Sääʹmteʹǧǧ paʹlǩǩii sääʹmǩiõli, sääʹm ǩiõtt-tuej da puäʒʒhååid mättʼtõõttjid
Sääʹmteʹǧǧ jueʹjji Sääʹmvuuʹd škooultemkõõskõõzz ǩiđđprääʹznǩest stipeeʹndid sääʹmǩiõli, sääʹm ǩiõtt-tuej da puäʒʒhååid määttain puârast spraavdõõttâm mättʼtõõttjid. Stipeeʹndid uʹvdde õhttsiʹžže kuʹtte škooultemkõõskõõzz liinjin valmštõõvvâm mättʼtõõttja.
Sääʹmteeʹǧǧ stipeeʹndid vuåǯǯu täk nuõr:
Aanrõšǩiõll ja kulttuur: Heli Sarre
Tâʹvvsääʹmǩiõll ja kulttuur: Kristiina Jomppanen
Nuõrttsääʹmǩiõll ja kulttuur: Suvi-Tuuli Fofonoff
Sääʹm ǩiõtt-tuejj: Harri Krogerus ja Maria Saijets
Puäʒʒhåidd: Vili Nuorgam
Sääʹmteʹǧǧ tuäivat leekk da šiõǥǥ ǩieʹssluäm pukid!
Sääʹmnuõri čeäʹppvuõđpeeiʹv liânttummuš ǩiõččâmnalla
Sääʹmnuõri čeäʹppvuõđpeeiʹv liânttummuš lij ååʹn ǩiõččâmnalla vueʹlnn åårrai liiŋkin. Liânttummuš lij juõkkum kooum vuässa.
Vuõssmõs vueʹss (ouddâl poorrâmpoodd): https://youtu.be/bd4x3RUZ0PY
Nuʹbb vueʹss (poorrâmpoodd mâŋŋa): https://youtu.be/MXrCPru2Y5A
Ravggon čuäjtõõttmõš: https://youtu.be/5haYPUkUK6c
Lââʹssteâđ:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132
Sääʹmnuõri čeäʹppvuõđpeiʹvv 2021 rääi – ǩiõčč puäđõõzzid
Sääʹmnuõri čeäʹppvuõđpeiʹvv jäʹrjsteš 18.5. neʹttšõddmõššân. Šõddmõõžžâst vueiʹnneš 38 video ǩeeʹjjmieʹldd jânnam. Jäʹrjsteei späʹssbâʹšše jäʹrjstummšid vuässõõttâm oummid, ärvstõõllʼjid da jååʹđteeʹjid di pukid šõddmõʹšše vuässõõttâm oummid.
Čeäʹppvuõđpeeiʹvest leʹjje kueʹhtt klaass, 13-20-ekksa da vuâlla 13-ekksa, koin kuõhttuin vaʹlljeeš koumm vuõiʹtti. Lââʹssen čeäʹppvuõđpeeiʹvest jueʹǩǩeš õhtt cisttpeäggtõõzz.
Čeäʹppvuõđpeiʹvv 2021 vuõiʹtti:
12-20-ekksa
1. sââʹjj Traditional Goahka Show, Uʹccjooǥǥ sääʹmlookkjiškooul
Senja Aikio, Elle Raudasoja da Jesse Ruokolainen. Oʹhjjeei Solja Magga.
Juõkkum 2. sââʹjj Mii leat čeahpit suohtastallat ja ráfáidit, Hetta pââibužškooul da Jeänõõǥǥ tuõddârlookkjiškooul
Sara-Elina Valkeapää, Biret Juliánná Hætta, Elen-Anne Juuso, Paulus Labba, Per-Jona Labba da Máret-Elle Valkeapää. Oʹhjjeei Anne-Mari Kukkonen da Sinikka Labba.
Juõkkum 2. sââʹjj Mij leäʹp čieʹpp mainstõõllâd – Čeʹvet, Čeʹvetjääuʹr škooul
Veera Nykänen, Maija Leivo, Markus Porsanger, Johannes Porsanger, Janna-Maria Semenoff, Inari Jomppanen, Iida Jomppanen da Anna Lias. Oʹhjjeei Hanna-Maaria Kiprianoff.
Vuâlla 13-ekksa
1. sââʹjj Mun lean čeahppi dánsut, Karesâvvan škooul
Ebba Valkeapää. Oʹhjjeei. Taina Syväjärvi
2. sââʹjj Muäna leäʹp čieʹpp räʹppjed-Maaski tueʹǩǩen, Čeʹvetjääuʹr škooul
Ilmari Leivo da Aarni Seri Oʹhjjeei. Hanna-Maaria Kiprianoff.
