Sämitige stivrâ meridij 10.5.2021, ete Sämitigge ij vuáláčääli peividum PEFC-standard. Peividum kritereh iä Sämitige mield turvii tuárvi sämmilij päikkikuávlu meccituálu killeelvuođâ, iäge Sämitige iävtuttâsah lah valdum standardpargoost tuárvi huámmášumán.

– Sämitige stivrâ lii kieđâvuššâm peividum standard já puáttám taggaar puátusân, ete tot ij turvii tuárvi sämikulttuur paijeentoollâm já ovdedem hinnáid sämmilij päikkikuávlust, paahud saavâjođetteijee Tuomas Aslak Juuso.

Sämikulttuur, eromâšávt sämmilij ärbivuáválij iäláttâsâi hárjuttem hinnáid sämmilij päikkikuávlust uhkedeh šoŋŋâdâhnubástus, ain juátkoo mecciluándu uhkevuálásâžžân šoddâm já eennâmkevttimteddui lasanem. Sämmilij ärbivuáválij iäláttâsâi hárjuttem lii čonâsist sämmilij päikkikuávlu eellimvuáimán já putes luándun já čácáduvváid sehe ohtâlâs kuávloid.

– Sämmilij ärbivuáválij iäláttâsâi já algâaalmugvuoigâdvuođâi turvim ličij vaattâm standardpargoost tom, ete sämmilij uáinuid liččii váldám huámmášumán sämikulttuurân kyeskee kriiteer paaldâst meid eres kriterijn tállân pargo aalgâ rääjist já ete kriterijd liččii tarkkum olesvuottân sämmilij ekologâlii, sosiaallii já kulttuurlii killeelvuođâ uáinust, paahud II värisaavâjođetteijee Leo Aikio.

PEFC-standard peividempargo pištám kyehti ive

Sämitigge lii uásálistám aktiivlávt PEFC-standard peividempaargon. Sämitigge iävtuttij tärkkilistmijd já lasattâsâid vyeimist orroo standard PEFC FI 1002:2014 almoláid sehe ekologâlii, sosiaallii já kulttuurlii killeelvuotân kyeskee kriterijd tállân peividempargo aalgâst. Iävtuttâsâiguin já lasattâsâiguin Sämitigge viigâi vaiguttiđ toos, ete standardist liččii aalgâ rääjist váldám huámmášumán sämmilij päikkikuávlu sierânâsjiešvuođâid, tubdâstâm sämmilij ärbivuáválij iäláttâsâi vuáđudem luándun sehe turvâstâm meccituálu uásild tom, ete sämikulttuur ij hiäjusm sämmilij päikkikuávlust.

Aalmugijkoskâsii standard PEFC ST 1001:2017 mield puoh čonâsjuávhuh kolgâččii leđe ovdâstum standardpargojuávhust tienuuvt, ete mihheen ovtâskâs čonâsjuávkkupeelijd ij lah merideijee sajattuvâst. PEFC-standard peividempargo várás vuáđudum PEFC-standardpargojuávhust lijjii masa puohah meccituálu ovdâsteijeeh já návt meccituálu ovdâsteijein lâi noonâ rooli meid miärádâstohâmist. Sämitige iävtuttâsah já tievâsmitmeh sierâ kriteráid iä valdum pargo ääigi tuárvi huámmášumán já uáivilijd viggii raijiđ sierâ standard olesvuođâst.

Peividum PEFC-standard ij faalâ meccituálu stivrejeijee kriterijd, moh västideh sämmilij päikkikuávlu sierânâsjiešvuođáid já pehtilávt torvejeh sämikulttuur hárjuttem hinnáid já tondiet Sämitiggeest iä lah tuárvi vuáđđuseh peividum standard vuáláčälimân.

PEFC Suomâ lii iävtuttâm Sämitiigán jotkâráđádâlmijd kriterijn tienuuvt, ete ráđádâlmijn kiddiiččii huámášume aššijd, maid Sämitigge iävtuttij standardpargo aalgâst. Sämitigge kiäččá peividum PEFC-standard hammim olesvuođâ sämmilij ekologâlii, ekonomâlii já sosiaallii killeelvuođâ uáinust. Kriterijd láá hammim já tievâsmittám merhâšitteht ton maŋa, ko Sämitigge lii toohâm vuossâmuid iävtuttâsâidis. Taan tiet ij pijssáá, ete tuš peividemproosees algâmuddoost iävtuttum aašijd tarkkuuččii uđđâsist jotkâráđádâlmijn. Ko váldá vala huámmášumán Sämitige resursijd já standardpaargon jo kevttum ääigi, te Sämitigge ij ane máhđulâžžân algâttiđ jotkâráđádâlmijd.

