Ääiʹj eʹtǩǩeed vuäzzlaid Säʹmmlai tuõttvuõtt- da suåvâdvuõttkomissiooʹje jueʹtǩet

/in , /by

Vuäzzlaid Säʹmmlai tuõttvuõtt- da suåvâdvuõttkomissiooʹje vuäitt eʹtǩǩeed vueʹssmannu 17. peeiʹv 2020 räjja. Sääʹmteʹǧǧ da Saaʹmi siidsååbbar tuʹmmje juäʹtǩǩed ääiʹj čoʹrstemvueʹjj diõtt.

“Leäʹp tuʹmmjam uʹvdded lââʹssääiʹj komissaarân eʹtǩǩummša, ko Sääʹmteeʹǧǧest lij mieʹrren riâššâd kuullâmpooddid eʹtǩǩuum komissaari vaʹlljummuž pirr ouddâl tuʹmmstõktuâj. Kuullâmpooddid ij leäkku vueiʹtlvaž riâššâd tän čoʹrstemvueʹjjest”, mušttal Sääʹmteeʹǧǧ saaǥǥjååʹđteei Tuomas Aslak Juuso tuʹmmstõõǥǥ pirr.

Komissiost âʹlǧǧe leeʹd vuäzzla, koin lij spesiaalsilttummuš säʹmmlai jeälain, ǩiõlâst da kulttuurâst. Komissio meäʹrat riikksuåvtõs nâânn õhttsažtuâjast Sääʹmtiiʹǧǧin da Saaʹmi siidsåbbrin. Komissiost liâ vitt komissaar, koin kueʹhtt vaʹlljeet riikksuåvtõõzz eʹtǩǩõõzzâst, kueʹhtt Sääʹmteeʹǧǧ eʹtǩǩõõzzâst da õhtt Saaʹmi siidsåbbar eʹtǩǩõõzzâst.

“Raukkâp sääʹmõõutstõõzz tueʹjjeed eʹtǩǩõõzzid komissio vuäzzliʹžžen, leʹbe komissaarân nåkam oummin, koid õõutstõs ǩeäčč suåvliʹžžen tuõjju. Sääʹmteeʹǧǧ såbbar tuâjjan lij teʹl tuʹmmjed kueʹhtt komissaar eʹtǩǩummšest riikksuåvtõʹsse”, Sääʹmteeʹǧǧ I vääʹrrsaaǥǥjååʹđteei Anni Koivisto juätkk.

Saaʹmi siidsåbbar vuäǯǯam eʹtǩǩõõzzid komissaarân ǩiõttʼtõõlât Njeäʹllem-Keväjääuʹr da Njauddâm vuuʹdi õhttsaž saaʹmi siidsåbbrest, koʹst tuʹmmjet õõut komissaar eʹtǩǩummšest riikksuåvtõʹsse. “Såbbar ij vueiʹt riâššâd čoʹrstemvueʹjjest. Raukkâp eʹtǩǩõõzzid nuõrttsaaʹmin da komissaarân eʹtǩǩuum oummid kååččat såbbra kuullâmnalla”, särnn saaʹmi ouddooumaž Veikko Feodoroff.

Tuõttvuõtt- da suåvâdvuõttkomissio vuäzzla liâ veiddsõs naʹddjõõzz naaudšeei oummu säʹmmlai da lääʹdd õhttsažkååʹdd kõõskâst. Vuäzzla liâ čõnnsaʹttem jiâ-ka eeʹttkââʹst tõn vueʹssbeäʹl, kååʹtt lij siʹjjid eʹtǩǩääm leʹbe siʹjjid vaʹlljääm. Komissio nõõmtummšest vääʹldet lokku tääʹssbeällsânji jeeʹres sääʹmǩiõllʼjooukid. Komissio nõõmtummšest põõrǥât väʹldded lokku sooǥǥbieʹli tääʹssbeällsaž eeʹttkâsttmõõžž.

Tuõttvuõtt- da suåvâdvuõttproseeʹss mieʹrren lij aiccâd da arvvtõõllâd historiallaš da annʼjõž čårstummuž, mieʹldd looǥǥeeʹl riikk suddeempolitiikk, di vuõiggâdvuõđi neuʹrrummšid, čiõlǥted mäʹhtt täk vaaikte säʹmmlaid da sij õhttsažkådda ânnʼjõž vueʹjjest da eʹtǩǩeed, mäʹhtt vuäitčes õõuʹdeed õhttvuõđ säʹmmlai da Lääʹddjânnam riikk kõõsk di säʹmmlai kõõskâst.

Eʹtǩǩõõzzid Sääʹmtegga raaukât 17.5.2020 mõõneeʹst juʹn-a pååʹšt mieʹldd Sääʹmteʹǧǧ, Sajos, 99870 AANAR leʹbe neʹttpooʹštin info(at)samediggi.fi. Eʹtǩǩuum oummui miâsttmõš tuõjju âlgg ainsmâʹtted ouddǩiõʹtte tõnnalla, što eʹtǩǩuum ooumaž teâudd lomaakk.

