Muumileehi-ráiđu ráhtoo sämikielân Sämitige alguu vuáđuld

Sämitigge iävtuttij juovlâmáánu loopâst Yleisradion, ete tot rähtiškuáđáččij uđđâ Muumileehi-rááiđu sämikielân. Uđđâ Muumileehi-ráiđu oovdânpuáhtoo Ylest kiđđuv 2019 pyeremuu keččâlemääigi televisiost sehe Yle Areenast suomâ- já ruotâkielâ version. Sämitigge iävtuttij talle, ete Yleisradio ráhtáččij rááiđust lasseen versio, mast váldojeh huámmášumán puoh Suomâst sarnum sämikielah.

Alguu tyehin lâi juurdâ movtijdittiđ Yle uásálistiđ  OA aalmugijkoskâsii algâaalmugij kielâi  teemaihán, mii ávuduvvoo ive 2019. Ive ulmen lii kiddiđ huámmášume maailm algâaalmugkieláid, main stuárráámus uási láá uhkevuálásiih. Meid puoh Suomâst sarnum sämikielah láá luokittâllum eromâš uhkevuálásâš tâi uhkevuálásâš kiellân, já kielâiäláskittempargo ovdeduvvoo vuáimálávt tääl, vâi kielah siäiluuččii.

Yle almottij 15.3.2019, ete tot pyevtit Muumileehi-rááiđust meid sämikielâlijd versioid Sämitige iävtuttâs miäldásávt.

– Mun lam hirmâd ilolâš, ete YLE vaaldij vuástá mii háástu väldiđ algâaalmugij kielâi ive huámmášumán já mij peesâp kuullâđ anarâš-, nuorttâlâš- já tavesämikielâ muumihuáđđoi njäälmist, illood Sämitige saavâjođetteijee Tiina Sanila-Aikio.

Sämitige mielâst lii tehálâš, ete eromâšávt paarnij várás ličij eenâb ohjelmfalâldâh sii jieijâs kielân.

– Monnjâjienâttem (su. dubbaus) lii puovtâdâs peeleest pehtilis vyehi lasettiđ sämikielâlijd ohjelmijd, mon kolgâččij anneeđ ävkkin ain eenâb. Taat lii šiev taho Yleisradiost sämikielâi pyerrin, paahud Sämitige kielâtorvočällee Anne Kirste Aikio.

– Lii eromâš tehálâš, ete sämikielah uáinojeh já kullojeh eenâb já eromâšávt media lii uáli tehálâš niävvu kielâi eellimvuáimálâšvuođâ naanoodmân, Aikio juátká.

Jienâttem- já jurgâlempargo algâttuvvoo párásist já Sämitigge lii lopedâm faallâđ äššitubdâmuš iššeen jienâttem olášutmân.

Alguu Muumileehi-rááiđu sämikielân rähtimân puáhtá luuhâđ tievâslâžžân Sämitige dokumentpaaŋkist.

Lasetiäđuh

Saavâjođetteijee Tiina Sanila-Aikio, puh. 050 300 1780, tiina.sanila-aikio(at)samediggi.fi

Kielâtorvočällee Anne Kirste Aikio, puh. 010 839 3124, anne-kirste.aikio(at)samediggi.fi

Sämitigge almoot uuccâmnáál muusikkuávdáá proojeektpargee meriáigásii tooimâ

Pargo álgá 3.6 já pištá 31.8.2019 räi. Proojeektpargee pargoid kuleh el. säämi muusikkuávdáá išedeijen toimâm sehe Ijâttes ijjâ -algâaalmugij muusikfestivaal išepyevtitteijee pargoh. Pargo miänástuvvee hoittám išedeh hiäivulâš škovlim, sämikielâ táiđu sehe kelijdeijee eŋgâlâskielâ táiđu. Proojeektpargee pälkki miärášuvá Suomâ sämitige pálkkááttemvuáháduv vátávâšvuođâtääsi VII/I mield (vuáđupälkki 1 790,15 eurod/mp). Vuáđupäälhi lasseen máksojeh 24 % sämikuávlu lase já pargohárjánem mield miärášuvvee hárjánemlaseh. Proojeektpargee toimâsaje lii säämi kulttuurkuávdáš Sajosist.