Iäláttâs-, jotolâh- já pirâskuávdááh sehe Suomâ pirâskuávdáš láá taan räi Sämitige lasseen almottâm, ete iä vuáláčääli standard. IJP-kuávdái vuáđđuseh standardist kiäsádâtmân láá tääbbin (suomâkielân).

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso(at)samediggi.fi

Leo Aikio
II värisaavâjođetteijee
040 621 6505
leo.aikio(at)samediggi.fi

Laapi lito váldustivrâ meridij onne 17. vyesimáánu macâttiđ Tave-Laapi eennâmkoddekaava valmâštâlmân. Váldustivrâ meridij ääšist jienâiguin 43-3. Miärádâs mield sikkoh Jieŋâmeerâ rađan kyeskee merkkiimijd puáttee eennâmkoddekaavast.

Sämitigge lii tuđâvâš Laapi lito váldustiivrâ miärádâsân macâttiđ Tave-Laapi eennâmkoddekaava 2040 uđđâsist valmâštâlmân. Puáttee eennâmkoddekaavast sikkoh merkkiimijd, moh kyeskih Jieŋâmeerâ rađan.

Sämitige saavâjođetteijee Tuomas Aslak Juuso illood, ete systemaatlâš já iäljáris pargo, mii lii jotkum maaŋgâid iivijd, lii finnim puáttus. – Mun lam eromâš ilolâš, ete váldustiivrâ jesâneh láá kuullâm mii jienâ já meridâm visásmittiđ sämikulttuur já ärbivuáválij iäláttâsâi puátteevuođâ já sikkoh rađemerkkiimijd kaavast. Taat addel osko toos, ete Laapist ulmuuh iä lah vájáldittâm Säämi aalmug, veikâ valmâštâlmist láá systemaatlávt viggâm rađelinjim tuhhiitmân, iätá Juuso.

Sämitige I värisaavâjođetteijee Anni Koivisto uásálistij váldustiivrâ čuákkimân, mast joođhij Sämitige noonâ uáivil oovdânpyehtim. – Pyeri, ete sij kullii sämmilij huolâid já valdii taid tuođâst. Mun halijdâm kijtteđ Laapi lito váldustiivrâ já puohâid, kiäh láá toimâm ääši ovdedem pyerrin. Lii tuođâi tehálâš, ete oles kuávlu tuáimeeh kyeddih ohtsii ovdâsvástádâs sämikulttuur puátteevuođâst, paahud Koivisto.

– Mij lep tuođâi hiälpáskâm, ete sikkoh eennâmkoddekaavast merkkiimijd, moh kyeskih Jieŋâmeerâ rađan. Olášuudijn rađe ličij jottáám puoh kuulmâ sämikielâjuávhu váimuskuávlui rasta. Mun tuáivum, ete miärádâs naanood nuorâi osko puátteevuotân já toos, ete sämmilij päikkikuávlust puáhtá puátteevuođâst-uv finniđ pargo sämmilij ärbivuáválijn iäláttâsâin, juátká II värisaavâjođetteijee Leo Aikio.

Jieŋâmeerâ rađemerkkim lii finnim viijđes vuástálistem

Sämitigge já maaŋgah eres peleh láá maŋgii sierâ uáivilijn já ciälkkámušâin puáhtám oovdân, ete sij vuástálisteh Jieŋâmere rađe merkkim eennâmkoddekaavan ubâ raavâlâžžân. I värisaavâjođetteijee Anni Koivisto lii uásálistám Sämitige nomâttem äššitobdeejesânin Laapi lito stiivrâ čuákkimáid já sun lii puáhtám meid tobbeen oovdân sämmilij uáinuid rađelinjimist. Toos lasseen jotolâh- já viestâdemministeriö tovâttem čielgiittâsâst lii pahudum, ete Jieŋâmeerâ rađe ij kannat ekonomâlávt.

Sämitigge keesij njuhčâmáánust 2021 Laapi lito váldustiivrân vâi tot sihoččij Jieŋâmeerâ rađe linjim eennâmkoddekaavast ton maŋa, ko Laapi Lito stivrâ meridij oovdânpyehtiđ eennâmkoddekaava tuhhiittem váldustiivrân.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso(at)samediggi.fi 

Anni Koivisto
I värisaavâjođetteijee
040 415 5969
anni.koivisto(at)samediggi.fi

Leo Aikio
II värisaavâjođetteijee
040 621 6505
leo.aikio(at)samediggi.fi

Kove: Ville-Riiko Fofonoff