Pirâsministeriö já Sämitigge ráđádâllii pirâslaavâst

/in , /by

Pirâsministeriö já Sämitige ovdâsteijeeh ráđádâllii sämitiggelaavâ 9. § mield šoŋŋâdâhlaavâst majebaargâ 27. peeivi roovvâdmáánu. Haldâttâs iävtuttâs uđâsmittum šoŋŋâdâhlaahân lii tárguttâs valmâštuđ kiđđuv 2021.

Ráđádâlmist sämitige ovdâsteijeeh puohtii oovdân uáinuid tast, ete maht sämmilij vuoigâdvuođâid kolgâččii väldiđ huámmášumán šoŋŋâdâhlaavâst.

”Šoŋŋâdâhnubástus uhked eromâšávt sämmilâškulttuur já ton ärbivuáválijd luándun vuáđuduvvee iäláttâsâid. Mij halijdep nanodiđ šoŋŋâdâhlaavâ uđâsmitmist sämmilij vuoigâdvuođâid algâaalmugin já uásálistemmáhđulâšvuođâid šoŋŋâdâhpolitiikân”, iätá ráđádâlmáid uásálistám pirâs- já šoŋŋâdâhminister Krista Mikkonen.

Ráđádâlmijn pajanij oovdân šoŋŋâdâhnubástusân vuáhádume tehálâšvuotâ já vuáhádume tuárjum sehe tárbu toohâđ tiätuvuáđu, äššitobdeeárvuštâllâm sehe čuávvum šoŋŋâdâhnubástus vaikuttâsâin sämmilij uáinust.

”Mun halijdâm kijtteđ minister tast, ete minister lii jieš ráđádâlmin sämitiggijn. Tot lii härvinâš. Sämmilii šoŋŋâdâhpolitiik oovdedmân mun anam eromâš tehálâžžân, ete šoŋŋâdâhlaahâ ana sistees sämmilii šoŋŋâdâhpaaneel sehe šoŋŋâdâhnubástusân vuáhádum ohjelm. Sämmilij vuoigâdvuođâi huámmášumán väldim vijđásubbooht šoŋŋâdâhlaavâst lii tiervâpuáttim já tuođâi taarbâšlâš”, iätá Sämitige saavâjođetteijee Tuomas Aslak Juuso.

Aalmugjesânij uáinuid šoŋŋâdâhlaavâst noreh viermikoijâdâlmijguin

Šoŋŋâdâhlaavâ uđâsmitmist lii eidu joođoost puohháid ávus viermikuullâm. Koijâdâlmeh láá kyehti, já nube koijâdâlmist noreh tiäđu eromâšávt tast, ete maht sämmilij vuoigâdvuođâid kolgâččii kirjiđ šoŋŋâdâhlaahân. Koijâdâlmáid puáhtá västidiđ sämikielân.

Koijâdâlmáid puáhtá västidiđ Otakantaa-siijđoin. Koijâdâlmeh láá ávus 12.11.2020 räi. Vástádâsâin ráhtoo čuákánkiäsu, mii toimâttuvvoo laavâ valmâštâllee pargojuávkun já almostittoo pirâsministeriö viermisiijđoin.

Lasetiäđuh:

Pirâs- já šoŋŋâdâhminister sierânâsišedeijee Riikka Yliluoma, p. 0295 250 091, riikka.yliluoma@ym.fi

Šoŋŋâdâhlaavâ uđâsmittee pargojuávhu saavâjođetteijee, pajehovdâ Leena Ylä-Mononen, pirâsministeriö, p. 0295 250 023, leena.yla-mononen@ym.fi

Pirâsčällee Tiina Lovisa Solbär, Sämitigge, p. 010 839 3184, tiinalovisa.solbaer@samediggi.fi

Saavâjođetteijee Tuomas Aslak Juuso, Sämitigge, p. 010 839 3101, tuomas.juuso@samediggi.fi

Luuvâ lase šoŋŋâdâhlaavâst já ton uđâsmitmist pirâsministeriö viermisiijđoin

Sämitige kuullâmtilálâšvuođah tuotâvuotâ- já sovâdâttâmkomissaarij valjiimist

/in , , /by

Sämitigge uárnee kulâmijd sämiaalmugân tuotâvuotâ- já sovâdâttâmkomissaarij valjiimijn. Koronatile tiet tilálâšvuođah tuállojeh káidusohtâvuođâi peht.

