Sámediggi sávvá ráfálaš juovllaid ja lihkolaš ođđa jagi 2023!
Sämitigge tuáivut rávhálijd juovlâid já luholii uđđâ ive 2023!
Sääʹmteʹǧǧ tuäivat rääuhlõs rosttvid da leklvaž ođđ eeʹjj 2023!
Saamelaiskäräjät toivottaa rauhallista joulua ja onnellista uutta vuotta 2023!
Season’s Greetings!
Sámedikki telefonguovddáš lea gitta 23.–30.12.2022. Hohpolaš áššiin váldibehtet oktavuođa info@samediggi.fi
Uʹcc ǩeerja (Unna girjjážat) –nuortalašgielat digigirjeráidu lea almmustahtton davvi- ja anárašsámegillii. Girjjážat láidejit dábálaš sámegiela sániide, nu mo johtinvearbbaide ja ivnniide, biktasiidda ja borramušsániide. Girjjážat ovddidit seammás giellaoahppaáššiid ja lohkama oahpaheami. Girjjážiin leat guokte oasi, stávvalaston ja stávvalkeahtes oassi. Dán lassin lea juohke temái gullevaš hárjehusgirji.
Uʹcc ǩeerja -digigirjjážiid ráidu lea riegádan Čeavetjávrri skuvlla nuortalašgiela oahpaheaddji Maria Porsanger evttohusas.
Girjjážiid lea čállán ja govuhan Esther Berelowitsch, guhte bargá Sámedikki oahppomateriálaprošeaktabargin. Arla Magga lea jorgalan girjjiid davvisámegillii, ja Laura Ylinampa anárašgillii.
Uʹccǩeerja -bargojovkui gullet Maria Porsanger, Raija Lehtola, Tiina Sanila-Aikio, Anna-Katariina Feodoroff, Petra Kuuva, Heli Aikio ja Aura Pieski. Digigirjjáža teknihkalaš ollašuhttimis leaba vástidan Unni Länsman ja Esther Berelowitsch.
Ráidu ain dievasmahtto boahtte jagi.
Girjjiid lea almmustahttán Sámedikki skuvlen- ja oahppomateriáladoaimmahat.
Esther Berelowitsch
Nuortalašgielat oahppomateriála prošeaktabargi
esther.berelowitsch@samediggi.fi
Ohcan jagi 2023 sámediggeválggaid válgalogahallamii nohká 31.12.2022 ovdal dmu 16. Ohcanskovi sáhttá máhcahit elektrovnnalaččat, poastta fáro dahje njuolgga Sámedikki válgalávdegotti doaimmahahkii. Skoviid ferte máhcahit válgalávdegotti doaimmahahkii 31.12.2022 ovdal dmu 16.00.
Válggaid áigetávval ja ohcanskovit gávdnojit čujuhusas: https://www.samediggi.fi/valggat-2023/?lang=dav.
Lassedieđuid ohcama várás sáhttá jearrat telefovnna dahje suddjejuvvon šleađgapoastta bokte.
Anáris 20.12.2022
Sámedikki válgalávdegoddi
Sámekulturguovddaš Sajos
Menesjärventie 2A
99870 INARI
010 839 3155
Suddjejuvvon šleađgapoasta: https://secmail.com/send/vMJaNprX, vuostáiváldi: vaalit@samediggi.fi
Suoma Sámediggi ja Deanu guolledoalloguovlu geassádit Deanu bivdonjuolggadusráđđádallamiin danin go ráđđádallamat leat bisánan Norgga eiseválddiid čavga gáibádussii gieldit luossabivddu Deanus álfárot boahtte bivdonjuolggadusas, mii livččii fámus 5 – 7 jagi. Eavttut ráđđádallamiid joatkimii eai gávdno šat.
