Sámedikkit háliidit nannet rájiid rasttildeaddji skuvlaovttasbarggu sámeguovlluin

/in , /by

Norgga, Ruoŧa ja Suoma Sámedikkit leahkastit ođđa siiddu rájiid rasttildeaddji sámi skuvlaovttasbarggu nannema dáfus. Sirpmás ja Ohcejogas lea leamašan juo guhká skuvlaovttasbargu, mii doarju sámegiela. Dán háliidit dorvvastit. Seammás čielggadit eará rádjeguovlluid skuvllaid, mat addet sámeoahpahusa, ovttasbarggu dili ja vejolašvuođaid.

Sápmelaš skuvlaovttasbarggu ovddideapmi lea oassin Sámi Parlamentáralaš Ráđi mihttomeriid. Norgga Sámediggi jođiha davviriikkalaš bargojoavkku, mas leat mielde Suoma, Ruoŧa ja Norgga Sámedikkiid lassin ovddasteaddjit Ohcejoga ja Deanu gielddain ja lassin Ohcejoga ja Sirpmá skuvllain ja skuvllaid vánhemiid gaskkas.

Bargojoavkku bargu lei bisánan jahkái, daningo prošektii eai gávdnan bargi. Bargojoavku čoahkkanii jagi bottu maŋŋel disdaga 4. juovlamánu Kárášjogas. Norgga sámediggeráđđi Mikkel Eskil Mikkelsen bovdii bargojoavkku čoahkkái ja buohkat illudedje prošeavtta joatkašuvvamis. Norgga Sámediggi ruhtada ja jođiha barggu.

Jagi álggus bargojoavkku čállin álggaha FM Arla Magga Anáris. Magga bargá Suoma Sámedikki skuvlen- ja oahppomateriáladoaimmahagas oasseáigásažžan jagi 2019. Suoma Sámedikki ovddasteaddjin bargaba Eila Tapiola Ohcejogas ja Ulla Aikio-Puoskari hálddahusas.

Govas: Bargojoavkku jođiheaddji Inger Anne Klemetsen, Arla Magga, Jon Christer Mudenia, Ol-Johan Sikku, Lars Miguel Utsi, Leif Erik Varsi, Mikkel Eskil Mikkelsen, Eila Tapiola, Aura Pieski, Ulla Aikio-Puoskari ja Brita Oskal Eira.

Lassedieđut:

Skuvlen- ja oahppamateriáladoaimmahat: ulla.aikio-puoskari(at)samediggi.fi, 040 767 3101;

Sámenuoraid dáiddadáhpáhus 2019 Gáregasnjárgga ođđa Njálla hállas

/in , /by

Sámenuoraid dáiddadáhpáhus 2019 ordnejuvvo Gáregasnjárgga ođđa Njálla máŋggadoaimmathállas ja skuvlla birrasis cuoŋománu 10.-11. beaivve. Riikaviidosaš temán dáhpáhusas lea teáhter ja sápmelaš temán ”Muitaleami máŋggat hámit / Kertomisen monet muodot”. Dáhpáhusa oktavuođas ordnejuvvo maiddái lagašoahpahusbeaivi oahppiide, geat lohket sámegielaid ruovttuguovllu olggobealde.

Riikaviidosaš temá rávvagat leat https://nuorikulttuuri.fi/ – siidduin. Sápmelaš temá sáhttá leat ovdamearkka dihte juoigan, livđe, leʹudd, máinnasteapmi dahje eará lávddi alde ovdanbuktojuvvon sátnedáidda. Dárkilut oassálastinrávvagat almmustahttojuvvojit álgogiđas, muhto ráhkkaneami gánneha álggahit jo dál! Čuovo Sámedikki neahttasiidduid www.samediggi.fi!

Lagašoahpahusbeaivi 10.4.ordnejuvvo oahppiide, geat lohket sámegielaid gáiddusoahpahusfidnu bokte sámeguovllu olggobealde ja dán beaivvi birra dieđiha fidnu koordináhtor.  Čuovo maiddái fidnu neahttasiidduid, mat rahpasit lagašáiggiid!