Eʹtǩǩõõzzid Saaʹmi siidsåbbra raaukât 17.5.2020 mõõneeʹst juʹn-a pååʹšt mieʹldd Saaʹmi siidsååbbar, Sevettijärventie 9080, 99930 ČEʹVETJÄUʹRR leʹbe neʹttpooʹštin kolttien.kylakokous(at)saamisiidsaabbar.fi. Eʹtǩǩuum oummui miâsttmõš tuõjju âlgg ainsmâʹtted ouddǩiõʹtte tõnnalla, što eʹtǩǩuum ooumaž teâudd lomaakk.

 

Lââʹssteâđ

Sääʹmteʹǧǧ
Saaǥǥjååʹđteei Tuomas Aslak Juuso, +358 40 687 3394, tuomas.juuso(at)samediggi.fi
I vääʹrrsaaǥǥjååʹđteei Anni Koivisto, +358 40 415 5969, anni.koivisto(at)samediggi.fi

Saaʹmi siidsååbbar
Saaʹmi ouddooumaž Veikko Feodoroff, +358 50 396 1297, veikko.feodoroff(at)kolttasaamelaiset.fi

Snimldõk: Anja Vest

Sääʹmǩiõli tuʹlǩǩeemškooultõs älgg – Sääʹmteʹǧǧ äjšmâtt ooccâd škooultõʹsse

/in , /by

Sääʹmteeʹǧǧ kuʹǩesäiggsaž tuõiv sääʹmǩiõli tuʹlǩǩeemškooultõõzzâst šâdd mââimõsân tuõttân, ko Sääʹm škooultemkõõskõs alttad tuʹlǩǩeemškooultõõzz čâhčča õõutveäkka Diakonia-ämmatõllškooulin da Oulu universiteeʹtt Giellagas-instituuttin. Haʹŋǩǩõõzz teäggtet Euroopp sosiaalteäggõõǥǥ väärain da haʹŋǩǩõõzz lie teäggteʹmen še säʹmmlai dommvuuʹd kooʹddin Aanar, Uccjokk da Jeänõk di Sääʹmteʹǧǧ.

Haʹŋǩǩõõzzâst čõõđtet määŋghääʹmmškooultõssân 25 mättceäkkaz veiddsõs sääʹmǩiõli tulkkškooultõsobbvuõđ lookkâmeeʹjj 2020–2021. Škooultõs lij jurddum jeäʹrben vuuʹdest juʹn tuåimmi sääʹmǩiõli tuulkid, leâša tõt ââʹnat še jeeʹres mõõn-ne nuuʹbb tääʹzz škooultõõzz spraavâm oummid, koin lij riʹjttjeei njäälmlaž da ǩeerjlaž ǩiõllsilttõs lääʹddǩiõlâst da mõõn-ne kooum sääʹmǩiõlâst.

Sääʹmteeʹǧǧ ǩiõllstaanpiisar Anne Kirste Aikio

Sääʹmteʹǧǧ äjšmâtt sääʹmǩiõllsaid ooʒʒõõttâd škooultõʹsse, ko sääʹmǩiõli tuulki tarbb lij jõnn. Sääʹmteʹǧǧ vieʹǩǩat veʹrǧǧniiʹǩǩid kaunnâd tuulkid, leâša teâtt, što vueʹǩǩ tuulki vuäǯǯamvuõđ peäʹlest lij väʹǯǯel, ko tuulk jie leäkku jiânnai. Tuulk tuâjj suäpp puârast sääʹm jieʹllemnälla, ko tuâjj lij suåvtemnalla äʹrbbvuõđlaž jieʹllemvuõʹjji lââʹssen še mättʼtõõttjid leʹbe põõrǥâsniiʹǩǩid, peäggat jiõčč-i tulkkân kuuʹǩǩ ääiʹjben tuåimmâm ǩiõllstaanpiisar Anne Kirste Aikio.

– Tuulk tuâj leʹjje samai šiõǥǥ lââʹsstuâj mättʼtõõttmõõžž paʹldde, seämmanalla tõt lij šiõǥǥ nääʹll vuäǯǯad lââʹsstiânnsid jeeʹres tuâjai lââʹssen, håʹt mâka ǩiõtt-tuâjai tuejjeeʹjid leʹbe jåårǥlõʹttjid. Tuulk tuâjj lij miõlǩiddsaž, kaiʹbbjeei da taʹrjjad še vueiʹttemvuõđ seuʹrrjed da mättjed määŋgi aaʹšši pirr lââʹzz. Tuulk tuâjast leäm piâssâm maatkčed, kaaunõõttâd jiânnai jeeʹres oummivuiʹm da veeideed silttummuž jeeʹres õhttsažkååʹdd suõʹrjin.

Sääʹmteʹǧǧ taarbaš tuulkid såbbrid, seämmanalla mâʹte kååʹdd da jeeʹres veʹrǧǧneeʹǩǩ. Looǥǥ lââʹzz tulkkškooultõõzz da tõn siiskõõzz pirr Sääʹm škooultemkõõskõõzz seeidain.

 

Ooccâmäiʹǧǧ škooultõʹsse lij 3.4.2020 räjja.

Ooccâmlomaakk käunnʼje tääiʹben.