Ucâmušâid lahtosijdiskuin kalga toimâttiđ sämitige čäällimkoodán 12.4.2019 tme 16.00 räi čujottâsân Sajos, 99870 Aanaar. Lasetiäđuid pargoost addel säämi muusikkuávdáá vuávájeijee Oula Guttorm p. 040 667 4545, oula.guttorm(at)samediggi.fi. Sämitige tooimân puáhtá uápásmuđ nettičujottâsâst www.samediggi.fi já Ijâttes ijjâ- algâaalmugij muusiktábáhtusân čujottâsâst www.ijahisidja.fi

 

Anarist 12.3.2019 Sämitigge

Säminuorâi taaiđâtábáhtusân almottâttâm aalgij

Almottâttâm Säminuorâi taaiđâtábáhtusân lii álgám, já tot tábáhtuvá neetist, Webropolist. Almottâttâm lii áávus 1.-15.3 Puohah, kiäh uásálisteh tábáhtusân, kalgeh tevdiđ almolii almottâttâmluámáttuv – meiddei sij, kiäh iä uásálist teatter- teikkâ muštâlemkištoid.

 

Kyehtipiäivásâš taaiđâtábáhtus uárnejuvvoo taan kiiđâ Anarist Sämikulttuurkuávdáš Saijoosist 10.-11.4 Tábáhtus riijkâvijđosâš teeman lii teatter já sämiteeman Mainâstem maaŋgah häämih. Tábáhtus lekkâmtilálâšvuotâ lii koskoho 10.4 tijme 18.00 äälgin.

 

Almottâttâmluámáttuvah láá tääbbin:

 

  • Luámáttâh, moin almottuvvojeh puoh tábáhtusân uásálisteeh sáátui já puurâdmij ornim tiet.

https://link.webropolsurveys.com/S/C67FF7C6292352B1

 

Toos lasseen teatter- já muštâlemkištoid uásálistee juávhuh kalgeh tevdiđ vala sierâ almottâttâmluámáttuv.

  • Luámáttâh, teatterteeman uásálistee juávhuh.

https://link.webropolsurveys.com/S/106AE0C82FC95EED

 

Teatterteemast lii eenâb tiätu TEATRIS -tábáhtus siijđoin:

https://nuorikulttuuri.fi/teatris/

 

3) Luámáttâh, mainâstem maaŋgah häämih -teeman uásálisteeh. https://link.webropolsurveys.com/S/D42DD998146685CB

 

Mainâstem maaŋgah häämih lii teeman uáli viijđes, já tast lii lope kevttiđ mielâkuvviittâs! Tehálumos lii, et muštâlem lii sämikielân já ton vuolgâsaje lii sämikulttuurist. Teeman hiäivulâš čájáttâs puáhtá leđe ovdâmerkkân mainâstem, tiivtâ luuhâm, stand-up -koomik, juáigus, leuʹdd teikkâ livđe – sänitaaiđâ, mon oovdânpyehtip läävdi alne!

 

Taaiđâtábáhtuspargen lii algâttâm 25.2 Anna Lumikivi, kiäin puáhtá leđe ohtâvuođâst puoh tábáhtusân kyeskee aašijn. Sämitigge uárnee taan-uv ive uásálistei sáátuid, táárbu mield ijâstâllâmsoojijd já tábáhtus váldupeeivi purâdem.

 

Tábáhtus postereh láá valmâštum, taid finnee Škovlim- já oppâmaterialtoimâttuvâst Sämitiggeest, Saijoosist. Taan ive poster kove lii máálám 13-ihásâš Aslak Pieski Kärigâsnjaargâ škoovlâst.