3. sââʹjj Mii leat čeahppit dahkat vaikko maid, Aanar škooul
Biret-Elle Ruotsala, Sara Ellen Safronova, Kenja Tervaniemi, Ann-Elle Näkkäläjärvi, Gábrellen Wolfiina Magga, Paulus Rauhala, Uula Kosonen, Juhan-Henrik Magga, Ante Mihkkal Safronov da Nils-Matti Paltto. Oʹhjjeei Siiri Magga
Cisttpeäggtõs: Čepis viiljah, Sääʹmougglõsmättʼtõshaʹŋǩǩõs
Benjamin Arola da Kaius Erola. Oʹhjjeei Henna Aikio
Čuäʹjtõõzz Traditional Goahka Show, Mii leat čeahpit suohtastallat ja ráfáidit, Mij leäʹp čieʹpp mainstõõllâd – Čeʹvet, Mun lean čeahppi dánsut ja Muäna leäʹp čieʹpp räʹppjed-Maaski tueʹǩǩen vuässâʹtte sääʹmnuõri eeʹttǩeeʹjen 22.5. jäʹrjstemnalla åårrai väʹlddkååʹddlaž Nuõrr Kulttuur -šõddmõʹšše.
Vuõssmõssân puättam vuäǯǯa ciistân selfie/youtubečuõv jueʹljin pueʹtti videoi raajjâm vääras. Lââʹssen puk päʹlǩǩuum čuäʹjtõõzzi raajji vuäǯǯa koummjueʹlj videoi raajjmõõžž vääras.
Lââ’ssteâđ:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132
Sääʹmteʹǧǧ iʹlmmat ooccâmnalla mieʹrräiggsaž projektt-tuâjjla tuâj
Projektt-tuâjjla tuâjjan lij vaʹstteed õhttsažtâʹvvjânnmallaš sääʹmnuõri konfereensâst, plaanummšest, riâššmõõžžin, teâđtummšest, jeeʹres ouddvalmštõõllmõõžžin di šõddmõõžž mâʹŋŋtuâjain. Tuâjj älgg 14.6.2021 da peštt 27.8.2021 räjja.
Õhttsažtâʹvvjânnmallaš sääʹmnuõri konferenss riâžžât påʹrǧǧmannust 2021 ougglõsõhttvuõđin. Konfereenss vueiʹvvteeʹmmen lij Sääʹmteeʹǧǧ nuõrisuåvtõs da tõn riâžžât õõutveäkka Sääʹm parlamentaarlaž rääʹđ nuõriluʹvddkååʹddin.
Tuâj oʹnnsteeʹjjes håiddmõõžž ooudâsveʹǩǩe ââʹnteei škooultõs, sääʹmǩiõl silttõs di riʹjttjeei eŋgglõsǩiõl silttõs. Uʹvddep äärv oʹdde jiõččnaž da tääʹrǩes tuõjju di šiõǥǥ õhttsažtuâjj- da vuârrvaikktõs-silttõõzzid. Päʹlǩǩ meäʹrtââvv Sääʹmteeʹǧǧ päʹlǩǩriâšldõõǥǥ kaiʹbbjemtääʹzz V da tõʹst II joouk mieʹldd (vuâđđpäʹlǩǩ 2247,67 euʹrred/mp). Vuâđđpääʹlǩ lââʹssen määuʹset ougglõstuâj åårrmõšpääiʹǩ mieʹldd 24% sääʹmvuuʹd lââʹzz da tuâjjǩiõččlâsttmõõžž mieʹldd meäʹrtõõvvi ǩiõččlâsttmõšlââʹzz. Projektt-tuâjjla tuâj lij vueiʹvv-vueʹzzest ougglõstuâj
Ooccmõõžžid mätt- da tuâjjtuõđštõõzzivuiʹm âlgg tååiʹmted Sääʹmteeʹǧǧ piisarkådda piâtnâc 4.6.2021 mõõneeʹst addrõʹsse: https://www.sympahr.net/public/pq.aspx?6f492549
Lââʹssteâđaid tuâjast oudd nuõripiisar Elli-Marja Hetta,elli-marja.hetta(at)samediggi.fi, teʹl. 050 3825 179 da nuõrisuåvtõõzz saaǥǥjååʹđteei Anni-Sofia Niittyvuopio, anni-sofia.niittyvuopio(at)samediggi.fi, teʹl. 040 7082 072
Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi da nuõrisuåvtõõzz tåimmjummša addrõõzzâstwww.nuor.fi
Aanrest 21.5.2021
Sääʹmteʹǧǧ
Sääʹmteʹǧǧ ååcc ougglõsmämättʼtõshaʹŋǩǩõʹsse koordinaattor
Sääʹmteʹǧǧ iʹlmmat ooccâmnalla sääʹmǩiõli ougglõsmättʼtõshaʹŋǩǩõõzz koordinaattor mieʹrräiggsa tuej.
