Sámediggi, Sámi Árvvut rs ja Eanodaga sápmelaččat ságastalle áigeguovdilis áššiin
Sámedikki stivra deaivvadii Eanodagas 10.5. Sámi Árvvut rs:a searvvi stivrra lahtuiguin, ON:id olmmošriektekomiteai oktagasváidalusa dahkan sápmelaččaiguin ja Neakkela bálgosa Gálggojávrri siidda ovddasteaddjiiguin. Deaivvadeamis ságastallui áigeguovdilis áššiin Eanodagas sihke ON:id olmmošriektekomitea čovdosiid ollašuhttimis. Olmmošriektekomitea attiii guokte čovdosa, mas dat gávnnahii, ahte Suopma lea rihkkon siviilavuoigatvuođaid ja politihkalaš vuoigatvuođaid guoski oktasašsoahpamuša Suoma sápmelašmeroštallamis.
”Sámedikki stivra geahčai dehálažžan ságastallat ON:id olmmošriektekomiteai váidalan olbmuiguin ovdal ráđđádallamiid vuoigatvuođaministeriijain. Olmmošriektekomitea čovdosat leat guovddáš rollas maiddái boahttevaš ráđđehusráđđádallamiin. Sávan, ahte ráđđádallanbohtosa lea vejolaš doalvut sámedikki čoahkkima gieđahallamii nu jođánit go vejolaš”, dadjá sámedikki ságajođiheaddji Tiina Sanila-Aikio.
ON:id olmmošriektekomitea čovdosiid ollašuhttima birra deaivvadeamis gávnnahuvvui ovttamielalaččat, ahte sámediggeválggaid galggašii sirdit uhcimustá jagiin ja dan áiggis rievdadit sámediggelága sápmelašmeroštallama oktasašbarggus sámeservošiiguin. Čuovvovaš sámediggeválggaid galgá ordnet dakkár sápmelašmeroštallamiin, man sámesearvvuš dohkkeha. Sámediggi, Sámi Árvvut rs ja oktagasváidaleaddjit leat čatnasan olmmošriektekomitea čovdosiid ollašuhttimii ja daid ovddideapmái.
”Deaivvadeapmi lei hui dehálaš ja áigeguovdilis, go ráđđehusráđđádallamiid orodettiin jođus dárbbašit buot sámeoassebeliid oktasašbarggu, vuoi sámiide dehálaš áššit fidnejuvvojit njuolgga mearrideaddjiid dihtui ja sávvamis maiddái ráđđehusprográmma rádjai. Lean hui ilus das, ahte sámedikkis ja oktagasváidalusa dahkan olbmuin lea seammalágan oaidnu das, man láhkai mearrádusaid sáhttá ollašuhttit ja dát addá buriid eavttuid dasa, ahte sáhttit lihkostuvvat oktasaš ulbmilis”, Sámi Árvvut rs:a ságajođiheaddji Klemetti Näkkäläjärvi deattuha.
Gálggojávrri siida guđii sámediggái čoahkkimis evttohusa Bievrrašjávrri áidalas meahcceguovllu dikšun- ja geavahanplána beaivideami várás ja guovllu luonddusuodjalanguovllu dárkkisteami várás. Deaivvadeamis gieđahallon eará áššit ledje ráđđehusráđđádallamat, meahccejohtalusláhka, juohkeolbmo vuoigatvuođaid tulkon, sámegiela ja kultuvrra oahpahus Eanodagas ja Duodji-akatemiija.
Lassidieđut:
Sámedikki ságajođiheaddji Tiina Sanila-Aikio, tel. 050 300 1780, tiina.sanila-aikio(at)samediggi.fi
Sámi Árvvut rs:a ságajođiheaddji Klemetti Näkkäläjärvi, tel. 040 537 1584, klemetti.nakkalajarvi(at)pp.inet.fi