Deanu guolledoalloguovlu lea juo mearridan ráđđádallamiin geassádeamis. Suoma Sámediggi doarju Deanu guolledoalloguovllu mearrádusa ja Sámedikki stivra gieđahallá ášši stivrra boahtte vahku čoahkkimis Deanu ráđđádallanjoavkku Sámedikki ovddasteaddjiid evttohusa vuođul.
Suoma Sámediggi ja Deanu guolledoalloguovlu oidnet, ahte Norgga eiseválddiid ovddasteaddjit leat vuodján ráđđádallamiid gárgo ala go eai sáhte miehtat sámiid unnánašge luossabivdui Deanus eaige čuovo riikkaidgaskasaš mearravuoigatvuođašiehtadusa gođđuriikaprinsihpa.
– Lea áddetmeahttun mo Norga suovvá Deanu luossanáliid bivddu iežas riddoguovlluin seammás go dat gáibida luossabivddu gieldima Deanus, dadjá Deanu guolledoalloguovllu stivrra ságadoalli Mika Aikio.
Suoma stáhtaráđđi ásahii Deanu bivdonjuolggadusa Suoma ráđđádallanjoavkku miessemánus 2020 ja attii ráđđádallamiidda guokte váldomihttomeari: Deanu luossanáliid ealáskahttima ja sápmelaččaid vuoigatvuođaid ollašuvvama ovddideami. Maiddái Norgga ráđđehus celkkii ovdal ráđđádallamiid mihttomearrin sámiid vuoigatvuođaid nannema.
– Suoma eanan- ja meahccedoalloministeriija ja eará ministeriijaid ovddasteaddjit leat ráđđádallamiin bealuštan sámiid ja eará bivdovuoigatvuođaid hálddašeaddjiid vuoigatvuođaid ja almmuhan, ahte eai sáhte dohkkehit evttohuvvon bivdonjuolggadusa danin go dat livččii Suoma vuođđolága vuostá. Leage oalle váidalahtti, ahte Norgga eiseválddiin ráđđádallamiid vuolggasajit orrot vajálduvvan, dadjá Suoma Sámedikki II várreságadoalli Leo Aikio.
Suomas Sámediggi ja Deanu guolledoalloguovlu galget almmuhit eana- ja meahccedoalloministeriija bokti stáhtaráđđái geassádeamis ja bivdit earu mieđiheami iežaset ovddasteaddjiide Suoma ráđđádallanjoavkkus. Norgga beale Deanu guolástanhálddahusa stivra gieđahallá ášši ođđajagimánus.
Leo Aikio
II várreságadoalli
040 621 6505
leo.aikio@samediggi.fi
Mika Aikio
Deanu guolledoalloguovllu stivrra jođiheaddji
0400 558 391
micka50@hotmail.com
Govva: Hans Pieski
Leat go gazzame oahpu dahje aitto gárven oahpu dáidda-, animašuvdna-, gráfalaš- dahje filbmasuorggis? Walt Disney Animation Studios bovdejit sámi oahpahalli ohcat sin oahpahalliprográmmii, mii álgá miessemánus 2023.Taleanttaid ovdánahttinoahpahallin oaččut erenomáš vejolašvuođa bargat ovttas Disney-bagadeddjiin ja guorahallat buot beliid dáidda-, muitalushábmen- ja filbmasuorggis.
Walt Disney Animation Studios Summer Internship Program bistá 10 vahku, ja dat lea máksojuvvon prográmma, mii lea heivehuvvon sidjiide, geat lohket dáidaga, animašuvnna, dihtorgrafihka ja filbmasuorggi. Loga eambbo sin oahpahalliprográmma ja eavttuid birra dás:
Ohcanáigemearri WDAS oahpahallin: 15.01.2023, 11:59 PM Pacific Standard Time (Fuomáš áigeerohusa).
