Sámekulturguovddážiid doaimma galgá sihkkarastit

/in , , /by

Sámediggi doarjala oahpahus- ja kulturministeriijai ovttaveardásaš ja olahahtti sámekultuvrra ovddideami dihtii. Sámeservoša buresveadjimii hui dehálaš kulturguovddážiid doaimma ruhtadeami galgá sihkkarastit, vuoi sámiid kulturbálvalusat livčče eallinfámolaččat ja buohkaid olámuttos.

Mánáidkulturguovddáš Mánnu oassálastá sámedáhpáhusaid ordnemii nu ahte buvttada prográmmasisdoaluid mánáide ja nuoraide. Govva: Petra Magga-Vars.

Sámedikki vuollásažžan doaibmi guovddážiin lea stuorra mearkkašupmi ealli sámekultuvrra ja sámeservoša buresveadjima ovddideamis. Filbmaguovddáš Skábma, mánáidkulturguovddáš Mánnu ja Sámemusihkkaguovddáš leat dorjon sihke sámiid kulturidentitehta ja maiddái lasihan sámedáidagiid oidnoma. Dát doaimmat leat mearkkašan olu erenomážit sámemánáide ja – nuoraide, nu sámeguovllus go dan olggobealdege.

-Jos eat oaččo doarvái ruhtadeami, bissána ovdamearkan mánáidkulturguovddáš Mánu doaibma ollásit boahtte jagi, dasgo ruhtadeapmi reahkká dušše bargi bálkágoluide. Dalle buot fysalaš doaibma rievdá plánenbargun, mii ii leat šat jierpmálaš vuohki. Lean fuolas, ollašuvvetgo sámemánáid vuoigatvuođat, jos sidjiide ii leat giela ja kultuvrra mieldásaš iežas doaibma fállun, gávnnaha sámi mánáidkulturguovddáža guhkesáigásaš bargi Petra Magga-Vars.

Dálá ruhtadeapmi ii atte vejolašvuođa guovddážiid dievasmearálaš doibmii, eaige dat bastte almmá lasseruhtadeami haga fállat bálvalusaid ovttaveardásaččat dahje ovddidit boahttevaš bargguset. Sámediggi doarjalage oahpahus- ja kulturministeriijai, ahte guovddážiid doaibma sihkkarastošii maiddái boahttevuođas.

Duodjeakademiija álggaheapmi lea dehálaš

Dálá guovddážiid lassin lea dehálaš beassat joatkit maiddái Duodjeakademiija barggu. Eanodaga gielddain ovddiduvvon prošeavttas lea leamaš mihttomearrin nannet duddjončehppodaga ja ráhkadit ođđa bargosajiid, sihke Eanodagas ja olles Sámeguovllus.

-Sámekulturguovddážiid ja Duodjeakademiija doaimmaid sihkkarastin lea erenomáš dehálaš. Akademiija čohkken máŋggabuolvvat biras nannešii maiddái oktasašbarggu Ruoŧa ja Norgga duodječehpiiguin, lohká Sámedikki ságajođiheaddji Tuomas Aslak Juuso.

Akademiija ordnen kurssat ealáskahttet sámekultuvrra ja nannejit duddjondáiddu sirdáseami buolvvas nubbái. Ovdal ruovttus ja lagašbirrasis sirdásan dáiddut eaktudit dál doarjjan aktiivvalaš doarjjadoaimmaid. Sámedikki mihttomearrin lea oažžut Duodjeakademiija Sámedikki kulturguovddášdoaimma oassin.

Loga Sámedikki bivdaga buorebut olahahtti, dásseárvvolut sámekultuvrra ovddideami várás

Lassedieđut:

Tuomas Aslak Juuso
Ságajođiheaddji
tel. 040 687 3394
tuomas.juuso@samediggi.fi 

Doaimmajođiheaddji
Petra Biret Magga-Vars
tel. 040 7325503
petra.magga@samediggi.fi

Sámediggi almmuha ohcanláhkái Sámedikki oktavuođas doaibmi Davvi-Suoma sosiálasuorggi máhttinguovddáža sámeossodaga mearreáigásaš plánejeaddji doaimma

/in , /by

Bargu ollašuhtto oasseáigásažžan (60 %). Bargu álgá 5.1.2023 ja bistá 31.12.2024 rádjai. Sámeossodat vástida sápmelaččaid buresveadjinbálvalusaid ovddideamis, mii lea Davvi-Suoma sosiálasuorggi máhttinguovddáža riikaviidosaš sierrabargu. Plánejeaddji barggut leat meroštallon Sámedikki bargoortnegis.

