Sámediggi almmuha ohcan láhkai láhkačálli mearreáigásaš barggu

/in /by

Bargu álgá soahpámuša mielde ja bistá 31.12.2021 radjái. Láhkačálli bargun lea ee.

  • válmmaštallat sámiid vuoigatvuođaide, ealáhusaide ja sámiid ruovttuguovllus ja váikkuhusaiguin dohko ollán eanangeavaheapmái guoskevaš juridihkalaš áššiid,
  • doaibmat ealáhus- ja vuoigatvuođalávdegotti áššemeannudeaddjin ja čállin ja dan iešvuođas válmmaštallat lávdegotti čoahkkináššiid ja doaibmáibidjat dan mearrádusaid,
  • čuovvut sápmelaččaid vuoigatvuođaide, ealáhusaide, ja sámiid ruovttuguovllu eanangeahaheapmái guoskevaš láhkaásahanprošeavttaid ovdáneami,
  • veahkehit doaibmasuorggistis dikki ságajođiheaddji riikka dási ja riikkaidgaskasaš bargguin,
  • doaibmáibidjat su doaibmasuorgái gullevaš dikki ja stivrra čoahkkima mearrádusaid ja veahkehit dikki eará bargiid vuoigatvuođalaš gažaldagaid válmmaštallamis,
  • dikšut eará iežas doaibmasuorgái gullevaš sihke ealáhus- ja vuoigatvuođalávdegotti ja hálddahushoavdda sutnje sierra mearridan bargguid.

Bargogovva dárkkálmáhttojuvvo dárbbu mielde jagi áigge. Geahččalit fidnet barggu fasta virgin jagi 2021 áigge.

Sámediggeásahusa (1727/95) mieldásaš gelbbolašvuođagáibádussan lea vuoigatvuođadiehtaga kandidáhta dutkkus (bajit allaskuvladutkkus) ja sámiid guoski vuoigatvuođalaš áššiid dovdamuš sihke sámegiela dáidu. Virggi ceavzilis dikšuma veahkehit lassin sámekultuvrra ja hálddahuslaš bargguid buorre dovdamuš sihke buorre ruoŧa/dárogiela ja eaŋgalsgiela dáidu. Virggideavdimis čuvvojuvvo guovtti mánotbaji geahččalanáigi. Bálká mearrašuvvá Sámedikki bálkávuogádaga gáibádusdási III/I mielde (vuođđobálká 3132,72 euro/mb). Vuođđobálkká lassin barggus máksojuvvojit ahkelasit ja sámeguovllus barggadettiin 24 %:a lassi.

Ohcamušaid mildosiiguin galgá doaimmahit čállingoddái maŋimustá 15.1.2021 čujuhusain https://www.sympahr.net/public/pq.aspx?e6fbccf1

Lassidieđuid addá hálddahushoavda Pia Ruotsala-Kangasniemi tel. 040-7262688 Sámedikki doibmii sáhttá oahpásmit neahttačujuhusas www.samediggi.fi.

Anáris 31.12.2020 Sámediggi

Buriid juovllaid ja lihkolaš ođđa jagi 2021

/in /by

Buriid juovllaid ja lihkolaš ođđa jagi 2021!​

Pyereh juovlah já luholâš uđđâ ihe 2021!​

Šiõǥǥ rosttvid da leklvaž ođđ eeʹjj 2021!​

Hyvää joulua ja onnellista uutta vuotta 2021!​

Merry Christmas and Happy New Year 2021!

Govva: Erja Wiltse

Sámedikki telefonguovddáš lea gitta 23.12.-31.12.2020

/in /by

Sámedikki telefonguovddáš lea gitta 23.12.-31.12.2020.

Oza oahpahallin Walt Disney Animation Studios

/in /by

Leat go gazzame oahpu dahje aitto gárven oahpu dáidda, animašuvnna, gráfalaš dahje filbma suorggis? Walt Disney Animation Studios bovdejit sámi oahpahalli geassái 2021. Taleanta ovdánahttin oahpahallin oaččut erenomáš vejolašvuođa bargat ovttas Disney bagadeddjiin ja guorahallat buot beliid dáidda, muitalushábmen ja filbmasuorggis.

