Sámediggi almmustahttigoahtá Sámit sode-ođastusas -bloggaráiddu čavčča 2020 áigge

22.9.2020 /

Oassin sode-kampánjjas Sámediggi almmustahttigoahtá Sámit sode-ođastusas -bloggaráiddu sámegielat ja kultuvrra vuhtiiváldi sode-bálvalusain, ja daidda laktáseaddji hástalusain ja vejolašvuođain. Bloggaráiddus iešguđet surggiid áššedovdit buktet ovdan iežaset vásáhusaid ja áššedovdamuša vuođul geahččanguovlluid sode-suorggi bálvalusaid olis.

Bloggaráiddus ságastallet sode-bálvalusaid fállamis ovttaveardásašvuođa geahččanguovllus ja muitalit dárkileappot sámegielat ja kultuvrra vuhtiiváldi bálvalusaid mearkkašumis árgabeaivvis konkrehtalaš ovdamearkkaid bokte.

“Sámegielat ja kultuvrra vuhtiiváldi sode-bálvalusaid fállama hástalusaid lassin háliidit giddet sihke čálliid ja lohkkiid fuomášumi daid vejolašvuođaide, maid sode-ođastus fállá bálvalusaid ja daidda guoski láhkaásaheami ovddideapmái”, muitala sátnejođiheaddji Tuomas Aslak Juuso bloggaráiddu birra.

Sámediggi álggahii geassemánus 2020 kampánjja ovttaveardásaš sosiála- ja dearvvašvuođafuolahusa (sode) bálvalusaid ovdii.  Suoma ráđđehus lea álggahan sode-ođastusa ja sode-eanangottiid vuođđudeami, maid mihttomearri lea ollašuhttit sode-bálvalusaid ovttaveardásaččat buohkaide. Marina ráđđehusprográmmii lea girjejuvvon čielgasit maiddái dihkkáduvvon mihttomearri gielalaš vuoigatvuođaid praktihka ollašuvvama sihkkarastimis sámegillii.

Sode-kampánjjainis Sámediggi háliida buktit almmolaš ságastallamii eambbo dieđuid sámiid sode-bálvalusaid dálá dilis ja sode-bálvalusaide laktáseaddji láhkaásaheami ođastusa dárbbuin sámiid geahččanguovllus.

https://www.samediggi.fi/sote-uudistus

Lassedieđut:

sátnejođiheaddji Tuomas Aslak Juuso, 040 687 3394, tuomas.juuso(at)samediggi.fi

sosiála- ja dearvvašvuođačálli Anne Länsman-Magga, 040 182 9998, anne.lansman-magga(at)samediggi.fi