Ságajođiheaddji Tuomas Aslak Juuso: Ruvkelága ođastus lea dehálaš sápmelaččaide

“Ruvkelága ođastus lea dál okta dain deháleamos láhkaásahanprošeavttain sámiid dáfus. Intreassaid ruossalasvuođat ja daid árvvoštallan, sámiid ruovttuguovllu luonddu rašesvuohta ja áidnalunddotvuohta, sámekultuvrra hedjonahttingielddus ja dasa laktáseaddji váikkuhusaid árvvoštallan, friija dihtui vuođđudeaddji ovdamiehtan ja árbevirolaš sámeealáhusaid boahttevuohta leat guovddáš áššit, maid ođđa láhkaásaheapmi galgá vuhtii váldit”, dadjá ságajođiheaddji Tuomas Aslak Juuso.

Ruvkelága ođadeami, mii dál jođus, ulbmilin lea buoridit ruvkkiid birassuodjaleami ja doaibmaneavttuid. Lassin mihttomearrin lea nannet sihke ruvkkiid dohkkehahttivuođa báikkálaččat ja áššeosolaččaid váikkuhanvejolašvuođaid.

Ruvkelága ođasmahttima doarju bargojoavku lea bivdán barggu várás lassiáigge jagi 2021 lohppii, vuoi intreassaveardádallama sáhttá čielggadit viidát ja čielggadeami bohtosiid váldit fárrui bargui. Intreassaveardádallamiin dárkkuhuvvo ruvkefidnu ávkkiid ja hehttehusaid guorahallan, man vuođul árvvoštallošii, sáhttágo fidnui mieđihit lobi. Ruvkedoaimma ávkkálaš áššin ovdan buktojit dávjá barggolašvuohta ja ruvkkiin ožžojuvvon materiálat. Hehttehussan leat gávnnahuvvon earret eará ruvkedoaimma birasváikkuhusat, vejolaš hehttejumit eará ealáhusaide ja váikkuhusat eará eanageavaheapmái.

II várreságajođiheaddji Leo Aikio

Sámediggi leage ovdal máŋggain oktavuođain evttohan bargo- ja ealáhusministarii, ahte ruvkelága mieldásaš lohpeproseassain galggašii váikkuhusaid árvvoštallama ja gohcima várás vuođđudit sorjjasmeahttun árvvoštallan- ja gozihanorgána. Orgána bargguide gulašedje sámiid eamiálbmotvuoigatvuođaide váikkuheaddji doaimma váikkuhusaid árvvoštallan ja gohcin.

”Vuordit miellagiddevašvuođain intreassaveardádallama gárváneami. Lea čielggas, ahte lohpevirgeoapmahaččat eai dál dovdda birrasa ja sámekultuvrra oktavuođa, eaige dovddas ruvkedoaimma birrasis dagahan nuppástusaid váikkuhusa sámekultuvrii ja vejolašvuođaide bargat sámiid árbevirolaš ealáhusaiguin, lohká II várreságajođiheaddji Leo Aikio.

Sámedikki čoahkkin geavai sáttaságastallama ruvkelága ođadeamis čakčamánus 2020. Sáhkavuoru geavahan lahtut bukte ságastallamis ovdan fuola dálá ruvkepolitihkas ja erenomážit ovdan badjánii Ei kaivoksia Suomen käsivarteen-lihkadusa bargu Eanodaga duottarluonddu ja árbevirolaš ealáhusaid beales.

”Ođđa ruvkelágas galgá sihkkarastit sámiide eakti váikkuhanvejolašvuođaid ruvkkiid guoski mearrádusbargamii sámiid ruovttuguovllus. Lea morašlaš oaidnit, makkár luottaid ruvkedoaibma guođđá lundui. Dát lea min ruktomet. Eat miige mana nuppiid ruovttuide hedjonahttit sin ealáhusaid ja vejolašvuođaid bargat ealáhusaiguin”, joatká Aikio.

Duogáš:
  • Bargo- ja ealáhusministeriijaleaálggahanruvkeláhkaásaheamiođadeami Marin ráđđehusprográmmiigullevašgirjemiidvuođulnu ahte ásahiigolggotmánus 2019 láhkaválmmaštallanproseassa lágarievdadeami várás.
  • Válmmaštallamadoarjut lea vuođđuduvvonruvkelága ođadeami Sámedikkiovddasteaddjin bargojoavkkus lea Tiina Sanila-Aikio ja várrelahttun ealáhusčálli Sarita Kämäräinen.
Lassidieđut:

Ságajođiheaddji Tuomas Aslak Juuso tel. 040 687 3394 / 010 839 3101, tuomas.juuso(at)samediggi.fi

II várreságajođiheaddji Leo Aikio tel. 040 621 6505 / 010 839 3180, leo.aikio(at)samediggi.fi

Vs. láhkačálli Kalle Varis tel. 010 839 3187 / 050 384 7040, kalle.varis(at)samediggi.fi

Vs. birasčálli Tiina Lovisa Solbär tel. 010 839 3184 / 050 599 9725, tiinalovisa.solbaer(at)samediggi.fi

Ealáhusčálli Sarita Kämäräinen tel. 010 839 3143 / 040 186 7258, sarita.kamarainen(at)samediggi.fi