Gelbbolašvuođagáibádussan lea virggi eaktudan skuvlejupmi ja lassin gáibiduvvo sámegiela máhttu (ásahus 1727/95). Doaimma ceavzilis dikšuma veahkehit heivvolaš allaskuvladutkkus, viiddes sosiálafuolahusa ja sámekultuvrra dovdamuš ja vásáhus ovddidanbarggus. Mii vuordit maiddái válmmašvuođa iehčanas bargamii, buori organiseren- ja streassagierdannávcca ja buriid ovttasbargo- ja vuorrováikkuhusdáidduid.

Bálká mearrašuvvá Sámedikki bálkávuogádaga gáibádusdási IV/II mielde (vuođđobálká 2 760,63 euro/mb). Vuođđobálkká lassin máksojuvvo 24 % sámeguovllu lassi ja bargohárjánumi mielde mearrašuvvi ahkelasit. Virgegaskavuođas čuvvojuvvo 6 mánotbaji geahččalanáigi. Ohcamušaid mildosiiguin galgá doaimmahit Sámedikki čállingoddái 25.11.2022 rádjai čujuhusas https://www.sympahr.net/public/pq.aspx?b0a127ab

Lassedieđuid barggus oažžu hálddahushoavda Pia Ruotsala-Kangasniemis tel. 010 839 3106.

Anáris 31.10.2022
Sámediggi

Evttohuvvon ruvkeminerálavearru lea menddo vuollegis dásis

/in , /by

Sámediggi lea cealkán hápmosis guoskkadin ráđđehusa evttohusa ruvkeminerálavearu guoski láhkaásaheapmin. Supmii evttohuvvo ođđa ruvkeminerálavearru, man galggašii máksit Suomas roggon ruvkeminerálain. Vearu heivehansuorgái gulašedje ruvkelágas dárkkuhuvvon ruvkeminerálat, muhto heivehansuorggi olggobeallái ráddjejuvvošedje ruvkeminerálat, mat gávdnojit golledoidimis.

Evttohusa mielde buot metállamálmmaid vearrodássi livčče giddes 0,6 proseantta oassi metállamálmma sisttisdoallan metálla vearuhusárvvus. Eará ruvkeminerálaide vearrodássi livčče giddes 0,20 euro málbmatonnas.

– Evttohuvvon ruvkeminerálavearru lea menddo vuollegis dásis.  Máilmmis metállamálmmaid árvorojálttat leat máŋggageardásaččat go veardida Supmii evttohuvvon vearrodássái. Vearroboađuin eai leat bastán ráhkadit dustema vejolaš vahágiid várás, eaige gokčat infrastruktuvrra goluid, muitala Sámedikki ságajođiheaddji Tuomas Aslak Juuso.

Sámediggi buktá ovdan cealkámušas, ahte ruvkedoaibma sámiid ruovttuguovllus ii leat sámiid perspektiivvas dohkkehahtti, iige ruvkeminerálavearru boađe lasihit doaimma dohkkehahttivuođa. Ruvkedoaibma ii heive sámiid ruovttuguovllu árktalaš ja hihtásit ođasmuvvi lundui.

– Sámediggi ii oainne vuođustusaid dasa, manin golleroggama oktavuođas gávdnon ruvkeminerálaid galggašii ráddjet ruvkeminerálavearu olggobeallái. Golleroggamis gávdnon minerálat leat seamma láhkai dakkár luondduriggodagat, maid sáhttá oktii geavahit, nugo earáge minerálaid, joatká Juuso.

Suomas mašiinnain rogget golli eanaš sámiid ruovttuguovllus, gos luondu lea rašši ja ođasmuvvá hihtásit. Golleroggan vahágahttá luonddu, čázádaga ja sámiid vejolašvuođaid bargat guovllus árbevirolaš ealáhusaiguin. Sámediggi atná govttolažžan dan, ahte nu gohčoduvvon stáhta eatnamiin golleroggit oassálastet vearumáksimii ja váldet iežaset oasis vásttu ođasmuvakeahtes luondduriggodagaid eatnamis eret váldimis.

Lassidieđut:

Tuomas Aslak Juuso
ságajođiheaddji
040 687 3394
tuomas.juuso@samediggi.fi 

Sarita Kämäräinen
ealáhus- ja birasláhkačálli
040 415 5969
sarita.kamarainen@samediggi.fi

Anárašgiella lievllaid siste, nuortalašgiella gámmáris ja davvisámegiella báđi guoras – rabas oahppodiimmut sámi giellavahku!