 

 

Lasetiäđuh:

Anna Lumikivi

010 839 3174, 040 684 1957

anna.lumikivi(at)samediggi.fi

Facebook: @saamelaisnuortentaidetapahtuma

Instagram: @samenuoraid_daiddadahpahus

Tábáhtus hashtagih: #sndd2019 / #sntt2019

Sämitige vaaljah 2019 – Valjâluvâttâllâm lii uáinimnáál 18.-29.3.2019

Sämitige vaaljah tuállojeh 2.9. – 30.9.2019 koskâsii ääigi. Valjâluvâttâllâm tuálloo uáinimnáál njuhčâmáánu 18.3. – 29.3.2019 peeivij ääigi argâpeeivij vu-vá tijme 13.00 – 16.00 čuávvoo soojijn:

Tuodâr-Laapi luándukuávdáš                  Hetta, Peuratie 15

Sämitige toimâttâh                                  Sajos, Menesjärventie 2A

Sämitige toimâttâh                                  Ucjuuhâ, Kieldâtáálu, Luossatie 1

Vuáču škovlâ                                           Vuáčču, Ivalontie 8716

Juáhháást lii máhđulâšvuotâ tärhistiđ jieijâs kyeskee valjâluvâttâlmân merkkejum tiäđuid njuolgist valjâlävdikode toimâttuvâst puh. 010 839 3120, 010 839 3127, tâi šleđgâpostâ; vaalit@samediggi.fi tâi eelâšmáin keččâmin valjâluvâttâlmist paajaapiäláin soojijn mainâšum ääigi.

Kote uáiná, et sun lii vuoigâdvuođâttáá kuođđum meddâl valjâluvâttâlmist tâi sunjin kyeskee merkkim valjâluvâttâlmist lii puástud, puáhtá kirjálávt vaattâđ njuolgim valjâlävdikoddeest majemustáá cuáŋuimáánu 12. peeivi ovdil tijme 16.00.

Njuolgimmonâttâllâmravvuid finnee valjâlävdikode toimâttuvâst tâi taid puáhtá printtiđ www.samediggi.fi

Anarist 28.2.2019                                                          Valjâlävdikodde

Sämitigge almoot uuccâmnáál kulttuurčällee virge

Kulttuurčällee pargoh láá miäruštâllum Sämitige pargo-oornigist 24 §. Kulttuurčällee pargon lii el. valmâštâllâđ sämmilij kulttuur kyeskee aašijd, hoittáđ sämmilâš kulttuurmeriruuđâ haldâšem kullee pargoid sehe toimâđ kulttuurlävdikode oovdânpyehten já čällen. Pargo álgá 2.5.2019.Virgesajan lii Sämitige toimâsaje sämmilij päikkikuávlust.

Asâttâsvuáđustâslâš tohálâšvuotâvátámâššân lii virge vaattâm škovlim já lasseen váttoo sämikielâ táiđu (asâttâs 1727/95). Virge miänástuvvee hoittám váátá pyeri sämikulttuur, sämmilii ärbivuáválii tiäđu já haaldâtlij pargoi tubdâm sehe puorijd oovtâstpargo- já vuáruvaikuttâstááiđuid. Mij vyerdip meid kiärgusvuođâ jiečânâs porgâmân sehe puorijd ornim- já tedduukierdâmnaavcâid.

Pälkki meriduvvoo Sämitige pälkkivuáháduv vátávâšvuotâtääsi IV/II mield (vuáđupälkki 2596,52 €/mp). Vuáđupäälhi lasseen máksojeh pargohárjánem mield meridum hárjánemlaseh sehe sämikuávlust porgâdijn 24 % sämikuávlu lase. Virgeest lii kuuđâ mánuppaje keččâlemäigi.

Ucâmušâid tuođâštusâiguin kalga toimâttiđ Sämitige čäällimkoodán 28.3.2019 tme 16.00 räi čujottâsân info@samediggi.fi  Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106. Sämitige tooimân puáhtá uápásmuđ nettičujottâsâst www.samediggi.fi

Anarist 27.2.2019 Sämitigge

Pevdikirjij uáinimnáál toollâm

Sämitige pargo-oornig 64 § mield Sämitige čuákkim já stiivrâ pevdikirjeh toos lohtâseijee vaidâlemčujottâssáin tuálloo tärhistem maŋa almolávt uáinimnáál nuuvt maht tast lii almottum muuneeld. Eres toimâorgaan pevdikirje uáinimnáál tolâmist meerrid áášánkullee toimâorgaan jieš.

Pevdikirje tuálloo almolávt uáinimnáál Sämitige nettisiijđoin čujottâsâst www.samediggi.fi ucemustáá pevdikirje vaidâlemääigi, jis ij syeligâsâsttolâmân kyeskee njuolgâdusâin eres čuávu.

