Sämitigge ocá tavesämikielâ jurgâleijee sajasii vuáruttâllâmriijâ ááigán

Sajasâšvuotâ lii ááigán 1.6.–30.11.2022. Sajasâžžân väljejum kalga tevdiđ vuáruttâllâmrijjâlaavâst (1305/2002) tárguttum iävtuid.

Jurgâleijee pargon lii hoittáđ tavesämikielâ jurgâlem- já terminologiapargo kielâtoimâttuvâst. Jurgâleijee tohálâšvuotâiähtun lii paargon hiäivulâš ollâškovlâtođhos teikâ eres škovliittâs sehe laavâst auktorisistum jurgâleijein (1231/2007) uáivildum vuoigâdvuotâ toimâđ auktorisistum jurgâleijen suomâkielâst tavesämikielân teikâ nubijkulij.

Jurgâleijee pälkki meriduvvoo Sämitige pälkkivuáháduv vátávâšvuotâtääsi IV/IV tâi V/II mield (vuáđupälkki 2597,07–2247,67 eurod/mp). Vuáđupäälhi lasseen pargoost máksoo 24 % sämikuávlu lase já hárjánemlaseh, moh meriduvvojeh pargohárjánem mield.

Ucâmušâid lahtosijdiskuin kalga toimâttiđ Sämitige čäällimkoodán 15.5.2022 räi čujottâsân: https://www.sympahr.net/public/pq.aspx?64f523ee

Lasetiäđuid pargoost addel Sämitige kielâtorvočällee Anne Kirste Aikio +358 40 707 5626.

Sämitige tooimân puáhtá uápásmuđ nettičujottâsâst www.samediggi.fi.

29.4.2022
Sämitigge

Saamelaiskäräjien vaalien ääntenlaskenta käynnistymässä.

Sämitige valjâlävdikodde almoot uuccâmnáál valjâvuávájeijee meriáigásii pargo – Sämitigge juátká uuccâmääigi 15.5.2022 räi

Pargo álgá 1.6.2022 tâi sopâmuš mield já pištá 31.12.2022 räi já máhđulávt ton maŋa. Valjâlävdikode toimâsaje lii sämikulttuurkuávdáš Sajosist, Anarist. Valjâvuávájeijee pargon lii huolâttiđ valjâlävdikode vyelni ive 2023 sämitiggevaaljâi vuávámân já olášutmân lahtojeijee pargoin.
Asâttâsvuáđuslâš tohálâšvuotâvátámâššân lii paargon heivejeijee škovliittâs já sämikielâ táiđu (asâttâs 1727/95). Hárjánem valjâlävdikode pargoost kiäččoo hiättun.

Pälkki miärášuvá sämitige pälkkivuáháduv IV/III – V/I mield (vuáđupälkki kooskâst 2645,46 e/mp – 2492,97 e/mp). Vuáđupäälhi lasseen máksojeh 24 % sämikuávlu lase já pargofeerim mield miärášuvvee feerimlaseh.

Ucâmušâid labdosijdiskuin kalga toimâttiđ sämitige čäällimkoodán majemustáá 15.5.2022 čujottâsân: https://www.sympahr.net/public/pq.aspx?0758ce03

Lasetiäđuid pargoost adelává valjâlävdikode čällee Antti Aikio p. + 358 10 839 3148 já valjâlävdikode saavâjođetteijee Heikki Paltto p. +358 10 839 3159‬.‬‬‬

Sämitige toimáid puáhtá uápásmiđ nettičujottâsâst www.samediggi.fi.

Anarist 8.4.2022
Sämitige valjâlävdikodde

Saavâjođetteijee Juuso já kulttuurlävdikode saavâjođetteijee Näkkäläjärvi uásálistev Venetsia taaiđâbiennaalân

Sämitige saavâjođetteijee Tuomas Aslak Juuso já Sämitige kulttuurlävdikode saavâjođetteijee Pirita Näkkäläjärvi uásálistev Venetsia taaiđâbiennaalân 21.4.-23.4.  Tääl vuossâmuu keerdi taaiđâbiennaal aalmuglii paviljoŋgist láá tuš sämitaaiđâreh já meid vuossâmuu keerdi sämmiliih láá aalmugin ovdâstum paviljoŋgist.

