Čohkket dieđuid sámi skuvlaovttasbarggus – bivdit vástidit!

/in , /by

Sámi Parlamentáralaš ráđđi lea ásahan oktan ulbmilin sámi skuvlaovttasbarggu viiddideami ja nannema. Norgga Sámediggi lea ásahan davviriikkalaš bargojoavkku, mii lea dál čielggadeame ášši ja válmmaštallame evttohusaid rájáhis sámi skuvlaovttasbarggu ovddideapmái.  Barggu duohken ja vuođđun lea Suoma Ohcejoga ja Norgga Sirpmá skuvllaid guhkesáigge ovttasbargu, man vásáhusaid lea vejolaš ávkkástallat maid eará sajiin. Barggu ulbmilin lea láhčit vejolašvuođa ovddidit sámegielaid, sámi álbmoga oahpu, sámiid fuolkevuođa, oktasaš ealáhusaid ja maiddái boahtteáiggi bargovejolašvuođaid riikarájáid rastá.

Bargojoavku bargá 1.1.2019–31.12.2019, man áigge dat kárte ja čohkke dieđuid dálá skuvlaovttasbarggus iešguđet guovllus Sámis. Dán lassin bargojoavku árvvoštallá dáláš ovttasbarggu doaibmanmálliid, čuolmmaid, dásiid, oahpaheaidiliid ja boahttevaš vejolašvuođaid viiddidit skuvlaovttasbargguid. Bargojoavkku ulbmilin lea ráhkadit konkrehta evttohusaid oahpahuslágaid rievdadeamis (jos dárbu), oahppoplánaid ja -fágaid (ávdnasiid) oktiiheiveheamis ja oahppoplánanorpmaid rievdadeamis (jos dárbu) ja eará ovttasbarggu eastagiin, olles Sápmái.

Bargojoavkku ságadoallin bargá Inger-Ánne Klemetsen Norgga Sámedikkis. Čállin bargá Arla Magga Suoma Sámedikkis. Bargojoavkkus leat vel čuovvovaš lahtut: Ulla Aikio-Puoskari, Laura Arola, Eila Tapiola, Torkel Rasmussen, Aura Pieski, Jon-Christer Mudenia ja Leif Erik Varsi.

Jearahallamii sáhttá vástidit liŋkka bokte https://forms.gle/Asno9Y958NZNJTvT9 dahje nu, ahte sádde dieđu Arla Maggai vai son sáhttá jearahallat riŋgemiin dahje epoastajearahallamiin.

Lassedieđut

Seniorráđđeaddi Inger Anne Klemetsen
Sámediggi (NO)
+47 78 47 40 94
inger.anne.klemetsen(at)samediggi.no

Čálli Arla Magga,
Sámediggi (FI)
+358 401 985 033
arla.magga(at)samediggi.fi

Govva: Kevin Francett