Sámedikki skuvlen- ja oahppamateriáladoaimmahat lea dáhpáhusa váldoordnejeaddji. Dáhpáhusa ordnemis leat mielde maiddái Lappi girjerájuid Johtti girjerádju-fidnu, Sámedikki Mánáidkulturguovddáš Mánnu, Sámemusihkkaguovddáš ja Nuoraidráđđi.

Dáhpáhusa áigetávval:
  • dáhpáhusa surggiin, almmuheamis, sáhtuin ja idjademiin dieđihuvvo dárkilut guovva-njukčamánus;
  • almmuheapmi gilvvu oasseváldiide ja eará oassálastiide rahpasa neahtas 5.3. ja nohká 22.3.;
  • dáiddadáhpáhusa buvttadeaddji álggaha barggus Sámedikki skuvlen- ja oahppamateriála doaimmahagas sullii guovtti mánotbaji ovdal dáhpáhusa;
  • sámenuoraid dáiddadáhpáhus Gáregasnjárggas 10.-11.4.2019 ja
  • riikaviidosaš TEATRIS-dáhpáhus Jyväskyläs 24.-26.5.2019.
Lassedieđut:
  • Skuvlen- ja oahppamateriáladoaimmahat: anni.nakkalajarvi(at)samediggi.fi, 040 511 1821;         ulla.aikio-puoskari(at)samediggi.fi, 040 767 3101;
  • Sámegielaid gáiddusoahpahusa pilohttafidnu: arla.magga(at)samediggi.fi, 040 198 5033;
  • Johtti girjerádju -fidnu: minna.nakkalajarvi(at)rovaniemi.fi, 016 322 21 77;
  • Sámi mánáidkulturguovddáš Mánnu: petra.magga(at)samediggi.fi, 040 732 5503.

Ilolaš mielain giđa guvlui ja Gáregasnjárgii!

Gáregasnjárgga skuvlla oahpaheaddjit Laura Niittyvuopio ja Satu-Marjut Nieminen čájeheaba makkár dáiddárat skuvllas leat leamašan. Fiinna seaidnegova leaba málen Haarla ballerinajumežat  Biret ja Katja.

 

                       

Boađe ságastallat áigeguovdilis áššiin Anárii disttaga 4.12.

/in , /by

Sámedikki stivrra lágidan ságastallandilálašvuođat joatkašuvvet. Stivra ordne čoahkkima oktavuođas ságastallandilálašvuođa Anáris disttaga 4.12. dmu 18-20. Dilálašvuođa dárkkuhussan lea deaivvadit guovllu sámiiguin ja fállat vejolašvuođa ságastallat áigeguovdilis áššiin.

Sámedikki stivra sávvá Anára guovllu sámiid leat bures boahtin válgaáigodaga viđát ságastallandilálašvuhtii! Dilálašvuohta lágiduvvo Sámekulturguovddáš Sajosis disttaga 4.12. dmu 18-20.

Sámedikki jagi 2018 doaibmaplána mielde stivrra čoahkkimat lágiduvvojit vejolašvuođaid mielde Ohcejogas, Vuohčus, Helssegis, Eanodaga Gárasavvonis ja Anáris. Čoahkkimiid oktavuođas ordnejuvvo báikegottis ságastallandilálašvuohta, gos stivra deaivvada guovllu sámiiguin, muitala čoahkkáigeassun stivraáigodaga doaimmain ja fállá eahpevirggálaš vejolašvuođa ságastallat áigeguovdilis áššiin.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

 

Govva: Mika Huisman / Sajos

Anárašgiela bustávvavideo válmmaštuvai

/in , /by

Anárašgiela bustávaide  oahpisteaddji video lea válmmaštuvvan. Videos leaba mielde Sáárákáisá ja Siiri. Soai ohcaba ja maid gávdnaba anárašgiela alfabehtaid. Juohke bustávas dadjaba sáni ovdamearkan. Video lea buvttadan Sámedikki skuvlen- ja oahppamateriáladoaimmahat. Buohkat sáhttet geahččat video friija.