Sämitige saavâjođetteijee Tuomas Aslak Juuso illood sämitaiđuu noonâ oovdâstmist Venetsia taaiđâbiennaalist.

– Must lii ilo uásálistiđ biennaalân oovtâst nuubij Sämitiigij ovdâsteijeiguin. Lii tehálâš tuárjuđ sämitaaiđârijd já keččâliđ ovdediđ sii tile maailm taaiđâareenain, iätá Juuso.

Sämitaaiđâreh Pauliina Feodoroff, Máret Ánne Sara já Anders Sunna nubásmiteh Venetsia 59. taaiđâbiennaal Tave-eennâmlii paviljoŋg Säämi paviljoŋgin. Nubástus Säämi paviljoŋgin áávvud sämmilii algâaalmug taiđuu já suvereniteet.

Säämi parlamentaarlâš rääđi já Office for Contemporary Art Norway (OCA) uárnejeh Säämi paviljoŋg lekkâmijd tuorâstuv 21.4. Suomâ Sämitige ovdâsteijeeh saavâjođetteijee Tuomas Aslak Juuso já  kulttuurlävdikode saavâjođetteijee Pirita Näkkäläjärvi uásálistev lekkâmáid oovtâst Taažâ já Ruotâ Sämitiigij ovdâsteijeiguin.

Säämi paviljoŋg lekkâmtilálâšvuotâ 21.4.2022. Kooveest čižetpeln: Asta Balto, Tuomas Aslak Juuso, Pauliina Feodoroff já Pirita Näkkäläjärvi. Kove: Ánde Somby

Sämitige kulttuurlävdikode saavâjođetteijee Pirita Näkkäläjärvi mielâst lii tehálâš ete ohtsâškodde kuldâl taaiđârijd. 

– Taaiđâreh mättih já tyestih koijâdiđ koččâmušâid já pyehtiđ oovdân uáinuid, moh mudoi iä veltihánnáá puáđi uáinusân. Venetsia biennaalist sämitaaiđâreh pyehtih oles maailm tiätun čuávdimettum koččâmuš sämmilij eennâmvuoigâdvuođâin, Näkkäläjärvi eeđâi.

Säämi paviljoŋg taaiđâčáitálduv lii pyevtittâm juávkku, mast láá mieldi sämmilâš totkee Liisa-Rávná Finbog, sämmilâš luándusuojâleijee já tuáijár Beaska Niillas já OCA hovdâ Katya García-Antón. Juávhu išedeijen láá Martina Petrelli, Liv Brissach já Raisa Porsanger. OCA lii Tave-eennâmlii paviljoŋg válduovdâsteijee ive /8/2022.8

Venetsia taaiđâbiennaal lii moodeern taiđuu aalmugijkoskâsâš stuorrâ kejâstâh, mii uárnejuvvoo jyehi nubbe ive. Biennaal šadda iänááš čáitálduvâin, moh láá paviljoŋgijn, maid staatah láá iivij mield huksiittâm. Vuossâmuš Venetsia taaiđâbiennaal uárnejui ive 1895.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Pirita Näkkäläjärvi
Kulttuurlävdikode saavâjođetteijee
040 3577 006
pirita.nakkalajarvi@gmail.com

Kietâčalluu čäällimpáájá 15.5. já 21.5. Sajosist Anarist

Oopâ rähtiđ jieijâd mainâsist elleekovekietâčalluu, oovdeb hárjánem ij taarbâš leđe.

Siskáldâs: mii lii elleekovekietâčalluu čäällim, kietâčalluu formaat, hárjuttâspargopitáh já kietâčällee koskâvuotâ čaittâlmân jna.

Äigi: Uási 1 pasepeeivi 15.5. tme 11-17, uási 2 lávurduv 21.5. tme 10-15.

Stivrejeijen Sakari Maliniemi. Páájá lii uáivildum nuoráid já rävisulmuid, mieldi váldojeh enâmustáá 12 olmožid. Páájá tuálloo suomâkielân já tot lii uásálisteid nuuvtá. Máhđulâšvuotâ uásálistiđ meid káidusin.

Almottât mieldi majemustáá 6.5.2022 tarja.porsanger@samediggi.fi.

Ohtsâštave-eennâmlâš kietâčalluu čäällimtábáhtus NORTHERN SCRIPT ocá tave-eennâmlijd, 18-29 ihásijd nuorâid, kiäh láá perustum kietâčalluu čälimist.