Káiduskulâmeh uárnejuvvojeh Zoom-heiviittâs peht já kulâmáid puáhtá uásálistiđ jo-uv heiviittâs peht tâi nuuvt, ete suáittá puhelimáin. Káiduskulâmáid kalga almottâttâđ muuneeld majemustáá ton kuullâmtilálâšvuođâ oovdeb argâpeeivi tme 12.00 räi taan liiŋkâst (https://link.webropolsurveys.com/S/9A23CFEB09B76748) tâi suáittimáin numerân 040 676 5102. Mij vuolgâttep almottâttâm ulmuid šleđgâpoostâ peht liiŋkâ kuullâmtilálâšvuođáid, uásálistemravvuid sehe eettisijd ravvuid tilálâšvuođâi savâstâllâm vuáđđun.

Kuullâmtilálâšvuođâi orniimist váldojeh huámmášumán jieškote-uv sämikielâjuávhuh sehe suomâkielâ. Toos lasseen tilálâšvuođâin váldojeh huámmášumán ulmuuh, kiäh ääsih sämmilij päikkikuávlu jieškote-uv  kuávluin já ton ulguubeln. Puoh sämikielâlijn tilálâšvuođâin lii Zoom-heiviittâs peht uásálistdijn tulkkum sämikielâ-suomâkielâ.

Kuullâmtilálâšvuođâi saavâjođetteijen tuáimá psykiatrâlâš pyecceetipšoo Niila Rahko já čällen Sämitige má. vuávájeijee Heli Aikio.

Kuullâmtilálâšvuođah päddejuvvojeh já päädih siäiluttuvvojeh Sämitiggeest kyevti oho ääigi tilálâšvuođâ maŋa raportistem toorjân. Puoh kuullâmtilálâšvuođâin ráhtoo muštottemčáálus já muštottemčáállusij vuáđuld ráhtoo raapoort Sämitige stiivrâ já tievâsčuákkim anon komissaarij valjiimân kyeskee miärádâstoohâm toorjân.

Káiduskuullâmtilálâšvuođâi lasseen jieijâs uáinu tuotâvuotâ- já sovâdâttâmkomissaarijn vattum jiešvuođâin já máátust sehe torjuu iävtukkâssân orroo ulmuid puáhtá pyehtiđ oovdân Sämitiigán meid šleđgâpoostâ peht info(at)samediggi.fi, poostâ peht čujottâsân Sämitigge, Sajos, 99870 Aanaar 17.11.2020 räi tâi puhelin peht muuneeld almottum puhelinaaigijn.

Káiduskulâmij äigitavlu:
  • Koskokko 4.11.2020 tme 18–20.30 suomâkielâlâš kuullâm
  • Vuossargâ 9.11.2020 tme 18–20.30 tavesämikielâlâš kuullâm Aanaar kuávlust ässee ulmuid
  • Majebargâ 10.11.2020 tme 18–20.30 tavesämikielâlâš kuullâm Vuáču kuávlust já sämmilij päikkikuávlu ulguubeln ässee ulmuid
  • Koskokko 11.11.2020 tme 18–20.30 anarâškielâlâš kuullâm
  • Tuorâstâh 12.11.2020 tme 18–20.30 sämmilâšnuorâi kuullâm
  • Vuossargâ 16.11.2020 tme 18–20.30 tavesämikielâlâš kuullâm Ucjuv já Iänuduv kuávlust ässee ulmuid
  • Majebargâ 17.11.2020 tme 18–20.30 nuorttâlâškielâlâš kuullâm

Káiduskulâmáid kalga almottâttâđ muuneeld majemustáá ton kuullâmtilálâšvuođâ oovdeb argâpeeivi tme 12.00 räi taan liiŋkâst (https://link.webropolsurveys.com/S/9A23CFEB09B76748) tâi suáittimáin numerân 040 676 5102.

