Duodjeakademiija Eanodahkii -ovddidanprošektii ruhtadeapmi Duottar-Lappi Leaderis
Duottar-Lappi Leader lea mieđihan ruhtadeami Duodjeakademiija Eanodahkii -ovddidanprošektii. Duodjeakademiija ulbmilin lea lasihit searvvušlašvuođa sihke nanosmahttit duodjemáhtu Eanodagas ja viidásabbot sámeguovllus. Ovddidanprošeavtta ollašuhtti lea Sámediggi, ovttasbarggus Eanodaga gielddain.
Duodji lea sápmelaččaid ruovttuguovllus vejolaččat nannosepmosit ovdánan aiddo Eanodagas. – Eanodaga sajádat sámeguovllu váibmosis Ruoŧa ja Norgga lávga lagašvuođas mielddisbuktá erenomáš buorre vejolašvuođa nanosmahttit duodjekultuvrra, dadjá Sámedikki II várreságadoalli Tuomas Aslak Juuso ovddidanprošeavtta birra.
– Illudan Eanodaga sápmelaččaid nana duodjemáhtu vuođu ovddas, mainna lunddolaččat lea fámolaš oktavuohta boazodollui. Duodjeakademiija, man lea boahttevuođas ulbmilin ásahit fásta doaibman Sámedikki oktavuhtii, lea buorre ođđalágan doaibma ja álgu ovddosguvlui. Erenomáš duđavaš lean dasa, ahte ulbmilin lea lágidit doaimma Eanodaga Gárasavvonis, joatká Juuso prošeavtta dehálašvuođa birra.
– Báikkálaš movttegis eaktodáhtolaččat leat leamašan aktiivvalaččat válmmaštallamin prošeavtta, mii lea leamašan erenomáš buorre. Prošeakta sihkkarit bohciidahttá buriid álgagiid maiddái boahttevuođas, Eanodaga gieldda ovddidanhoavda Hannu Autto gávnnaha.
Duodji lea davvisámegielat doaba giehtaduodjái ja hábmemii. Dat ii leat dušše konkrehtalaš gieđaiguin duddjon, duodji sisttisdoallá vuoiŋŋalaš árvomáilmmi, vuogi eallit, jurddašit ja čájehit árvvusatnima. Doahpagii ii leat suomagielat vástta.
– Ovddidanprošeavtta lea dárkkuhus álgit geassemánus ja bistit guovvamánu lohppii 2020. Mii ohcat prošektii prošeaktakoordináhtora, geas gávdno buorre duodjedovdamuš ja hállu ovddidit ja nanosmahttit árbevirolaš duddjoma mearkkašumi, roahkasmahttá kulturčálli Riitta Orti-Berg prošeavttas beroštuvvan olbmuid ohcat barggu.
Duodjeakademiija vuođđudeami ulbmilin lea lasihit searvvušlašvuođa sihke nanosmahttit duodjemáhtu Eanodagas ja viidásabbot sámeguovllus. Akademiija vuođđudeamis leat dasa lassin positiivvalaš váikkuhusat sámegillii, sosiálalaš doaimmaide ja sápmelaš kultuvrii. Akademiija doarju buresveadjima ja dahká vejolažžan ođđa bargovejolašvuođaid. Lassin akademiija láhčá ođđa “boares” doaibmavugiid: soga ja bearraša siskkáldas dáiddu sirdima dálááigásaš vugiiguin (dokumenteren, digitaliseren), nanosmahttá identitehta sihke dieđu ja dáiddu sirdáseami sohkabuolvvas nubbái.
Duogáš
Sámedikki doaibmaplánii válgabadjái 2016-2019 lea čállojuvvon, ahte Sámediggi ovddida Duodjeakademiija ovddidanprošeavtta Eanodahkii. Sámediggi lea ožžon prošektii ruhtadeami Duottar-Lappi Leadera bokte. Ovddidanprošeavtta ollašuhtti lea Sámediggi, ovttasbarggus Eanodaga gielddain.
Sámedikki kulturlávdegotti álgágis dollojuvvui Duodjeakademiija ásaheami dihte vuosttaš deaivvadeapmi 9.1.2018, masa oassálaste Sámedikki II várreságadoalli Tuomas Aslak Juuso, kulturlávdegotti lahttu ja Sámi Duodji rs ságadoalli Maarit Magga, kulturčálli Riitta Orti-Berg sihke Eanodaga gieldda ovddidanhoavda Hannu Autto ja gulahallan- ja kulturkoordinerejeaddji Heli Nurmi.
Lassedieđut:
Kulturčálli Riitta Orti-Berg, riitta.orti-berg(at)samediggi.fi, tel. 010 839 3103
II várreságadoalli Tuomas Aslak Juuso, tuomas.juuso(at)samediggi.fi, tel. 040 187 1331
Govva: Gáijon Issáha Ánne / Anni Näkkäläjärvi
