Sámedikki stivra hilggui sámediggeválggaid bohtosis dahkkon njulgengáibádusaid

/in /by

Sámedikki stivra mearridii čovdosiinnis hilgut sámediggeválggaid bohtosis dahkkon njulgengáibádusaid. Jagi 2019 sámediggeválggaid bohtosis ledje dahkkon áigemearis njeallje Sámedikkis addon lága 40 §:s dárkkuhuvvon njulgengáibádusa. Njulgengáibádusain lea gáibiduvvon válggaid bohtosa gomiheapmi ja ođđa válggaid lágideapmi.

– Sámediggeválggaid bohtosis dahkkon njulgengáibádusat leat dál gieđahallon ja dat oassi válggaide laktáseaddji meannudeamis lea Sámedikki oasil dikšojuvvon. Sámediggeválggaide vuolggedettiin lei dieđus juo ovddalgihtii, ahte dilli lea hui moivvas. Sámedikki stivra lea ainge hui fuolas sámiid vuđolaš iešstivrenvuoigatvuođa ollašuvvamis sámiid guoski siskkáldas áššiin, muitala Sámedikki ságajođiheaddji Sanila-Aikio.

Sámedikki stivra oaivvilda, ahte golmma njulgengáibádusa oasil eai leat ovdanbukton Sámedikkis addon lága 40 §:a eaktudan vuođustusat válggaid bohtosa njulgema várás dahje válggaid ođđasit doaimmaheami várás.

Njealját njulgengáibádusa oasil Sámedikki stivra mearridii leat njulgetkeahttá válgabohtosa. Stivra gávnnahii čovdosisttis, ahte oppalaččat árvvoštaladettiin válggaid doaimmaheami oktavuođas sámiid iešstivrenvuoigatvuohta ii leat ollašuvvan, muhto njulgengáibádusa vuođul válggaid doaimmaheapmái guoskkadin válgalávdegotti mearrádusain dahje doaibmabijuin ii leat fuopmášuvvon válgalávdegotti doaimmain boahtán lágahisvuohta.

Vaikke gáibádusaid dahkkit leat čujuhan válggaid bohtosa nannema almmolaš lágahisvuođa ja feaillalaš válgalogahallama váikkuhusa válgabohtosii, sii eai leat bastán njuolgga – válgačiegusvuođa dihtii – ovdanbuktit njuolggo duođaštusa das, man láhkai lágavuostásaš válgalogahallan lea váikkuhan justa sin buohta. Guoskevaš feaillaid guoski duođaštusa lea vejolaš ovdanbuktit dušše eahpenjuolgadit.

Sámedikki stivrra beavdegirji 19/2019 čoahkkin 13.11.2019

Sámedikki stivrra čovdosat jagi 2019 sámediggeválggaid bohtosis dahkkon njulgengáibádussii 1-4

 

40 § (30.12.2002/1279) Válggaid bohtosa guoski njulgengáibádus ja váidalus

Jietnavuoigadahtton olmmoš, guhte oaivvilda, ahte válgalávdegotti šiehttamuš válggaid bohtosa nannemis dahje válggaid doaimmaheapmái laktáseaddji eará doaibmabidju lea lágavuostásaš, sáhttá dahkat sámedikki stivrii njulgengáibádusa 14 beaivve siste dan beaivvis, go válgalávdegoddi lea nannen válggaid bohtosa.

Sámedikki stivra galgá gieđahallat njulgengáibádusa hohpolaččat ja maŋimustá ovdal válgajagi nohkama.

Sámedikki stivrra šiehttamuššii oažžu ohcat nuppástusa váidalemiin alimus hálddahusriektái maŋimustá 14 beaivve dan beaivvis, go áššáiosolaš lea ožžon sámedikki stivrra mearrádusa diehtun. Muđuid nuppástusohcamis čuvvojuvvo, mii hálddahuslágageavahanlágas ásahuvvo.

Jos válgalávdegotti 1 momeanttas dárkkuhuvvon šiehttamuš dahje doaibmabidju lea leamaš lágavuostásaš ja dát lea váikkuhan válggaid bohtosii, válggaid bohtosa galgá njulget ja stáhtaráđđi galgá dárbbu mielde mearridit sámedikki lahtuid ja várrelahtuid válggaid njulgejuvvon bohtosa mielde.

