Sämitigij ohtsii kielâkonferens ohjelm lii almostittum já almottâttâm lii lekkum

/in , /by

Sämitigeh uárnejeh oovtâst 9.-10.10.2019 kielâseminaar Anarist eromâšávt ulmuid, kiäh pargeh sämikielâiguin: jurgâleijeid, tulháid tâi eres kielâpargeid. Seminaar uárnejuvvoo Taažâ, Ruotâ já Suomâ Sämitigij já Säämi Kielâkäldee (Sámi Giellagáldu) ohtsâšpargon. Seminaar kulá OA algâaalmugkielâi ive huámmášumán väldimân Sämitige uásild.

Seminaarist mij peessâp kuullâđ luvâldâlmijd já savâstâlmijd vijđáht jurgâleijei, tuulhâi já eres kielâpargei syergist. Seminaarohjelm válduluvâldâllen tuáimá Oulu ollâopâttuv sämikielâ professor Jussi Ylikoski, kote tuálá luvâlduv: Sámegiela eallin, dat lea biekka ja cizáža: eres kielâi vaikuttâs sämikieláid. Fáddá lii äigikyevdilis eromâšávt sämmilij kielâoovtâstpargo, jurgâlem- já eres kielâpargo tááhust.

Seminaarist lii meid máhđulâšvuotâ uápásmuđ teknisáid čuávdusáid, moh láá ovdedum sämikielâi toorjân. Romssa ollâopâttuv Giellatekno oovdânpuáhtá sahâvuárustis jurgâlemniävuid já eres teknisijd čuávdusijd, moh láá ävkkin kielâiguin pargee ulmuid. Feerimsahâvuáru fáádást tuálá jurgâleijee Anne-Márjá Guttorm Graven, kote lii kiävttám ei. jurgâlemmušto pargostis. Seminaarist mij kuullâp meid kielâpargei aargâst: nuorttâsämikielâ jurgâleijee Merja Fofonoff muštâl, ete maggaar lii porgâđ kielâpargen eromâšávt uhkevuálásii nuorttâlâškieláin ”ko säänih iä pijssáá”, ko vuod rap-artist Ailu Valle muštâl, ete maht šaddeh sämikielâliih rap-teevstah. Aanaarsämikielâ miänástusmainâs kielâiäláskittempargoost muštâl toimâtteijee-niävttár Heli Huovinen.  Jis tun vuod lah eenâb perustum kielâtipšom koččâmušâin, te puáđi kuldâliđ Oulu ollâopâttuv sämikielâ máttáátteijee Kaarina Vuolab-Lohi luvâlduv sämikielâi sajehaamij kiävtust.

Taat lii tuše uási oles vijđes ohjelmist, maid Taažâ, Ruotâ já Suomâ sämitigeh láá halijdâm faallâđ já mij povdip-uv iloin puoh sämikielâin perustum ulmuid kielâseminaarân 9.- 10.10.2019 Anarân.

Seminaar oles ohjelm lii tääbbin.

Seminaarist lii tulkkum tave-, aanaar-, nuorttâ-, maadâ- já juulevsämikielân.

Jis tun ááiguh puáttiđ Ruotâbeln, te vääldi ohtâvuođâ miliana.baer(at)sametinget.se. Ruotâ sämitigge lii orniimin ohtsâšsáátu.

Seminaarân almottâttâm tääbbin.

Lasetiäđuh:

Anne Kirste Aikio, anne-kirste.aikio(at)samediggi.fi,. +358 40 7075626

Marie Louise Allas, marielouise.allas(at)sametinget.se, +46 70-367 46 82

Mikkel Rasmus Logje, mikkel.rasmus.logje(at)samediggi.no, +47 412 65 375

Sämitige stiivrâ ornim savâstâllâmtilálâšvuođah juátkojeh roovvâdmáánust

/in , /by

Sämitige stivrâ meridij čuákkimistis 28.8.2019 juátkiđ savâstâllâmtilálâšvuođâi ornim. Tilálâšvuođah uárnejuvvojeh Kärigâsnjaargâst 11.10., Oulust 12.11., Ruávinjaargâst 13.11. já Čevetjäävrist 1.12.2019. Ive majemuš Sämitige čuákkim uárnejuvvoo 17.-18.12. Anarist.

Sämitige ive 2019 toimâvuávám mield stiivrâ čuákkimij ohtâvuođâst uárnejuvvojeh savâstâllâmtilálâšvuođah máhđulâšvuođâi mield sierâ päikkikuudijn. Tilálâšvuođâin stivrâ tiäivá kuávlu sämmilijd, muštâl Sämitige tooimâin já addel epivirgálii máhđulâšvuođâ savâstâllâđ äigikyevdilijn aašijn. Savâstâllâmtilálâšvuođâin tieđettep lase aldeláá äigimudo.

”Mij halijdep stivráin juátkiđ vala savâstâllâmtilálâšvuođâi ornim návt loppâpaajeest. Savâstâllâmtilálâšvuođah láá šiev tilálâšvuotâ peessâđ savâstâllâđ já lonottiđ jurduid Sämitige já eromâšávt stiivrâ pargoost sierâ kuávlui sämmilijguin. Tilálâšvuođâin lii meid šiev máhđulâšvuotâ adeliđ evvisijd čuávvoo Sämitige čuákánpiejâmân”, iätá saavâjođetteijee Sanila-Aikio já tuáivut kiäsuttum ulmuid tiervâpuáttim puáttee tilálâšvuođáid.