Čuákkimäššikirjeh

Anna Lumikivi aalgij taaiđâtábáhtuspargen

Säminuorâi taaiđâtábáhtus ornim vuálgá tääl tuođâst joton. Nuorttâkielâlâš musikkár Anna Lumikivi lii álgám taaiđâtábáhtuspargen škovlim- já oppâmaterialtoimâttuvvâst. Taaiđâtábáhtus uárnejuvvoo Anarist Saijoosist cuáŋuimáánu 10.-11. peeivijn, teeman lii teatter já muštâlem maaŋgah häämih.

Tábáhtusâst väljejuvvojeh säminuorâi ovdâsteijeeh riijkâ tääsi Teatris-tábáhtusân, mii uárnejuvvoo Jyväskyläst vyesimáánust. Toos lasseen palhâšuvvojeh pyeremuuh muštâleijeeh. Muštâlem häämih pyehtih leđe jieškote-uvlágán sänitaiđuu häämih sehe juáigus, livđe já le´udd.

Taaiđâtábáhtus lii Annan uápis jo ovdišist. – Mun lam párnážin uásálistám kiišton já ton maŋa lam kuohtii porgâm tábáhtus tuámárin já ohtii jođetteijen, muštâl Anna. – Lii hävski peessâđ orniđ Säminuorâi taaiđâtábáhtus, mast láá nuuvt kuhes ärbivyevih já mast lii lamaš nuuvt stuorrâ merhâšume sämikuávlu párnáid já nuoráid – nuuvtko meiddei munjin-uv.

Tábáhtusân almottem lekkâs forgâ Webropolist. Čuávu Sämitige nettisiijđoid, tábáhtus jieijâs Facebook-siijđoid já uásálist!

Riijkâ tääsi Teatris-tábáhtus njuolgâdusah láá tääbbin: https://nuorikulttuuri.fi/wp-content/uploads/sites/12/saannot-teatris-2019.pdf

 

Ohtâvuotâtiäđuh

anna.lumikivi(at)samediggi.fi

puh. 010 8393 174 da 040 684 1957

Facebook: @saamelaisnuortentaidetapahtuma

Instagram: @samenuoraid_daiddadahpahus

Torjuuh, moh máksojeh säämi kielâlaavâ 31 § vuáđuld, láá uuccâmnáál

Riehtiministeriö almoot uuccâmnáál säämi kielâlaavâ (1086/2003) 31 §:st uáivildum torjuid. Torjui várás lii taan ive kevttimnáál ohtsis 150 000 eurod. Torjuu puáhtá mieđettiđ sämmilij päikkikuávlu kieldáid, servikuddijd já palgâsáid sehe laavâ 18 §:st uáivildum priivaat uásipeelijd mainâšum laavâ heiviitmist šaddee eromâš lasekoloi luávdimân. Tääl uuccâmnáál torjuuh láá uáivildum 1.1.2019 maŋa šoddâm teikâ šaddee lasekoloi várás.

Rijjâhámásijd ucâmušâid kalga toimâttiđ riehtiministeriön majemustáá 1.4.2019 tme 16:15 šleđgâlávt čujottâsân: oikeusministerio@om.fi. Ucâmuš puáhtá toimâttiđ meid postâčujottâsân Oikeusministeriö, Demokratia-, kieli- ja perusoikeusasioiden yksikkö, PL 25, 00023 Valtioneuvosto. Tuše meriääigi räi puáttám ucâmušah váldojeh huámmášumán. Ucâmušâst kalga selvâttiđ taid eromâš lasekoloid, moi luávdimân toorjâ occoo.

Lasetiäđuh riehtiministeriö torjust

Lasetiäđuh:

Kielâtorvočällee Anne Kirste Aikio, 010 839 3124, anne-kirste.aikio(at)samediggi.fi

 

Sämmilii kulttuurmeriruuđâst mieđettum kulttuurtorjuuh ive 2019

Sämitige kulttuurlävdikodde juovij kulttuurlävdikode čuákkimist 11.-12.2.2019 Máttááttâs- já kulttuurministeriö mieđettem staatâtorjuu ihán 2019 ohtsis 176 000 € sämikielâlii kulttuur oovdedmân já sämiseervij tooimân (nk. sämmilâš kulttuurmeriruttâ), mast Ucjuv sämikirkkotuuvij paijeentolâmân 10 340 eurod. Tave-eennâmlij sämiseervij tuárjumân 15 000 €.