Videos leaba mielde Sáárákáisá Seurujärvi ja Siiri Angeli. Video giehtačállosa leaba bargan Henna Lehtola ja Neeta Jääskö. Video lea govven ja editeren Eeva Mäkinen.

Geahča video dás: www.youtube.com/watch?v=CxrPDtIbZkA

Skuvlen- ja oahppamateriáladoaimmahat

Stáhtaráđi kansliija almmustahtii raportta duohtavuohta- ja soabadanproseassa válmmaštallama doarjjan dollon gullamiin

/in , /by

Suoma ráđđehus lea Sámedikki evttohusas álggahan sámeáššiid gieđahalli duohtavuohta- ja soabadanproseassa válmmaštallama golggotmánus 2017. Sámedikki čoahkkin evttohii sáttaságastallamis 9.2.2018, ahte proseassas ordnejuvvošedje sámiid gullamat nu sámiid ruovttuguovllus go dan olggobealdege. Stáhtaráđi kansliija almmustahtii gullamiin raportta 26.11.2018.

– Raporta čoahkkáigesii duohtavuohta- ja soabadanproseassa áigge gullamiin ovdan boahtán jurdagiid namaheapmin dahjege anonyman. Geahčan, ahte erenomáš dehálaš raporttas lea dat, maid áššiid ja dáhpáhusaid galggašii dutkat, juos duohtavuohta- ja soabadankomišuvdna mearriduvvo ásahuvvot, dadjá Sámedikki ságajođiheaddji Tiina Sanila-Aikio.

– Bajidivččen raporttas guokte váldofuopmášumi, main vuosttas lea dat, ahte sámit leat sierraárvvolaččat suopmelaččaid ektui nu láhkaásaheami dásis go ng. dábálaš eallimisge. Raportta nubbi váldočuoččuhus – assimilašuvdna dahjege suomaiduhttin ja kolonisašuvdna eanageavaheamis joatkašuvvet – lea lossa, bures vuođustallon ja galggašii leat duohtavuohta- ja soabadanproseassa ráđđádallamiid vuolggasadji, joatká Sanila-Aikio.

Almmustahtton gullanraporttas lágiduvvo buohkaide rabas ságastallandilálašvuohta 17.12.2018 dmu 17:30 Anáris Sajosa auditorios. Báikki alde leat ee. stáhtačálli Paula Lehtomäki sihke stáhtaráđi kansliija ja vuoigatvuođaministeriija virgeolbmot.

Sámediggi, vuoigatvuođaministeriija ja stáhtaráđi kansliija sohpe sámiid gullamiid ordnemis giđđat 2018. Sámiid ruovttuguovllus ja Suoma stuorámus gávpogiin dollojedje 29 gullama 2.5.–29.6.2018 gaskasaš áigge. Stáhtaráđi kansliija almmustahtii gullamiin raportta 26.11.2018. Raporta lea olggosaddon viđain gielain; anáraš-, nuortalaš- ja davvisámegillii, suomagillii ja ruoŧagillii. Lassin raporta almmustahtto maŋŋá maiddái eaŋgalsgillii.

Sámiid áššiid guoski soabadanproseassa -gullanraporta

Lassidieđut sámiid duohtavuohta- ja soabadanproseassa válmmaštallamis

Stáhtaráđi dieđáhus gullanraportta almmustahttimis (26.11.2018): https://valtioneuvosto.fi/artikkeli/-/asset_publisher/10616/kuulemisraportti-on-julkaistu

 

Lassidieđut:

Ságajođiheaddji Tiina Sanila-Aikio, tel. 050 300 1780, tiina.sanila-aikio(at)samediggi.fi

