Sámediggi vuostálastá garrasit Jiekŋameara ruovdegeainnu joatkkaplánaid

/in , /by

Ođas Jiekŋameara ruovdegeaidnofidnu plánema álggaheamis bođii áibbas vuorddekeahttá Sámediggái, go fitnodatdoaibmi Peter Vesterbacka almmuhii iežas áigumušain otná iđit. “Sámedikkiin eai leat gevvon makkárge virggálaš ságastallamat dán fidnu álggaheamis”, vástida ságajođiheaddji Sanila-Aikio ođđasa birra.

Vesterbacka muitala jearahallamis, ahte juná Roavvenjárggas Kirkonjárgii sáhtášii johtit joba viđa jagi geažis ja, ahte buot áššeosolaččaiguin lea dárkkuhus ságastallat fidnu birra. “Sámit eai leat fidnu oktavuođas čanusjoavku, muhto vuoigatvuođaeaiggádat ja Eurohpá uniovnna guovllu áidna eamiálbmot, man sajádat ja maiddái vuoigatvuohta iežas gillii ja kultuvrii lea sihkkaraston nu sisriikkalaš láhkaásaheamis go riikkaidgaskasaš vuoigatvuođa dásisge. Nappo sámiiguin ii ságastallo, muhto sámiiguin galgá ráđđádallat”, vástida Sanila-Aikio Vesterbacka plánaide.

Sámiid virggálaš ovddasteaddjit dáid ráđđádallamiin leat Sámediggi ja Nuortalaččaid giličoahkkin.

Nugo Sámediggi lea máŋggain ráđđádallamiin ja dilálašvuođain buktán ovdan juo ovdalge, ruovdegeaidnofidnu áitá ovttačilggolaččat sámiid árbevirolaš ealáhusaid, mat gullet vuođđolágas ja riikkaidgaskasaš vuoigatvuođas sihkkaraston sámekultuvrra suoji ollái. “Jiekŋameara ruovdegeaidnofidnu ovddideapmái eai leat eavttut dál eaige boahttevuođas, go vuođđolága 17.3 §:a sisttis doallan sámekultuvrra hedjonahttingielddus geavadis eastá Jiekŋameara ruovdegeainnu ráhkadeami sámiid ruovttuguvlui”, joatká ságajođiheaddji Sanila-Aikio.

Ruovdegeaidnofidnu vuostálastet viidát maiddái eará doibmejeaddjit. Sámedikki lassin vuostálasti bealiváldima leat ovdanbuktán Nuortalaččaid Giličoahkkin, Bálgosiid ovttastus, Sámemusea Siida, guovllu bálgosat, Ohcejoga gielda, máŋggat sáme- ja eará searvvit, gilidoaibmagottit sihke máŋggat priváhta olbmot.

Govva: Anja Vest

 

Lassidieđut:

Sámedikki ságajođiheaddji Tiina Sanila-Aikio, tel. 050 300 1780, tiina.sanila-aikio(at)samediggi.fi