Sääʹmteeʹǧǧ vaali võboršiiʹǩǩi piijjmõš poott piâtnâc 2.8. čiâss 16

/in , /by

Sääʹmteeʹǧǧ vaal-luʹvddkåʹdd mušttat, što Sääʹmteeʹǧǧ vaali 2019 võboršiiʹǩǩi piijjmõš poott piâtnâc påʹrǧǧmannu 2. peeiʹv čiâss 16. Vaʹlljeemõhttõõzz vuâđđeemäʹššǩeʹrjj/võboršeǩooccmõš âlgg leeʹd vaal-luʹvddkååʹddest Aanrest Sajoozz tuåimmpääiʹǩest peäggtum mieʹrräigga mõõneeʹst (addrõs: Sääʹmkulttuurkõõskõs Sajos, Menesjärventie 2A, 99870 AANAR).

Vaʹlljeemõhttõõzzi kannat väʹldded tän lokku jeäʹrben teʹl, ko äʹššǩiiʹrjid tuåimtet pååʹšt mieʹldd. Vaal-luʹvddkååʹddest jie leäkku jeeʹres tuåimmpääiʹǩ, koʹst äʹššǩiiʹrjid vääldčeš vuâstta.

Jiõnstemvuõiggâdvuõttneǩ vuäitt kuullâd tåʹlǩ õõut vaʹlljeemõhttõʹsse, leʹbe muđoi suu nõõm vääʹldet meädda pukin vaʹlljeemõhttõõzzin. Vaʹlljeemõhttõõzz äʹššoummust lij vueiʹttemvuõtt tiuddeed leʹbe vuõiǥeed ooccmõõžž teâđaid vu 6.8. čiâss 16 räjja.

Võboršeeʹǩǩ piijjmõʹšše kuulli lomaakk käunnʼje Sääʹmteeʹǧǧ neʹttseeidain addrõõzzâst www.samediggi.fi/vaaljah-2019/?lang=an da tõid vuäǯǯ Sääʹmkulttuurkõõskõs Sajoozzâst še.

Lââʹssteâđ

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
Menesjärventie 2A
99870 Aanar
+358 10 839 3120, +358 10 839 3138
vaalit@samediggi.fi

Walt Disney Animation Studios rääjj tâʹvvsääʹmǩiõllsaž versio Frozen 2 jieʹllikaartâst

/in /by

Walt Disney Animation Studios (WDAS) ooʒʒškuätt sõrgg čuäjtõõllʼjid Frozen 2 sääʹmǩiõllsaž versiooʹje. Tät lij puåđõs õhttsažtuâjast WDAS da sääʹm-meer kõõsk.

BURBANK, California, & KARASJOKK, Taarrjânnam, GIRON, Ruõccjânnam, AANAR, Lääʹddjânnam, sueiʹnnmannu 19. peiʹvv 2019.

Sääʹmǩiõllsaž versio jieʹllikaartâst lij puåđõs õhttsažtuâjast Sääʹm parlamentaarlaž suåvtõõzz (SPS), Sääʹmrääʹđ da Walt Disney Animation Studios kõõsk, koʹst Frozen 2 fiʹlmmraaji lie ooccâm da kaunnâm vuäʹpstõõzzid sääʹm tuâjj-jooukâst kuõskeeʹl elemeeʹntid jieʹllikaartâst, koon inspiraation lie leämmaž fiʹlmmraajjʼji mäʹtǩǩ Sääʹmjânnma. Lââʹzz teâđ tän õhttsažtuâjast õlmstââʹttet čõõđ eeʹjj.

