Sámedikki álgga Mumen – animašuvnna ráiddu dubbemis ollašuvvá
Sámediggi evttohii juovlamánu loahpas Yle:i, ahte dat álggahivčče ođđa Mumenvággi-ráiddu dubbema sámegielaide. Álgaga sáhttá lohkat obban Sámedikki dokumeantabáŋkkus. Ođđa Mumenvággi-ráidu čájehuvvo Yle:s giđđat 2019 buoremus geahččanáigge televišuvnnas ja maiddái Yle Areenas suoma- ja ruoŧagielat veršuvdnan. Sámediggi evttohii dalle, ahte Yle dubbešii ráiddus lassin veršuvnna, mas vuhtii váldojit Suomas hállon buot sámegielat.
Álgaga duogážin lei jurdda movttiidahttit Yle oassálastit ON:id riikkaidgaskasaš eamiálbmogiid gielaid temájahkái, mii dollojuvvo jagi 2019. Jagi dárkkuhussan lea giddet fuomášumi máilmmi eamiálbmotgielaide, main stuorámus oassi leat áitatvuložat. Maiddái Suomas hállon buot sámegielat leat árvvoštallon leat erenomáš áitatvuloš dahje áitatvuloš giellan, ja gielaid ealáskahttinbargu ovddiduvvo fámolaččat dál, vuoi gielat seillošedje.
Yle almmuhii 15.3.2018, ahte buvttada Mumenvággi-ráiddus maiddái sámegielat veršuvnnaid Sámedikki evttohusa mielde.
– Lean erenomáš ilus, ahte Yle válddii min eamiálbmogiid gielaid jagi guoski fuomášanhástalusa vuostá ja mii beassat gullat anáraš-, nuortalaš- ja davvisámegielaid mumeniid njálmmis, illuda Sámedikki ságajođiheaddji Tiina Sanila-Aikio.
Sámedikki mielas lea dehálaš, ahte erenomážit mánáide livččii eanet iežasgielat prográmmafálaldat.
– Dubben lea buvttadeami dáfus beaktilis vuohki lasihit sámegielat prográmmaid, muhto dattetge dát lea mearkkašahtti fuomášeami addin maiddái Yle:s, gávnnaha Sámedikki gielladorvočálli Anne Kirste Aikio.
– Lea erenomáš dehálaš, ahte sámegielat oidnojit ja gullojit eanet ja erenomážit media lea hirbmat dehálaš gaskoapmi giela eallinfámu nannemis.
Dubben- ja jorgalanbargu álggahuvvo bárrásiin ja Sámediggi lea lohpidan fállat áššedovdamuša veahkkin dubbema ollašuhttimii.
Lassidieđut
Ságajođiheaddji Tiina Sanila-Aikio, tel. 050 300 1780, tiina.sanila-aikio(at)samediggi.fi
Gielladorvočálli Anne Kirste Aikio, tel. 010 839 3124, anne-kirste.aikio(at)samediggi.fi