 

Lââʹsteâđ haʹŋǩǩõõzz da škooultõʹsse ooʒʒõõttmõõžž pirr käunnʼje SOGSAKK neʹttseeidain da

Iiris Mäenpää, SOGSAKK, iiris.maenpaa@sogsakk.fi, 040 487 6887

Tiisu-Maria Näkkäläjärvi, SOGSAKK, tiisu-maria.nakkalajarvi@sogsakk.fi, 040 378 0304

leʹbe

ǩiõllstaanpiisar Anne Kirste Aikio, anne-kirste.aikio@samediggi.fi, 010 839 3124 / 040 707 5626

Teâđ koronaviruuzz pirr sääʹmǩiõʹlle

/in , /by

Sääʹmteʹǧǧ nåårr tän sijddu õlmstõttum vuäppõõzzid da teâđtõõzzid koronaviruuzz pirr sääʹmǩiõʹlle:

Leäk-a ton hoʹhssjam jeeʹres sääʹmǩiõllsaž vuäppõõzzid leʹbe leäk-a teâđtam sääʹmǩiõʹlle koronavirusvueʹjj pirr? Vuõlttâd teâđ tõn pirr addrõʹsse: tiedotus(at)samediggi.fi.

Lââʹssteâđ:

Ǩiõllstaanpiisar Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiaal- da tiõrvâsvuõttpiisar Anne Länsman-Magga, 010 839 3128 / 040 182 9998, anne.lansman-magga(at)samediggi.fi

Saaǥǥtempiisar Johanna Alatorvinen, 010 839 3140 / 040 663 4493, johanna.alatorvinen(at)samediggi.fi

Sääʹmǩiõl ougglõsmättčiâss tarjjeemnalla škooulniiʹǩǩid!

/in , , /by

Sääʹmǩiõli ougglõsmättʼtõshaʹŋǩǩõs jääʹrjast pukid äävai nuõrtt-, aanar-, da tâʹvvsääʹmǩiõl mättčiâssid neeʹttest. Mättčiâss lie primmum jeärbi mieʹldd škooulniiʹǩǩid.

 

Taʹrjjeemnalla lie mättčiâss koonn-a sääʹmǩiõlâst nääiʹt:

Nuõrttsääʹmǩiõll pâʹjjškooulniiʹǩǩid da lookkjiškooulniiʹǩǩid seärdi 25.3., 1.4. ja 8.4. čiâss 10.00–10.45

Aanrõšǩiõll   3. – 6 klassniiʹǩǩid nelljdpeeiʹvi 26.3., 2.4. ja 9.4. čiâss 10.00–10.45

Tâʹvvsääʹmǩiõll 0 – 2 klassniiʹǩǩid piâtnci 27.3., 3.4. da vuõssaarǥ 6.4. čiâss 14.00–14.45

 

Vuässõõttâmvuäʹppõõzz käunnʼje täʹst. Čiâssid ij taarbâž iʹlmmtõõttâd õuddǩiõʹtte.

Bures boahtin! Tiervâpuáttim! Tiõrv pueʹttem! Bures boahtin! Tervetuloa!

www.saamenetaopetus.com

Sääʹmteʹǧǧ ännââtt, što rääʹjteʹče liikkummuž Lääʹddjânnmest

/in , /by

Sääʹmteʹǧǧ ännââtt väʹlddministeeʹrest, što rääʹjteʹče liikkummuž Lääʹddjânnam raaji seʹst, što vuäitčeš miâlǥeed koronaviruuzz leävvnummuž da nuʹt suõjjeed riskkjooukid.

Neäʹttel-loopp ääiʹj määŋg media lie õlmstâttam ođđsid Lääʹddjânnam siiskâž maatkčummuž da Lappi-vuuʹdest luämai âânnmõõžž pirr, håʹt-i Lääʹddjânnam halltõs lij ouddam vuäppõõzzid vieʹltted sosiaalʼlaž kontaaktid da ǩeâlddam pâʹjjel 10 oummu õõlmâs noorõõttmõõžžid.

– Leäm seuʹrrjam vueʹjj sami huõl ââʹnškuäʹđeeʹl. Ååʹn leʹčči juõʹǩǩkast äiʹǧǧ väʹldded vueʹjj tuõđlânji da jääʹǩǩted uvddum vuäppõõzzid. Mij jeäʹp haaʹled piijjâd riskkjooukid vaar vuâlla, jeäʹrben sääʹmvuäʹmmoummu lie joukk, koon meeʹst feʹrttai suõjjeed, teäʹddad Sääʹmteeʹǧǧ saaǥǥjååʹđteei Tuomas Aslak Juuso.

Sääʹmteeʹǧǧ mieʹldd Lääʹddjânnam siiskâž liikkummuž rääʹjtem leʹčči pueʹrmõs nääʹll suõjjeed sääʹm-meer da jeäʹrben riskkjooukid, mâʹte sääʹmvuäʹmmoummid, njuämmam vuâstta da tõn staanâm diõtt, što håidd riʹjttai pukid. Sääʹmǩiõl siltteei tiõrvâsvuõtthuõl tuâjjla lie juʹn tän vueʹjjest occanj da jeäʹrben ǩirrsallaš hååid õhttvuõđâst da kriisvuõʹjjin jiijjâsǩiõllsaž kääzzkõõzzin lij jõnn miârktõs.

