SDM máhcahii badjealbmáid sadjásašveahkkediimmuid dási ovddeža dássái – Sámediggi lea evttohan sadjásašveahkkediimmuid meari bajideami dálá dárbbu vástideaddji dássái

Sosiála- ja dearvvasvuođaministeriija nannii skábmamánu 5 beaivve badjealbmáide buhttejuvvon sadjásašveahkkediimmuid eanemus mearrin 200 sadjásašveahkkediimmu badjealbmá ektui jagi 2020. Ovdal sadjásašveahkkediimmuid eanemus mearri jahkái 2020 ásahuvvui eará láhkai go dábálaččat dušše 120 diimmu badjealbmá ektui. Sámediggi lea evttohan sadjásašveahkkediimmuid meari bajideami dálá dárbbu vástideaddji dássái uhcimustá 300 diibmui jagis.

”Sadjásašveahkkediimmuid máhcaheapmi ovddit dássái lea rivttes guvlui dahkkon divvun, muhto ii vel doarvái. Sámediggi lea evttohan, ahte badjealbmáid sadjásašveahki buorideami oktavuođas sadjásašveahkkái budjeterejuvvon mearreruhta sihke sadjásašveahkkediimmuid mearri bajiduvvojit dálá dárbbu vástideaddji dássái, gávnnaha Sámedikki ságajođiheaddji Tuomas Aslak Juuso.

Jagi 2019 badjealbmáin lei vuoigatvuohta geavahit 200 sadjásašveahkkediimmu, muhto liikká sadjásašveahkkebuhtadusaid dárbu manai badjel mearreruđa, mii lei daidda sosiála- ja dearvvasvuođaministeriija bušeahtas várrejuvvon. Dan dihtii Mela ii leat sáhttán máksit badjealbmáide sadjásašveahkkebuhtadusaid loahppajagi 2019 oasil. Sámediggi doarjalii čakčamánus 2020 ministtar Kiurui badjealbmáid loahppajagi 2019 mávssekeahttá leahkki sadjásašveahkkebuhtadusaid máksima dihtii.

”Boazodoallu lea váralaš ealáhus, dasgo dasa laktásit luonddus olu johtin iešguđetlágan dálke- ja luonddudiliin, sihke iešguđetlágan bargomuttut, mat vejolaččat dagahit dáhpedorpmiid. Lea čielggas, ahte 200 diimmu ii leat doarvái viiddes sadjásašveahkki dakkár dilis, juos badjealbmái sáhtto lossa bárti dahje son buohccá guhkálaččat, lohká II várreságajođiheaddji Leo Aikio.

Boazodoallu lea sadjásašveahki oasil eahpedásseárvosaš sajádagas veardidettiin eanadoalu sierra suorgin gehččon ealáhusaide, nugo eanadollui.  Mela luopmosadjásašstatistihka mielde eanadoalli geavahii jagi 2019 gaskamearálaččat 314 diimmu sadjásašveahki, go fas badjealbmás lea vuoigatvuohta dušše 200 diibmui. Sámedikki oainnu mielde badjealbmáid várás galgá leat anus uhcimustá 300 sadjásašveahkkediimmu jagis buohcuvuođa ja bártideami várás.

“Badjealbmáid sadjásašveahkkelága oppalašođastus lea vealtameahttun maiddái buolvvaid gaskasaš dásseárvvu ovddideami dáfus. Dálá dilis nissonolmmošbajonis ii ovdamearkan leat vuoigatvuohta sadjásašveahkkái riegádahttima dahje smávvamáná dikšuma áigái”, joatká Juuso.

Giđa 2020 áigge Sámediggi doaimmahii evttohusa ja ságastalai sosiála- ja dearvvasvuođaministeriija ja MELA ovddasteaddjiiguin badjealbmáid sadjásašveahkis ja dan ovddideamis. Sámediggi lea ovdan buktán fuola sápmelaš badjealbmáid sosiáladorvvu ollašuvvamis, barggus veadjimis ja bargoeallima guhkideamis. Lassin Sámediggi lea evttohan, ahte lága badjealbmáid sadjásašveahkis (1238/2014) galggašii ođasmahttit, nu ahte dat dáhkidivčče badjealbmáide ovttaveardásaš sajádaga eanadoalu sierra ealáhusaiguin bargiid ektui.

Lassidieđu ohcama birra oaččot Melas Maatalousyrittäjien eläkelaitos Mela

Boazoolbmuid sadjásašveahkkediimmuid jagi 2020 dássi lea máhcahuvvon ovddežii (5.11.2020)

Lassidieđut:

Ságajođiheaddji Tuomas Aslak Juuso tel. 040 687 3394 / 010 839 3101, tuomas.juuso(at)samediggi.fi

II várreságajođiheaddji Leo Aikio tel. 040 621 6505 / 010 839 3180, leo.aikio(at)samediggi.fi

Ealáhusčálli Sarita Kämäräinen tel. 010 839 3143 / 040 186 7258, sarita.kamarainen(at)samediggi.fi

Sosiála- ja dearvvasvuođačálli Anne Länsman-Magga tel. 010 839 3128 / 040 182 9998, anne.lansman-magga(at)samediggi.fi