Puhelinääigih:
  • Vuossargâ 2.11.2020 tme 9–16.00 anarâškielâlâš puhelinkuullâm, Heli Aikio, puh. 040 676 5102 / 010 839 3107
  • Majebargâ 3.11.2020 tme 9–16.00 tavesämikielâlâš puhelinkuullâm, Pia Ruotsala-Kangasniemi, puh. 040 726 2688 / 010 839 3106
  • Koskokko 4.11.2020 tme 9–16.00 nuorttâlâškielâlâš puhelinkuullâm, Laura Olsén-Ljetoff, puh. 040 617 5113 / 010 839 3190
  • Vástuppeivi 6.11.2020 tme 9–16.00 suomâkielâlâš puhelinkuullâm, Heli Aikio, puh. 040 676 5102 / 010 839 3107
Lasetiäđuh

čällee, má. vuávájeijee Heli Aikio, 040 676 5102 / 010 839 3107, heli.aikio(at)samediggi.fi

saavâjođetteijee išedeijee Laura Olsén-Ljetoff, 040 617 5113 / 010 839 3190, laura.olsen-ljetoff(at)samediggi.fi

Sämitige siijđoh tuotâvuotâ- já sovâdâttâmkomissiost

Komissaariävtukkâsah

Kove: Tarja Länsman

Säämi Kielâkäldee stiivrâ saavâjođetteijee lii väljejum

/in , , /by

Säämi kielâkäldee stivrâ lii tääl nomâttum, já stivrâ lii valjim saavâjođetteijee já värisaavâjođetteijeid.

Säämi Kielâkäldee lii Suomâ, Taažâ já Ruotâ Sämitiigij ohtsâštave-eennâmlâš äššitobdeeorgaan sämikieláid kyeskee aašijn. Säämi Kielâkäldee ulmen lii sämikielâ kirjekielâi já sárnumkielâi hammim kulttuuräärbi siäiluttem, kattim já ovdedem. Haaldâtlávt Säämi Kielâkäldee tuáimá Taažâ Sämitige ohtâvuođâst.

Säämi Kielâkäldee joođeet stivrâ, mast kuulmâ Sämitiggeest lii ovtviärdásâš ovdâstem.

Säämi kielâkäldee stivrâ:

Ole Henrik Magga, värijeessân: Raimo Valle

Tauno Ljetoff, värijeessân: Neeta Jääskö

Sig-Britt Persson, värijeessân: Karin Rensberg Ripa

Mikael Svonni, värijeessân: Per-Eric Kuoljok

Magreta Sara, värijeessân: Klemetti Näkkäläjärvi

Ann-Mari Thomassen, värijeessân: Maja-Lisa Kappfjell

Stiivrâ saavâjođetteijee: Ole Henrik Magga

Värisaavâjođetteijeeh: Tauno Ljetoff já Sig-Britt Persson

 

Säämi Kielâkäldee stivrâ lii väljejum neelji ihán, 2020-2023. Stiivrâ saavâjođetteijee já värisaavâjođetteijee toimâpaje lii pelnub ihe, já talle väljejuvvoo uđđâ saavâjođetteijee ja värisaavâjođetteijeeh.

Lasetiäđuh:

Sämitigge Suomâ peln, Pia Ruotsala-Kangasniemi, +358 40 726 2688

Sämitigge Taažâ peln, Inger Marit Eira Åhrén, +47 971 29 744

Sämitigge Ruotâ peln, Anita Kitok, +46(0)73-049 41 04

Oopâ saanijd -kovesänikirje almostuvá digikirjen

/in , /by

Pivnohis Oopâ saanijd -kovesänikirje almostuvá tääl digiversion. Algâalgâlii kirje rähtee lii Matti Morottaja já kirje kuuvijd lii sárgum Sirpa Seppänen. Matti Morottaja meid lohá saanijd digikiirján. Digikirjeest láá kevttum algâalgâlii kirje koveh já teevstah.

Digikiirján lii kove já teevstâ lasseen lasettum jienâ. Saanijd lii tääl máhđulâš máttááttâllâđ meid jienâdiđ.

Digikirje lává teknisávt olášuttâm Anne Seipiharju já Miina Seurujärvi, suoi västidáin meid jienâi paddiimist. Jienâpaadij čuoppâmist já jienâi kietâdâlmist lii västidâm Janne Lappalainen.

Sämitige oppâmateriaaleh

https://www.samediggi.fi/tuote/oopa-saanijd-jienakirje/?lang=an

Sämmilij kielâliih vuoigâdvuođah -siijđoh almostittojeh virgeomâhái pargo toorjân

/in , /by

Sämitigge almostit sämikielâi ohhoost tieđettemsiijđoid, kuus láá nurrum ravvuuh virgeomâháid säämi kielâlaavâ heiviitmân. Siijđoi almostittemtilálâšvuotâ lii vástuppeeivi 23.10.2020 tijme 10.00-11.00. Oovdânpyehtimtilálâšvuođâst Sämitige kielâtorvočällee Anne Kirste Aikio oovdânpuáhtá siijđoi siskáldâs já kevttimmáhđulâšvuođâid. Sämitigge haalijd pivdeđ sierâ virgeomâháid uápásmuđ sijđoid.