Sääʹmvuäʹmmoummin miârkteei vueʹss jäälast säʹmmlai dommvuuʹdest. – Sääʹmteʹǧǧ ännââtt väʹlddministeeʹrest, što son tuejjeʹči taarbšum tuåimid, što tuuʹššes maatkčem Lääʹddjânnmest puuđči, ǩiõrǥat saaǥǥjååʹđteei Juuso.

Sääʹmǩiõllsaž teâttjueʹǩǩem õõlǥči lââʹzzted

Sääʹmteʹǧǧ mušttʼtat jeeʹres veʹrǧǧniiʹǩǩid, mâʹte THL da riikksuåvtõõzz kanslia, sääʹmǩiõllsaž teâttjueʹǩǩem vääžnaivuõđâst. Sääʹmteʹǧǧ lij eʹtǩǩääm sääʹmǩiõllsaž teâttjueʹǩǩem lââʹzztummuž da pueʹrummuž sääʹm ǩiõll-lääʹjj vuâđald da õõlmâs staanvuõđ diõtt. Teâttjueʹǩǩmest âlgg še väʹldded lokku sääʹmǩiõllsai taarbid âsttjemvuõttõõlǥtõõzzi peäʹlest, ouddmiârkkân tõn, što määŋg sääʹmǩiõllsa jie silttâd lookkâd jiijjâs jieʹnnǩiõl.

– Tõn, što teâđ mottje ǩeeʹjjmieʹldd ääiʹj, ij vueiʹt ââʹnned mäinnan, što õõlmâs vuäppõõzzid jie jåårǥlââʹtt sääʹmǩiõlid. Sääʹmǩiõllsaž teâttjueʹǩǩmest âlgg ouddned še plaan meâldlânji da vuäppõõzzid peeiʹvteeʹl, vuäʹppast ǩiõllstaanpiisar Anne Kirste Aikio. – Ååʹn jeeʹres veʹrǧǧneeʹǩǩ âʹlǧǧe še ââʹnned huõl jeäʹrben tõʹst, što säʹmmlai ǩiõlʼlaž vuõiggâdvuõđ teâuddje da ooumaž šâdd fiʹttjum sääʹmǩiõʹlle, håʹt jieʹttkõõskõʹsse leʹbe tiõrvâsvuõttkõõskõʹsse sååiteen, jõs son kädd koronanjuämmam.

Lââʹssteâđ:

Saaǥǥjååʹđteei Tuomas Aslak Juuso, 010 839 3101 / 040 687 3394, tuomas.juuso(at)samediggi.fi

Ǩiõllstaanpiisar Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiaal- da tiõrvâsvuõttpiisar Anne Länsman-Magga, 010 839 3128 / 040 182 9998, anne.lansman-magga(at)samediggi.fi

Saamelaiskäräjien vaalikauden 2020-2023 ensimmäinen kokous, edustajat kävelevät kokoustilaan.Snimldõk: Ville Fofonoff

Sääʹmteeʹǧǧ tiuddsåbbar da vaalpââʹj ääʹveempoodd mââʹjee

/in , /by

Sääʹmteeʹǧǧ njuhččmannu tiuddsåbbar da vaalpââʹj 2020-2023 ääʹveempoodd mââʹjee koronavirusvueʹjj diõtt nuʹtt, što tõi ääiʹjpoodd tuʹmmje mâʹŋŋlest. Sääʹmteeʹǧǧ halltõs ǩiõttʼtõõli såbbreʹstes pâʹsslašttâm-mannu 19. peeiʹv Sääʹmteeʹǧǧ vaʹrrjõõttmõõžž koronavirusvuâkka (COVID-19) da tuʹmmji tääʹrǩab tuåimin.

Sääʹmtegga vuâđđeet čoʹrstemvueʹjj vaalmâšvuõttjoouk, kååʹtt oudd taarb mieʹldd tiuddeei leʹbe jeeʹres vuäppõõzzid vuâkka. Saaǥǥjååʹđteei jååʹđat vaalmâšvuõttjoouk da tõn ouʹddepuʹhttjen lij vaaldâšmjååʹđteei. Vaalmâšvuõttjoouk jeeʹres vuäzzla lie I da II väärrsaaǥǥjååʹđteei di lääʹǩǩpiisar. – Leäʹp aivv ođđ vueʹjj ooudâst da lij vääžnai, što pâʹsttep staanâd Sääʹmteeʹǧǧ vuâđđtuåimid tän muttum vueʹjjest še, linnjad saaǥǥjååʹđteei Tuomas Aslak Juuso.

Sääʹmteeʹǧǧ väʹlddreâuggamnääʹll lij meäʹrteʹmes ääiʹj ougglõstuâjj, jie-ǥa veʹrǧǧmaaʹtǩin jååʹđ čoʹrstemvueʹjj ääiʹj. Sääʹmteeʹǧǧ riâššâm seminaarid, šõddmõõžžid da noorõõttmõõžžid jårrââʹstet vueʹssmannu loopp räjja da såbbrid vuässõõđât ougglõsõhttvuõđin. Sääʹmteʹǧǧ teâđat vueʹjj da tõn muttsi pirr aktiivlânji tuâjjlažkådda.