Säminuorah pyehtih uásálistiđ kiišton jieijâs eenikielân, teeman lii  TEMPTATION. Elleekovekietâčalluu kalga vuolgâttiđ 22.8.2022 räi čujottâsân tarja.porsanger@samediggi.fi. Lasetiäđuh Northern Script-kietâčaalâtábáhtusâst čujottâsâst www.nosi.fi!

Algâaalmugij elleekovekuávdáš Skábma/Sämitigge

Sämitige puhelinkuávdáš lii kiddâ 14.-18.4.2022

Sämitige puhelinkuávdáš lii kiddâ 14.-18.4.2022.

Sämitigge tuáivut puorijd pessijáid puohháid!

Säminuorâi taaiđâtábáhtus 2022 uárnejuvvoo čohčâmáánust Anarist – šlaaijân muusik já tiivtah

Säminuorâi taaiđâtábáhtus uárnejuvvoo čohčuv 14.-15.9.2022 Anarist, Sämikulttuurkuávdáš Sajosist. Tábáhtus lii ärbivuáválávt uárnejum kiđđuv, mutâ tábáhtus lii sirdum koronatile tiet.

Tábáhtus váldušlaaijân láá muusiktiivtah. Šlaajáid uásálistoo jo-uv láávdástmáin tâi toimâtmáin jieš rahtum tâi čallum muusikpitá tâi tiivtâ majeláá almottemnáál vuovvijn. Muusik- já tihtâláávdástmeh já kirjáliih tyejeh árvuštâllojeh sierâ jieijâs aherááiđuin.

 

Rááiđuh:

Vuálá 10-ihásiih, vuálá 16-ihásiih já 16–20-ihásiih.

  1. Muusik: lávdástem tábáhtusâst já/tâi kirjálâš tyeji
  2. Tiivtah: lávdástem tábáhtusâst já/tâi kirjálâš tyeji

 

Puoh sierâ muusik já tiivtâi šlaajah já genreh láá toháliih kuohtuin váldušlaajâin. Láávdástmeh pyehtih leđe ohtuu tâi juávhoin olášuttum. Tábáhtusâst puáhtá lávdástiđ jieijâs tâi iärásij pyevtittem tuojijd, mutâ puoh láávdástmeh já jieš tohhum tyejeh kalgeh leđe sämikielâliih (anarâš-, nuorttâlâš- tâi tavesämikielâ).

Lasetiäđuh tábáhtusâst almottuvvojeh vyesimáánu ääigi. Tábáhtusân almottâttoo porgemáánust.

taaiđâtábáhtus orniistâlmijn láá mield Sämitige škovlim- já oppâmateriallävdikodde, nuorâirääđi, sämmilâš párnáikulttuurkuávdáš Mánnu sehe sämmiliih elleekove- já muusikkuávdááh.

Tábáhtus orniistâlmijn čuávuh tárkká koronatile já -torvolâšvuođâ, mon tiet uárnejeijeeh värideh máhđulâšvuođâ nubástussáid.

 

Lasetiäđuh:

Anni-Sofia Niittyvuopio

anni-sofia.niittyvuopio@samediggi.fi

 

www.saamelaisnuortentaidetapahtuma.com

Facebook: Saamelaisnuorten taidetapahtuma

Instagram: @samenuoraid_daiddadahpahus

#taaiđâtábáhtus #čeäppvuõđpeeiv #dáiddadáhpáhus #sntaidetapahtuma

Sämikielâ káidusmáttááttâshaahân ulâttâsmeeri almottâtmeh – paijeel 160 uápped

Ulâttâsmeeri paijeel 160 uápped láá almottâttâm Ucjuv kieldâ já Sämitige ohtsii Sämikielâi káidusmáttááttâs piiloothaavâ luuhâmive 2022–2023 máttááttâsân.

Anarâš-, nuorttâlâš- já tavesämikielâ máttááttâsân almottâttii ohtsis 19 ovdâmáttááttâs uápped já 131 vuáđumáttááttâs uápped. Luvâttâhškovliimân almottâttii 11 uápped. Almottâtmeh lijjii anarâškielâ máttááttâsân ohtsis 38, nuorttâlâškielâ máttááttâsân 20 já tavesämikielâ máttááttâsân 103.