Walt Disney Animation Studios Summer Internship Program bistá 12 vahko ja lea máksojuvvon prográmma heivehuvvon sidjiide geat lohket dáidaga, animašuvnna, dihtorgrafihka ja filmma. Fuomáš: sihkarvuohta ja dearvvašvuohta lea hui dehálaš midjiide. Eiseváldiid rávvagiid mielde mearriduvvo čađahuvvo go prográmma gáiddusin vuoi Burbank CA studios. Loga eambbo sin oahpahalli prográmma ja eavttuid birra dás:

Story

CG Artist – Character

CG Artist – Environment

Visual Development

Production Management

CG Animation

Ohcanáigemearri WDAS oahpahallin: 24.01.2021, dii 11:59 Pacific Standard Time
(Fuomaš áigeerohusa).

Mátkestipeanda

Oahpahalli galgá ohcat 10.000 $ sturrosaš mátkestipeandda, man Sámiráđđi ja Sámedikkit almmuhit dán oktavuođas. Ohccis galgá leat sámi duogáš, galgá deavdit WDAS eavttuid oahpahallái ja sus galgá leat plána das mo son áigu máhcahit gelbbolašvuođa ruovttoluotta sámi servodahkii, nu go omd. sosiála mediaid bokte, logaldallamiid bokte jnv.

Čális ohcama, eanemusat 1 siiddu, gos čilget man vuođul ozat oahpahallin ja mo áiggut čoavdit eavttuid mátkestipendii. 

Sádde ohcama dán čujuhussii ja merke ohcama “WDAS oahpahalli”: kmr@saamicouncil.net.

Ohcanáigemearri mátkestipeanda: 24.01.2021, dii 11:59 Pacific Standard Time
(Fuomáš áigeerohusa).

Tuomas Aslak Juuso (sámediggepresideanta Suoma bealde), Åsa Larsson-Blind (várrepresideanta Sámeráđis), Aili Keskitalo (sámediggepresideanta Norgga bealde) ja Per-Olof Nutti (sámediggepresideanta Ruoŧa bealde). Govva: Sámediggi

– Mii leat nu ilus go dát erenoamáš vejolašvuohta fas ráhpasa 2021:as, šattaš go digitála hámis dahje báikkálaččat Walt Disney Animation Studioas, Los Angeles:as. Diibmá ledje hui ollu buori ohccit sámis, muhto Covid-19 bissehii oahpahalliortnega dán jagi. Mii sávvat ahte sii geat ledje dalle ohcan, oidnet liibba fas ohcat dása. Mii leat ilus go mii sáhttit leat doarjjan duohtandahkat erenoamáš ja ávkkálaš oahpolonohallama, dadjet Aili Keskitalo (sámediggepresideanta Norgga bealde), Tuomas Aslak Juuso (sámediggepresideanta Suoma bealde), Per-Olof Nutti (sámediggepresideanta Ruoŧa bealde) ja Åsa Larsson-Blind (várrepresideanta Sámeráđis) oktasaš cealkámušas.


Oktavuođadieđut:

Tuomas Aslak Juuso
Telefuvdna: +358 406873394
E-poastta: tuomas.juuso@samediggi.fi

Aili Keskitalo,
Telefuvdna: +47 97129305
E-poastta: aili.keskitalo@samediggi.no

Per-Olof Nutti
Telefuvdna: +46 703763112
E-poasta: Per-Olof.Nutti@sametinget.se

Åsa Larsson-Blind,
Telefuvdna: +46 702543356             
E-poasta: asa@saamicouncil.net

Praktihkálaš dieđut ortnega birra:
Christina Hætta, Sámiráđđi
+47 48021734
christina@saamicouncil.net

Lähikuva Sajoksen parlamenttisalin pyöreästä pöydästä ennen Saamelaiskäräjien kokousta.