– Juõʹǩǩkaž meeʹst vuäitt jiijjâs tuåimmʼmõõžžines vaaikted tõõzz, mäʹhtt riskkjoouk pâʹstte suõjjõõttâd njuämmʼmest. Lij vääžnai jääʹǩǩted vuäppõõzzid da vieʹltted âʹlddkontaaktid. Ååʹn feʹrttai juurdčed puk sääʹmõõutstõõzz, jeäʹrben ääkkaid da ääjjaid, mij tääʹrǩmõs aunnsateʹmes kulttuurääʹrb kuõʹddjid, juätkk I väärrsaaǥǥjååʹđteei Anni Koivisto.

– Koronaviruuzz njaammʼmest lie leämmaž veiddsõs vaaiktõõzz maaiʹlmveiddsânji da halltõõzzâst saǥstõõlim vueʹjj vaaiktõõzzin jeäʹrben sääʹmõõutstõʹsse. Sääʹmteʹǧǧ pârgg jiijjâs vueʹzzeld oouʹdeed teâđ vuäǯǯam sääʹmǩiõʹlle, ǩiõrǥat saaǥǥjååʹđteei Juuso.

Sääʹmteeʹǧǧ halltõs lij mõõnnâm čõõđ Lääʹddjânnam halltõõzz 16.3.2020 uʹvddem linnjʼjõõzzid da ouddam pueʹtti Sääʹmteeʹǧǧ tuåimmʼmõõžž kuõskki vuäppõõzzid. Sääʹmteeʹǧǧ halltõs seuʹrrai vueʹjj da noorââtt taarb mieʹldd tuʹmmjed juâtkktuåimin.

Ääiʹjpoddsa teâđ Sääʹmteeʹǧǧ vaʹrrjõõttmõõžž pirr koronavirusvuâkka

 

Lââʹssteâđ

Saaǥǥjååʹđteei Tuomas Aslak Juuso, 040 1871 331, tuomas.juuso(at)samediggi.fi
I väärrsaaǥǥjååʹđteei Anni Koivisto, 040 415 5969, anni.koivisto(at)samediggi.fi
Vaaldâšmjååʹđteei Pia Ruotsala-Kangasniemi, 040 726 2688, pia.ruotsala(at)samediggi.fi

Sääʹmǩiõli ougglõsmättʼtõõzz iʹlmmtõõttâmääiʹj jueʹtǩet

/in , /by

Iʹlmmtõõttâmääiʹj sääʹmǩiõli ougglõsmättʼtõshaʹŋǩǩõʹsse lookkâmpâjja 2020–2021 jueʹtǩet 29.3.2020 räjja.

Sääʹmǩiõli ougglõsmättʼtõshaʹŋǩǩõs taʹrjjad aanar-, nuõrtt- da tâʹvvsääʹmǩiõli vuâđđmättʼtõõzz da lookkjiškooulškooultõõzz tiuddeei mättʼtõõzz kueʹhtt (2) neäʹttelčiâss. Mättʼtõs lij jurddum säʹmmlai dommvuuʹd åålǥpeäʹlnn jälsteei sääʹmškooulniiʹǩǩid. Haʹŋǩǩõs ij taʹrjjed mättʼtõõzz vuõrâsoummid.

Iʹlmmtõõttmõõžž mättʼtõʹsse tuejjeet juʹn-a liâdǥlaž leʹbe põʹmmailomaakkin. Tääʹrǩab vuäppõõzz iʹlmmtõõttmõʹšše käunnʼje ougglõsmättʼtõshaʹŋǩǩõõzz neʹttseeidain.

Iʹlmmtõõttâmääiʹj jueʹtǩet tõn diõtt, ko iʹlmmtõõttâmäiʹǧǧ lij pääccam mäŋggsest vuâmmšeǩani.

 

Lââʹssteâđ

projeʹkttjååʹđteei Hanna Helander
hanna.helander(at)edu.utsjoki.fi
040 7012 094

koordinaattor Arla Magga
arla.magga(at)samediggi.fi
040 1985 033

Sääʹmteʹǧǧ siâzztââll ââʹnned sääʹmǩiõllsaž digiaunnstõõzzid päiʹǩǩmättʼtõõzzâst

/in , , /by

Sääʹmǩiõlid lie õlmstõttum juʹn jiânnai digimateriaal, mobiilspeâl da video, kook ââʹnte puârast ougglõsmättʼtõʹsse ååʹn, ko škoouluusid lie piijjâm ǩidd. Aunnstõõzz käunnʼje nuʹtt Sääʹmteeʹǧǧ jiijjâs neʹttseeidain ko še jeeʹres kääzzkõõzzin. Škooultõs- da mättmateriaalkoontâr siâzztââll tobdstõõttâd aunnstõõzzid. Vueʹlnn åårrai liʹstte lie norrum päiʹǩǩmättʼtõʹsse ââʹnteei materiaal.

Sääʹmteeʹǧǧest lij mättmateriaali neʹttkaupp. Toʹben lie ´Ääv digimateriaal´, da tõn tiuddeed ååʹn. Jeeʹres materiaal lie še laaddâmnalla mättʼtemǩiõli mieʹldd juâǥǥtõllum seeidain, leâša tõk õõlǥte tobddõõzzi tiʹllʼjummuž škooultõs- da mättmateriaalkonttrest.

