Ijahis idja -festivála prográmma lea almmustahtton

Ijahis idja -eamiálbmogiid musihkkafestivála prográmma lea almmustahtton odne. Festivála ordnejuvvo borgemánus Anáris jo guhttanuppelogát geardde ja dán jagaš temá lea ON:id eamiálbmogiid giellajagi mielde sámegielat. Festiválavahkkolohppii gullet konsearttaid lassin ságastallanarena, duodjemárkanat, sámi valástallangilvvut ja mánáid ja nuoraid prográmma.

Dáhpáhus álgá bearjadaga 16.8. mánáid- ja nuoraidprográmmain. Beaivvi áigge ovddalgihtii almmuhan mánát ja nuorat oassálastet bargobájiide ja besset geahččat sámi filmmaid. Sii besset maiddái čájehit iežaset dáidduid Násttážat-konsearttas. Konsearttas loaiddastit maiddái Wimme Saari, Mihkku Laiti ja eamiálbmotguossi Aydar Churupov. Churupov boahtá Siperias Altai-guovllus ja ovddasta Telengit-álbmotjoavkku.

Festivála rahppojuvvo bearjadaga dmu. 18.00. Rahpanprográmmas loaiddasteaba juoigi Nils-Heikki Paltto ja diktačálli Inger-Mari Aikio. Seamma áigge rahpasit maiddái duodjemárkanat. Rahpanprográmma maŋŋá olgolávddis álgá Ijahis idja -arena. ON:id eamiálbmogiid giellajagi gudnin sátnefriddjavuođaorganisašuvdna Suoma PEN lágida panelaságastallama Gollegiellamet sámegielat girjjálašvuođa mearkkašumis sámekultuvrii, sámeservošii ja áitatvuloš sámegielaide. Panelaságastallama jođiha Suoma PEN-klubba stivrra lahttu sihke giella- ja jorgalankomitea ságadoalli Pirita Näkkäläjärvi.

Bearjadaga konsearttaid Ijahis ija váldolávddis álggaha anáraš lávlu ja livđe-čeahppi Anna Morottaja. Son almmustahttá konsearttas iežas debyhtaalbuma. Su maŋŋá lávdái gorgŋe aiddo ođđa cd-skearru almmuhan Niko Valkeapää musihkkajoavkkuinis. Čuovvovažžan lea vuorus vejolaččat dovdosamos sámeartista, Mari Boine. Nugo Valkeapää de maiddái Boine lea gieskat almmustahttán ođđa musihka. Bearjadaga konsearttat nohket sihkkarit garra leavttuin go DJ-joavku Article 3 čuojaha sámemusihka ja eará eamiálbmogiid musihka.

Lávvardaga 17.8. prográmma álgá konsearttain sámemusea Siidda olgomuseas Itnetvári stobus. Smávva stohpokonsearttas loaiddasta Wimme Saari. Konseartta bileahtat vuvdojuvvojit Siiddas dáhpáhusvahkus.

Festiválaguovlu rahpasa lávvardaga dmu. 15.00. Bearjadaga álgán duodjemárkanat joatkašuvvet dalle. Ijahis idja -festivála lávvardaga álgoeahkedis leat dábálaččat beassan návddašit musihkas maiddái sámekulturguovddáš Sajosa auditorios ja nu lea maiddái dán jagi. Festivála temákonsearta Háliidivččen čatná geasuheaddji vugiin oktii divttaid, lávlagiid, luđiid ja musihka. Fárus leat Niko Valkeapää, Inger-Mari Aikio, Ánná Káisa Partapuoli ja Øystein Nilsen.

Lávvardaga olgolávddi prográmma rahpá Máttut-konsearta. Konsearttas Jávrrešduoddara luđiid juiget Anna-Reetta Niemelä, Matias Niemelä, Petra Biret Magga-Vars ja Anna Näkkäläjärvi-Länsman. Janne Lappalainen lea mielde čuojaheame giellainstrumeanttaid ja perkušuvnnaid. Ijahis ija olgolávddis loaiddastit lávvardaga maiddái juoigi Øystein Nilsen, eamiálbmotguossi Aydar Churupov, ubmisámegielat lávlu Katarina Barruk musihkkajoavkkuinis, bivnnut pop-joavku Isák ja legendáralaš folkrock-joavku Sančuari. Ovddabealde máinnašuvvon artisttat čuojahit vuosttaš geardde Ijahis idja -festiválas. Konsearttaid olis festiválaguossit besset njoarostit. Jođánis ja dárkilvuođa gáibideaddji gilvu lágiduvvo Sajosa šiljus.

Ijahis idja 16.–17.8.2019 Anáris. Bileahtaid ovddalgihtii vuovdin álgá 5.7.2019.

Ijahis ija ordnejit Anára Sámisearvi ry, Sámediggi, Sámi oahpahusguovddáš, Sámemusea Siida, Anára gielda ja Yle Sápmi. Festivála ovttasbargoguoimmit leat Hotealla Kultahovi, Wilderness Hotel Inari ja Hotealla Inari.

Lassedieđut:

Buvttadeaddji
Oula Guttorm
oula.guttorm(at)samediggi.fi
+358 40 667 4545

www.ijahisidja.fi