Sámediggi ohcá bargi sámegielat mánáidmateriála ovddidanprošektii
Sámedikkis lea álgimen sámegielat mánáidmateriála ovddidanprošeakta. Prošeavtta olis lea ulbmilin buvttadit vuollái skuvlaahkásaččaide oaivvilduvvon materiála golmmain sámegielain sápmelaš árrabajásgeassima ja bearrašiid atnui. Deattuhus boahtá leat vuollái skuvlaahkásaččaide heivvolaš digitála materiálas, dego spealloapplikašuvnnat ja elektrovnnalaš jietnagirjjit. Dán bokte figgat doarjut árrabajásgeassinovttadagaid ja bearrašiid sámegiela ja sámekultuvrra sirdimis ja nannemis, sihke ollašuhttit sámemánáid ovttaveardásaš vuoigatvuođa návddašit modeardna mánáidkultuvrras iežaset gielain ja iežaset kultuvrra vuođul. Prošeavtta dahká vejolažžan oahpahus- ja kulturministeriija mieđihan erenomášdoarjja.
Materiálaprošektii ohccojuvvo mearreáigásaš plánejeaddji vástidit prošeavtta plánemis, ollašuhttimis ja raporteremis. Bargu álgá soahpamuša mielde farggamusat ja bistá 31.8.2019 rádjái. Prošeavttas vástida sámegiela doaimmahat ja hoavdan doaibmá gielladorvočálli. Prošeaktaplánejeaddjis gáibiduvvo heivvolaš skuvlejupmi ja sámegiela dáidu, ja sávvojuvvo sámekultuvrra, materiálabarggu ja digitála doaibmabirrasa dovdamuš sihke máhttu iehčanas plánenbargui ja ollašuhttimii ovttasbarggus eará doibmiiguin. Ovttasbargoguoimmit bohtet leat ee. Sámedikki skuvlen- ja oahppomateriáladoaimmahat ja sápmelaš árrabajásgeassima ovttadagat. Dá liŋka bargoalmmuhussii.
Sámediggi bivdá bargoohcamušaid čuvvosiiguin 15.11. rádjái čujuhussii Sámedikki čállingoddi, Sajos, 99870 Anár.
Lassedieđuid addá gielladorvočálli Anne Kirste Aikio, anne-kirste.aikio@samediggi.fi / tel. 010 839 3124.