“Pukid Disney Animation jieʹllikaartid lij tarbbsõs tuejjeed šiõǥǥ tuʹtǩǩeemtuâj, što vueiʹttep raajjâd miõlljuurdsallaš, leša seämmast tuõđliʹžžen tobddjeei maaiʹlmid, kook lie tobddâz ǩiõččjid. Aivv Frozen 2 raajjmõõžž aalǥâst, mij fiʹlmmraaji reissje Islaʹntte, Taarrjânnma da Lääʹddjânnma ooccâd jeänab teâđ. Mij jieʹliim mäŋggan pääiʹǩest da kaaunõõđiim oummivuiʹm, jeäʹrbi mieʹldd säʹmmlaivuiʹm. Tät tuõđi vaikkti di kuõskti miʹjjid”, ceälkk jieʹllikaart puuʹtʼteei Peter Del Vecho.

Sääʹmtiiʹǧǧi da Sääʹmrääʹđ saaǥǥjååʹđteei – Aili Keskitalo (Taarrjânnam), Tuomas Aslak Juuso (Lääʹddjânnam), Per-Olof Nutti (Ruõccjânnam) da Åsa Larsson-Blind (Sääʹmrääʹđđ) leʹjje älššai tän ääʹšš diõtt:

“Mij leäʹp kuärǥast da späʹssballaš õhttsažtuâjast Disney Animation:in. Mij rämmšep, ko sääʹmpäärnaid uuʹdet vueiʹttemvuõtt vueiʹnned Frozen 2 -jieʹllikaart jiiʹjjes jieʹnnǩiõʹlle. Mij leäʹp samai toođva, ko vueiʹttep mušttlet täid ođđsid ååʹn, ko ÕM prääzkai Meeraikõskksaž alggmeerai ǩiõli eeʹjj tän eeʹjj”, cieʹlǩǩe sääʹm saaǥǥjååʹđteei.

Rick Dempsey,  kååʹtt lij SVP Creative Disney Character Voices International beäʹlnn, vuåpp da jååʹđat Frozen 2 jieʹllikaart jåårǥlâʹttem- da rooltemtuâj tâʹvvsääʹmǩiõʹlle. Disney Animation da Disney Character Voices International lie õiʹdde alttääm õhttsažtuâj čooudoummivuiʹm Tahitist, Havaijist da Ođđ-Seelantâst Moana jieʹllikaart alggmeerǩiõʹlle tuejjeem diõtt, jeäʹrben Tahiti, Havaiji da Māori ǩiõlid.

Walt Disney Animation Studios alttad sõrgg rooltem-proseeʹss Frozen 2 jieʹllikartt versio diõtt. Sääʹmǩiõllsaž versio õõlǥči plaan mieʹldd iʹlmstõõvvâd seämma ääiʹj ko jeeʹres tâʹvvjânnmallaš versio rosttovmannust 2019.

 

WALT DISNEY ANIMATION STUDIOS PIRR:

Walt Disney Animation Studios õhttad čeäpplõs maainâsmušttlummuž jiiʹjjesnallšem da ođđäiggsaž teknologiain, da animaatiostudio jååʹđte jiõčč fiʹlmmraaji. Sij lie raajjâm jieʹllikaartid, kook lie kuõsktam oummid pirr maaiʹlm. Studio lij Burbank, Los Angeles nõmmsaž pääiʹǩest da sij tuejjee jiiʹjjez tuâj innovaatio da kreevsõsvuõđ ääʹrb õõl. Tän sij lie tuejjääm vuõssmõs animaatiojieʹllikaart rääʹjest, 1937: “Snow White & the Seven Dwarfs» 2013 Academy Award®-vuõʹtti «Frozen» jieʹllikaart räjja, mii lij šuurmõs animõsttum jieʹllikartt čõõđ ääiʹj. Studio lij raajjâm še jieʹllikaartid Pinocchio, Sleeping Beauty, The Jungle Book, The Little Mermaid, The Lion King, Big Hero 6 da Zootopia. 

