Sámedikki válbmemis ođđa auktoriserejuvvon sámegiela jorgaleaddjit

Sámediggi lágidii diibmá golggotmánus válbmenbeaivve auktoriserejuvvon jorgaleaddji dutkosii. Válbmemii oassálaste vihtta olbmo. Auktoriserejuvvon jorgaleaddji dutkkus lágiduvvui skábmamánus 2018 ja dutkosa bohtosat almmustahttojedje giđđat 2019. Dutkosa čađahedje guokte sámegiela jorgaleaddji, Arla Magga čađahii suomagiella-davvisámegiella giellapárrii auktoriserejuvvon jorgaleaddji dutkosa ja Terhi Harju suomagiella-nuortalašgiella giellapárrii.

Válbmenbeaivve ordnen Sámedikki gielladorvočálli Anne Kirste Aikio illuda jorgaleaddjiid meari lassáneamis.

– Lea fiinna ášši, ahte válbmema bokte guokte ođđa jorgaleaddji čađaheigga dutkosa. Dušše okta olmmoš oppa máilmmis leamaš nuortalašgiela auktoriserejuvvon jorgaleaddji, dál soai leaba guovttis. Davvisámegiela dutkosa čađaheaddjit maŋimuš logi jage áigge leamaš dušše moattis, nu ahte dasge lasáhus lea oalle mearkkašahtti.

Dutkosa čađahan Terhi Harju ja Arla Magga mielas Sámedikki válbmenbeaivvis lei stuorra mearkkašupmi dutkosii ráhkkaneapmái.

– Válbmenbeaivve oaččui dehálaš dieđuid dutkosis ja buriid rávvagiid dutkosii ráhkkaneapmái. Lei sihkkarut dovdu, go dutkosii gullevaš áššiid beasai geavvat čađa áššedovdiiguin ovttas ovddalgihtii, kommentere Terhi Harju.

Oahpahusráđđehusa hálddašan auktoriserejuvvon jorgaleaddji dutkkus ordnejuvvo čuovvovaš háve skábmamánus 2019. Sámediggi lágida boahtte čavčča maiddái válbmenbeaivve, juos lea beroštupmi.

– Dutkkus lea hástaleaddji ja dutkosii gánneha ráhkkanišgoahtit áiggil. Gánneha oahpásmuvvat dutkosa sisdollui ja geavahit ávkin Sámedikki válbmenbeaivve, rávve ođđa auktoriserejuvvon jorgaleaddji Arla Magga .

Sámediggi lágida maiddái giđa áigge tulkka barggus beroštuvvan olbmuide oahpásmanskuvlema, daningo jorgaleaddjiid lassin maiddái sámegiela tulkkat leat oalle uhcán. Skuvlemis dieđihuvvo sierra.

Lassidieđut:

Gielladorvočálli Anne Kirste Aikio
anne-kirste.aikio@samediggi.fi
tel. 010 8393124