– Táálái tiäđui mield sämmilij kielâliih vuoigâdvuođah olášuveh hiäjuht. Uásisuijân toos lii eereeb iärrás virgeomâhái tietimettumvuotâ tâi peerustmettum jurdâččemvyehi säämi kielâlaavâ kuáttá. Tai uđđâ siijđoi ulmen lii adeliđ virgeomâháid ääigitásásii tiäđu sämmilij kielâlijn vuoigâdvuođâin, já tuárjuđ sii kielâlij vuoigâdvuođâi huámmášumán väldimist keevâtlii pargoost ravvui já oonâi vievâst. Siijđoh heivejeh pyereest ovdâmerkkân uđđâ pargei uápásmitmân tâi škovlimpeivijd, muštâl kielâtorvočällee Anne Kirste Aikio

Siijđoin lii tiätu sämmilij kielâlijn vuoigâdvuođâin já ravvuuh säämi kielâlaavâ heiviitmist. Siijđoh láá 23.10.2020 rääjist čujottâsâst: https://www.samediggi.fi/saamelaisten-kielelliset-oikeudet/

Siijđoin lii tiätu sämmilij kielâlijn vuoigâdvuođâin já ravvuuh säämi kielâlaavâ heiviitmist. Siijđoh láá uáivildum toorjân puohháid, kiäh pargeh sämikielâlij palvâlusâi ooleest. Ulmen lii, ete jyehi virgeomâhâš, kiäs säämi kielâlaahâ kuáská, tobdá  já ibbeerd sämmilij kielâlijd vuoigâdvuođâid.

Siijđoi teevstâid lii lamaš pyevtitmin hahâpargee Tuuli Miettunen. Siijđoi kuuvijn lii västidâm Erja Wiltse. Siijđoh almostittojeh tuš suomâkielân. Sämitigge lii meid valmâštâlmin tieđettemmateriaal sämikielân sämiaalmugân kielâlijn vuoigâdvuođâin siijđoi ohtâvuotân.

Siijđoh láá 23.10.2020 rääjist čujottâsâst: https://www.samediggi.fi/saamelaisten-kielelliset-oikeudet/

Oovdânpyehtimtilálâšvuotâ lii Teams-ohtâvuođâ peht, te uásálisteid pivdep almottiđ majemustáá tuorâstuv 22.10.2020 uásálistmist čujottâsân anne-kirste.aikio(at)samediggi.fi

Sämikielâi okko ávuduvvoo 19.-25.10.2020 ja Sämitigge lii pivdám puohâid uásálistiđ teemaookon ovdâmerkkân tábáhtusâid orniimáin já pyehtimáin sämikielâid oovdân.

www.giellavahkku.no

Lasetiäđuh:

Anne Kirste Aikio, kielâtorvočällee
anne-kirste.aikio(at)samediggi.fi

Sämitigge almoot uuccâmnáál oppâmateriaalčällee virge

/in , /by

Sämitigge almoot uuccâmnáál oppâmateriaalčällee virge. Oppâmateriaalčällee pargoh láá miäruštâllum Sämitige pargo-oornig 40 §:st. Oppâmateriaalčällee pargon lii valmâštâllâđ sämikielâlii oppâmateriaal pyevtitmân kyeskee aašijd, toimâđ škovlim- já oppâmateriaallävdikode já sämmilij škovlimaašij oovtâstpargo-orgaan oovdânpyehten, čällen já valmâštâllen oppâmateriaalaašijn sehe olášuttiđ lävdikode, oovtâstpargo-orgaan, Sämitige stiivrâ já tige čuákkim toohâm jieijâs toimâsyergi miärádâsâid. Oppâmateriaalčällee čuávu já haaldâš oppâmateriaalmeriruuđâ kevttim já materiaalhaavâid, kocá meriáigásij oppâmateriaalpargei pargo, huolât oppâmateriaalhaavâi toimâttempargoost, iššeed tige saavâjođetteijee jieijâs toimâsuárgán kullee pargoin sehe tuálá ohtâvuođâ eres sämmilâšornijduumijd raajij rasta já sierâ virgeomâháid.