 

Lââʹzz teâđ:

https://www.disneyanimation.com

https://www.youtube.com/disneyanimation

https://www.twitter.com/disneyanimation

https://www.instagram.com/disneyanimation

https://www.facebook.com/disneyanimation

 

Kaartid Frozen 2 jieʹllikaartâst vuäitt ǩiõččâd tääiʹben: https://www.image.net/Frozen2

SÄÄʹM PARLAMENTAARLAŽ SUÅVTÕÕZZ da SÄÄʹMRÄÄʹĐ PIRR:

Sääʹmteeʹǧǧ lie jiõččnaž da eeʹttkâʹsttmallaš orgaan, kook lie vaʹlljuum säʹmmlai kõõskâst Taarrjânnmest, Lääʹddjânnmest da Ruõccjânnmest. Sääʹmteeʹǧǧ reâugga pukin aaʹššivuiʹm, kook kueʹsǩǩe sääʹm-meer.

Sääʹm Parlamentaarlaž suåvtõs lij Sääʹmtiiʹǧǧi õhttsažtuâjjsuåvtõs, koozz Ruõššjânnam säʹmmlai eeʹttkõõʹsti še vuässâʹtte. SPS tuåimmai tõn vuâđain, što säʹmmla lie õhtt meer, huõlkâni riikkraaʹjin.

Sääʹmrääʹđđ lij organisaatio Lääʹddjânnmest, Ruõššjânnmest, Taarrjânnmest da Ruõccjânnmest, kååʹtt lij reâuggam sääʹmaaʹššivuiʹm eeʹjj 1956 rääʹjest. Tõn väʹlddtuâjjan lij oouʹdeed säʹmmlai vuõiggâdvuõđid da intreeʹssid.

 

Lââʹzz teâđ:

https://samediggi.no

https://www.samediggi.fi

https://www.sametinget.se

http://www.saamicouncil.net

 

MEDIA ÕHTTVUÕTTVÄLDDMÕÕŽŽ:

Walt Disney Animation Studios
Amy Astley
Amy.Astley@disney.com

Sääʹm saaǥǥjååʹđteei:

  • Sääʹmteeʹǧǧ saaǥǥjååʹđteei Taar beäʹlnn,
    Aili Keskitalo, neʹttpååʹšt: keskitalo@samediggi.no, teʹl: +47 971 29 305
  • Sääʹmteeʹǧǧ II väärrsaaǥǥjååʹđteei Lääʹdd beäʹlnn,
    Tuomas Aslak Juuso, neʹttpååʹšt: juuso@samediggi.fi, teʹl: +358 40 1871 331
  • Sääʹmteeʹǧǧ saaǥǥjååʹđteei Ruõcc beäʹlnn,
    Per-Olof Nutti, neʹttpååʹšt: per-olof.nutti@sametinget.se, teʹl: +46 0980 780 27
  • Sääʹmrääʹđ saaǥǥjååʹđteei,
    Åsa Larsson Blind, neʹttpååʹšt: asa@saamicouncil.net, teʹl: +46 70 254 33 56

Jeeʹres kõõččmõõžž; vääʹld õhttvuõđ Taarrjânnam Sääʹmteeʹǧǧ jååʹđteeja da Sääʹm parlamentaarlaž suåvtõõzz da Sääʹmrääʹđ tuâjj-joouk jååʹđteeja Rune Fjellheimma, neʹttpååʹšt: rune.fjellheim@samediggi.no, teʹl: +47 910 09 320.

Jiõnstemvuõiggâdvuõttneǩ – Iʹlmmet mottjam addrõssad vaal-luʹvddkådda

/in , /by

Čõõuč 2019 sääʹmteʹǧǧvaalin vuäitt jiõnsted pååʹšt mieʹldd leʹbe maaccteeʹl äʹššǩiiʹrjid vaal-luʹvddkååʹdd konttra. Vaaläʹššǩiiʹrjid vuõltteet ǩeʹrjjuum ǩeʹrjjen jiõnstemvuõiggâdvuõttniiʹǩǩid Lääʹddjânnam narodteâttriâšldõʹǩǩe mieʹrǩǩuum addrõʹsse.

