâdâhnubástusân sehe sämikulttuurân já vuoigâdvuođáid lohtâseijee tiätuvuáđu pyevtittem kyeskee pargoid. Säämi šoŋŋâdâhrääđi meerrid sii čuákkimijn já rääđi tooimâst jiešráđálávt šoŋŋâdâhlaavâ já statârääđi asâttâs vuáđuld.  Orgaan keevâtlâš tooimâst ij lah oovdeb feerim.

Säämi šoŋŋâdâhrääđi vuáđudem avžuuttuvvojii ive 2021 Suomâ arktâsâš politiik strategiast. Säämi šoŋŋâdâhrääđi vuáđudem lii iävtuttum meid SAAMI – Sämmilij vuáhádum šoŋŋâdâhnubástusân -haavâ loppâraportist. Šoŋŋâdâhnubástus lii čielgâsávt aiccâmist sämmilij päikkikuávlust.

Sämitige valjâpaje kuávdášlâš ulme olášuvá

Sämmilij ärbivuáválâš iäláttâsâi tuárjum šoŋŋâdâhnubástusân vuáháduumeest puoh vuovijguin lii kuávdášlâš Sämitige valjâpaje 2023-2023 ulme. 

– Säämi šoŋŋâdâhrääđi vuáđudem lii lamaš Sämitige valjâpaje njunošulme. Ilodâm čuuvtij, ete mij pyehtip tääl táttuđ sämmilijn nomâttemiävtuttâsâid šoŋŋâdâhrááđán, paahud Sämitige saavâjođetteijee Tuomas Aslak Juuso.

– Uásild šoŋŋâdâhrääđi lii vyehi västidiđ šoŋŋâdâhnubástus sämikulttuurân tahhee hástoid. Taat uđđâ orgaan naanood sämmilij uásálâšvuođâ Suomâ šoŋŋâdâhpolitiikâst, iätá vs. pirâsčällee TIina Lovisa Solbär.

Sämitigge čuákkee nomâttemiävtuttâsâid säämi ärbivuáválâš tiäđu haldâšeijen puáttám iävtuttâsâi vuáđuld. Ulmen lii, ete säämi šoŋŋâdâhrääđi asâttuvvoo vuosmuš neelji ive pajan keesi 2023 ääigi.  Jesânij máátu já tuáváá uásild viggâp maaŋgâpiälálâš sehe täsitiädulâš čuákánpieijâmân. Jyehi sämmilij päikkikuávlu kieldâst kalga leđe ucemustáá ohtâ ovdâsteijee.

Sämmilii šoŋŋâdâhrääđi jesânij uuccâm aalgij | Pirâsministeriö

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi

Tiina Lovisa Solbär
vs. pirâsčällee
050 5999 725
tiinalovisa.solbaer@samediggi.fi

Kove: Ville Fofonoff