Asâttâsân vuáđuduvvee tohálâšvuotâvátámâš lii virge vaattâm škovlim já lasseen váttoo sämikielâ táiđu (asâttâs 1727/95). Virge miänástuvvee hoittám váátá hiäivulii ollâškovlâtotkos, škovlimaašij já  haaldâtlij pargoi tubdâm sehe šiev oovtâstpargo- já vuáruvaikuttâstááiđuid.

Pälkki meriduvvoo Sämitige pälkkivuáháduv vátávâšvuođâtääsi IV/II mield (vuáđupälkki losijttáá 2653,96 eurod/mp). Vuáđupäälhi lasseen máksojeh pargohárjánem mield hárjánemlaseh sehe 24 % sämikuávlu lase. Virge tiävdoo 1.1.2021 rääjist já virge tevdimist nuávditteh kuuđâ mánuppaje keččâlemääigi.

Ucâmušâid lahtosijguin kalga toimâttiđ Sämitige čäällimkoodán 23.11.2020 räi čujottâsân https://www.sympahr.net/public/pq.aspx?dfb15561

Lasetiäđuid adelává škovlimčällee Ulla Aikio-Puoskari 010 839 3112 já oppâmateriaalčällee Hannu Kangasniemi 010 839 3115. Sämitige tooimân puáhtá uápásmuđ nettičujottâsâst www.samediggi.fi.

Anarist 20.10.2020 Sämitigge

Kove: Ville Fofonoff

Sämikielâi káidusmáttááttâshaahâ lii iävtukkâssân Cygnaeus-palhâšume uážžon

/in , /by

Máttááttâshaldâttâs lii nomâttâm sämikielâi káidusmáttááttâs piiloothaavâ ohtân Cygnaeus-palhâšume finalistân. Haahâ lii ornim čoovčâ 2018 rääjist anarâš-, nuorttâlâš- já tavesämikielâ máttááttâs sämmilij päikkikuávlu kieldâi ulguubeln. Taan luuhâmive haahâ uárnee máttááttâs suulân 92 uáppeid ohtsis 65 škoovlâst pirrâ eennâm. Oovtâstpargoost láá mieldi 35 máttááttâs uárnejeijed.

– Taat lii tuođâi ilolâš uuđâs, iätá haavâ jođetteijee Hanna Helander Ucjuv kieldâst. – Haahâ lii pyereest joođoost já uáppeemeeri lii lasanâm masa kyevtkiärdásâžžân čoovčâ 2018 rääjist. Jo tuš iävtukkâssân nomâttem lii merhâšittee mijjân hahâpargeid, iätá Helander. – Taat movtijdit vissásávt mii máttáátteijeid, kiäh jo mudoi-uv uáli iäljárávt ovdedeh mii máttááttâs.

Haavâ máttáátteijen taan luuhâmive pargeh Henna Aikio, Satu-Marjut Nieminen, Joni Saijets, Sirkka Sanila já Sonja Moshnikoff. Tavesämikielâ uáppeeh láá ohtsis 44, anarâškielâ 28 já nuorttâlâškielâ 20. – Haahâ uárnee máttááttâs pedagogisávt sehe kielâ- já ahetääsi mield nuuvt hiäivulijn juávhuin, ko máhđulâš. Feerimeh láá pyereh, iätá Helander.

Haavâ Sämitiggeest pargee koordinaattor Arla Magga ana iävtukkâsvuođâ tehálâžžân haavâst rahtum pargo oinum tááhust. – Viehâ maŋgii mij kuullâp kommentijd, moi tuáváást lii imâštâllâm tast, ete puáhtá-uv sämikielâ máttááttâs kuoskâd mijjân, Maadâ-Suomâst tuáimee máttááttâs uárnejeijeid. Sämmilâšpárnáin já -nuorâin kuittâg jo 2/3 áásá já jotá škoovlâ eres saajeest ko sämmilij päikkikuávlust, iätá Magga.

Sämitige škovlimčällee Ulla Aikio-Puoskari muštâl, ete káidusmáttááttâshaahâ lii vuossâmuš lävkki sämikielâi máttááttâs fastâditmân päikkikuávlu kieldâi ulguubeln. – Máttááttâs- já kulttuurministeriö asâttem sämikielâi já sämikielâlii máttááttâs ovdedempargojuávkku parga eidu ääši ooleest. Pargojuávkku almostit iävtuttâsâs täst já maaŋgâ eres ääsist puáttee ive aalgâbeln.