Stivrâ iävtut Sämitige kuávdái pargoi fastâdem

Sämitige stivrâ pahudij, ete párnáikulttuur-, muusik- já elleekovekuávdái pargoi meriáigásii hoittáámân iä lah lavâliih vuáđđuseh já meridij iävtuttiđ Sämitige čuákkimân viirgij vuáđudem toi pargoi hoittáámân. Tääl Sämitige pargo-oornigist láá miäruštâllum párnáikulttuur-, muusik- já elleekovekuávdái pargoh já palvâlemkoskâvuođâ häämi. Koččâmušâst orroo pargoh láá lamaš tevdum taan räi meriáigásâš virgekoskâvuottân ruttâdem epivisesvuođâ tiet.

”Kuávdái vuávájeijei pargo lii jotkum taan räi kuhemustáá jo suulân vittnubálov ihheed, te lii čielgâs, ete kuávdái tooimâst lii šoddâm fastâ uási Sämitige tooimâ, ige meriáigásâšvuotân lah vuáđus”, seelvât saavâjođetteijee Sanila-Aikio tile.

Vajesaahâ vaaigut negatiivlávt

Sämmiláid já Sämitiigán čuáccám vajesaahâ lii lasanâm eromâšávt sosiaallii mediast, mutâ meid eres mediast já ohtsâškoddeest. Juátkojeijee já lasaneijee vajesaahâ vaaigut negatiivlávt eromâšávt Sämitige pargei já sii perrui pyereestvajemân já tiervâsvuotân ko sij kärttih meid priiveatelimist ohtânmaanoost tuárjuđ lasaneijee olgoštem já hemâdem. Vajesaahâ vaaigut meid vijđásubbooht ohtsâškode miärádâstohâmân eereeb iärásij nuuvt, ete keeppid haalu uásálistiđ almos savâstâlmân sehe hiäjusmit luáttámuš instituutioid.

Stivrâ savâstâlâi sämmiláid já Sämitiigán čuoccâm vajesaavâst já meridij váldásmittiđ haldâttâhhoovdâ haahâđ lahâäššitobdeeiše ääši jotkâvalmâštâllâm várás.

Sämitige stiivrâ čuákkim 14/2019 pevdikirje

Sämitige dokumenteh

Lasetiäđuh

Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi

Sämitige vaaljâin 2.9.-30.9.2019 jienâstem

/in , /by

Valjâäššikirjeh láá pieijum poostân kirjejum reivân jyehi jienâstemvuoigâdvuođâlâžân vuossaargâ 2.9.2019. Kirjejum reivâ lii árvupostâ, et jienâsteijee kalga jieš viežžâđ tom jieijâs postâtoimâsaajeest, ko lii finnim almottâs poostâst.

Vaaljâin jienâstem tábáhtuvá nuuvt, et jienâsteijee maaccât valmâšin maksum já tevdum vuolgâttâskovertist kirjejum reivân poostâ pehti jieijâs vuáláčäällim vuolgâttâsreei­vâ já valjâkovertân toppum valjâliipu.

Valjâäššikiirjijd kalga pieijâđ poostân nuuvt puorijn aaigijn, et toh kiergâneh Anarân majemustáá 30.9.2019 ovdil jienâirekinistem algâttem. Taan äigimudo; 30.9.2019 tijme 18.00 maŋa puáttee valjâäššikiirjijd valjâlävdikodde ij pyevti väldiđ vuotân jienâirekinistmist.

Poostân pieijâm sajan puáhtá jienâsteijee meiddei macâttiđ valjâäššikirjijdis persovnlávt virgeääigi 16.9. – 27.9.2019 valjâlävdikode toimâttâhân: Sämitigge, Valjâlävdikode toimâttâh, čujottâs: Sämikulttuurkuávdáš Sajos, Menesjärventie 2 A, 99870 Aanaar.

Sämmilij päikkikuávlust orroo lájádâsâin tipšomnáál ulmuuh, sehe tagareh pääihist tipšomnáál ulmuuh, kiäh iä mudoi pastaččii jienâstiđ, uážžuh táárbu mield išedeijee tipšosaajeest jienâstem várás. Ääšist kalga väldiđ ohtâvuođâ valjâlävdikode toimâttâhân jo-uv puhelin tâi šleđgâpoostâ peht.

Valjâpeeivi jienâstem ij uárnejuu ive 2019.

Keejâ iävtukkâsluvâttâllâm täst.

Sämitige vaaljah toimâttuvvojeh 2.9. – 30.9.2019. Vaaljâin väljejuvvojeh 21 jesânid já nelji värijeessân sämitige toimâpajan 2020 – 2023. Jienâsteijee finnee valjâäššikiirjijd kirjejum vuolgâttâssân postâčujottâsân, mon sun lii almottâm aalmugtiäđoid 31.12.2018 räi.

Lasetiäđuh

Sämitige valjâlävdikodde
Sämikulttuurkuávdáš Sajos
Menesjärventie 2A
99870 Aanaar

+358 10 839 3120, +358 10 839 3127
vaalit(at)samediggi.fi