– Haavâ aalgâst ive 2018 máttááttâsâst algâttii suulân 50 uápped, ađai mii uáppeemeeri lii paijeel kuulmâkiärdásâš ko verdid mii vuossâmuu hahâihán, illood haavâ proojeekthovdâ Anni-Sofia Niittyvuopio Ucjuv kieldâst. – Uáppeemere vuáimálâš lasanem muštâl tast, ete fastâ sämikielâ káidusmáttááttâsân lii lasaneijee tárbu väldikodálávt, iätá Niittyvuopio.

Monnjâalmottâtmeh váldojeh vala vuástá

Máttááttâsân almottâttâm nuuvâi 31.3. Monnjâalmottâtmeh váldojeh kuittâg vala vuástá. Almottâttâm máttááttâsân tahhoo Hellewi-vuáháduvâst.

Káidusmáttááttâshaahâ fáálá sämikielâ (anarâš-, nuorttâlâš- tâi orjâlâškielâ) ovdâ- já vuáđumáttááttâs tâi luvâttâhškovlim tievâsmittee sämikielâ máttááttâs 2 okkotijme sämiuáppeid, kiäh láá sämmilij päikkikuávlu ulguubeln já kiäi perruu tâi suuvâ kielâ lii miinii Suomâst sarnum sämikielâin. Haahâ ij faalâ máttááttâs rävisulmuid. 

Almottâttâm nuuhâm maŋa máttááttâsân uásálistmist ráđádâleh vistig uáppee päikkikieldáin. Máttááttâsjuávhuh ráhtojeh jieškote-uv sämikielân sierâ nuuvt, ete uáppei luokkâ- já kielâtääsi sehe luuhâmoornig váldojeh huámmášumán nuuvt pyereest ko máhđulâš.

Lasetiäđuh:

Anni-Sofia Niittyvuopio, hahâhovdâ
Ucjuv kieldâ
anni-sofia.niittyvuopio@edu.utsjoki.fi
040 701 2094

Arla Magga, hahâkoordinaattor
Sämitigge
arla.magga@samediggi.fi
040 687 5989

www.saamenetaopetus.com

Lasetiäđuh Sämikielâi káidusmáttááttâshaavâst:

Sämikielâi káidusmáttááttâs piiloothaahâ lii haahâ, mon Ucjuv kieldâ joođeet já Sämitigge koordinist, já mii juátkoo 2023 kiđđâluuhâmpaje loopâ räi. Máttááttâs- já kulttuurministeriö ruttâd haavâ. Ton ulmen lii faallâđ sämikielâ káidusmáttááttâs kyehti okkotijme verd vuáđuškoovlâ já nube tääsi uáppeid sämmilij päikkikuávlu ulguubel.

Kulttuurlävdikodde juovij ive 2022 kulttuurtorjuid

Sämitige kulttuurlävdikodde juovij kulttuurlävdikode čuákkimist 24.2.2022 máttááttâs- já kulttuurministeriö mieđettem staatâtorjuu ihán 2022 ohtsis 179 000 eurod sämikielâlii kulttuur oovdedmân, Tave-eennâmlij sämiseervij tuárjumân já Sämmilâškirkkotuuvij paijeentolâmân.

Sämitige toimâttâhân pottii Ruotâst já Taažâst ohtsis 9 ucâmuššâd, main torjuid uccii ohtsis 22 499 €.

Torjuuh mieđettuvvojii čuávvoo náál: Kulttuurmeriruttâ 2022

Lasetiäđuh

Kulttuurčällee Riitta Orti-Berg 010-839 3103, riitta.orti-berg(at)samediggi.fi

Kove: Kari Kuivamäki

Kädet kannettavan tietokoneen näppäimistöllä.

Mijá tekno -kielâteknologiaseminaar Luuleest

Ruotâ, Suomâ já Taažâ Sämitigeh puávdejeh kielâteknologiaseminaarân Lulán.