Oahpahalli galgá ohcat 10.000 $ sturrosaš mátkestipeandda, man Sámiráđđi ja Sámedikkit almmuhit dán oktavuođas. Ohccis galgá leat sámi duogáš, son galgá deavdit WDAS eavttuid oahpahallái ja sus galgá leat plána das mo son áigu máhcahit gelbbolašvuođa ruovttoluotta sámi servodahkii, nu go omd. sosiála mediaid bokte, logaldallamiid bokte jnv.
Čális eanemustá 1 siiddu guhkkosaš ohcamuša, mas čilget man vuođul ozat oahpahallin ja mo áiggut čoavdit mátkestipeandda eavttuid.
Sádde ohcamuša dán čujuhussii ja merke ohcamuša “WDAS oahpahalli”: kmr@saamicouncil.net. Mátkestipeandda ohcanáigemearri: 15.01.2023, 11:59 PM Pacific Standard Time (Fuomaš áigeerohusa).
Christina Hætta, Sámiráđđi
+47 48021734
christina@saamicouncil.net
Anára ja Mátta-Várjjaga gielddat álggahit nuortalašgiela ja -kultuvrra ealáskahttima ovdaprošeavtta. Prošektii juolluduvvui ruhtadeapmi Interreg Aurora -prográmma Sápmi-oasis prográmmabaji 2021-2027 vuosttas ohcamis. Prošeavtta álbmotlaš stáhta ruhtadanoassi Norggas boahtá Sámedikkis ja Romssa ja Finnmárkku fylkkain ja Suomas Lappi lihtus. Interreg Aurora 2021-2027 lea ođđa prográmma Eurohpá Interreg-servoša rájáid rasttildeaddji barggu várás ja dan Sápmi-oassi gokčá Sámeguovlluid Norggas, Suomas ja Ruoŧas. Prošeavtta leat leamašan mielde plánemin ee. Nuortalaškulturfoandda ovddasteaddjit ja Sámedikki giellaáššedovdit.
Sámedikki ságajođiheaddji Gáijjot Ánte Issáha Duommá dahjege Tuomas Aslak Juuso mielas prošeakta lea dehálaš ja son lohká: “Illudan go prošeakta ollašuvvá. Prošeakta lea duođaid dehálaš danin go dat ealáskahttá ja nanne nuortalašgiela ja -kultuvrra dakkár ovttasbargguin, mii dáhpáhuvvá rastá rájáid. Prošeakta veahkeha ovddidit maiddái Sámedikki Giellapolitihkalaš doaibma- ja ovddidanprográmmas 2020-2023 nammaduvvon joksanmeari čielggadit vejolašvuođaid vuođđudit giellaguovddážiid erenomážit daid guovlluide, main giellaealáskahttin dárbbašuvvo, degomat nuortalašgiela hállanguovlluin.”
Maiddái Sámedikki giellaráđi ságajođiheaddji Tauno Ljetoff illuda ođđasis: “ Lea hui fiinna ášši ahte nuortalaš giella- ja kulturguovddáža ovdačielggadanprošektii lea mieđihuvvon ruhtadeapmi. Dát lea buorre ovdamearka das mo EU ja Interreg ruhtadeapmi sáhttá doarjut nuortalaškultuvrra ja áitatvuloš nuortalašgiela ealáskahttima ja čájeha dan, ahte maiddái áitojuvvon unnitlogugielaid atnet árvvus. Nuortalašgiela ja -kultuvrra ealáskahttin lea lunddolaš stáhta rájáid rasttildeaddji ovttasbargu. Sávan, ahte nuortalaččat sihke Anára ja Mátta-Várjjaga gielddain oassálastet stuorra joavkkuin ovdačielggadanprošeavtta čoahkkimiidda vai servoša oainnut ja dárbbut boađášedje ovdan.”
Prošeakta lea jođus 15.1.-15.7.2023 ja ovdaprošeavtta áigge plánejuvvo ieš máŋggajagáš váldoprošeakta nuortalaš giella- ja kulturguovddáža duohtan dahkama várás. Prošeavtta áigge gullat viidát nuortalaš álbmoga oainnuid ja dárbbuid sihke Norgga ja Suoma bealde.