Sääʹmteʹǧǧvaalin jiõnstemvuõiggâdvuõđ õlmmeei iʹlmmtõskoort lie vuõlttuum pååʹšt mieʹldd pâʹsslašttâm-mannu aalǥâst. Vaal-luʹvddkåʹdd lij välddam vuâstta mäʹccjam iʹlmmtõskoortid, kook jie leäkku tääʹvtam jiõnstemvuõiggâdvuõttniiʹǩǩid. Jeäʹrben ålggjânnmin jälsteeʹji iʹlmmtõskoort lie mäʹccjam jiânnai.

Jõs teâđad, što leäk jiõnstemvuõiggâdvuõttneǩ Sääʹmteʹǧǧvaalin jiõk-ǥa leäkku vuäǯǯam iʹlmmtõskoort, vääʹld õhttvuõđ vaal-luʹvddkådda sueiʹnnmannu loʹppe mõõneeʹst.

Vaaläʹššǩiiʹrjid vuõltteet čõhččmannu aalǥâst. Vaaläʹššǩiiʹrjid vuõltteet ǩeʹrjjuum ǩeʹrjjen, de tõk dooiʹde jiõnstemvuõiggâdvuõttneeʹǩǩ ââldmõs Pååʹšt kääzzkõspäikka. Vaaläʹššǩiiʹrjid viiǯǯeeʹn oocci âlgg tuõđšted identiteʹttes. Ǩeʹrjjuum ǩeeʹrj vuäitt viǯǯâd nuuʹbb peäʹlest tåʹlǩ väʹlddǩiiʹrjin. Väʹlddǩeʹrjjvuâđ kaaunak Pååʹšt neʹttseeidain. Väʹlddǩiiʹrjin väʹlddvuõttum še âlgg tuõđšted identiteʹttes.

Vaaläʹššǩiiʹrjid vuõltteet jiõnstemvuõiggâdvuõttneeʹǩǩ Lääʹddjânnam narodteâttriâšldõʹǩǩe mieʹrǩǩuum addrõʹsse. Vaaläʹššǩiiʹrji pååʹštʼtem diõtt lij vääžnai, što vaal-luʹvddkååʹddest lij jiõnstemvuõiggâdvuõttneeʹǩǩ vuõigg addrõs. Jos leäk serddam eeʹjj 2019 äiʹǧǧen leʹbe leäk ǩeâlddam tuu addrõsteâđai ouddmõõžž, iʹlmmet mottjam addrõssad Sääʹmteeʹǧǧ vaal-luʹvddkådda sueiʹnnmannu loʹppe mõõneeʹst. Muuʹšt tuejjeed še veerǥlaž addrõsmuttâz. Vuäitak tääʹrǩsted maistraattâst, što tuu addrõsteâđ lie vuõiʹǧǧest (www.maistraatti.fi).

Lââʹssteâđ

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
Menesjärventie 2A
99870 Aanar
+358 10 839 3120, +358 10 839 3138
vaalit@samediggi.fi

www.samediggi.fi/vaal-2019/?lang=nuo

Sääʹmteeʹǧǧ piisarkååʹdd teʹlfonkuvddlõs lij ǩidd 1.7.- 4.8.

/in /by

Sääʹmteeʹǧǧ piisarkååʹdd teʹlfonkuvddlõs lij ǩidd 1.7.- 4.8.2019 kõõskâst.

Sääʹmteʹǧǧ tuäivat šiõǥǥ ǩieʹzz pukid!

 

Piisarkååʹdd õhttvuõtt-teâđ

Sääʹm-maatkčem eettlaž vuäʹpstõõzzi vuõssmõs ođđ karttõskaart lie valmštõõvvâm

/in , , /by

Räiddkarttčeäppneǩ Sunna Kitti karttad Vasttõsvuõđlaž da da eettlânji ǩeâllʼjeei sääʹm-maatkčem tuåimmjemvuâđđjurddi -vuäʹpstõõzz. Obb karttõsmateriaal lij mieʹrr valmštõõvvâd ǩieʹzz 2019 poodd. Ođđ materiaal lij vuõss-sâjjsânji jurddum mättmateriaalââʹnnma maatkčemsueʹrj mättʼtõõttjid di maatkčemsueʹrj jeeʹres tuåimmjeeʹjid da voudda pueʹtti määtklaid.