Tuejj älgg 1.8.2021 da peštt 31.12.2021 räjja. Haʹŋǩǩõskoordinaattor vaʹsttad õhttvuõđin jeeʹres åʹrnn Lääʹddjânnam åårrai škooulid, škooultõõzz jäʹrjsteeʹjid da škooulniiʹǩǩi huõlteeʹjid. Koordinaattor nåårr sääʹmǩiõli mättʼtõsjooukid da tåimm âlddlõs õhttsažtuejast Uccjooǥǥ kååʹddest põrggi projeʹkttjååʹđteeʹjin da haʹŋǩǩõõzz jeeʹres tuejjlaivuiʹm. Haʹŋǩǩõskoordinaattor tuõjju koʹlle še teâđtem- da aaʹšši õuʹddepuʹhttem tuej. Haʹŋǩǩõs jääʹrjast ougglõsõhttvuõđid, kååʹtt lij vuâđđmättʼtõõzz da lookkjiškooul tiuddeei sääʹmǩiõli (aanrõš-, nuõrttsääʹm- da tâʹvvsääʹmǩiõl) mättʼtõs, saaʹmi päiʹǩǩvuuʹd oolǥbeäʹlnn leʹddi škooulid.
Haʹŋǩǩõõzz teäggteei lij mättʼtõs- da kulttuurministeria. Tuej pueʹrr hoiʹddjummuž veäʹǩǩat sääʹmkulttuur tobddmõš, da oodd jiõččnaž tuõjju. Ââʹntemõõlǥtõssân lij tuej õõlǥtem ââʹnteei škooultõs da sääʹmǩiõl silttõs (asetõs 1727/95). Haʹŋǩǩõõzzâst vaʹsttad škooultõs- da mättmateriaalkoontâr da õuddooumžen tåimm škooultõspiisar.
Haʹŋǩǩõskoordinaattor päʹlǩǩ meäʹrtââvv Sääʹmteeʹǧǧ päʹlǩǩriâšldõõǥǥ kaiʹbbjemtääʹzz IV/IV mieʹldd (vuâđđpäʹlǩǩ 2 572,13 €). Vuâđđpääʹlǩ lââʹssen määuʹset sääʹmvuuʹd lââʹss 24% da tuejjǩiõččlâsttmõõžž mieʹldd meäʹrtõõvvi ǩiõččlâsttmõšlââʹzz. Tuejjooccmõš mieʹlddõõzzineez âlgg tååimted 31.5.2021 mõõneeʹst addrõʹsse https://www.sympahr.net/public/pq.aspx?1e73e825. Lââʹssteâđaid oudd škooultõspiisar Ulla Aikio-Puoskari, ulla.aikio-puoskari@samediggi.fi, teʹl. 010 839 3112.
Aanrest 17.5.2021
Sääʹmteʹǧǧ
Sääʹmteʹǧǧ toođvaž Lappi leett väʹlddõõzz tuʹmmstõʹǩǩe maaccted Tâʹvv-Lappi mäddkåʹddkääʹv valmštõõllma
Lappi leett väʹlddõs tuʹmmii täʹbbe ǩiđđmannu 17. peeiʹv maaccted Tâʹvv-Lappi mäddkåʹddkääʹv valmštõõllma. Väʹlddõs tuʹmmii ääʹššest jiõnin 43-3. Tuʹmmstõõǥǥ mieʹldd Jiõŋŋmiâr ruʹvddčuõkku kuõskki mieʹrǩǩummšid jaukkeet puõʹtti mäddkåʹddkääʹvest.
Sääʹmteʹǧǧ lij toođvaž Lappi leett väʹlddõõzz tuʹmmstõʹǩǩe maaccted Tâʹvv-Lappi mäddkåʹddkääʹv 2040 valmštõõllma. Puõʹtti mäddkåʹddkääʹvest jaukkeet Jiõŋŋmiâr ruʹvddčuõkku kuõskki mieʹrǩǩummšid.