Sámediggi evttoha duohtavuođa- ja soabadankommišuvnna lahttun Heikki Hyvärinen ja Miina Seurujärvi

/in , /by

Sámedikki čoahkkin mearridii 18.12.2020 evttohit sámiid duohtavuođa- ja soabadankommišuvnna lahttun dehe komissáran Heikki Hyvärinen ja Miina Seurujärvi. Nuortalaččaid siidačoahkkin lea mearridan evttohit kommišuvnna lahttun Irja Jefremoff. Lassin stáhtaráđi evttohusa vuođul válljejuvvojit guokte lahtu kommišuvdnii.

Sámedikki čoahkkin gulai ovdal mearrádusbargama stáhtaráđi ovddasteaddjin vuoigatvuođaministtar Anna-Maja Henriksson ja olgoriikkaministtar Pekka Haavisto, Sámedikki I várreságajođiheaddji Anni Koivisto,  gullandilálašvuođa ságajođiheaddji Niila Rahko ja plánejeaddji Heli Aikio. Sámedikki čoahkkin jienastii mearrádusas.

Ovdal komissáraid nammadeami Sámediggi, Nuortalaččaid siidačoahkkin ja stáhtaráđđi dahket komissáraevttohasaid oktiiheiveheami. Duohtavuođa- ja soabadankommišuvnna lahtut galget leat olbmot, geat návddašit viiddis luohttámuša sápmelaš ja suopmelaš servodagas. Lahtut leat sorjjasmeahttumat eaige ovddas dan beali, mii sin lea evttohan dahje válljen. Kommišuvnnas galget leat dakkár lahtut, geain lea sierračehppodat sápmelaččaid diliin, gielas ja kultuvrras. Kommišuvnna nammadeamis vuhtii váldojit sierra sámegielaid joavkkut ovttaveardásaččat ja figgojuvvo dasa, ahte vuhtii váldo sohkabeliid ovttaveardásaš ovddasteapmi. Kommišuvnna ásaha stáhtaráđđi lávga ovttasbarggus Sámedikkiin ja nuortalaččaid siidačoahkkimiin ja lea dárkkuhus, ahte kommišuvdna álggaha barggus jagi 2021 áigge.

Sámediggi bivddii sámeservošis evttohusaid komissárran, geaid searvvuš geahččá heivvolažžan doibmii ja geaid miehtan dasa lea ovddalgihtii sihkkaraston. Evttohusaid galggai vuođustallat.

Mearreáigge rádjai kommišuvnna lahttun bohte oktiibuot 16 evttohusa, 14 Sámediggái ja guokte Nuortalaččaid siidačoahkkimii. Evttohuvvon olbmot ledje oktiibuot 10, geain 9 olbmo lea evttohuvvon Sámediggái.

Lassin Sámediggi lágidii gullamiid evttohuvvon komissáraid válljemis. Gullandilálašvuođat lágiduvvojedje gáiddusoktavuođaid bokte koronadili dihtii. Gullandilálašvuođat ordnejuvvojedje giellajoavkkuid mielde čuovvovaččat: golbma davvisámegielat gullandilálašvuođa (Ohcejoga ja Eanodaga guovlu, Anára guovlu, Vuohču guovlu ja eará Suopma), okta anárašgielat gullandilálašvuohta, okta nuortalašgielat gullandilálašvuohta sihke okta suomagielat gullandilálašvuohta. Maiddái nuoraidráđđi lágidii iežas gullandilálašvuođa sámenuoraide.

Gáiddusgullamiid lassin Sámediggi ordnii vejolašvuođa buktit ovdan iežas oainnu komissáraevttohasain maiddái telefovnnain sihke šleađgapoasttain ja poastta bokte.

Gáiddusgullamiid ságajođiheaddjin doaimmai psykiátralaš buohccedivššár Niila Rahko ja čállin Sámedikki mearreáigásaš plánejeaddji Heli Aikio. Gullamiin lea ráhkaduvvon raporta, mas leat váldon vuhtii olbmuid oainnut iešvuođaid ja čehppodaga birra, mat eaktuduvvojit duohtavuođa- ja soabadankomissárain, ja maiddái addon doarjja olbmuide, geat leat evttohassan. Raporttas leat váldon vuhtii buot 17.11.2020 rádjai boahtán bealiváldimat.

