Sämitige Sämikielâ toimâttuvâst porgâv tääl kyehti arâšoddâdem materiaalpargee, vyesimáánust algâttâm Anni Saara Aikio já syeinimáánust algâttâm Onneli Sieppi. Kuohtuuh lává arâšoddâdem máttáátteijeeh já lává porgâm sämmilii arâšoddâdmist. 

Sämmilii arâšoddâdem ohtâ stuorrâ hástus lii ain materiaalvänivuotâ. Vänivuotâ lii puoh materiaalijn, kiirjijn, lyevdispeelâin, muusikist, pedagogisijn máttáátteijei materiaalijn, áámmátkirjálâšvuođâst já sierâin. Sämmilii arâšoddâdem pargeeh láá tuođâi čeepih heiviittiđ, jurgâliđ já rähtiđ jieš materiaal, mutâ kiävttuanolâš já sämmilii pedagogiik vuáđuld rahtum materiaal annoo ain. 

Tile puárrán váhá taan čoovčâ ääigi. Materiaal pyevtittuvvoo sehe teddilum kirjen, korttân já spellân já meid digihäämist. Projekteh láá joođoost jo maaŋgah já uási lii jo valmâštum-uv, ko teddilemlájádâsâst lii puáttám kuulmâkielâlâš Peerâ- muštospellâ já Kuáti.fi- materiaalpaaŋkin láá luođim 10 uđđâ ivnimkovveed, main sämikulttuur lii kuávdáást. Lasseen ovdil algâttum Värinautit- pargojuávhoin oovtâstpargoost rahtum vijđes tobdošoddâdemmateriaal, Värinauttij häldeekirje tobdoin – Máttáátteijee raavâkirje lii valmâštum.  

– Mun lam tuođâi ilolâš, ete mij finnip uđđâ materiaal sämmilii arâšoddâdmân. Párnáid lii tehálâš uáiniđ, ete mij lep já mii kulttuur lii speelâin,kiirjijn já ivnimkuuvijn mieldi. Ko mij spellâp syemmilii muštospeelâ perrust, te mij kavnâp eeji, eeni, uárbim- já viljâpele, oobijd já viiljâid já äijih já ááhu, mutâ sämmilii speelâst mist láá lasseen ristvaanhimeh, ristuábih já -viiljah já imeh já maavah, já ama siäsáh já čeesih-uv láá eenâb ko syemmilii speelâst. Kooveest muáđá čuáldá vuodduid, motomijn láá mááccuheh, motomijn sovskapereh, ulmuuh láá kuáláástmin, luommiimin já ristviiljâst lii vyesi askestis. Taah sättih orroođ uccâ äššin, mutâ toh láá tuođâi stuárráh já teháliih.  Ivnimkuuvijn mist vuod lii ovdâmerkkân pyerástoovlist čokkájeijee pärni. Tággáár representaatio sämipárnááh uáinih uáli uccáá, muštâl kielâpiervâlstivrejeijee Niina Aikio-Siltala.  

– Meid pargoviehân taah materiaaleh láá tuáivu mield stuorrâ iššeen. Ovdâmerkkân Värinautit- pargojuávhoin oovtâstpargoost rahtum materiaalist mist láá hirmâd ennuv tobdoid lohtâseijee säänih, moh láá ucceeb mieldi argâkielâst. Kuáti.fi- sijđoid vuáđudemnáál blogin vuod láá puátimin jieškote-uvlágán artikkâleh sämmilii pedagogiikâst, moiguin mij pastep váhá sajanpieijâđ áámmátkirjálâšvuođâ vänivuođâ, juátká Aikio-Siltala. 

Sämikielâ toimâttuvâst pyevtittemnáál materiaaleh ruttâduvvojeh kulttuur- já kielâpiervâltooimâ staatâtorjust já taid jyehih nuuvtá sämikielâláid arâšoddâdemohtâduvváid já sämikielâlii ovdâmáttááttâsân. Materiaal puáhtá tiiláđ jieijâs ohtâdâhân tuáistáážân šleđgâpostáin kielâpiervâlstivrejeijest. 

Lasetiäđuh 

Niina Aikio-Siltala 
má. kielâpiervâlstivrejeijee 
010 839 3115 / 040 487 5414 
niina.aikio-siltala@samediggi.fi 
 
Anni Saara Aikio  
má. materiaalvuávájeijee  
010 839 3132 / 040 610 9773 
anni-saara.aikio@samediggi.fi 

Onneli Sieppi  
má. materiaalvuávájeijee 
010 839 3132 / 040 610 9773 
onneli.sieppi@samediggi.fi