Jos válggaid bohtosa ii sáhte njulget, válggaid galgá doallat ođđasit. 

 

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Stuorámus lobálaš boazologut – bargojoavku ii evttot boazologuid vuolideami

/in , /by

Eana- ja meahccedoalloministeriija lea almmustahttán odne stuorámus lobálaš boazologut –bargojoavkku loahpparaporta. Raporttas gávnnahuvvo, ahte bálgosiid guoski ealliboazologuide ii evttohuvvo nuppástus, muhto guđege bálggus geatnegahtto dasa, ahte ovdanbuktá guokte doaibmabiju guohtoneatnamiid suvdilvuođa sihkkarastima várás. Sámediggi atná erenomáš buorrin bargojoavkku evttohusa, ahte bálgosiid guoski boazologuide ii evttohuvvo nuppástus.

Sámedikki ságajođiheaddji Tiina Sanila-Aikio oassálastá 25.11.2019 stuorámus lobálaš boazologut – bargojoavkku evttohusa almmustahttindilálašvuhtii. “Sápmelaš boazodoaluin barganeavttuid ja eallinvejolašvuođa dáfus lea duođaige dehálaš, ahte bargojoavku ii evttot boazologuid vuolideami”, Sanila-Aikio gávnnaha.

Eana- ja meahccedoalloministeriija ásahii 12.10.2018 stuorámus lobálaš boazologut – bargojoavkku válmmaštallat evttohusa, mii guoská dálveguohtoneatnamiid suvdilis buvttadannávcca mieldásaš ealliboazomeriid jagiide 2020-2030. Sámedikki ovddasteaddjin bargojoavkkus lea doaibman Asko Länsman. Bargojoavkku loahpparaporta lea gárvánan, iige stuorámus lobálaš boazologuide evttohuvvo vuolideapmi.

Bargojoavku evttoha loahpparaporttas, ahte ráhkaduvvojit bohccuid dálveguohtoneatnamiid suvdilis geavaheami sihkkarastima várás sihke luonddu máŋggahápmásašvuođa doarju guođoheami optimerema várás bálgosiid guoski guohtoneatnamiid  dikšun- ja geavahanplánat. Bargojoavku evttoha, ahte bálggus vállje čuovvovaš vugiin guokte doaibmabiju guohtoneatnamiid suvdilvuođa sihkkarastima várás: 1) Uhcimustá 7 % eallibohccomeari luoitin stuorámus lobálaš ealliboazomeari ektui, 2) áiggil ollašuhtton njuovvamat 1.6.-15.11., 3) jeageleatnamiid dili buorideapmi, 4) geasseguohtoneatnamiid vurohallama ovddideapmi, 5) bálgosiid ovttastahttin.

Sámedikki ja eana- ja meahccedoalloministeriija gaskasaš sámediggelága 9 §:a mieldásaš ráđđádallan bargojoavkku loahpparaporttas ja evttohusas dollui 14.11.2019. Ráđđádallamis gieđahallojedje earret eará áiggil ollašuhtton njuovvamat ja dasa laktáseaddji hástalusat. Sámediggi buvttii ovdan, ahte máŋggain sámiid ruovttuguovllu bálgosiin njuovvamiid ollašuhttin lea gitta luonddudiliin ja áiggil ollašuhtton njuovvamiid ii vealttakeahttá leat vejolaš ollašuhttit 15.11. rádjai, go bohccuid čohkken bigálusaid várás eaktuda čázádagaid jiekŋuma ja muohttaga boahtima.

Hástalussan sáhttá maiddái leat dat, ahte bálgosat eai fidne biergogávppiid áigemeari rádjai. Nappo Sámediggi evttohii, ahte sámiid ruovttuguovllu oasil bálgosat geatnegahttojit ovdanbuktit ovtta doaibmabiju guohtoneatnamiid suvdilvuođa sihkkarastima várás. Ráđđádallamiin mearriduvvui, ahte EMM:a ásahan boahttevuođabargojoavku árvvoštallá Sámedikki ávžžuhusas 15.11. beaivemeari báldii maŋimuš áigemeari “ja/dahje ovdal dálveguohtoneatnamiidda sirdáseami” geavahan- ja dikšunplána ollašuhttima čoavddedettiin.