Sámiid duohtavuođa- ja soabadankommišuvdna

Kommišuvnna lahttun Sámediggái evttohuvvon olbmot ja vuođustusat

Lassidieđut

Ságajođiheaddji Tuomas Aslak Juuso tel. 040 687 3394 / 010 839 3101, tuomas.juuso(at)samediggi.fi

I várreságajođiheaddji Anni Koivisto tel. 040 415 5969, anni.koivisto(at)samediggi.fi

Ságajođiheaddji veahkkebargi Laura Olsén-Ljetoff tel. 010 839 3190 / 040 617 5113, laura.olsen-ljetoff(at)samediggi.fi

Saamelaiskäräjien edustajien 2020-2023 ryhmäkuvaGovva: Ville Fofonoff

Sámedikki čoahkkin 17.–18.12. lágiduvvo gáiddusoktavuođaiguin

/in /by

Sámedikki čoahkkin 4/2020 lágiduvvo 17.-18.12.2020 koronadili dihtii gáiddusoktavuođaiguin. Guovttebeaivásaš čoahkkin mearrida ee. guovtte duohtavuođa– ja soabadankommišuvnna lahtu evttoheamis stáhtaráđđái, Sámedikki doaibmaplánas ja bušeahtas jahkái 2021 sihke doaibmasurggiid guoski doaibman- ja ovddidanprográmmain válgabadjái 2020–2023. Vealtameahttun sivaid dihtii Sámedikki lahttu sáhttá oassálastit čoahkkimii maiddái Sajosis. Parlameantasálii eai váldojuvvo geahččit dehege álbmot koronadili dihte.

Sámedikki čoahkkin mearrida Sámedikki bargoortnega nuppástuhttimis mearreáigái koronapandemiija dagahan njoammudávdavára dihtii, guovtte duohtavuođa- ja soabadankommišuvnna lahtu evttoheamis stáhtaráđđái, Sámedikki doaibmaplánas ja bušeahtas jahkái 2021, doaibmasurggiid guoski doaibman- ja ovddidanprográmmain válgabadjái 2020-2023 ja lahtu nammadeamis Akwé:kon bargojovkui guoskkadin sámiid ruovttuguovllu luondduriggodatplánema.

Lassin čoahkkin gieđahallá sámiid psykososiálalaš doarjaga duohtavuođa- ja soabadanproseassa áigge ja geavvá sáttaságastallama sámediggeválggaid oktilašvuođaevttohusa dihtii.

Čoahkkima 4/2020 áššelistu lea dokumeantabáŋkkus.

Parlameantasálii eai váldojuvvo geahččit dehege álbmot

Sámedikki lahtut oassálastet guovttebeaivásaš čoahkkimii juogo gáiddusoktavuođaiguin dahje báikki alde Sajosis. Koronadili dihte álbmot ja media sáhttet čuovvut čoahkkima dušše njuolggo sáddaga bokte čujuhusas www.samediggi.fi/live. Sáddagis lea oažžun láhkai dulkon buot golmma sámegillii ja suomagillii. Sajosa parlameantasálii ii váldojuvvo álbmot báikki ala.

Lassedieđut:

ságajođiheaddji Tuomas Aslak Juuso, tlf. 040 687 3394 / 010 839 3101, tuomas.juuso(at)samediggi.fi

hálddahushoavda Pia Ruotsala-Kangasniemi tlf. 010 839 3100 / 040 726 2688, pia.ruotsala(at)samediggi.fi

dieđihančálli Johanna Alatorvinen, tlf. 010 839 3140 / 040 663 4493, johanna.alatorvinen(at)samediggi.fi

Sámiid kultur- ja giellabeassedoibmii 200 000 euro lasseruhta boahtte jahkái

/in , /by

Riikkabeivviid ruhtaváljagoddi evttoha lasseruhtadeami sámegielaid ealáskahttimii boahtte jahkái nu gohčoduvvon juovlaskeaŋkaruđain. Ruhtaváljagotti evttohusa mielde sámiid kultur- ja giellabeassedoibmii mieđihuvvošii 200 000 euro lasseruhta jahkái 2021, dalle kultur- ja giellabeassedoibmii mieđihuvvon doarjaga ollessubmi livččii 1,4 miljon euro.

