Sámediggi bajidii ovdan EU:a Árktalaš forumas eamiálbmogiid oassálastinvejolašvuođaid EU:s

Sámedikki II várreságajođiheaddji Tuomas Aslak Juuso oassálasttii 3.-4.10.2019 Uumajas Ruoŧas Eurohpá komišuvnna, Eurohpá olgogaskavuođahálddahusa sihke Ruoŧa ráđđehusa ordnen EU:a Árktalaš Forumii (EU Arctic Forum).

Juuso bajidii Forumis ovdan gažaldaga das, man láhkai EU:a mearrádusbargamis sáhtášii duođalaččat vuhtii váldit dan guovllus ealli sierra álbmogiid oainnuid. Oktasaš suvdilis čovdosiid gávdnama dihtii árktalaš guovlluin, Juuso deattuhii erenomážit eamiálbmogiid oassálastinvejolašvuođaid buorideami nu, ahte sis livčče ovttaveardásaš oassálastinvejolašvuođat váikkuheapmái ja mearrádusbargamii EU:s eará álbmogiid ovddasteaddjiiguin.

Ságastallama bohciidahtte maiddái árktalaš guovlluide plánejuvvon iešguđetlágan stuorra investerenfidnut, mat márkanastojit daid suvdilvuohta vuosttasin (sustainable investment). Juuso goittotge váillahii dákkár fidnuid plánema oktavuođas dahkkon riskkaid árvvoštallanproseassa dehálašvuođa ja guorahalai, man láhkai dáin vuhtii váldojuvvojit plánejuvvon investeremiid vejolaš negatiivvalaš váikkuhusat sámekultuvrii dahje sámiid vuoigatvuođaid ollašuvvamii, vai vuhtii váldojuvvojitgo dat ?

EU:a Árktalaš Foruma oktavuođas Juuso deaivvadii maiddái olgoriikkaministtar Pekka Haavistoin. Deaivvadeami oktavuođas ságastallui ee. Barents guovllu oktasašbarggu mearkkašumis. Juuso mielde eamiálbmogiid oppalaš oassálastinvejolašvuođaid galggašii nannet maiddái Barents Euro-Árktalaš ráđi (BEAC) doaimmas ja ruhtadeami dasa lasihit.

EU:a Árktalaš Forum lea dáhpáhus, gos árktalaš guovllu sierra oassebealit čoahkkanit oktii ja sáhttet ságastit ee. árktalaš guovllu maŋimuš áigge ovdáneamis. Dáhpáhusas ságastallui EU:a árktalaš politihka maŋimuš áigge bohtosiin ja ságastallui boahttevaš doaimmain. Maiddái árktalaš eamiálbmogiid jahkásaš dialoga ordnejuvvo dáhpáhusa oktavuođas 4.10.2019.

Lassidieđut:

Sámedikki II várreságadoalli Tuomas Aslak Juuso
tel. 040 1871331
tuomas.juuso(at)samediggi.fi

Duodjeakademiija vuosttaš álbmotdeaivvadeapmi lágiduvvui Gárasavvonis

Mannan duorastaga 24.9.2019 lágiduvvui Duodjeakademiija vuosttaš álbmotdeaivvadeapmi Gárasavvonis. Álbmotdeaivvadeami ulbmil lei oahpásmuhttit báikkálaš olbmuid Duodjeakademiijai ja ságastallat duoji ovdánahttima dárbbuid. Deaivvadandilálašvuođas ovdanbuvttiiga Sámedikki nubbin várreságadoalli Gáijjot Ántte Issáha Duommá ja Duodjeakademiija koordináhtor Ánte Nils-Duommá Editha Iŋgá.

Ságastallamis bohte ovdan ollu jurdagat ja sávaldagat das ahte mo duoji sáhttá nannet Gárasavvona guovllus. Sávaldagat ledje earret eará ahte Duodjeakademiija lágidivččii duodjeeahkediid, nu ahte duojárat besset deaivvadit. Ságastallamis bohte maid ovdan sávaldagat ahte Gárasavvon guovllus livččii doaibmavistti, gos livčče dárbbašlaš mašiinnat ja reaiddut, maid báikkálaš olbmot beasaše ávkkástallat. Duodjeakademiija čohkkii olbmuin buot dieđuid ja jurdagiid, mat bohte ovdan álbmotdeaivvadeamis, maid sáhttá ávkin atnit prošeavtta loahpalaš hábmemii ja doaimmaid plánemii.

Duodjeakademiija lea dál plánegoahtán čuovvovaš álbmotdeaivvadeami, mii galgá lágiduvvot Heahtás skábmamánu 8. Beaivvi. Lassi dieđut dáhpáhusas almmuhuvvojit dađistaga.

Sámediggi lea ožžon prošektii ruhtadeami Duottar-Lappi Leadera bokte.

Oktavuođa dieđut:

Iŋgá Påve Idivuoma
inga.idivuoma(at)samediggi.fi
tel. +358 40 620 6676

 

 

Sámediggeválggaid nannekeahtes boađus

Sámedikki válgalávdegoddi lea čoahkkimis 1.10.2019 olggosaddán sámediggeválggaid álgomuttu bohtosa. Sámediggeválggaid nannekeahtes jienastanproseanta lea 48,58. Jienastanvuoigatvuođa válggain geavahedje oktiibuot 2853 jietnavuoigadahtton olbmo.

Sámediggeválggaid nannekeahtes boađus (PDF).

Sámedikki kulturdoarjagiid ohcan 2020

Sámediggi almmuha ohcanláhkai doarjagiid, mat mieđihuvvojit Oahpahus- ja kulturministeriija sámegielat kultuvrra mom. 29.80.52 (sápmelaš kulturmearreruhta) ovddideapmái ja sámeservviid doaibmamii jahkái 2020 čujuhuvvon mearreruđas. Doarjjaohcamušaid galgá čujuhit Sámediggái maŋimustá 31. golggotmánu 2019 d. 16.15 rádjai čujuhusain: info@samediggi.fi,  Sámediggi, Sajos,  99870 Anár. Ohcanskoviid ja lassidieđuid fidne kulturčállis tel. 010 839 3103 ja šleađgapoastta bokte riitta.orti-berg(at)samediggi.fi. Ohcanskovit leat maiddái printemis Sámedikki interneahttasiidduin čujuhusas www.samediggi.fi. Doarjjaohcamušaid sáhttá doaimmahit buktimiin ieš dahje áššealbmá mielde, sáddet šleađgapoastta dahje poastta bokte. Doarjjaohcamušaid sádden dáhpáhuvvá sáddejeaddji ovddasvástádusain.

Govva: Ijahis Idja 2019, Jari Rantapelko

Ohcanskovit

Sáhtát luđet vulobealde pdf-skovi, man sáhttá deavdit. Skovi sáhttá deavdit maid oasis neahttalohkkiin, nugo Chrome dahje Internet Explorer.

Teknihkalaš rávvagat

Bargostipeanda

Searvvi doaibmandoarjja / prošeaktadoarjja

Prošeaktadoarjja

Ruhtageavahančilgehus