Kulttuurlävdikodde lii mieđettâm kulttuurpalhâšuumijd tubdâstâssân noonâ sämmilii kielâ, kulttuur já kulttuuräärbi, ärbivuáválij iäláttâsâi eellimvuáimálâšvuođâ ovdedeijen já tobdosin tohâmist. Eellimpargo -kulttuurpalhâšume uážžooh lává Inkermaria Hetta Vuáčust já Antti Oula Juuso Iänuduvâst. Kuohtuuh uážžuv 3000 € stuárusii palhâšume.

Oppeet puáhtá pahudiđ, ete ucâmušâi tääsi lâi olluv, mii muštâl, ete sämitaaiđâ já kulttuur eelih vuáimálii uđâsmittem ääigi. Siämmáá ääigi jyehimnáál kulttuurmeriruuđâ meeri lii pissoom siämmážin.

Ive 2019 ávuduvvoo OA algâaalmugij kielâi ihe. Teemaive ulmen lii pajediđ oovdân maailm algâaalmugij kielâi tile. Kulttuurlävdikodde halijdij movtijdittiđ jo kukken orroo čäällimhaavâi valmâšin finniimân, seervij tooimâ aktivistem sehe kulttuuräärbi tiäđui, tááiđui já vuovij ellen já nubástuvven siäilum suhâpuolvâst nuubán.

Kulttuurtorjui uážžoid vuolgâttuvvoo sopâmuš/miärádâs vuáláčäällimnáál kyehtin pittán já nubbe pittá macâttuvvoo Sämitiigán, mon maŋa torjuuh máksojeh.

Kulttuurmeriruttâ 2019

Sämitigge almoot uuccâmnáál viestâdemčällee virge

Viestâdemčällee pargoh láá miäruštâllum Sämitige pargo-oornigist 26 e §. Pargon lii iärásij lasseen hoittáđ, vuáváđ já ovdediđ Sämitige viestâdmân kyeskee aašijd mieldi luhâmáin viestâdemstrategia olášuttem, išediđ saavâjođetteijee já čäällimkode tieđettemtooimâst sehe valmâštâllâđ suu toimâsuárgán kullee aašijd tige čuákkimân, stiivrân já lävdikuudijd. Pargo álgá 1.4.2019.

Virge soijimsaje lii sämmilij päikkikuávlu. Asâttâsvuáđustâslâš tohálâšvuotâvátámâššân lii virge vaattâm škovlim já sämikielâ táiđu (asâttâs 1727/95). Virge miänástuvvee hoittám váátá šiev sämikulttuur tubdâm, njyebžilis kirjálii já njálmálii olgospyehtim sehe šiev oovtâstpargo- já vuáruvaikuttâstááiđuid. Mij vyerdip meid kiärgusvuođâ jiečânâs porgâmân, šiev ornimnaavcâ já tedduuhaldâšem. Ruotâ- já eŋgâlâskielâ táiđu (kirjálâš já njálmálâš) sehe pargohárjánem västideijee pargoin annojeh hiättun.

Pälkki meriduvvoo Sämitige pälkkivuáháduv vátávâšvuotâtääsi IV/II mield (vuáđupälkki 2596,52 €/mp). Vuáđupäälhi lasseen máksojeh pargohárjánem mield meridum hárjánemlaseh sehe sämikuávlust porgâdijn 24 % sämikuávlu lase. Virgeest lii kuuđâ mánuppaje keččâlemäigi.

Ucâmušâid tuođâštusâiguin kalga toimâttiđ Sämitige čäällimkoodán 22.3.2019 tme 16.00 räi čujottâsân info@samediggi.fi  Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106. Sämitige tooimân puáhtá uápásmuđ nettičujottâsâst www.samediggi.fi

Anarist 21.2.2018 Sämitigge