Sierraáššedovdi Anni-Kristiina Juuso, tel. 0295 160 169, stáhtaráđi kansliija

Sámediggi ohcá mearreáigásaš nuortalašgiela, anárašgiela ja davvisámegiela giellabargi áigái 2.1.–29.6.2019

/in , /by

Sámi parlamentáralaš ráđi vuollásažžan doaibmá davviriikkaid oktasaš sámegielaid fága- ja resursaguovddáš Sámi Giellagáldu, man doaimma ruhtadit Suoma, Ruoŧa ja Norgga Sámedikkit. Fága- ja resursaguovddáža barggut leat earret eará giellagáhtten, giela […]

Loga lasi

Sámegielat sosiála- ja dearvvašvuohtasuorggi studeanttaid ja bargiid riikkaviidosaš kárten

/in , /by

Poske (Davvi-Suoma sosiálasuorggi máhttinguovddáš) sámeovttadat ollašuhttá gažadeami ovttasbarggus Perhekeskustoimintamalli Lappiin – integroidut monitoimijaiset palvelut perheille (Bearašguovddášdoaibmanmálle Lappii – integrerejuvvon máŋggadoaibmi bálvalusat bearrašiidda) –fidnuin (2017–2018). Boahttevaš eanangodde- ja sode-ođastusa mielde lea dehálaš čielggadit gokčevaččat sámegielat sode-suorggi ámmátolbmuid ámmát- ja gielladáiddu ja sajáiduvvama riikkaviidosaččat. Eanangoddeođastusa mielde sámegielat bálvalusaid buoret koordineren ja ámmátolbmuid kárten lea okta guovddáš gažaldat sámegielat bálvalusaid dorvvasteami dáfus.

Gažadeapmi guoská vuosttaš sajis sámegielat čuvgehus ja sosiála- ja dearvvašvuohtasuorggi ámmátolbmuid gielddain, servviin, searvegottiin ja boahtteáiggi sode-ámmátolbmuid oahppolágádusain. Gažadeapmái sáhttet almmatge oassálastit buohkat, geat háliidit ovdanbuktit iežaset máhtu sámegielaid dáfus. Čielggadeami bohtosat adnojuvvojit eanangodde- ja sode-válmmaštallamis čuozihit sámegielat ámmátolbmuid čuoziheami. Gažadeapmi ollašuhttojuvvo Webprobol-gažadeapmin ja vástideapmi bistá sullii 10-15 minuhta. Muitalit bohtosiid birra jagi 2019 áigge.

Gažadeapmái vástideapmi ii geatnegahte vástideaddji masage ja gažadeapmái sáhttá vástidit iežas namain dahje anonyman. Persovdnadieđuid gieđahallamis čuovvut EU diehtosuodjenjuolggadusaid. Vástádusaid gieđahallet Lape-fidnu prošeaktabargi, Sámedikki sode-čálli, Poske sámeovttadaga plánejeaddji ja Lappi eanangotti sámebálvalusaid plánejeaddji. Vástádusat ja oktavuođadieđut geavahuvvojit dušše sámegielat sosiála- ja dearvvašvuohtabálvalusaid ja čuvgehusbálvalusaid plánemii ja ovddideapmái. Vástádusat seailluhuvvojit fuolalaččat suollemassániin suddjejuvvon muitosákkis. Vástideaddji sáhttá eastit iežas vástádusaid geavaheami maŋálgihtii, nu ahte váldá oktavuođa Poske sámeovttadaga plánejeaddjái.

Giitit váimmolaččat juo ovddalgihtii du vástádusas. Bivdit vástádusaid gažadeapmái 14.12.2018 rádjai.

Oktavuođaolmmoš addá lassedieđuid čielggadusas:

Riitta Lehtola,
riitta.lehtola@poskelappi.fi
p. 040 16 26 424

Julevsámegiela ja gildinsámegiela ovddideaddjiide Gollegiella -giellabálkkašupmi

/in , /by

Karin Tuolja Johkamohkis Ruoŧas ja Jekaterina Mechkina Murmánskkas Ruoššas oažžuba davviriikalaš sámi giellabálkkašumi jagi 2018.