/in , /by

Sámegielaid gáiddusoahpahusprošeakta lágida maiddái dán jagi buohkaide rabas oahppodiimmuid sámi giellavahku 43!

Oahppodiimmuid temán lea ruoktu ja biras. Anárašgiela oahppodiibmui gullá sávdnjun ja vejolaččat gáldus stužiheapmi, nuortalašgiela diimmus oahpásnuvvat iežas latnjii ja dan suollemasvuođaide, davvisámegiela diimmus fas oahppat, mo huššat gievkkanis davvisámegillii.

Oahppodiimmuid ulbmilin lea lasihit dieđu sámegielaid birra ja seammás sámi kultuvrras. Oahppodiimmut leat oaivvilduvvon vuođđooahpahusa ohppiide ja nuppi dási studeanttaide, muhto oahppodiimmuide leat bures boahtin maiddái earát, geat leat sáhkkit oahpásnuvvat sámegielaide. Diimmuide sáhttá oassálastit guđege oahppi iešráđálaččat, dahje olles luohkká sáhttá oassálastit ovttas seammá boddui oktasaš rusttegiin. Oassálastit sáhttá maiddái máŋgga diibmui.

Oahppodiimmut dollojuvvojit Microsoft Teams bokte. Diimmut leat oktiibuot golbma, okta guđege Suomas hubmojuvvon sámegielas: nuortalaš-, anáraš- ja davvisámegielas.

Disdat 25.10. diibmu 10–10.45

Anárašgiella lievllaid siste

Oahpaheaddjin Laura Ylinampa

Oaivvilduvvon badjeskuvlii ja nuppi dássái

Oassálastinliŋka: Oassálastte čoahkkimii dán liŋkkas

Gaskavahkku 26.10. diibmu 10–10.45

Nuortalašgiella gámmáris

Oahpaheaddjin Kia Olin ja Sirkka Sanila

Oaivvilduvvon 0.–2. luohkkái

Oassálastinliŋka: Oassálastte čoahkkimii dán liŋkkas

Duorastat 27.10. diibmu 10–10.45

Davvisámegiella báđi guoras

Oahpaheaddjin Máren-Elle Länsman

Oaivvilduvvon 3.–6. luohkkái

Oassálastinliŋka: Oassálastte čoahkkimii dán liŋkkas

Diimmuid áigge lea vejolaš jearrat gažaldagaid ja ságastallat čálašanlođás (čáttas). Diimmuide ii dárbbaš almmuhit iežas ovddalgihtii. Oahppodiimmut eai báddejuvvo.

Dárkilut rávvagat das, mo searvat oahppodiimmuide dáppe.

Lassedieđut:

Hanna Helander, prošeaktahoavda
hanna.helander@edu.utsjoki.fi
040 701 2094

Arla Magga, prošeaktakoordináhtor
arla.magga@samediggi.fi
040 6875989

Lassedieđut Sámegielaid gáiddusoahpahusprošeavtta birra:

Sámegielaid gáiddusoahpahusa pilohttaprošeavtta jođiha Ohcejoga gielda ja koordinere Sámediggi. Prošeavtta mihttomearrin lea fállat sámegielaid gáiddusoahpahusa vuođđoskuvlla ohppiide ja nuppi dási studeanttaide sámeguovllu gielddaid olggobeallái guokte vahkkodiimmu ja ovddidit sámegieloahpahusa pedagogihka. Gáiddusoahpahusprošeavtta oahpahus lea reálaáiggi oahpahus (nu gohčoduvvon synkronalaš oahpahus), mas oahpaheaddji ja oahppit oassálastet oahppodiibmui seamma áigge iežaset dihtoriiguin iešguđet guovllus.

Lassedieđut sámi giellavahku birra:

Sámi giellavahku 24.–30.10.2022 ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis!

Sámedikki válgalávdegoddi lea nannen skoviid jagi 2023 válgalogahallamii ohcama várás

/in , /by

Sámedikki válgalávdegoddi lea nannen ohcanskoviid jagi 2023 sámediggeválggaid válgalogahallamii ohcama várás. Ohcanskovi sáhttá deavdit vuosttas háve maiddái elektrovnnalaččat.

