Sääʹmteeʹǧǧ Sääʹmǩiõl konttrest reâugga tän poodd kuõʹhtt ouddpeâmm materiaaltuâjjla, vueʹssmannust alttääm Anni Saara Aikio da sueiʹnnmannust alttääm Onneli Sieppi. Kuhttu lie ouddpeâmm uʹčteeʹl da tuejjääm sääʹm ouddpeâmmast. 

Sääʹm ouddpeâmm õhttân jõnn vaʹǯǯtõssân lij õinn materiaalvääʹnn. Vääʹnn lij pukin materiaalin; ǩiiʹrjin, perccluʹvddsiõrin, musiikkâst, pedagooglaž uʹčteeʹli materiaalin, ämmatǩiiʹrjin da siõrrneävvain. Sääʹm ouddpeâmm tuâjjla lie jiijj tuõđi čieʹpp šiõttõõllâd, jåårǥlâʹtted da valmšted materiaal, leša ââʹnnma vaalmâš da sääʹm pedagogiikk vuâđald rajjum materiaal kaiʹbbjet ǩeeʹjjteʹmeld. 

Vuâkka vuäǯǯat siõmmna hiâlptõõzz jooʹtti čõõuč ääiʹj. Materiaal puuʹtʼtet nuʹtt tiõddum ǩeʹrjjen, korttân da siõrrân ko digihäämast. Projeeʹkt lie mäŋgg jååʹttmen da vueʹss lie juʹn valmmšen, ko teäddmõõžžâst lij puättam kolmmǩiõllsaž Piâr- mošttspeâll da Kuáti.fi- materiaalbaʹŋǩǩe lie poortum 10 ođđ euʹnneemkoov, koin sääʹm kulttuur lij kõskksââʹjest. Lââʹssen ääiʹjben alttuum Värinaaut- tuâjj-jooukin õhttsažtuâjast valmštum veiddsõs toobdpeâmm-materiaal Värinaauti stäälažǩeʹrjj tobddjin – Uʹčteeʹl’l vuäppes lij ǩiõrǥtum.  

– Rämmšam tuõđi, što vuäǯǯap ođđ materiaal sääʹm ouddpiõmmu. Päärnaid lij šiõǥǥ vueiʹnned, što mij leäʹp da meeʹst kulttuur lij siõrin, ǩiiʹrjin da euʹnneemkoovin âʹldd. Ko siõrrâp lääʹdd mošttspeâll piârrjest, kaunnâp eeʹjj, jieʹnn, vuäʹrnnpeäʹl, vueʹbbžid da maaddârpuärrsid, leša sääʹm speâllast meeʹst lie veâl risttjieʹnn da eeʹjj, risttvueʹbb da -viillj da sieʹzzi, kueʹsǩi da mueʹđi da čieʹʒʒi pieʹllkueiʹm, da tuõđi sieʹzz, kueʹsǩ, mueʹđ da čieʹʒʒ lie veâl määŋgǩeârddsaž mieʹri lääʹdd spiõllu veʹrddeeʹl. Koovin mueʹđđ kååđđ vuõddjid, måttmin lie sääʹmpihttâz, måttmin sõõuskeäʹpper, hääm lie kueʹlšeeʹllmen, luâmmnid uussmen da risttvillj tuõʹllai vueʹss âʹsǩstes. Täid vueiʹtet ââʹnned uuʹcces äʹššen, leša tuõđâst tõk lie jõnn da kaallšõs ääʹšš.  Euʹnneemkoovin meeʹst eʹpet lij õuddmiârkkân kåålezstuuʹlest ištti päärnaž. Näkam representaatio sääʹmpäärna vuäiʹnne čuuʹt ooccanj, särnn ǩiõllpieʹssohjjeei Niina Aikio-Siltala.  

– Tuâjjlažkådda täk materiaal lie še tuäiv mieʹldd jõnn veäʹǩǩen.  Õuddmiârkkân Värinautit- tuâjj-jooukin õhttsažtuâjast tuejjuum materiaalâst meeʹst lie jiânnai tobddjid kuulli sääʹn, kookk lie ooʹccben arggǩiõlâst âʹldd. Kuáti.fi- seeidai õõl vuâđđuum blogid peäʹlstes lie pueʹttmen jeeʹresnallšem artikkeeʹl sääʹm pedagogiikk pirr, koin pâʹsttep siõmmna koʹrjjeed ämmatǩiiʹrji vääʹn, juätkk Aikio-Siltala.

Sääʹmǩiõl konttrest rajjum materiaalid teäggtet kulttuur- da ǩiõllpieʹsstååim riikkveäʹǩǩvuõđin da tõid jueʹjjet määusteʹmmen sääʹmǩiõllsaid õuddpeâmmjuâkksid da sääʹmǩiõllsaž ouddmättʼtõʹsse. Materiaal vuäitt tiʹllʼjed jiijjâs juâkksa neʹttpååʹšt mieʹldd ǩiõllpieʹssohjjeeʹjest.

Lââʹssteâđ:

Niina Aikio-Siltala 
mä. ǩiõllpieʹssohjjeei
010 839 3115 / 040 487 5414 
niina.aikio-siltala@samediggi.fi 

Anni Saara Aikio 
mä. materiaalplaanni
010 839 3132 / 040 610 9773 
anni-saara.aikio@samediggi.fi 

Onneli Sieppi  
mä. materiaalplaanni
010 839 3132 / 040 610 9773 
onneli.sieppi@samediggi.fi