Boazodoallolága 21 §:a mielde eana- ja meahccedoalloministeriija mearrida logi jahkái hávil, galle eallibohcco bálggus oažžu guovllustis jahkásaččat doallat ja galle dakkár bohcco bálgosa osolaš oažžu eanemustá oamastit.

Lassidieđut:

Ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Ealáhusčálli Sarita Kämäräinen tel. 040 186 7258, sarita.kamarainen(at)samediggi.fi

Govva: Tomi Guttorm / Sámediggi

Oza oahpahallin Walt Disney Animation Studios 

/in , /by

Leat go gazzame oahpu dahje aitto gárven oahpu dáidda, animašuvnna, gráfalaš dahje filbma suorggis? Walt Disney Animation Studios ohcet oahpahalliid geassái 2020.Taleanta ovdánahttin oahpahallin oaččut erenomáš vejolašvuođa bargat ovttas Disney bagadeddjiin ja guorahallat buot beliid dáidda-, muitalushábmen- ja filbmasuorggis.

Oahpahalliprográmma prográmma bistá logi vahkku ja juohkása iešguđet surgiide masa sáhtát ohcat. Loga eambbo sin oahpahalli prográmma ja eavttuid birra dás:

Story

Production Management

Character, CG Artist

Environment, CG Artist

Visual Development

CG Animation

Technology Tools

Technology Research Graduate

Intern Meander Drawing Software

Graduate Intern Appearance Modeling and Rendering

Real-Time Rendering Intern

Environment Software

Ohcanáigemearri WDAS oahpahallin ja mátkestipendii: 13.01.20 dii. 09:00 norgga/ruoŧa áigi ja 10:00 suoma áigi.

Mátkestipeanda

Oahpahalli gálga ohcat mátkestipeanda, man Sámeráđđi ja Sámedikkit almmuhit dán oktavuođas 10.000 $ sturrosaš mátkestipeandda. Ohccis galgá leat sámeduogáš, galgá deavdit WDAS eavttuid oahpahallái ja plána das mo son áigu máhcahit gelbbolašvuođa ruovttoluotta sámi servodahkii, nu go omd sosiála mediaid bokte, logaldallamiid jnv.

Čális ohcama, eanemusat 1 siiddu, mas čilget iežat duogaža ja du plána gelbbolašvuoda máhcaheapmai.

Sádde ohcama dán čujuhussii ja merke ohcama “WDAS oahpahalli”: kmr@saamicouncil.net.

Ohcanáigemearri WDAS oahpahallin ja mátkestipendii: 13.01.20 dii. 09:00 norgga/ruoŧa áigi ja 10:00 suoma áigi.

Oktavuođadieđut

Christina Hætta, Sámiráđđi
+47 48021734
kmr@saamicouncil.net

Sámegielat sosiála- ja dearvvasvuođasuorggi bargit čoahkkanit Sajosis

/in , /by

Sámegielat sosiála- ja dearvvasvuođasuorggi bargiid oktasaš deaivvadeapmi lágiduvvo jahkásaččat. Dán jagi deaivvadeamis lea dárkkuhus guorahallat ovttas sámiid palliatiiva divššu ja mieđuštandivššu iešvuođaid ja boahttevuođa ovddidandárbbuid sihke gieđahallat eará áigeguovdilis áššiid.

”Oktasaš deaivvademiid dárkkuhussan lea doarjut sámegielat bargiid kultuvrra mieldásaš bargovuogi ja barggus veadjima veardásašdoarjaga bokte. Dán jagi deaivvadeapmái oassálaste sámegielat boarrásiidbargit juohke sámeguovllu gielddas ja Sámisoster rs:s”, muitala deaivvadeami lágideamis vástidan Sámedikki hálddahushoavda Pia Ruotsala-Kangasniemi.

Oktasaš deaivvadeamis sámiid palliatiiva divššus ja mieđuštandivššu iešvuođain leaba muitaleamen Sámiid boarrásiidbálvalusaid ovddidanguovddáža hoavda Kristine Gaup-Grønmo ja buohccedivššár Ellen Inga Eira Kárášjogas.

Oktasaš deaivvadeami jahkásaš ordnemis vástida Sámediggi ja deaivvadeapmi lea dárkkuhuvvon buot sámegielat sosiála- ja dearvvasvuođasuorggi bargiide.