Sámediggi lea evttohan riikkabeivviide kultur- ja giellabeassedoaimma ruhtadeami lasiheami, vai doaimma sáhttá joatkit dan viidodagas masa lea dárbu. Váljagotti smiehttamuša mielde bajádus vástida sámegiela ealáskahttinprográmma guoski stáhtaráđi prinsihppamearrádusa mihttomeari, man mielde giellabeassedoaimma ruhtadeami galggašii lasihit vehážiid mielde 1,4 miljon euroi.  Sámedikki ságadoalli Tuomas Aslak Juuso lea duđavaš, ahte lasáhus lea boahtimin.

– Fiinnis, ahte juovlaskeaŋkaruđaid bokte sáhttá johtilit lasihit ruhtadeami akuhta dárbbuid várás. Sámegielaid ealáskahttin dárbbaša beaktilis doaimmaid, go gielaid dilli lea ain áitatvuloš. Sávvamis dát maid geažida dan, ahte ruhtadeapmi livččii bissovaččat bajiduvvomin.

Lasáhusain nagodat dorvvastit buot dálá kultur- ja giellabesiid doaimma, muhto maid ovdánahttit doaimma. Stáhta bušeahtas lea jagi 2011 rájes čujuhuvvon oahpahus- ja kulturministeriija váldoluohkás mearreruhta sámiid kultur- ja giellabeassedoaimma várás. Sámediggi juohká doarjaga ovddos doaimma lágideaddjiide. Sámiid kultur- ja giellabeassedoaibma lágiduvvo davvi-, anár- ja nuortalašsámegillii sámiid ruovttuguovllus ja dan olggobealde ja dat adnojuvvo oktan beaktilamos doaibman ealáskahttit sámegielaid.

Ruhtaváljagotti bušeahta lasáhusat riikkabeivviin jagi 2021 stáhta bušeahta gieđahallama oktavuođas ovdal juovllaid. Skábmamánu dievasmahtti evttohusas stáhta jagi 2021 bušeahttan lea váldon vuhtii lasáhussan 34 000 euro bálkámáksimiid dárkkistusaide, ja ná sámiid kulturiešstivrejumi bajásdoalus šaddi manuid várás evttohuvvo jahkái 2021 oktiibuot 3 943 000 euro. Sámedikkis ledje maid eará evttohusat lassemearreruhtan, muhto dat eai váldon vuhtii dán háve.

Evttohus, mii guoská stáhta 2021 bušeahta lassemearreruđa

Sámediggái evttohuvvo jagi 2021 bušeahtas lasáhus hálddahusa ovdánahttimii

Lassedieđut:

Ságadoalli Tuomas Aslak Juuso t. 040 687 3394 / 010 839 3101, tuomas.juuso(at)samediggi.fi

Gielladorvočálli  Anne Kirste Aikio t. 010 839 3124 / 040 707 5626, anne-kirste.aikio(at)samediggi.fi

Pöydällä pidettävä saamen lippu ja liituja muovirasiassa.

Sámediggi almmuha ohcanláhkai mearreáigásaš giellabeassejođiheaddji doaimma

/in , /by

Sámediggi almmuha ohcanláhkai mearreáigásaš giellabeassejođiheaddji doaimma. Bargu álgá 11.1.2021 dahje soahpamuša mielde ja bistá 31.12.2021 rádjai dahje vejolaččat guhkitge, jus sierraruhtadeapmi sihkkarastojuvvo. Giellabeassejođiheaddji bargui gullet ee. sámiid giellabeassedoaimma jođiheapmi, koordineren ja ovddideapmi sihke giellabesiid stáhtadoarjaga hálddašeapmái gullevaš barggut.