Karttõõzz da vuäʹpstõõzz teeʹkstid õhtteeʹl haaʹleet kaggâd sääʹm-maatkčummša õhttneei vaʹǯǯtõõzzid veiddsab tieʹttemvuõʹtte. “Tuäivvap, što visuaalʼlaž teâtt čiõʹlǧǧad vuäʹpstõõzz saaǥǥ da hiâlpad tõn fiʹttjummuž da ââʹnnmavälddmõõžž”, mušttal haʹŋǩǩõõzz plaaneei Kirsi Suomi.

Vuõssmõs karttõskaart lie ååʹn valmštõõvvâm. Puõʹttivuõtt, koon haaʹleep -kartt vuâđđââvv eettlaž vuäʹpstõõzzâst åårrai visiooʹje. Visio mieʹldd säʹmmlai äʹrbbvuõđlaž jieʹllemvueʹjj lie jieʹllemviõkksa da kannteei. Äʹrbbvuõđlaž jieʹllemvuõʹjji paaldâst ođđ jieʹllemvueʹjj, mâʹte vasttõsvuõđlaž da eettlânji ǩeâllʼjeei sääʹmvuõʹtte vuâđđõõvvi maatkčem tuärjjad äʹrbbvuõđlaž jieʹllemvuõʹjjid da oouʹdad reâuggvuõđ pääiklanji.

Visio mieʹldd vuâđđuum sääʹm-maatkčem vuäʹpstemkõõskõs jueʹǩǩ säʹmmlaid da sääʹmkulttuuʹre õhttneei tuõttvuõđ meâldlaž teâđ määtklaid da maatkčemtuåimmjeeʹjid, di teâđ eettlânji da ǩeâllʼjeeinalla tuåimmjeei sääʹm maatkčemtuåimmjeeʹji pirr. Še sääʹmõõutstõõzz argg da prääʹzniǩ, di säʹmmlai dommvuuʹd mäddââʹnnem lie šiõǥǥ visiost oʹnnsteeinalla õʹhttešiõttuum maatkčummšin säʹmmlai vuõiggâdvuõđid da kulttuur lokku vääʹldeeʹl di tõid ciʹsttjeeʹl.

Puõʹttivuõtt, koon haaʹleep. Kartt: Sunna Kitti.

Šiõǥǥ visio vuâstbieʹllen lij Puõʹttivuõtt, koon jeäʹp haaʹle. Tän kaartâst eettlaž vuäʹpstõõzz visio ij leäkku teâuddjam, ij-ǥa vaaldšeǩânai määtklažmieʹri juätkkjeei šorrnummuž tuejjääm vaʹǯǯtõõzzid leäkku vuäittam räʹtǩǩeed. Säʹmmlai dommvoudda puõʹtti maatkčem lij vaaldšeǩânai da säʹmmlai äʹrbbvuõđlaž jieʹllemvueʹjj lie jouddâm seʹrdded maatkčem ooudâst. Maatkčem åålǥbeällsaž narood kulttuurnaaʹlid jeäʹt leäkku oʹnnstam staaneed, peʹce sääʹmõõutstõõzz argg da prääʹzniǩ lie jouddâm maatkčemtuåimmjummšen da vueiʹnlmen.

Puõʹttivuõtt, koon jeäʹp haaʹle. Kartt: Sunna Kitti.

“Tuäivam, što karttõõzzin leʹčči vaikktõs määtklai da maatkčemsueʹrj siõhttlõõvvma säʹmmlaid da sääʹmkulttuuʹre. Vââǥǥlaž, vuäʹmmäiggsaž miõllkaartid vuâđđõõvvi maatkčem tuõppai tõn juʹn uʹcc sââʹj, koʹst säʹmmlai vueiʹtte friijâld harjjted jiiʹjjez kulttuur nuʹtt, što siʹjjid jeäʹt heâmmad. Mon âânam huõl tõʹst, što siid mottje nåkkmen, što pääikla jie vueiʹt teänab jälsted toʹben”, ceälkk räiddkarttčeäppneǩ Sunna Kitti tõn pirr, mõõn diõtt son vueʹlji mieʹldd vuäʹpstõõzz karttõʹsse.