 

Lassidieđut

Hálddahushoavda Pia Ruotsala-Kangasniemi, 010 839 3106 / 040 726 2688, pia.ruotsala(at)samediggi.fi

Vuollái skuvlaahkásaččaid mánáidmateriálaprošeavtta loahppaávvudeapmi ja materiálaid almmustahttindilálašvuohta Sajosis 20.11.

/in , /by

Sámedikki gielladoaimmahaga Vuollái skuvlaahkásaččaid mánáidmateriálaprošeavtta loahppaávvudeapmi ja buvttaduvvon materiálaid almmustahttindilálašvuohta dollojuvvo Sajosis mánáid vuoigatvuođaid beaivve 20.11. dmu 9.00-12.00.

Dilálašvuohta álggahuvvo auditorias sáhkavuoruin, materiálaid ovdanbuktimiin ja mánáid lávlumiin, man maŋŋá Sajosa boađafeaskáris lea vejolašvuohta oahpásmit materiálaidda dárkilabbot.

Prošeakta lea álgán jagi álggus ja dan olis leat buvttaduvvon guokte mobiilaspealu, guokte digigirjji, lávdespeallu ja bođubustávat anáraš-, nuortalaš- ja davvisámegillii.

Sámediggi sávvá buohkaid, muhto erenomážit materiálaid bargamii oassálastán mánáid, sámegielat vuollái skuvlaahkásaš mánáid ja ovdaskuvlla oahppiid, leat bures boahtin almmustahttindilálašvuhtii.

Dáhpáhus lea sámegielat.

Lassidieđut

Má. giellabeassejođiheaddji
Petra Kuuva
+358 10 839 3119 / +358 40 6624741
petra.kuuva(at)samediggi.fi

Sámedikki vuollái skuvlaahkásaččaid mánáidmateriálaprošeakta lea jagi 2019 bisti oahpahus- ja kulturministeriija ruhtadan prošeakta, man oktavuođas buvttaduvvojit Suoma sámegielain guokte mobiilaspealu, guokte digigirjji, sámegielaid bođubustávat ja boazofáttát lávdespeallu.

Duddjonmiella! dáhpáhus čohkkii olbmuid Heahttái

/in , , /by

Mannan bearjadaga skábmamánu 8.beaivvi lágiduvvui “Duddjonmiella!” dáhpáhus Heahtás. Dáhpáhusa lágidedje Duodjeakademiija, Sámi allaskuvla, Lappi Universitehta, Sámi mánáidkulturguovddáš Mánnu ja eaktodáhtolaš duodjeberošteaddjit.

Dáhpáhusas lei duddjonbádji mánáide ja nuoraide, masa serve 18 máná ja nuora. Duddjonbáji lágidii Sámi mánáid- ja nuoraid kulturguovddáš Mánnu. Dáhpáhusas lágiduvvui maid logaldallan FT Sigga Marja Maggain, gii logaldalai duodjeárbevieru nuppástuvvi máilmmis Eanodaga guovllu geahčastagas.

Maŋŋil logaldallama Duodjeakademiija bovdii olbmuid ságastallat duodjeárbevieru dilis ja boahtteáiggis. Ságastallamis bohte ovdan evttohusat mo duodjeárbevieru sáhtášii nannet ja ovdánahttit boahtte áiggis. Evttohusat ledje earret eará kurssaid lágideapmi, mánáid várás lágidit “meahcce-“ dahje “várre-skuvlla”, gos beasaše oahppat iešguđetge árbevirolaš bargguid meahcis ja ásahit duddjonbáji, gos livčče duddjonrusttegat ja reaiddut.

Loahpageahčen Duddjonmiella! dáhpáhusa prográmmas lei duojára ja PhD stipendiáhtta Maarit Magga govvačájáhusrahpan, mii lea oassin nákkosdutkamušas Lappi universitehta Dáidagiid dieđagoddái. Govvačájáhusa ollašuhttimis leat maid leamašan mielde Nillá-Máhtte Magga govvejeaddjin ja Hannu Tikkanen čájáhusa gráfalaš hábmejeaddjin. Maarit Magga lohká iežas duđavažžan čájáhusrahpamiin ja vuollegašvuođain giitá buot gussiid.

