Walt Disney Animation Studios (WDAS) ohcagoahtá fargga neavttárveaga sámegiel veršuvdnii Frozen 2 filbmii. Dát lea boađus ovttasbarggus gaskkal WDAS ja sámi álbmoga.

BURBANK, California, & KÁRÁŠJOHKA, Norga, GIRON, Ruoŧŧa, ANÁR, Suopma,
suoidnemánu 19. beaivvi 2019.

Sámegiel veršuvdna filmmas lea boađus ovttasbarggus gaskkal Sámi parlamentáralaš ráđi (SPR), Sámeráđi ja Walt Disney Animation Studios, mas Frozen 2 filbmadahkkit leat ohcalan ja ožžon rávvagiid sámi bargojoavkkus osiide filmmas man inspirašuvdnan leamaš filbmadahkkiid mátkki Sápmái. Eambbo dieđut dán ovttasbarggus almmuhuvvo dán jagi mielde.

“Buot Disney Animation filmmaide lea dárbbašlas dáhkkát buori ovdabarggu dieđuid háhkamis vai sáhttit hukset miellagovahalli, muhto seammás jáhkihahtti máilmmiid mat leat dovddus gehččiide. Áibbas álggus Frozen 2 hábmemis, min filbmadahkkit mátkkoštedje Islándii, Norgii ja Supmi ohcat eambbo dieđuid. Mii finaimet máŋgga sajis ja deaivvadeimmet ollu olbmuiguin, earret eará sámiin. Dát váikkuhii ja čuozai midjiide garrasit”, dadjá filmma produseantta Peter Del Vecho.

Sámedikkiid ja Sámeráđi presideantat – Aili Keskitalo (Norga), Tuomas Aslak Juuso (Suopma), Per-Olof Nutti (Ruoŧŧa) ja Åsa Larsson-Blind (Sámeráđđi) dovddahit oktasaš cealkámušas movtta dán áššis:

“Mii leat rápmásat ja giitevaččat ovttasbarggus Disney Animation:in. Mii leat ilolaččat go sámi mánáide addojuvvo vejolašvuohta oaidnit filmma Frozen 2 iežaset eatnigillii. Mii leat hui duđavačča go sáhttit dáid ođđasiid muitalit dál go ON ávvuda Riikkaidgaskasaš jagi eamiálbmotgielaid várás”, dadjet sámi presideanttat.

Rick Dempsey, guhte lea SVP Creative Disney Character Voices International bealis, galgá gozihit ja jođihit barggu jorgalit Frozen 2 filmma davvisámegillii. Disney Animation ja Disney Character Voices International lea gieskat ovttasbargan guovddášolbmuiguin Tahiti, Hawaii ja Aotearoas ráhkadandihte sin guovllu eamiálbmotgielaid veršuvnnaid Moana filmmas, namalassii Tahiti, Hawaiia ja Māori gielaide.

Walt Disney Animation Studios álggaha fargga casting-proseassa gávdnat neavttárveaga davvisámi veršuvdnii Frozen 2 filmmas. Sámi veršuvdna galgá plána mielde almmuhuvvot seamma áigge go dat eará davviriikkalaš veršuvnnat juovlamánus 2019.

 

WALT DISNEY ANIMATION STUDIOS BIRRA:

Walt Disney Animation Studios bidjá oktii dáiddalaš historjjámuitaleami erenoamáš ja ođđaáigásaš teknologiijan, ja lea animašuvdnastudio gean jođiheaddjit ieža leat filbmadahkkit. Sii ráhkadit filmmaid mat leat beaggán ja váikkuhan olbmuid miehtá máilmmi. Studio lea Burbank, Los Angeles nammasaš báikkis ja sii huksejit iežaset barggu innovašuvnna ja kreatiiva návccaid ala. Dan leat dáhkkán vuosttaš animašuvnna filmma rájes, 1937:s “Snow White & the Seven Dwarfs» gitta 2013 Academy Award®-vuoiti «Frozen» filmma rádjái, mii lea stuorámus animerejuvvon filbma áiggiid čađa. Studio lea maid ráhkadan filmmaid nu mo Pinocchio, Sleeping Beauty, The Jungle Book, The Little Mermaid, The Lion King, Big Hero 6 & Zootopia. 

 

Eanet dieđut:

https://www.disneyanimation.com

https://www.youtube.com/disneyanimation

https://www.twitter.com/disneyanimation

https://www.instagram.com/disneyanimation

https://www.facebook.com/disneyanimation

Govaid Frozen 2 filmmas sáhttá viežžat dáppe: https://www.image.net/Frozen2

 

SÁMI PARLAMENTÁRALAŠ RÁĐI JA SÁMIRÁĐI BIRRA:

Sámedikkit leat iešmearrideaddji ja ovddasteaddji ásahusat válljejuvvon sámi álbmogis Norggas, Suomas ja Ruoŧas. Sámedikkit bargat buot áššiiguin mat gusket sámi álbmogii.