Sääʹmteeʹǧǧ lij tuejjääm aanar-, nuõrtt- da tâʹvvsääʹmǩiõlid alfabeʹttvideoid, alfabeʹttkoovvtaaulid di videoid, koid vuäitt laaddâd tän seeid vueʹllruõbdâst: https://www.samediggi.fi/toiminta/koulutus-ja-oppimateriaali/

www.oktavuohta.com -sijddu lie norrum sääʹmǩiõllsa digiǩeeʹrj da mobiilspeâl: https://www.oktavuohta.com/mobiilipelit-ja-digikirjat

www.oktavuohta.com -seeidain lie artikkeeʹl, koi õhttvuõđâst lie liiŋk sääʹmǩiõllsaž musiʹǩǩe da måtam sääʹmǩiõllsaž teeʹkstid še. Materiaal käunnʼje, ko tuʹtǩǩad da ääʹvâstt liiŋkid, kook seeidain käunnʼje.

Lukulumo-kääzzkõs lij ääʹvääm puk jiijjâs materiaalid nuʹtt, što tõid vuäitt ââʹnned määustää. Seeidain lie tâʹvv- da saujjsääʹmǩiõllsa ǩeeʹrj: https://www.iltoppiminen.fi/palvelumme/lukulumo/

 

Liiŋk sääʹmǩiõllsaž päärnairadio- da TV-vuõlttõõzzid di jieʹllikaartid:

Unna Junná programm

Binna Bánna radioprogramm

SVT Plays Samiska programm

Maahisweb – Sää´m-museo Siida päärnai seeid

Cugu tâʹvvsäämas

Hejoloja päärnaiprogramm SVT

IeŽár päärnaiprogramm, NRK

Sápmifilm.com päärnaijieʹllikaart

NRK Jođi (tâʹvvsäämas)

Arkiivi jiõn, Giellagas-institutt

Lávlagiat ja sánit – Jikŋon 2 (tâʹvvsäämas)

E-girji

Dat o.s.

ABC-company/ e-skuvla

Sajus-web/ Davvi Girji

ČálliidLágádus

Ovttas – Sámi oahpponeavvut neahtas

Yle Ealli arkiiva

Yle Ellee arkkâdâh

Yle Jieʼlli arkiiv

Yle Sámi radio

Arktista pedagogiikka, opi digitaitoja-tallenteet

Riikkaid namat čieža gillii

Čáppagirjjálašvuođasiiddut davvisámegillii

Sääʹmteeʹǧǧ vaʹrrjõõttmõš koronavirusvuâkka

/in , /by

Tän sijddu peeiʹvtet Sääʹmteeʹǧǧ kuõskki teâđaid koronavirusvueʹjj pirr.

 

5.5.

Čoʹrstemvueʹjj vaalmâšvuõttjoukk noorââtt 12.5.2020.

 

17.4.

Sääʹmteeʹǧǧ halltõs noorââtt ougglõsõhttvuõđin

Sääʹmkulttuurkõõskõs Sajos lij leämmaž ǩidd pâʹsslašttâm-mannu 16. peeiʹvest vueʹljeeʹl. Halltõs tuʹmmji, što Sajos pââšš ǩidd vueʹssmannu loopp räjja.

 

16.4.

Sääʹmnuõri čeäʹppvuõttpeeiʹv prääzkjet piâtnâc 17.4. neeʹttest.

Ååʹn vuäitt ǩiõččâd live-vuõlttõõzz. Tõt älgg sââʹjest 2.20.

 

24.3.

Sääʹmteʹǧǧ nåårr tän sijddu õlmstõttum vuäppõõzzid da teâđtõõzzid koronaviruuzz pirr sääʹmǩiõʹlle.

Leäk-a ton hoʹhssjam jeeʹres sääʹmǩiõllsaž vuäppõõzzid leʹbe leäk-a teâđtam sääʹmǩiõʹlle koronavirusvueʹjj pirr? Vuõlttâd teâđ tõn pirr addrõʹsse: tiedotus(at)samediggi.fi

 

23.3.

Sääʹmteʹǧǧ ännââtt väʹlddministeeʹrest, što rääʹjteʹče liikkummuž Lääʹddjânnam raaji seʹst, što vuäitčeš miâlǥeed koronaviruuzz leävvnummuž da nuʹt suõjjeed riskkjooukid.

 

20.3.

Sääʹmteeʹǧǧ njuhččmannu tiuddsåbbar da vaalpââʹj 2020-2023 ääʹveempoodd mââʹjee koronavirusvueʹjj diõtt nuʹtt, što tõi ääiʹjpoodd tuʹmmje mâʹŋŋlest.

Sääʹmteeʹǧǧ halltõs ǩiõttʼtõõli såbbreʹstes pâʹsslašttâm-mannu 19. peeiʹv Sääʹmteeʹǧǧ vaʹrrjõõttmõõžž koronavirusvuâkka (COVID-19) da tuʹmmji tääʹrǩab tuåimin.