Suoma Sámedikki presideanta Tiina Sanila-Aikio, Norgga Sámedikki presideanta Aili Keskitalo, Karin Tuolja, Norgga beal jurylahttu Solvår Knutsen Turi, Ruoŧa Sámedikki presideanta Per-Olof Nutti. Govva: Ann Kristin Lindaas / KMD.

Gollegiella – Davviriikalaš giellabálkkašupmi juhkkojuvvo Karin Tuoljai Norgga, Ruoŧa ja Suoma sámeáššiin vástidan ministariid ja sámedikkiid sátnejođiheaddjiid čoahkkima oktavuođas Oslos 26.11. ja Jekaterina Mechkinai Murmánskkas 29.11. Giellabálkkašumi mihttomearri lea veahkehit sámegielaid nannemii, ovddideapmái ja seailumii Norggas, Ruoŧas, Suomas ja Ruoššas.

Karin Tuolja lea bargan julevsámegiela ovdii Ruoŧas olles rávis olbmo agis áigge. Son lea doaibman oahpaheaddjin, jorgaleaddjin, oahppomateriála ovddideaddjin ja gielladárkkisteaddjin. Tuolja lea dehálaš olmmoš julevsámegiela giellaservošis, ja sus leamašan guovddáš mearkkašupmi Norgga ja Ruoŧa giellaovttasbarggus, eandalii sátnevuorkkáid ja tearpmaid ovddideamis ja Biibbala jorgaleamis.

Jekaterina Mechkina oažžu Gollegiella-giellabálkkašumi guhkesáigásaš barggus gielddasámegiela sajádaga nannemis Ruoššas. Son lea oassálastán sátnevuorkká ovddideapmái ja gielddasámegiela sátnegirjji gárvvisteapmái. Mechkina lea čállán ja jorgalan girjjiid ja ovddidan oahppamateriála. Su dujiid bokte máŋggat leat oahpásmuvvan Murmánskka guovllu gielddasápmelaččaid eallimii ja kultuvrii.

Giellabálkkašupmi mieđihuvvo ovttaskas olbmui dahje servošii, geat leat ánssolaččat doaibman čielgasit sámegiela ovddideami beales. Bálkkašupmi juhkkojuvvo dál gávccát geardde. Čuovvovaš bálkkašupmi juhkkojuvvo jagi 2020 go Suopma doaibmá golmma riikka sámeáššiid ovttasbarggu sátnejođiheaddjin.

Bálkkašupmelávdegoddái gullet Neeta Jääskö Suomas, David Kroik Ruoŧas, Nina Afanasieva Ruoššas, Solvår Knutsen Turi ja Jane Juuso Norggas.

Lassidieđut:

Ráđđádalli virgeolmmoš Johanna Hautakorpi, vuoigatvuođaministeriija, tel. 02951 50018, ovdanamma.sohkanamma@om.fi

Bálkkašupmelávdegotti lahtu Neeta Jääskö Suoma sámedikkis, tel. 0405969230, ovdanamma@neetainari.fi

https://oikeusministerio.fi/

Vel lea áigi ohcat skuvlagalledeaddjin

/in , /by

Sámedikki nuoraidráđi ja Nuoraid Akatemiija Dihtosis-prošeavtta olis fállojuvvojit badjeskuvllaide sámetemát skuvlagalledeamit. Ohcatge dál movttegis badjel 18-jahkásaš sámenuoraid miehtá Suoma skuvlagalledeaddjin giđa 2019 áigge ollašuhtton guossástallamiidda. Ohcanáigi lea vel dát vahkku.

Galledeaddjiid bargun lea badjeskuvllain iešráđálaččat lágidit galledeami, gos muitaluvvo sámekultuvrras. Diibmu juohkása info-oassái ja ovttas doaibmamii nuoraiguin. Galledemiid dárkkuhussan lea juohkit dieđuid sápmelaččain ja sámekultuvrras  váldoálbmoga nuoraide. Materiálat leat gárvásat nu, ahte galledeaddji bargun báhcá skuvllain fitnan. Galledeaddjiide lágiduvvo skuvlejupmi Helssegis 14.1.2019, gos sii ožžot oahpisteami. Skuvlejupmái oassálastin lea eaktun gallejeaddjin doaibmamii.