Ohcanskovit jagi 2023 sámediggeválggaid válgalogahallamii galget leat válgalávdegotti doaimmahagas 31.12.2022 ovdal dmu 16. Ohcanskovi sáhttá doaimmahit elektrovnnalaččat, poastta fárus dahje juo doaimmahit ohcanskovi Sámedikki válgalávdegotti doaimmahahkii.

Elektrovnnalaš ohcanskovvi

Gávnnat elektrovnnalaš skovi Sámedikki neahttasiidduin čujuhusas https://www.samediggi.fi/valggat-2023. Elektrovnnalaš skovit gávdnojit davvisámegillii, nuortalašgillii, anárašgillii ja suomagillii.

Ohcanskovi doaimmaheapmi poastta fárus

Printe ohcanskovi Sámedikki neahttasiidduin čujuhusas https://www.samediggi.fi/valggat-2023 dahje bivdde dan válgalávdegotti doaimmahagas. Sádde vuollái čállojuvvon ohcanskovi mildosiiguin poastta fárus čujuhussii:

Sámedikki válgalávdegoddi
Sámekulturguovddáš Sajos
Menesjärventie 2A
99870 ANÁR

Lassidieđuid ohcama birra sáhtát dihtoštallat suddjejuvvon šleađgapoastta bokte:
Suddjejuvvon šleađgapoasta: https://secmail.com/send/m7jcWH7B, vuostáiváldi: vaalit@samediggi.fi

Anáris 19.10.2022

Sámedikki válgalávdegoddi

Sámekulturguovddáš Sajos
Menesjärventie 2A
99870 ANÁR

010 839 3155

Riikkaidgaskasaš giellavahkku 24.-30.10.2022

/in , /by

Giellavahkku čalmmustahttá dál sámegielaid njealjat jagi. Sámedikkit Ruoŧas, Norggas ja Suomas bovdejit buohkaid searvat ja oassálastit báikkálaš, regiovnnalaš ja našuvnnalaš dásis dán oktasaš áŋgiruššamis. Sávaldat lea ahte sámegielat oidnojit, gullojit ja geavahuvvojit buot servodatsurggiin Giellavahku oktavuođas. Giellavahkku, lágiduvvo 43. vahku, golggotmánu 24-30. beaivviid.

Giellavahkku vuolggahuvvui Ovttastuvvon našuvnnaid (ON) eamiálbmotgiellajagis (IYIL 2019). Dál lea ON mearridan ahte 2022-2032 lea eamiálbmotgielaid logijahki, the International Decade of Indigenous Languages (IDIL). Logijahki galgá movttiidahttit áŋgiruššamiidda mat seailluhit, suddjejit ja ovddidit buot smávva gielažiid máilmmis.

Giellavahku ja eamiálbmotgielaid logijagi oktasaš rahpandoalut lágiduvvojit golggotmánu 23. beaivvi Snåases, Norggas. Rahpandoaluide searvá H.M. Gonagas Harald V. Ruoŧa Sámedikki stivraságadoalli, ja Norgga ja Suoma sámediggepresideanttat ja Norgga gielda- ja guovloministtar maid servet rahpamii. Giellavahku rahpan lágiduvvo juohke jagi sierra báikkis Sámis ja dat čalmmustahttá oktasaš ávvudeami ja sámegielaid fuomášuhttima álggaheami miehtá Sámi.

Loga dieđáhusa dáppe

Dieđuid lágidemiid birra miehtá Sámi, designa ja eará materiála maid sáhttá geavahit Giellavahku oktavuođas gávnnat www.giellavahkku.org siiddus.

Sáhttá maid čuovvut Giellavahku sosiála mediain. Fáddagilkorat maid geavahat sosiála mediain:

Lullisámegiella #gïelevåhkoe
Ubmisámegiella #giällavahkkuo
Biŧonsámegiella #giellavahkko
Julevsámegiella #giellavahkko
Davvisámegiella #giellavahkku
Anárašgiella #kielâokko
Nuortalašgiella #ǩiõllneä’ttel

Sámedikki jagi 2023 válgalogahallamii ohcan

/in , /by

Sámedikki čuovvovaš válggat doaimmahuvvojit čakčamánus 2023. Jietnavuoigadahtton olbmot válggain leat buot dat sápmelaččat, geat leat merkejuvvon sámedikki válgalogahallamii. Válgalávdegoddi merke jagi 2023 válgalogahallamii daid sápmelaččaid, geat ledje jietnavuoigadahtton sámedikki válggain 2019. Buot earát galget ohcat válgalogahallamii maŋimustá dán jagi loahpa rádjai. Válgalogahallamii sáhttá ohcat sámediggelága 3 § 1 momeantta 1, 2 ja 3 ja 21 § vuođul (giela vuođul, áhči dahje eatni vuoigatvuođa vuođul, lappalačča maŋisboahttin ja sápmelažžan, guhte olgoriikka álbmotlahttun ássá Suomas).