Sääʹmteeʹǧǧ saaǥǥjååʹđteei Tuomas Aslak Juuso rämmaš, što systemaattlaž da viiššlõs, eeʹǩǩpõõʹjid juätkkjam tuâjj lij pohttam tääzz. – Leäm samai kuärǥast, što väʹlddõõzz vuäzzla lie kuullâm mij jiõn da tuʹmmääm ainsmâʹtted sääʹmkulttuur da äʹrbbvuõđlaž jieʹllemvuõʹjji pueʹttivuõđ jaukkeeʹl ruʹvddčuõkku mieʹrǩǩummšid kääʹvest. Tät oudd ååsk tõõzz, što Lappist oummu jie leäkku väjldâttam Sääʹm meer, håʹt valmštõõllmest lij systemaattlânji põrggum priimmâd ruʹvddčuõkku liinj, ceälkk Juuso.
Sääʹmteeʹǧǧ I väärrsaaǥǥjååʹđteei Anni Koivisto vuässõõđi väʹlddõõzz såbbra, koʹst jueʹtǩi Sääʹmteeʹǧǧ väʹlddem beäʹl õuʹdde pohttmõõžž. – Fiin, što säʹmmlai huõlid kuʹlle da vaʹldde tuõđâst. Haaʹlääm späʹssbõõššâd Lappi leett väʹlddõõzz da pukid, kook lie toiʹmmjam ääʹšš õõuʹdeem beäʹlest. Âânam tuõđi täʹrǩǩen, što toiʹmmjeei pirr vuuʹd kueʹdde õhttsaž õõudâsvaʹsttõõzz sääʹmkulttuur puõʹtti ääiʹjest, tuâtt Koivisto.
– Lij jõnn hiâlptõs, što Jiõŋŋmiâr ruʹvddčuõkku kuõskki mieʹrǩǩummšid jaukkeet mäddkåʹddkääʹvest. Čõõđ mõõneeʹn ruʹvddčuâǥǥas leʹčči jååttam puki koolm sääʹm ǩiõlljoouk õõđvuuʹdi čõõđ. Tuäivam tuʹmmstõõǥǥ raaveem nuõri ååsk puõʹtti äigga da tõõzz, što säʹmmlai dommvuuʹdest vuäitt še puäʹđlvest tuejjeed säʹmmlai äʹrbbvuõđlaž jieʹllemvuõʹjjin, juätkk II väärrsaaǥǥjååʹđteei Leo Aikio.
Jiõŋŋmiâr ruʹvddčuâǥǥasmieʹrǩǩummuš lij vuâsttlõsttum veiddsânji
Sääʹmteʹǧǧ da määŋg jeärraz lie määŋg vuâra jeeʹres beäʹlvälddmõõžžin da ceäʹlǩǩmin pohttam õuʹdde vuâsttlâsttmõõžžâs Jiõŋŋmiâr ruʹvddčuõkku mieʹrǩǩummšest mäddkåʹddkävva ni čõõnteʹmmen. I väärrsaaǥǥjååʹđteei Anni Koivisto lij vuässõõttâm Sääʹmteeʹǧǧ nõõmeem äʹšštobddivuäzzliʹžžen Lappi leett halltõõzz såbbrid da pohttam toʹben še õuʹdde säʹmmlai vuäinnmõõžžid ruʹvddčuâǥǥaslinjjummšest. Lââʹssen Jiõŋŋmiâr ruʹvddčuâǥǥas lij tuõttum joottlõk- da saaǥǥtem-ministeria tuejjtem čiõlǥtõõzzâst tääl beäʹlnn tuʹššen.
Sääʹmteʹǧǧ nuäjjõõđi pâʹsslâšttam-mannust 2021 Lappi leett väʹlddõʹsse Jiõŋŋmiâr ruʹvddčuõkku linjjjummuž jaukkeem beäʹlest mäddkåʹddkääʹvest mâŋŋa tõʹst, ko Lappi leett halltõs tuʹmmii eʹtǩǩeed mäddkåʹddkääʹv priimmʼmõõžž väʹlddõʹsse.