Sääʹmteeʹǧǧ sååbbar priimi 24.9.2018 Vasttõsvuõđlaž da eettlânji ǩeâllʼjeei sääʹm-maatkčem tuåimmjemvuâđđjurddjid. Eettlaž vuäʹpstõõzzi väʹlddtäävtõssân lij jaukkeed sääʹmvuõđ äuʹǩǩen õõʹnni maatkčem di maatkčem pääiʹǩ leävvneei säʹmmlaid kuõskki vââǥǥlaž teâđ. Nuʹbben teäddceäkldõssân lij staaneed maatkčem åålǥbeällsaž narood kulttuurnaaʹlid da äʹrbbvuõđid. Haʹŋǩǩõõzz lij teäggtam mättʼtõs- da kulttuurministeria.

https://www.samediggi.fi/saamelaismatkailun-eettiset-ohjeet/

Lââʹssteâđ

Plaaneei Kirsi Suomi, Kulttuurlânji vasttõsvuõđlaž sääʹm-maatkčem, 010 839 3118, kirsi.suomi(at)samediggi.fi

Ijahis idja -feʹsttvaal programm lij õʹlmstõttum

/in /by

Pårǧǧmannust jäʹrjstum Ijahis Idja- alggmeerai musikkfeʹsttvaal programm lij õʹlmstõttum. Aanrest 16. vuâra jäʹrjstum feʹsttvaal teeʹmm lie ÕM alggmeerai ǩiõli eeʹjj ciʹsttjen sääʹmǩiõl. Feʹsttvaalneäʹttel-loopp taʹrjjummša koʹlle konseeʹrti lââʹssen saǥǥstõõllâmareena, säʹmmlaž viõusõõttmõšǩeâšttõõttmõš, sääʹmǩiõtt-tuâjjmarkkân di pääʹrnai da nuõri jiiʹjjez programm.

Feʹsttvaal älgg piâtnâc 16.8. pääʹrnai da nuõri peeiʹvest. Peeiʹv mieʹldd ouddǩiõʹtte iʹlmmtõttum pääʹrn da nuõr vuässâʹtte tuâjjpaajid da peäʹsse vueiʹnned säʹmmlaž vuäʹnkõs fiiʹlmid. Jiiʹjjez silttõõzz pääʹrn da nuõr peäʹsse čuäʹjted Násttážat- nuõrikonseeʹrtest. Koʹnseertest čuäʹjtâʹtte še Wimme Saari, Mihkku Laiti da alggmeerkueʹss Aydar Churupov. Churupov puätt Sibiʹrjast Altai vuuʹdest da lij Telengit-meer eʹtǩǩeei.

Feʹsttvaal ääʹveet piâtnâc čiâss 18.00. Ääʹveemprograammâst vueiʹnet juõiggi Nils-Heikki Paltto da tivttneǩ Inger-Mari Aikio. Seämma ääiʹj ääʹvee še sääʹmǩiõtt-tuâjjmarkkân. Ääʹveempoodd mâŋŋa ålgglueʹv âʹlnn älgg Ijahis Idja- areena. ÕM alggmeerai ǩiõli eeʹjj ciʹsttjen sääʹnnfriijjvuõttõhttõs Lääʹddjânnam PEN jäʹrjastKåʹllǩiõllâm- paneelsaǥǥstõõllmõõžž sääʹmǩiõllsaž ǩeʹrjjlažvuõđ miârktõõzzâst sääʹmkulttuuʹre, sääʹmõhttsažkådda di vaarvuâlaž sääʹmǩiõlid. Paneelsaǥǥstõllmõõžž jååʹđat Lääʹddjânnam PEN jååʹđtemkååʹddneǩ da ǩiõll- da jåårǥlõskomitea saaǥǥjååʹđteei Pirita Näkkäläjärvi.