Bivdaga válgalogahallamii merkemis dahje das eret sihkkumis galgá bargat čálalaččat maŋimustá 31.12.2022 ovdal dmu 16.00 válgalávdegotti nannen skoviin. Ohcanskovi sáhttá sáddet elektrovnnalaččat dahje printet https://www.samediggi.fi/valggat-2023. Lassidieđuid ja báberskovi fidne válgalávdegotti doaimmahagas čuj. Sámedikki válgalávdegoddi, Kulturguovddaš Sajos, Menesjärventie 2 A, 99870 Anár, tel. 010 839 3155, šleađgapoasta: vaalit@samediggi.fi. Válgalávdegoddái sáhttá sáddet suddjejuvvon šleađgapoastta čujuhusas: https://secmail.com/send/m7jcWH7B.

Anáris 12.10.2022
Válgalávdegoddi

Nuoraidráđđi lágida nuoraidturnea

/in , /by

Nuoraidráđđi lágida čakčat 2022 sámenuoraide dárkkuhuvvon asttuáiggedoaimma turnea. Nuoraidráđi prošeaktabargin lea álggahan Miia Ruokojärvi.

Miia Ruokojärvi álggahii čakčamánu álggus nuoraidráđi prošeaktabargin. Su bargguide gullá earret eará sámegielat ja – kultuvrra mieldásaš asttuáigge doaimma ovddideapmi ovttas nuoraidráđiin ja maiddái sámenuoraide dárkkuhuvvon nuoraid asttuáiggedoaimma turnea plánen ja ollašuhttin. Ulbmilin lea nannet sámegielat nuoraidkultuvrra ja roahkasmahttit nuoraid geavahit sámegiela maiddái asttuáigge.

– Lea somá beassat bargat sámenuoraiguin. Lean ieš smávva báikegottis eret, gos ii leat leamaš sámegielat asttuáigge doaibma. Prošeavttas bargan orru erenomáš dehálaš, muitala nuoraidráđi prošeaktabargi Miia Ruokojärvi.

– Sávan, ahte nu máŋga sámenuora go vejolaš oassálastet min lágidan doibmii. Doaibma plánejuvvo nuoraid sávaldagaid mielde ja sisdoallun leat earret eará sámeduojit, lávdespealut ja ovttas orrun. Mu skuvlejupmin lea bivttastansuorggi artesána, nu ahte giehtaduojit ja duddjon loktanitge lunddolaš temán turnea áigge, Ruokojärvi joatká. 

Turnea ollašuhtto čavčča áigge sámeguovllu gielddain ja sámeguovllu olggobealde lea plánejuvvon turnea ollašuhttot álgoplána mielde Oulus, Helssegis, Tamperees ja Jyväskyläs. Turnea johtima sáhttá čuovvut Sámedikki ja nuoraidráđi neahttasiidduin sihke nuoraidráđi Instagramis ja Facebookis. Turnea plánemis geavahuvvojit ávkin Ijahis Idja-festivála áigge čoggon ideat nuoraidráđi doaimma várás.

– Nuoraidráđi mihttomearrin lea leamaš máŋggaid jagiid áigge stáđásmahttit sámegielat ja kulturmieldásaš nuoraidbarggu. Nuoraidturnea áigge beassat mannat nuoraid lusa, muhto maiddái oahpásmit gielddaid nuoraidbargui, ja beassat ovttas čoavdit váilevuođaid, mat leat ovddit čilgehusain albmanan, gávnnaha nuoraidráđi ságajođiheaddji Anni-Sofia Niittyvuopio.

Nuoraidráđi ulbmilin lea turnea vuođul álggahit boahtte jagi prošeavtta, man áigge nannejuvvo sámegielat nuoraidkultuvra, lasihuvvo oktasašbargu gielddaid doaibmiiguin ja čielggaduvvo sámegielat nuoraidkoordináhtora bálkáheapmi Sámediggái. Koordináhtor ovddidivčče sámegielat ja sámekultuvrii vuođđudeaddji nuoraidbarggu oažžuma sámiid ruovttuguovllu gielddain ovdamearkan hábmemiin málle mo fállat ruovttuguovllu gielddaide oastobálvalussan sámegielat nuoraidbarggu.

