Mánáidmateriálaprošeavtta plánejeaddjin álggaha Petra Kuuva

Oahpahus- ja kulturministeriija lea juolludan Sámediggái 125 500 e sturrosaš prošeaktadoarjaga sámegielat mánáidmateriála ovddideami várás. Prošeavttas lea ulbmilin buvttadit vuollái skuvlaahkásaš mánáide heivvolaš digi- ja speallomateriála golmma sámegillii. Ná geahččaluvvo doarjut árrabajásgeassinovttadagaid ja bearrašiid sámegiela ja sámekultuvrra sirdimis ja nannemis sihke ollašuhttit sámemánáid ovttaveardásaš vuoigatvuođa návddašit máŋggabealat mánáidkultuvrras iežaset gillii ja iežaset kultuvrra vuođul.

Materiálaprošeavtta plánejeaddjin lea álggahan 2.1.2019 bajásgeassindiehtagiid magisttar Petra Kuuva. Son lea ovdal bargan ee. Anára vuođđoskuvlla anárašgielat luohkáoahpaheaddjin sihke maŋimuš Sámi oahpahusguovddáža anárašgiela ja -kultuvrra oahpaheaddjin. “Dát lea fiinna vejolašvuohta beassat ollašuhttit ideaid, maid guhkes hárjánupmi mánáid máilmmis lea láddadan”, illuda Petra. “Ulbmilin lea hutkat buot golmma sámegillii áibbas ođđa materiála, mii lea aiddo dál mánáid siste áigeguovdil ja bivnnut. Lea buorre leat mánáidkultuvrra dahkkin millosabbot ovtta lávkki ovddabealde go maŋábealde!” Petra oaidná, ahte prošektii lea dehálaš oažžut fárrui maiddái suorggi buoremus áššedovdiid, nappo mánáid.

Sámegielat mánáidmateriálaprošeavtta ruhtadeapmi lea oassi jahkásaš sámiid kultur- ja giellabeassedoaimma doarjaga, mas bázii ruhta eará atnui, go giellabesiid doaibmabadji rievddai. Gažaldagas lea doaisttážii geardelunddot prošeakta, mii bistá borgemánu 2019 lohppii. Prošeavttas vástida Sámedikki sámegiela doaimmahat.

 

Lassediehtu:

Gielladorvočálli Anne Kirste Aikio, anne-kirste.aikio(at)samediggi.fi / 010 839 3124

Prošeaktaplánejeaddji Petra Kuuva, petra.kuuva(at)samediggi.fi / 010 839 3128