Oktavuođa dieđut:

Iŋgá Påve Idivuoma
inga.idivuoma(at)samediggi.fi
tel. +358 40 620 6676

 


 

 

 

Evttohus sámiid duohtavuohta- ja soabadankomišuvdnan válmmaš

/in , /by

Sámiid duohtavuohta- ja soabadankomišuvnna ásaheami guoski ráđđádallamat leat ožžojuvvon gárvvisin stáhta, Sámedikki ja Nuortalaččaid siidačoahkkima gaskkas. Stáhtaráđđi lea gieđahallan ja dohkkehan evttohusa sámiid duohtavuohta- ja soabadankomišuvdnan eahketskuvllas 13.11.2019. Evttohus ovdána Sámedikki ja Nuortalaččaid siidačoahkkima gieđahallamii.

Ulbmilin lea ásahit viđa lahttosaš komišuvnna, mii livčče doaimmastis iehčanas ja sorjjasmeahttun. Evttohus sámiid duohtavuohta- ja soabadankomišuvnna ásaheapmin sisttis doallá earret eará komišuvnna bargogohččosa, barggu ulbmiliid ja bargguid, ja dain dieđihuvvo lasi maŋŋá. Sámedikki čoahkkin gieđahallá evttohusa sámiid duohtavuohta- ja soabadankomišuvdnan čoahkkimis 17.-18.12.2019.

­- Vuđolaš válmmaštallama ja sihke Sipilä ja Rinne ráđđehusaiguin gevvon ráđđádallamiid maŋŋá leat beassan dan muddui, ahte sáhtán buktit viimmat evttohusa sámiid duohtavuohta- ja soabadankomišuvnna vuođđudeamis Sámedikki stivrra ja čoahkkima gieđahallamii, muitala Sámedikki ságajođiheaddji Tiina Sanila-Aikio.

– Čađahuvvon gullamiin sámeálbmot lea eaktudan stáhtas čatnašumi. Sámit vurdet, ahte boasttuvuođat čielggaduvvojit ja njulgejuvvojit ja ahte boasttuvuođat eai šat goassige dáhpáhuvašii. Válmmaštallama áigge lean ožžon diehtit lossa, ovttaskas sápmelaččaide dáhpáhuvvan tragediijaid. Dáid dáhpáhusain čohkiida sámeálbmoga oktasaš historjá ja ceavzima eallingeardi. Sámediggi ja Nuortalaččaid siidačoahkkin galget guorahallat, háliiduvvogo, ahte dáhpáhuvvan áššit buktojit oidnosii, Sanila-Aikio joatká.

Suoma ráđđehus lea Sámedikki evttohusa mielde álggahan sámeáššiid gieđahalli duohtavuohta- ja soabadanproseassa válmmaštallama golggotmánus 2017. Sámedikki čoahkkin evttohii gevvon sáttaságastallamis 9.2.2018, ahte proseassas lágiduvvošedje sámiid gullamat nu sámiid ruovttuguovllus go dan olggobealdege. Stáhtaráđi kansliija almmustahtii raportta gullamiin 26.11.2018. Sámediggi mearridii čoahkkimis 18.12.2018 ovdánit duohtavuohta- ja soabadanproseassas ja evttohit Suoma stáhtii duohtavuohta- ja soabadankomišuvnna vuođđudeami sihke mandáhtaráđđádallamiid álggaheami. Sámedikki stivra fápmudahttui ráđđádallat mandáhta birra stáhtain.

Stáhtaráđi dieđáhus 13.11.2019; Sámiid duohtavuohta- ja soabadankomišuvnna ásaheapmi ovdána

Lassidiehtu:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Sode- ja eanangoddeođastus sihke kulturbálvalusat ovdan sámeáššiid ráđđádallanbeivviin

/in /by

Sámeáššiid ráđđádallanbeaivvit ordnejuvvojit fas 7.-8.11.2019 Helssegis. Jahkásaš ráđđádallanbeivviid ulbmilin lea čađamannat áigeguovdilis sámeáššiid ovttas ministeriija virgeolbmuiguin ja Sámedikki ovddasteddjiiguin. Vuosttas beaivve lea buot ministeriijaide oaivvilduvvon oktasaš oassi ráđđehusprográmma ja dain doaibmabijuid birra.

Ráđđádallanbeivviid áigge ságastallojuvvo iešguđege suorggi vástideaddji virgeolbmuiguin áššiid birra, maid Sámediggi lea evttohan. Dán jagi fáttáide leat válljejuvvon kulturbálvalusat, sode- ja eanangoddeođastus ja turisma.