Lassidieđut:

Anni-Sofia Niittyvuopio
nuoraidráđi ságajođiheaddji
anni-sofia.niittyvuopio(a)samediggi.fi
040 610 7905

Miia Ruokojärvi
nuoraidráđi prošeaktabargi
miia.ruokojarvi(a)samediggi.fi
040 537 8481

Elli-Marja Hetta
nuoraidčálli
elli-marja.hetta(a)samediggi.fi
050  382 5179

Saamelaiskäräjien vaalien ääntenlaskenta käynnistymässä.

Sámedikki válgalávdegoddi almmuha ohcan láhkai doaimmahatčálli mearreáigásaš barggu

/in , /by

Bargu álgá 1.11.2022 dahje soahpamuša mielde ja joatkašuvvá 31.12.2022 rádjai ja vejolaččat dan maŋŋáge. Válgalávdegotti doaibmabáiki lea Sámekulturguovddáš Sajosis, Anáris.

Doaimmahatčálli bargun lea válgalávdegotti vuollásažžan fuolahit bargguin, mat laktásit jagi 2023 sámediggeválggaid válmmaštallamii ja ollašuhttimii. Dákkár barggut leat ee. boahtti ja vuolgi poastta diariseren, čujuhusdieđuid beaivádeapmi ja čujuhusgoarttaid printen, áššebáhpáriid kopieren ja sádden poastta fárus ja lassin eará dábálaš doaimmahatbarggut ja válgalávdegotti čálli sierra mearridan barggut.

Seađusvuđot gelbbolašvuođagáibádussan lea bargui heivvolaš skuvlejupmi ja sámegiela dáidu (ásahus 1727/95). Dovddiidus válgalávdegotti barggus gehččojuvvo ovdun. Bálká mearrašuvvá Sámedikki bálkávuogádaga gáibádusdási VI ja II luohká mielde (vuođđobálká 2017,90 euro/mb). Vuođđobálkká lassin máksojuvvojit 24 %:a sámeguovllu lassi ja ahkelasit, mat mearrašuvvet bargojagiid mielde.

Ohcamušaid mildosiiguin galgá doaimmahit Sámedikki čállingoddái 27.10.2022 rádjai čujuhussii: https://www.sympahr.net/public/pq.aspx?9c5d7b8e

Lassidieđuid barggu birra addiba válgalávdegotti čálli Antti Aikio t.+ 358 10 839 3148, válgalávdegotti áššemeannudeaddjičálli Sinikka Mäkinen t.+358 ‭10 839 3138‬‬.‬‬‬‬‬

Sámedikki doibmii sáhttá oahpásmit neahttačujuhusas www.samediggi.fi.

Anáris 13.10.2022
Sámediggi

Sámediggi almmuha ohcanláhkái filbmaguovddáža prošeaktabargi mearreáigásaš doaimma

/in /by

Bargu álgá 14.11. ja bistá 17.2.2023 rádjai. Prošeaktabargi bargguide gullet Skábmagovat -eamiálbmogiid filbmafestivála barggut (ea.ea. av-teknihkka, filbmakopiat, -čájáhusat) ja eará filbmaguovddáža barggut. Barggu menestuvvi dikšumis veahkehit heivvolaš skuvlejupmi, sámegiela máhttu sihke doarvái buorre eaŋgalsgiela máhttu.

Prošeaktabargi bálká mearrašuvvá Suoma sámedikki bálkávuogádaga gáibádusdási VII/I mielde (vuođđobálká 1 899,26 euro/mb). Vuođđobálkká lassin máksojuvvojit 24 % sámeguovllu lassi sihke ahkelasit, mat mearrašuvvet bargohárjánumi mielde. Prošeaktabargi doaibmabáiki lea sámekulturguovddáš Sajosis.

Ohcamušaid oktan mildosiiguin galgá doaimmahit sámedikki čállingoddái 27.10.2022 dmu 16.00 rádjai čujuhussii: https://www.sympahr.net/public/pq.aspx?990717b6

Lassedieđuid barggu birra addá filbmaguovddáža plánejeaddji Tarja Porsanger p. 050 569 6065, tarja.porsanger(at)samediggi.fi.

Sámedikki doaimmaide sáhttá oahpásmuvvat neahttačujuhusas www.samediggi.fi ja Skábmagovat Eamiálbmogiid filbmafestiválii čujuhusas www.skabmagovat.fi.

Anáris 6.10.2022
Sámediggi