Cygnaeus-palhâšume 2020 uážžoo almostittoo 23.11.2020 palhâšumejyehimtilálâšvuođâst, mii uárnejuvvoo neetist. Palhâšume juáhá Máttááttâshaldâttâs uáivihovdâ Olli-Pekka Heinonen.

Tiätu Cygnaeus-palhâšuumeest já eres finalistein Máttááttâshaldâttâs tiäđáttâsâst, mon puáhtá luuhâđ täst.

https://www.saamenetaopetus.com/

Säämi kielâlávgum puohháid – ávus oppâtijmeh sämikielâi ohhoost

Lasetiäđuh:

Hanna Helander, hanna.helander(at)edu.utsjoki.fi

Arla Magga, arla.magga(at)samediggi.fi

Ulla Aikio-Puoskari, ulla.aikio-puoskari(at)samediggi.fi

Sämitigge almoot uuccâmnáál kuttâ stipend

/in , /by

ALMOTTÂS 

Sämitigge almoot uuccâmnáál ohtsis kuttâ (6) 500 euro stipend, moh láá uáivildum sämikielâ já/teikâ sämikulttuur válduaamnâs- já uálgiaamnâsuáppeid ollâtääsi škovliimist ja uáppeid kiäh uásálisteh ollâtääsi škovliittâsân, mii vaalmâšt sämikielâlâš pargoelimân. Occein pivdojeh eromâš vuáđustâsah stipend uážžumân. Vuáđustâssân pyehtih leđe el. oppâčáituspargo rähtimân lohtâseijee eromâš koloh teikâ aassâmpäikkikode já oppâmpäikkikode kuhes kooskâst šaddee mätkikoloh.

Rijjâhámásiih ucâmušah pivdojeh toimâttiđ koskoho 11.11.2020 tme 16 räi šleđgâlávt čujottâsân info(at)samediggi.fi. Ucâmušân kalga lahteđ kopio oppâregisterváldusist.

Váijuvâš teikâ maŋanum ucâmušah iä kieđâvuššuu.

Anarist 12.10.2020 

Sämitigge/ škovlim- já oppâmateriaallävdikodde

JUOIGÂM JÁ MAINÂSTEM – Škovlimpeivi máttáátteijeid, párnáitipšoid já vaanhimáid

/in , /by

ANARIST SAJOSIST 28.10.2020

Ohjelm:

9.00-9.30 Juoigâmáin šoddâdem (jyeigee Inga-Máret Gaup-juuso)

9.30-10.00 Juáigusärbivyevi iäláskittem (musijkkár Anna Näkkäläjärvi-Länsman)

Feerimeh juoigâm oppâmist já párnái máttátmist

10.00-10.45 Mainâsteijee vyevih já išeniävuh (čaittâleijee Irene Länsman)

10.45-11.00 Sämimuusik já juoigâm sämimáttááttâs (máttáátteijee Maarit Niittyvuopio)

11.00-12.00 Purâdempuddâ

12.00-12.45 Feerimeh juoigâm máttátmist já oppâmist (musijkkár Tiina Aikio)

12.45-13.00 Káhvástâllâm

13.00-13.30 NIGÁ-párnáid já nuoráid (kirječällee Niilo Aikio Jávrre Juhán Niillás)

Jieččân kielân, nuottáin, mieláin

13.30-13.45 Hanna-Maaria Kiprianoff

13.45-14.00 Heli Aikio

14.00-14.15 Anna Näkkäläjärvi-Länsman

Párnái jienâ kulluđ

14.15-14.30 Škoovlâ tâi peivikiäju juáigus tâi laavlâ, Oula Guttorm já Petra Magga-Vars

14.30-15.00 Ohtsâš lopâttem já savâstâllâm + macâttâsluámáttâh

 

Almottâttâm muuneeld 16.10. räi: petra.magga(at)samediggi.fi

Eres tiäđuh:

Mij väldip škovliimân pääihi oolâ Sajosân siisâ enâmustáá 50 olmožid škovliimân pääihi oolâ Sajosân. Uásálisteid faallâp muátusuojijd. Jis tun halijdah uásálistiđ káidusohtâvuođâiguin, te almoot tom siämmást ko almottâđah škovliimân.

 

SÄÄMI PÁRNÁIKULTTUURKUÁVDÁŠ MÁNNU JÁ SÄÄMI MUUSIKKUÁVDÁŠ