Seađáhusvuđot gelbbolašvuođagáibádussan lea doaimma eaktudan skuvlejupmi ja sámegiela dáidu (ásahus 1727/95). Doaimma ceavzilis dikšun eaktuda oppalaš  pedagogalaš oainnu sápmelaš árrabajásgeassimis, giela ealáskahttinmetodaid dovdama sihke dovddiidusa sámekultuvrii ja stáhtadoarjaga hálddašeapmái gullevaš bargguide. Sávvat ahte bargui válljejuvvon olbmos lea mánáidgárdeoahpaheaddji gelbbolašvuohta.  Bálká mearrašuvvá sámedikki bálkávuogádaga gáibádusdási IV/II-III mielde (vuođđobálká 2625,08-2 565,88). Vuođđobálkká lassin máksojuvvojit 24 %:a sámeguovllu lassi ja bargohárjánumi mielde ahkelasit. Barggus čuvvojuvvo guovtte mánotbaji geahččalanáigi.

Ohcamušaid čuvvosiiguin galgá doaimmahit sámedikki čállingoddái 7.1.2021 radjái čujuhusas:

https://www.sympahr.net/public/pq.aspx?7c206795

Lassidieđuid barggus addá gielladorvočálli Anne Kirste Aikio tel. 010 8393 124. Sámedikki doaimmaide sáhttá oahpásmuvvat neahttačujuhusas www.samediggi.fi

Anáris 15.12.2020 Sámediggi

Petra Kuuva Sámedikki oahppamateriálačállin

/in , /by

Sámedikki stivra nammadii čoahkkimisttis 10.12.2020 bajásgeassindiehtagiid magisttar Petra Kuuva oahppamateriálačálli virgái. Mearreáiggi siste virgái bohte golbma ohcamuša. Kuuva álggaha barggus jagi 2021 álggus, go guhkesáigásaš oahppamateriálačálli Hannu Kangasniemi báhcá ealáhahkii.

Kuuva lea ovdal bargan guhká anárašgielat oahpahusa ja anárašgiela oahpaheaddjin sierra luohkkádásiin ovdaoahpahusas gitta nuppi dási skuvlejupmái, ja maŋimuš Sámedikkis giellabeassejođiheaddjin, ja ovdal dan son barggai sámegielat mánáidmateriálafitnu plánejeaddjin.

Kuuva lea ilus, go oažžu bargagoahtit sámegielat oahppamateriálaiguin. – Lea buorre dovdu, go beassá bargat oahppamateriálabarggu oassin viiddes fierpmádagas ja čeahpes doaimmahagas. Hannu guhkesáigásaš bargu lea buorre vuođđu joatkit mávssolaš ja dehálaš barggu. Liekkus váimmuin válddán dán movttiidahtti barggu vuostá, dadjá Kuuva.

Oahppamateriálačálli bargun lea válmmaštallat sámegielat oahppamateriála buvttadeapmái guoski áššiid, doaibmat skuvlen- ja oahppamateriálalávdegotti ja sámiid skuvlenáššiid ovttasbargoorgána áššemeannudeaddjin, čállin ja válmmaštallin oahppamateriálaáššiin ja ollašuhttit lávdegotti, ovttasbargoorgána, Sámedikki stivrra ja Sámedikki dievasčoahkkima iežas doaibmasuorggi mearrádusaid.

Oahppamateriálačálli čuovvu ja hálddaša oahppamateriálamearreruđa geavaheami ja materiálafitnuid, goziha mearreáigásaš oahppamateriálabargiid barggu, fuolaha oahppamateriálafitnuid doaimmahusbarggus, veahkeha Sámedikki sátnejođiheaddji doaibmasuorgásis gullevaš bargguin ja doallá oktavuođa rastá rájiid eará sámeorganisašuvnnaide ja iešguđet virgeoapmahaččaide.

Skuvlen ja oahppamateriála

Lassedieđut

Hálddahushoavda Pia Ruotsala-Kangasniemi, 010 839 3106 / 040 726 2688, pia.ruotsala(at)samediggi

Skuvlenčálli Ulla Aikio-Puoskari, 010 839 3112 / 040 767 3101, ulla-aikio-puoskari(at)samediggi.fi

Buori iehčanasvuođabeaivvi 6.12.2020

/in /by

Buori iehčanasvuođabeaivvi!

Šiev jiečânâsvuođâpeivi!

Šiõǥǥ jiõččnažvuõttpeeiʹv!

Hyvää itsenäisyyspäivää!

Happy Independence Day Finland!