Kulturbálvalusaid bokte váldojuvvojit ovdan guovddážiid doaibma ja ruhtadeapmi sihke Veikkaus -ruhtadeami geahpidanváikkuhusat. Sode-ođastusa olis leat ovdan sámiid gielalaš ja kultuvrralaš vuođđorivttiid ja ovttaveardásašvuođa buoret ollašuhttin ja sámiid váikkuhanvejolašvuođaid ja kulturiešmearrideami buorideapmi. Turismmas leat ovdan fitnodatturisma árktalaš guovllus, dorvvolašvuohta ja resursagažaldagat ja báikkálaš olbmuid gullan ja vuhtiiváldin.

Ráđđádallanbeivviide oasálastet Sámedikkis I várreságadoalli Heikki Paltto, II várreságadoalli Tuomas Aslak Juuso, stivrra lahttu Nilla Tapiola, hálddahushoavda Pia Ruotsala-Kangasniemi, kulturčálli Riitta Orti-Berg, ealáhusčálli Sarita Kämäräinen ja gáiddusoktavuođaid bokte Sámedikki virgeolbmot iešguđege suorggis.

Ráđđádallanbeivviid koordinerejit vuoigatvuođaministeriija ja Sámediggi ja dat ordnejuvvojit dál viđát geardde.

Lassedieđuid

I várreságadoalli Heikki Paltto, tel. 040 756 9075, heikki.paltto(at)samediggi.fi

II várreságadoalli Tuomas Aslak Juuso, tel. 040 187 1331, tuomas.juuso(at)samediggi.fi

Hálddahushoavda Pia Ruotsala-Kangasniemi, tel. 040 726 2688, pia.ruotsala(at)samediggi.fi

Oza mielde dahje evttot lahtu sámedikki nuoraidráđđái 2020-2021

/in , /by

Ohcat nuoraidráđđái movttegis ja aktiivvalaš sámenuoraid miehtá Suoma ovddidit sámenuoraid áššiid. Nuoraidráđi válljemis váldojuvvo vuhtii, ahte lahtut ovddastit nu viidát go vejolaš olles sámeguovllu ja maiddái sierra giellajoavkkuid. Sámegiela dáidu lea sávahahtti. Válljemis čuvvo maiddái sohkabeliid gaskasaš dásseárvu. Nuoraidráđi lahtut eai dárbbaš leat sámedikki lahtut.

Nuoraidráđđái válljejuvvojit čieža lahtu sihke persovnnalaš várrelahtut. Lahtut galget leat 18–28-jahkásaš aktiivvalaš sámenuorat. Lassin ráđđái válljejuvvojit vihtta fásta áššedovdi. Áššedovdilahtut galget válljejuvvot boađidettiin leat 15–17-jahkásaččat. Nuoraidráđđi bargá sámedikki stivrii evttohusa vejolaš lahtuin, ja loahpalaš mearrádusa dahká sámedikki čoahkkin.

Sáhtát ohcat  dahje evttohit du mielas nuoraidráđđái heivvolaš 18–28-jahkásaš sámenuoraid ja áššedovdilahttun heivvolaš 15–17- jahkásaš nuoraid. Evttohusaid vuođustusaiguin sáhttá sáddet maŋimustá 1.12.2019 šleađgapoasttain nuoraidčállái elli-marja.hetta(at)samediggi.fi

dahje poastta fáro

Nuoraidráđđi
Sajos, 99870 Anár

Sáhttát deavdit maid ohcanskovi.

Sámedikki oktavuođas doaibmá nuoraidráđđi. Ráđi váldobargun lea ovddidit sámenuoraid gielalaš ja kultuvrralaš vuoigatvuođaid sihke nannet sámenuoraid identitehta nuoraidbarggu bokte. Lassin ráđđi galgá válmmaštallat daid sámedikki evttohusaid, álgagiid, cealkámušaid ja eará bealiváldimiid, mat gusket sámenuoraid.

Nuoraidráđi doaimmaide sáhtát oahpásmuvvat lasi dáppe www.nuor.fi

Lassidieđut

Vs. Nuoraidčálli Elli-Marja Hetta puh. 010 839 3134, elli-marja.hetta(at)samediggi.fi