Sääʹmtegga vuâđđeet čoʹrstemvueʹjj vaalmâšvuõttjoouk, kååʹtt oudd taarb mieʹldd tiuddeei leʹbe jeeʹres vuäppõõzzid vuâkka. Saaǥǥjååʹđteei jååʹđat vaalmâšvuõttjoouk da tõn ouʹddepuʹhttjen lij vaaldâšmjååʹđteei. Vaalmâšvuõttjoouk jeeʹres vuäzzla lie I da II väärrsaaǥǥjååʹđteei di lääʹǩǩpiisar.

Sääʹmteeʹǧǧ väʹlddreâuggamnääʹll lij täʹst ooudâs ougglõstuâjj, jie-ǥa veʹrǧǧmaaʹtǩin jååʹđ čoʹrstemvueʹjj ääiʹj. Sääʹmteeʹǧǧ riâššâm seminaarid, šõddmõõžžid da noorõõttmõõžžid jårrââʹstet vueʹssmannu loopp räjja da såbbrid vuässõõđât ougglõsõhttvuõđin. Sääʹmteʹǧǧ teâđat vueʹjj da tõn muttsi pirr aktiivlânji tuâjjlažkådda.

Sääʹmteeʹǧǧ halltõs lij mõõnnâm čõõđ Lääʹddjânnam halltõõzz 16.3.2020 uʹvddem linnjʼjõõzzid da ouddam pueʹtti Sääʹmteeʹǧǧ tuåimmʼmõõžž kuõskki vuäppõõzzid. Sääʹmteeʹǧǧ halltõs seuʹrrai vueʹjj da noorââtt taarb mieʹldd tuʹmmjed juâtkktuåimin.

 

17.3.

Sääʹmteʹǧǧ siâzztââll ââʹnned sääʹmǩiõllsaž digiaunnstõõzzid päiʹǩǩmättʼtõõzzâst.

Sääʹmteeʹǧǧ tuâjjla reâugga ougglõstuâjast da vaʹsttee teâđstõõllmõõžžid neʹttpooʹštin da teʹlfoon pääiʹǩ. Mij õhttvuõtt-teâđaid kaaunak neʹttseeidain: Õhttvuõtt-teâđ õõut seeidast.

Sääʹmkulttuurkõõskõs Sajos lij ǩidd täʹst ooudâs.

 

16.3.

Sääʹmteʹǧǧ lij vaʹrrjõõttâm koronavirusvuâkka (COVID-19) rääʹjteeʹl kuõʹssi da åålǥpeällsaž oummui piâssmõõžž koontârsõõʹjid Sajoozzâst, Uccjooǥǥâst da Hettast. Tåʹlǩ Sääʹmteeʹǧǧ tuâjjla da åskkoummu peäʹsse jååʹtted koontârsõõʹjin.

Sääʹmteeʹǧǧ halltõs ǩiõttʼtââll 19.3. Sääʹmteeʹǧǧ vaʹrrjõõttmõõžž koronavirusvuâkka da tuʹmmai tääʹrǩab tuåimin.

Sääʹmteeʹǧǧ tuâjjlažkååʹdd lie vuäʹpstam vuässõõttâd såbbrid tåʹlǩ ougglõsõhttvuõđin. Tuâjjuʹvddi lij vuäʹpstam, što jõs lij flunss, ij vuäǯǯ pueʹtted tuâjjpäikka, ij ni teʹl, jõs måtam piârniiʹǩǩin lij puõccmen, håʹt-i jijstes jie leʹčče oudldõõzz. Sääʹmteeʹǧǧ tuâjjla reâugga tän poodd jäänmõsân ougglõstuâjast.

Sääʹmteʹǧǧ seuʹrrai Lääʹddjânnam halltõõzz siâzztõõzzid, ij-ǥa Sääʹmteʹǧǧ riâžž frijjääiʹj tuåimid Sajoozzâst leʹbe jeeʹres åʹrnn. Puk suåppum kaaunõõttmõõžž, kõʹllʼjummuž da škooultõõzz lie jårrõsttum leʹbe sirddum pueʹttiäigga.

Sääʹmkulttuurkõõskõs Sajoozz info da kaaʹffpõrtt Čaiju lie ǩidd 16.-20.3. Sajoozz vuäʹpstummšid lie jõskkâm täʹst ooudâs, jeät-ǥa Sajoozzâst riâššu jieʹllikarttšõddmõõžžid ljn.

Sääʹmteeʹǧǧ škooultõs- da mättmateriaalkoontâr lij iʹlmmtam tuʹmmstõõǥǥâs pirr, što Sääʹmnuõri čeäʹppvuõttpeeiʹv jie riâžž koronaviiruuzz njaammʼmõõžž cõggâm diõtt. Kueiʹtpeivvsaž čeäʹppvuõttpeeiʹv leʹčče riâššâm Aanrest Sajoozzâst da Riutulast Vasatokkast 15.-16.4.

 

Lââʹssteâđ tuâjjtiõrvâsvuõttstroiʹttel seeidast:
https://www.ttl.fi/toimintaohje-tyontekijoille-wuhanin-koronaviruksen-tartunnan-ehkaisyyn/

da Tiõrvâsvuõđ da pueʹrrvââjjam stroiʹttel (THL) seeidain:
https://thl.fi/fi/ajankohtaista/tiedotteet-ja-uutiset

 

Lââʹssteâđ:

Vaaldâšmjååʹđteei Pia Ruotsala-Kangasniemi teʹl. 040 726 2688, pia.ruotsala(at)samediggi.fi
Saaǥǥjååʹđteei Tuomas Aslak Juuso teʹl. 040 1871 331, tuomas.juuso(at)samediggi.fi

Kuvassa porot kulkevat tunturissa.