Piâtnâc konseeʹrt Ijahis Idja väʹlddlueʹv âʹlnn aalǥat aanrõš läullai da livđeei Anna Morottaja. Son õʹlmstâtt konseeʹrtest vuõssmõs aʹlbuumes. Morottaja mâŋŋa lueʹv õõl kaggâtt eʹman ođđ aʹlbuum õʹlmstõttâm Niko Valkeapää bääʹndines. Teʹl vuârast lij možât pukin peäglvummuš sääʹmartistt, läullai Mari Boine Taaʹrr beäʹlnn Sääʹmjânnmest. Mâʹte Valkeapää, lij Boine še eʹman õʹlmstõttâm ođđ musiikk. Piâtnâc konseeʹrtid looppat DJ-kollektiiv Article 3, kååʹtt såittai sääʹm-musiikk di jeeʹres alggmeerai musiikk.

Sueʹvet 17.8. programm älgg konseeʹrtin sääʹm-muzei Siida ålggmuʹzeejest, Tirro põõrtâst. Intiim konseeʹrtest čuäjtâtt juõiggi Wimme Saari. Konseeʹrt liippid kaaupšet Siidast feʹsttvaalneäʹttlest.

Feʹsttvaalvuʹvdd ävvan sueʹvet čiâss 15.00. Piâtnâc älggam sääʹmǩiõtt-tuâjjmarkkân juätkkje vuuʹdest. Ijahis Idja-feʹsttvaal sueʹvet älggjeäʹǩǩääst lij äʹrbbvuõđlânji piâssâm naaudšed musiikâst še sääʹmkulttuurkõõskõs Sajoozz auditoriost da nuʹtt lij še tän eeʹjj. Feʹsttvaal teeʹmmkonseʹrtt Haaʹleʹčem pohtt miõlǩeässlanji õʹhtte tivttâz, laulljid, juõiǥid da musiikk. Mieʹldd lie Niko Valkeapää, Inger-Mari Aikio, Ánná Káisa Partapuoli da Øystein Nilsen.

Sueʹvet ålgglueʹv prograam ääʹvad Máttut-konseʹrtt. Konseeʹrtest Jääuʹrestuõddâr juõiǥid juõikka Anna-Reetta Niemelä, Matias Niemelä, Petra Biret Magga-Vars da Anna Näkkäläjärvi-Länsman. Janne Lappalainen čuõjldâʹtt straŋggsååitanjivuiʹm da perkussiovuiʹm. Ijahis Idja ålgglueʹv âʹlnn čuäjtâʹtte še juõiggi Øystein Nilsen, alggmeerkueʹss Aydar Churupov, uuʹmesääʹmǩiõllsaž läullai Katarina Barruk bääʹndines, elektronlaž pop-joukk ISÁK di legendaarlaž folkrock-joukk Sančuari. Ooudâst peäggtum artiist čuõjldâʹtte vuõssmõs vuâra Ijahis Idja- feʹsttvaalâst. Konseeʹrti lââʹssen viõusõõđat. Šlaajjân lij jåʹttelvuõđ da tääʹrǩesvuõđ õõlǥti njuärstõk. Ǩeâšttõõttmõš šadd Sajoozz šeeljast.

Ijahis idja 16.–17.8.2019 Aanrest. Ouddliippkaaupšummuš älgg 5.7.2019.

Ijahis idja jäʹrjsteei lie Anára Sámisearvi ry, Sääʹmteʹǧǧ, Sääʹm škooultemkõõskõs, Sääʹm-muʹzei Siida, Aanar kåʹdd da Yle Sääʹmjânnam. Feʹsttvaal õhttsažtuâjjkueiʹm lie Hoteʹll Kultahovi, Wilderness Hotel Inari da Hoteʹll Inari.

Lââʹssteâđ:

Puutʼteei
Oula Guttorm
oula.guttorm(at)samediggi.fi
+358 40 667 4545

www.ijahisidja.fi