Skuvlagalledeamit ollašuhttojit skuvlabeivviid áigge áigodagas 1.2.-31.5.2019. Galledeaddji ii dárbbaš čatnasit fárrui olles giđđii, muhto guossástallamiid mearri lea gitta diŋgojumiin ja galledeaddjiid iežaset áigetávvaliin. Sáhtát bargat galledemiid eará bargguid dahje stuđerema olis. Juohke galledeamis máksojuvvojit 54€ sturrosaš háválisbálká ja maiddái mátkegolut galledanbáikái.

Ohcat galledeaddjiid ee. oaivegávpotguvlui, Jyväskyläi, Tamperei, Oului ja Roavvenjárgii. Maiddái eará báikegottiin beroštuvvan sámenuorat sáhttet ohcat fárrui.

Doaimmat friijahápmásaš ohcamuša 30.11.2018 dmu 16.00 rádjai čujuhussii: minna.lehtola(at)samediggi.fi

Lassidieđut:

Minna Lehtola
Prošeaktabargi
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-proseakta/?lang=dav 

Sámediggi ohcá sámegielaid gáiddusoahpahusfidnui koordináhtora

/in /by

Bargu álgá 1.1.2019 ja bistá 31.12.2020 rádjái. Bargu lea oasseáigásaš (50%). Prošeaktakoordináhtor vástida oktavuođain Suoma sierra guovlluid skuvllaide, skuvlema ordnejeaddjiide ja vánhemiidda. Koordináhtor čohkke sámegielaid oahpahusjoavkkuid ja doaibmá lagaš ovttasbarggus Ohcejoga gielddas doaibmi prošeaktahoavddain ja prošeavtta fierbmebálvalusaid buvttadeaddjiin. Prošeaktakoordináhtora bargui gullet maid dieđiheapmi ja raporteren. Prošeakta lágida gáiddusoahpahusa, mii lea vuođđooahpahusa ja logahatskuvlejumi dievasmahtti sámegielaid (anáraš-, nuortalaš- ja davvisámegiela) oahpahus, sámiid ruovttuguovllu olggobealgielddaid skuvllaide. Prošeavtta ruhtada oahpahus- ja kulturministeriija. Barggu ceavzilis dikšuma veahkehit sámeservoža dovdamuš ja máhttu iehčanas bargui. Gelbbolašvuođagáibádussan lea barggu eaktudan heivvolaš skuvlejupmi ja sámegiela dáidu (ásahus 1727/95). Prošeavttas vástida skuvlen- ja oahppamateriáladoaimmahat ja hoavdan doaibmá skuvlenčálli.

Prošeaktakoordináhtora bálká mearrašuvvá Sámedikki bálkávuogádaga gáibádusdási IV/IV mielde (vuođđobálká 2491,54 €, 50 %). Vuođđobálkká lassin máksojuvvo 24 % sámeguovllu lassi ja bargohárjánumi mielde vásáhuslasit. Koordináhtora doaibmabáiki lea sámekulturguovddáš Sajosis ja barggu dikšun oassái gáiddusbargun lea soahpamuša mielde vejolaš. Friddjahápmásaš bargoohcamušaid čuvvosiiguin galgá doaimmahit Sámedikki čállingoddái 5.12.2018 rádjái čujuhussii Sajos, 99870 Anár. Lassedieđuid addá skuvlenčálli Ulla  Aikio-Puoskari, ulla.aikio-puoskari@samediggi.fi / tel. 010 839 3112. Sámedikki doibmii sáhttá oahpásmuvvat neahttačujuhusas www.samediggi.fi.

Anáris 21.11.2018 Sámediggi