Sámeáššiid skuvlenseminárii almmuhan badjel 70 oassálasti

Sámedikki nuoraidráđđi ja stivra ordnejit vuosttas háve sámeáššiid skuvlenseminára ministariidda, riikkabeaiáirasiidda sihke stáhta virgeolbmuide Anáris 15.-16.8.2019. Seminára dárkkuhussan lea lasihit oktasašbarggu mearrideaddjiiguin ja virgeolbmuiguin. Guovttebeaivásaš seminárii leat almmuhan badjel 70 oassálasti, mielde ee. oahpahusministtar Li Andersson, máŋggat riikkabeaiáirasat sihke sierra eiseválddiid ja stáhta hálddahusa virgeolbmot.

Sámedikki nuoraidráđi evttohusas Sámediggi lea válmmaštallan skuvlenseminára-oahpásmanfitnama ministariidda, riikkabeaiáirasiidda sihke stáhta virgeolbmuide. Maiddái vuoigatvuođaministeriija lea oassálastán válmmaštallamiidda, dasgo Sisriikkalaš vuođđo- ja olmmošriekteprográmma (2017) figgá dasa, ahte “virgeolbmuid, geat gieđahallet sámeáššiid, máhttin buoriduvvo skuvlejumiin, mii vuoddju sámiid vuoigatvuođaide”. Sámedikki doibmii ja sámegažaldagaide oahpásmuvvan lea lunddolaš joatkka vuoigatvuođaministeriija ovdal ordnen sámeáššiid vuođđokursii. Deaivvadeapmi nanne ja ođasmahttá oktasašbarggu ja dialogia guovtte álbmoga gaskkas.

Guovttebeaivásaš seminára áigge oassálastiin lea vejolašvuohta oahpásmit sámeáššiide máŋggaid sierra temáid bokte. Temát leat sámit eamiálbmogin ja sámiid iešráđđen, oahpahus ja oahppamateriála, sámegielat, sámiid vuoigatvuođat, árrabajásgeassin ja giellabeassedoaibma, sosiála- ja dearvvasvuođabálvalusat, sámiid árbevirolaš ealáhusat, sámekultuvra ja nuoraidáššit.

”Leat hui duhtavaččat oassálastiid stuorra mearrái ja beroštupmái sámeáššiid hárrái. Čielgasit dákkár skuvlejupmái lea dárbu, dasgo lea dehálaš juohkit dieđuid Sámedikki doaimmas sihke áigeguovdilis áššiin”, muitala Sámedikki II várreságajođiheaddji ja skuvlema válmmaštallan bargojoavkku ságajođiheaddji Tuomas Aslak Juuso.

Lassin oassálastiin lea vejolašvuohta galledit sierra sámedoaibmiid luhtte ja oassálastit Ijahis Idja -festiválii.

Sámedikki nuoraidráđđi barggai álgaga stivrii skuvlenseminára ordnemis stáhtaráđđái lasihan dihtii stáhtaráđi diđolašvuođa sámeáššiin. Sámedikki stivra mearridii ásahit bargojoavkku válmmaštallat semináraprográmma. Stivrra bealis bargojovkui válljejuvvojedje Tiina Sanila-Aikio, Tuomas Aslak Juuso ja Pentti Pieski. Lassin nuoraidráđđi nammadii bargojovkui Risten Mustonen, Ánte Veijola ja Sunna Aikio.

Lassidieđut:

Sámedikki II várreságajođiheaddji Tuomas Aslak Juuso tel. 040 1871331, tuomas.juuso(at)samediggi.fi

Nuoraidčálli Elli-Marja Hetta tel. 010 839 3134, elli-marja.hetta@samediggi.fi

Govva: Ville-Riiko Fofonoff