Lââʹssteâđ:
Tuomas Aslak juuso
Saaǥǥjååʹđteei
040 687 3394
tuomas.juuso(at)samediggi.fi
Anni Koivisto
I väärrsaaǥǥjååʹđteei
040 415 5969
anni.koivisto(at)samediggi.fi
Leo Aikio
II väärrsaaǥǥjååʹđteei
040 621 6505
leo.aikio(at)samediggi.fi
Snimldõk: Ville-Riiko Fofonoff
Pueʹtted tiõrvân čuâvvad Sääʹmnuõri čeäʹppvuõttpeeiʹv neeʹttest 18.5 čiâss 10
Sääʹmnuõri čeäʹppvuõttpeeiʹv vuäitt čuâvvad mââibaarǥ 18.5 čiâss 10 ääʹljeeʹl addrõõzzâst https://www.sajos.fi/live
Prograʹmme vuäitt tobdstõõttâd tääiʹben: https://www.samediggi.fi/2021/05/14/katja-gauriloff-saara-seipiharju-ja-sunna-nousuniemi-taidetapahtuman-tuomareiksi-tapahtuman-ohjelma-julkaistu/
Lââ’ssteâđ:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132
Katja Gauriloff, Sáárá Seipiharju da Sunna Nousuniemi čeäʹppvuõđpeeiʹv suʹvddjen – šõddmõõžž programm õlmstõttum
Jieʹllikarttohjjeei Katja Gauriloff, freelancer-tååimteei Sáárá Seipiharju da fiʹlmmraajji Sunna Nousuniemi tåimma pueʹtti mââibaarǥ 18.5.2021 riâššâmnalla åårrai Sääʹmnuõri čeäʹppvuõđpeeiʹv suʹvddjen.
Sääʹmnuõri čeäʹppvuõđpeeiʹv jäʹrjstet ougglõsõhttvuõđin čiâss 10 ääʹljeeʹl. Šõddmõõžž ääʹvad Erke Eriksen musikkčuäjtõõzzin. Šõddmõõžžâst čuäjtââtt Ravggon, kååʹtt čuäʹjat ođđ musiikkâs da še Talent Lääʹddest vuõinnum räʹppneǩ Mihkku Laiti kuõʹssai vuõlttõõzzâst! Vuäitak tobddõõttâd prograʹmme tääʹrǩben vueʹllʼlest.
Ravggon-bäʹndd lij raajjâm ođđ bliin õõutveäkka puuʹtʼteei Duomis Heandaratin. Bliin lij ǩiõrǥtummuž vuâlla. Bääʹnd vuäzzla lie seämma ǥo ouddâl, leâša musikk lij mottjam akustiikklab folk-popâst siõmmna kueʹrmsõʹbben da joba ǩiččlõddi puuʹtte. Suõmmõõzz lie vuäǯǯam inspiraatio suâlnas mooštin, persoonlaž põrggmõõžžin da toʹlǩǩummšin di põõlâst, što mâiʹd ǩeävv luõttu, ǥo ni mii ij leäkku teänab dovoʹlna. Tän vuâra Ravggon soiʹttai uuʹccab jooukin da čuäʹjat še ođđ käpplõõǥǥid, koid jeäʹla ouddlest čuäʹjtum
Sääʹmnuõri čeäʹppvuõđpeivva vueʹrdet pâʹjjel 300 päärna da nuõr pirr jânnam da šõddmõõžžâst vueiʹnet 38 video. Lââʹssen čeäʹppvuõđpeivva vueʹrdet seuʹrrjeeʹjid õõlmâs Youtube-striiʹme, mõõn liiŋk jueʹjjet čeäʹppvuõđpeeiʹv sosiaalʼlaž mediast.
Šõddmõõžž jååʹđtet koolmin sääʹmǩiõlin. Šõddmõõžž jååʹđte nuõrttsäämas Anna Lumikivi, aanrõšǩiõʹlle Satu Aikio da tâʹvvsäämas Teija Kaartokallio.
Programm mââibaarǥ 18.5.
| 9.45 | Liinj ävvne |
| 10.00 | Neʹttšõddmõõžž programm älgg |
| Erke Eriksen musikkčuäʹjtõs | |
| Säʹmmlaž päärnai kulttuurkõõskõs Mánnu video puõccui čuäʹrvin | |
| Vuõssmõs video | |
| 10.55 | Õhttsaž kõhttsportt |
| 11.00 | Ravggon čuäjtââtt |
| 11.30 | Peiʹvvporrmõš – Sohkaršohkka skeeʹts da snimldõõǥǥ oouʹdab šõddmõõžžin |
| 12.30 | Neʹttšõddmõõžž programm juätkkai |
| Kueʹssen Mihkku Laiti | |
| 12.45 | Loopp videoin |
| 14.00 | Puäđõõzzi õlmmʼmummuš da šõddmõõžž loopptummuš |
Prograʹmme vuäiʹtte võl šõddâd muttâz. Vueiʹnnep sõrgg!
Lââ’ssteâđ:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132
Sääʹmteeʹgg teʹlfonkõõskõs lij kidd 14.5.2021
Sääʹmteeʹgg teʹlfonkõõskõs lij kidd 14.5.2021.