Sámi Parlamentáralaš Ráđđi lea Sámedikkiid ovttasbargoráđđi mas Ruoššabeale sámi ovddasteaddjit maid oassálastet. SPR bargá dainna vuođuin ahte sámit leat okta álbmot, beroškeahttá riikkarájáin.

Sámiráđđi lea organisašuvdna Suomas, Ruoššas, Norggas ja Ruoŧas mii lea bargan sámi áššiiguin 1956 rájes. Sin váldobargun lea ovddidit sámi vuoigatvuođaid ja beroštumiid.

Eambbo dieđut:

https://samediggi.no

https://www.samediggi.fi

https://www.sametinget.se

http://www.saamicouncil.net

 

PRESSSAOKTAVUOĐAT:

Walt Disney Animation Studios
Amy Astley
Amy.Astley(at)disney.com

 

Sámi Presideanttat:

• Sámediggepresideantta Norgga bealde,
  Aili Keskitalo, e-boastta: keskitalo(at)samediggi.no, telefovdna: +47 971 29 305
• Sámedikki II várraságadoalli Suoma bealde,
  Tuomas Aslak Juuso, e-boastta: juuso(at)samediggi.fi, telefovdna: +358 40 1871 331
• Sámedikki stivraságadoalli Ruoŧa bealde,
  Per-Olof Nutti, e-boastta: per-olof.nutti(at)sametinget.se, telefovdna: +46 0980 780 27
• Sámiráđi presideantt,
  Åsa Larsson Blind, e-boastta: asa(at)saamicouncil.net, telefovdna: +46 70 254 33 56

Eará gažaldagat; váldde oktavuođa Norggabeale Sámedikki direktevrrain ja Sámi Parlamentáralaš Ráđi ja Sámiráđi ásahuvvon bargojoavkku jođiheddjiin Rune Fjellheim, e-boastta: rune.fjellheim@samediggi.no, telefovdna: +47 910 09 320.

Sámediggi, ovddasteaddjinis Sámedikki nubbi várreságadoalli Tuomas Aslak Juuso, oassálastá 15.-19.7.2019 Geneves Šveiccas jahkásaš Eamiálbmogiid vuoigatvuođaid áššedovdimekanismma čoahkkimii. Sámedikkis leat čoahkkimis máŋga sáhkavuoru.

Vuossárgga 15.7. dollojuvvon Sámedikki sihke Sámiráđi oktasaš sáhkavuorus lei váldodeaddu lagamustá riikkarájáid dagahan hástalusain sápmelaččaid eallimis. Sáhkavuorus buktojuvvui maiddái ovdan rájáid rasttildeaddji oktasašbarggu mearkkašupmi. “Mii sápmelaččat leat okta álbmot, mii eallá njealji riikka siste Suomas, Ruoŧas, Norggas ja Ruoššas”, Juuso cealká sáhkavuorustis.

Sáhkavuorus gávnnahuvvo ahte sihke riikkaráját ja ovdamearkka dihte sápmelaš badjeolbmuid johtima stivrejeaddji soahpamušat ja láhkaásaheapmi leat rievdan juo muhtun geardde daid vuođđudeami maŋŋá. “Mii leat vuogáiduvvan dáidda nuppástusaide ja ođđa diliide, muhto lunddolaččat dain lea leamaš váikkuhus min kultuvrii ja midjiide oktan álbmogin”, joatká Juuso.

Olahuvvon oktasašbargu sámegielaid suorggis loktejuvvui sáhkavuorus ovdan positiivvalaš ovdamearkan bures lihkostuvvan, rájáid rasttildeaddji oktasašbarggus sámedoaibmiid gaskka. Maiddái Sámi parlamentáralaš ráđđi (SPR) deattuhuvvui dehálaš, oktasašbarggu ovddideaddji doaibmin.

Sámi parlamentáralaš ráđđi ja Sámediggi leat mielde ordnemin panelaságastallama, mii dollojuvvo EMRIP-čoahkkima áigge ja man dat jođihit ovttas golmma eará, sierra guovlluid ovddasteaddji eamiálbmotorganisašuvnnaiguin – The International Indian Treaty Council (IITC), Coordinadora de las Organizaciones Indígenas de la Cuenca Amazónica (COICA) and Asia Indigenous Peoples Pact (AIPP). Panelaságastallan lea siidodáhpáhus, mas ságastallo eamiálbmogiid oassálastinvejolašvuođain Ovttastuvvan Našuvnnaid (ON) doibmii, ja oassálastimis deaividuvvon hástalusain.

Sámediggi lea riikkaidgaskasaš doaibmasis guoski strategiija mielde geahččalan aktiivvalaččat ovddidit ja bajásdoallat ságastallama eamiálbmogiid oassálastinvejolašvuođain ON:s.