Mädd- da meäʹcctäällministeria čiõlǥad âʹlnn åårrai muõttvueʹjj vaaiktõõzzid puäʒʒhoiddu

/in , /by

Mädd- da meäʹcctäällministeria lij ouddam 5.3.2020 tuʹmmstõõǥǥ Paalǥâskooʹddi õhttõõzz alttõõzz vuâđald skääđ čiõlǥummšest, mij lij čuõʒʒtam puäʒʒhååid. Tuʹmmstõõǥǥ mieʹldd Luâttreeʹǧǧesvuõttkõõskõs tuejjad puäʒʒskääđđlääʹjjest jurddum čiõlǥtõõzz muõttvueʹjjest vueiʹtlvaž lääʹjjest jurddum skääđđan di tõn vaaiktõõzzin puäʒʒhoiddu. Tuʹtǩǩummuž tuejjeet 2.8.2020 mõõneeʹst.

Mädd- da meäʹcctäällministeria tuʹmmstõõǥǥ mieʹldd lij čiõlǥâs, što muõttvueʹǩǩ lij tän tääʹlv vaiggääb ko kõskkmieʹrin. Tääʹlv 2019-2020 muõttvueʹjj vuäitt še tuõttâd Äimmtiõttistrooiʹtel statistiikkin. Mädd- da meäʹcctäällministeria ǩeäčč, što tät oudd nokk vuâđđõttum määin altteed skääđ čiõlǥummuž puäʒʒskääđđlääʹjj meâldlânji.

”Sääʹmteʹǧǧ vuäinn pueʹrren, što mädd- da meäʹcctäällministeria lij alttääm čiõlǥeed âʹlnn åårrai muõttvueʹjj tuõđâsvuõđ puäʒʒhåiddamvuuʹdest”, ceälkk Sääʹmteeʹǧǧ saaǥǥjååʹđteei Tuomas Aslak Juuso.

Ministeria kuuitâǥ ǩiõčči, što skääđ veeidasvuõđ jie vueiʹt snäätnainalla čiõlǥeed puäʒʒskääđđlääʹjjest peäggtum neellj neäʹttel mieʹrrääiʹj seʹst tõn diõtt, ko muõttvueʹjj pešttmõš da tõn vaaiktõõzz, diǥu jieʹlled lokkum puõccui jäämmʼmõõžž da vueʹssproseʹntt, seʹlvvne eman mâʹŋŋlest ǩeâđđa da alggǩeässa. Seämmast vueiʹtlva skääđ da mõõntummuž lie tuõđštemnalla mâʹŋŋlest jm. ko puäʒʒloǥstõõǥǥid ǩiõrǥte.

”Lij hueʹnn, što jie vueiʹt reagâʹstted tän vuâkka tâʹllesǩani, ko tõõzz leʹčči tarbb. Muõttvueʹǩǩ da jiõŋŋriâdd muõttjest lie šõõddtam lââʹsspoortemtaarb määŋgain palggsin. Jåʹttlab reagâʹsttmin leʹčče vueiʹtlvânji pâsttam cõggâd šuurab skääđaid,” juätkk II väärrsaaǥǥjååʹđteei Leo Aikio.

”Motstõõvvi äimmõõzz mieʹldd paalǥâskooʹddi da puäʒʒsiidi pâstlvažvuõtt reagâʹstted jåʹttlânji motstõõvvi luâđ vuõʹjjid lij tääʹrǩab da tääʹrǩab. Lij vääžnai, što puäʒʒoummu pâʹstte jiijj meäʹrtõõllâd jiijjâz tuâjjmaalleez juõʹǩǩ luâđ vueʹjj mieʹldd”, looppat saaǥǥjååʹđteei Juuso.

Sääʹmteʹǧǧ ännõõđi mädd- da meäʹcctäällministeeʹrest, što mädd- da meäʹcctäällministeria altteʹči sõõrǥab čiõlǥummuž, vueiʹtet-a tän tääʹlv muõttvueʹjj ââʹnned nåkam puäʒʒhååid čuõʒʒtam äʹššen, mõõn vuâđald puäʒʒoummuin leʹčči vueiʹttemvuõtt vuäǯǯad koʹrvvõõzz luâđ vueʹjj šõõddtem ekonoomlaž kuulin Paalǥâskooʹddi õhttõõzz alttõõzz meâldlânji.

Lââʹssteâđ:

Saaǥǥjååʹđteei Tuomas Aslak Juuso teʹl. 040 1871 331, tuomas.juuso(at)samediggi.fi

II väärrsaaǥǥjååʹđteei Leo Aikio teʹl. 040 621 6505, leo.aikio(at)samediggi.fi

Jieʹllemvueʹǩǩpiisar Sarita Kämäräinen teʹl. 040 186 7258, sarita.kamarainen(at)samediggi.fi