Tuomas Aslak Juuso
Ságajođiheaddji
040 687 3394
tuomas.juuso(at)samediggi.fi
Marko Marjomaa
Sámi giellaáššiid čálli
050 438 2484 / 010 839 3183
marko.marjomaa(at)samediggi.fi
Govva: Ville Fofonoff
BOVDEHUS
Oassálastindilálašvuhtii 12.1.2023 álggedettiin dmu 14.
Báiki: Duottar-Sámi Luondduguovddáš, Heahttá (Peuratie 15)
Dilálašvuođa fáddán lea: Sámegiela ja –kultuvrra vuhtii váldin Bállás-Ylläsduoddara álbmotmeahci dikšuma ja geavaheami plánemis.
Dilálašvuođa ordnejit Meahciráđđehus ja Sámediggi.
Suoma Sámediggi lea jagi 2022 áigge fállan davvisámegiela-, anáraš- ja nuortalašgiela giellarávvenbálvalusa ja dál almmuhit ahte giellarávvenbálvalusat Suoma Sámedikki bokte nohket jagi 2022 loahpa radjái. Giellabargit leat dán jagi dahkan giellarávvenbargguid sámegiela doaimmahagas ja válmmaštallan earret eará tearbmalisttuid ja bargan giellagáhttema. Gaskaboddosaš giellarávvenbargguin Suoma Sámediggi lea hálidan dorvvastit sámegielaid giellabarggu dan botta go Sámi Giellagáldu ásahanproseassa lea leamaš gaskan.
Sámedikki guhkit áiggi ulbmilin lea leamaš oažžut bistevaš Sámi Giellagáldu doaimma johtui ja sirdit dakkár giellabargguid, nu mo giellageavaheaddjiid rávvema Sámi Giellagáldui. Suoma Sámedikki ságadoalli Tuomas Aslak Juuso lea duđavaš ahte guhkes ovttasbargu lea buktán bohtosiid:
– Suoma Sámediggi hálida giitit Norgga ja Ruoŧa Sámedikkiid ovttasbarggus dán radjái ja illuda go ruhtadeapmi ja oktasaš čoavddus lea boahtán dál sadjái ja fásta Sámi Giellagáldu ásahanproseassa lea dál jođus.
Suoma Sámediggi gávnnaha ahte gažaldaga giellabarggu ordnemis leat geahččalan čoavdit guhká ja gielladorvočálli Anne Kirste Aikio muitala ahte proseassa lea leamaš mohkkái:
– Ii leat álki ásahit oktasaš sámi institušuvnna ja mii leat deaividan hui máŋggalágan čuolmmaid barggus. Leat gávnnahan ahte mis leat ollu rádjehehttehusat vel, mat sáhttet caggat dakkár miehtá sámi ásahusa barggu. Leat goittotge dehálaš, ahte riikkaráját eai galgga váikkuhit min sámegielaide ja ahte oktasaš giellabargu sámegielaid buorrin beassá joatkašuvvat.
Boahtteáiggis Norgga, Suoma ja Ruoŧa Sámedikkiid oktasaččat ruhtadan Sámi Giellagáldu vástida giellabarggus. Sámi Giellagáldu lea iehčanas ásahus, mii doaibmá hálddahuslaččat Norgga Sámedikki oktavuođas. Sámi Giellagáldu doaimma jođiha stivra, masa buot golbma Sámedikki leat nammadan lahtuid ja stivrrajođiheaddjin doaibma Suoma Sámedikki nammadan lahttu Tauno Ljetoff.
Anne Kirste Aikio, gielladorvočálli
anne-kirste.aikio@samediggi.fi
010 839 3124 / 040 707 5626
Sámedikki telefonguovddáš lea gitta 14.12.2022 bargiid virkkosmahttinbeaivve dihtii.
Govva: Ville Fofonoff