Vyesimáánu 10.–11. peeivi uárnejeh Ruotâ, Suomâ já Taažâ Sämitigeh Mijá tekno -kielâteknologiaseminaar Luuleest. Seminaar lii uási Sämitiigij koskâsâš oovtâstpargo algâaalmugkielâi aalmugijkoskâsii ihelove (IDIL 2022-2032) ooleest. Seminaar ulmen lii kavnâđ sämmilii njunošproojeekt (Flagship-proojeekt) kielâteknologia syergist, mon ooleest Sämitigeh pargeh korrâsávt ja mast lii ävkki oles sämisiärvádâhân.

Kielâteknologia ovdán jotelávt pirrâ maailm. Tondiet lii Sämitiigij mielâst eromâš tehálâš, ete mij sämmiliih pastep čuávvuđ ovdánem, já tienuuvt visásmittiđ mii kielâi puátteevuođâ. Sämitigeh aneh meid tehálâžžân tom, ete sämiaalmug lii mieldi hammiimin puátteevuođâ čuávdusijd, moiguin mij pajedep já ovdedep mii kielâid – meid kielâteknologia maailmist.

Seminaarân láá puávdejum luvâldeijeeh jieškote-uv sämmilâš lájádâsâin já instituutioin já ulmen lii tarkkuđ vijđáht, ete magareh kielâteknologâliih táárbuh sämisiärváduvâst láá. Seminaar vuossâmuu peeivi láá luvâlduvah já paaneelsavâstâllâm. Seminaar nubbe peivi lii väridum pargopááján, mast peessâp oovtâst čokkiđ jurduid já pyehtiđ oovdân táárbuid.

Ep vuolgât seminaar stream peht ige toos pyevti uásálistiđ káidusohtâvuođâi peht.

Seminaar: Mijá tekno – Gåk giellateknologiddja máhttá åvdedit sámegielajt? (Mijá tekno – Maht kielâteknologia puáhtá ovdediđ sämikielâid?)

Kuás: Vyesimáánu 10.–11. 2022

Kost: Kulturens hus, Skeppsbrogatan 17, 97231 Lule

Almottâttâm: Meriäigi 8.4.2022
https://response.questback.com/sametingetsverige/ld1hlny7hd

Lasetiäđuid adeleh:

Ingegerd Vannar, e-poasta ingegerd.vannar@sametinget.se, tlf. +46 980 780 29

Marko Marjomaa, e-poasta marko.marjomaa@samediggi.fi, tlf. +358 50 438 24 84

Inger Anne Marie Pulk, e-poasta inger.anne.marie.pulk@samediggi.no, tlf +47 78 48 42 07

Sämitigge almoot uuccâmnáál iäláttâsčällee virge

Iäláttâsčällee pargoh láá miäruštâllum Sämitige pargo-oornigist 26 c §. Pargon lii iärásij lasseen valmâštâllâđ sämmilij iäláttâssáid já toi oovdedmân lohtâseijee aašijd väldimáin huámmášumán sämmilij ärbivuáválii tiäđu sehe toimâđ iäláttâs- já vuoigâdvuotâlävdikode oovdânpyehten. Pargo álgá sopâmuš mield.

Asâttâsvuáđustâslâš tohálâšvuotâvátámâššân lii virge vaattâm škovlim já lasseen váttoo sämikielâ táiđu (asâttâs 1727/95). Virge miänástuvvee hoittám váátá šiev sämikulttuur, sämmilii ärbivuáválii tiäđu, sämikuávlu já -iäláttâsâi sehe haaldâtlij pargoi tubdâm sehe šiev oovtâstpargo- já vuáruvaikuttâstááiđuid. Mij vyerdip meid kiärgusvuođâ jiečânâs porgâmân, šiev ornimnaavcâ já tedduuhaldâšem. Virgeest lii kuuđâ mánuppaje keččâlemäigi.

Pälkki meriduvvoo Sämitige pälkkivuáháduv vátávâšvuotâtääsi IV/II mield (vuáđupälkki 2706,50 €/mp). Vuáđupäälhi lasseen máksojeh pargohárjánem mield meridum hárjánemlaseh sehe sämikuávlust porgâdijn 24 % sämikuávlu lase.

Ucâmušâid tuođâštusâiguin kalga toimâttiđ Sämitige čäällimkoodán 30.4.2022 räi čujottâsâst: https://www.sympahr.net/public/pq.aspx?034d31fd

Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106. Sämitige tooimân puáhtá uápásmuđ nettičujottâsâst www.samediggi.fi

Anarist 1.4.2022
Sämitigge