Lassediehtu:

Sámedikki II várreságadoalli Tuomas Aslak Juuso tel. 040 1871331, tuomas.juuso(at)samediggi.fi

 

AHR hilggui Sámedikki stivrra burginohcamuša AHR:a mearrádusain, mat gusket jagiid 2011 ja 2015 sámedikki válgalogahallama, vaikko ON:a olmmošriektekomitea mielde mearrádusat loavkidedje olmmošvuoigatvuođaid. AHR ii eahpit ON:a olmmošriektekomitea čovdosiid KP-soahpamušas ja eará riikkaidgaskasaš vuoigatvuođa eamiálbmogiid suoji guoski gálduin jođihuvvon ákkaid, muhto oaidná ahte ii sáhte daid vuođul burgit jagiid 2011 ja 2015 čovdosiid.

II várreságadoalli Tuomas Aslak Juuso lea behtton mearrádussii. “Suoma stáhtas lea ovddasvástádus KP-soahpamuša (siviila- ja politihkalaš vuoigatvuođaid guoski oktasašsoahpamuš) oassebeallin gudnejahttit ja ollašuhttit ON:a olmmošriektekomitea mearrádusaid. KP-soahpamuša mielde soahpamušriika lea geatnegas buhttet olmmošriekteloavkideami ja eastit loavkideami joatkašuvvama, go dakkár lea gávnnahuvvon.”

Suopma berre raporteret ON:a olmmošriektekomiteai guđa mánotbaji siste daid doaibmabijuin, mat komitea čovdosiid geažil leat álggahuvvon. “Geavadis dát oaivvilda mearreáiggi nohkama suoidnemánu loahpas”, joatká Juuso.

Alimus hálddahusriekti dieđihii suoidnemánu 5. beaivve 2019 ahte lea hilgon Sámedikki stivrra burginohcamuša, mii guoská jagiid 2011 ja 2015 sámedikki válgalogahallama, mas AHR lei vuostá Sámedikki válgalávdegotti ja stivrra oainnu mearridan 97 olbmo merkejuvvot sámedikki válgalogahallamii.

“ON:a olmmošriektekomitea gávnnahii čovdosiinnis, ahte sámiid válgalogahallamii merken logahallama gárvvistettiin lea sámi iešmearridanrievtti guovddášášši. Lea veadjemeahttun oaidnit, mo sámiid iešmearridanvuoigatvuohta ollašuvašii dáid mearrádusaid čuovggas, mat maŋimuš áigge leat dahkkon”, lohká I várreságadoalli Heikki Paltto.

Burgimii guoski mearrádusastis AHR gávnnaha ee., ahte “olmmošriektekomitea lea dál jagis 2019 addin oainnuin dárkkálmahttán ja čielggasmahttán sápmelašmeroštallama tulkoma eamiálbmogiidda guoski riikkaidgaskasaš vuoigatvuođa perspektiivvas. Alimus hálddahusriekti gávnnaha, ahte ovdal dáid čovdosiid riikkaidgaskasaš bearráigeahččoorgánaid meannudanvuohki erenomážit iešidentifikašuvnna ja joavkodohkkeheami gaskasaš mearkkašumis leamašan eahpečielggas go lea meroštallon, ahte gii lea sápmelaš. Alimus hálddahusrievtti ii nappo sáhte geahččat dál gieđahallama vuolde leahkki mearrádusaid dahkama áigemuddun heivehan lága boastut dan álbmotvuoigatvuođalaš meannudanvuogi čuovggas, mii leamašan geavaheamis.”

AHR govvida olmmošriektekomitea oainnuid “ovttageardánin” muhto dadjá maiddái, ahte dat ii “álbmotlaš lága tulkomii guoski oainnuid earuin fuolakeahttá eahpit olmmošriektekomitea oainnuid KP-soahpamušas ja riikkaidgaskasaš vuoigatvuođa eará gálduin jođihuvvon eamiálbmogiid vuoigatvuođaide guoski mearrádusaid tulkomis”. (AHR:a čovdosis AHR 2019:60.)

Burginohcamuša duogážis leat ON:a olmmošriektekomitea 1.2.2019 almmustahttin guokte čovdosa, maid mielde AHR:a mearrádusat loavkidedje siviilavuoigatvuođaide ja politihkalaš vuoigatvuođaide guoski riikkaidgaskasaš oktasašsoahpamuša (KP-soahpamuš) 25, 27 ja 1 artihkkalis oaivvilduvvon vuoigatvuođaid dasgo AHR lei spiehkkasan sihke sámediggelága 3 §:a sátnehámis ja láhkačuoggá áddehallamii vuođđuduvvi tulkomis. AHR lei lágas gáibiduvvon objektiivvalaš kriteraid sajis heivehan “ollislaš guorahallama”.

Lassediehtu

II várreságadoalli Tuomas Aslak Juuso, +358 40 187 1331, tuomas.juuso(at)samediggi.fi

I várreságadoalli Heikki Paltto, +358 40 756 9075, heikki.paltto(at)samediggi.fi

AHR:a dieđáhus 5.7.2019:
Alimus hálddahusriekti hilggui sámedikki stivrra burginohcamuša

Sámedikki dieđáhus 4.4.2019:
Sámediggi ohcá burgima AHR:a mearrádusaide