Boađe ságastallat áigeguovdilis áššiin Gárasavvonii mánnodaga 8.10.

Sámedikki stivrra lágidan ságastallandilálašvuođat joatkašuvvet. Stivra ordne čoahkkima oktavuođas ságastallandilálašvuođa Gárasavvona kapeallas mánnodaga 8.10. dmu 18-20. Dilálašvuođa dárkkuhussan lea deaivvadit guovllu sámiiguin ja fállat vejolašvuođa ságastallat áigeguovdilis áššiin.

Ságastallandilálašvuođaid ulbmilin lea nannet sámeservoša ja Sámedikki gaskasaš gulahallama oktasaš áššiid ovddideami olis. Helssega ja Vuohču dilálašvuođat leat čájehan dan, ahte dákkár eahpevirggálaš ságastallamiidda lea dárbu, dadjá Sámedikki ságajođiheaddji Tiina Sanila-Aikio.

Sámedikki stivra sávvá Gárasavvona guovllu sámiid leat bures boahtin válgaáigodaga goalmmát ságastallandilálašvuhtii! Dilálašvuohta lágiduvvo Gárasavvona kapeallas mánnodaga 8.10. dmu 18-20.

Stivrra čuovvovaš ságastallandilálašvuođat ordnejuvvojit 5.11. Ohcejogas ja 4.12. Anáris. Dilálašvuođaid birra dieđihuvvo lasi maŋŋá.

Sámedikki doaibmaplána-bušeahta 2018 mielde stivrra čoahkkimat lágiduvvojit vejolašvuođaid mielde Ohcejogas, Vuohčus, Helssegis, Eanodaga Gárasavvonis ja Anáris. Čoahkkimiid oktavuođas ordnejuvvo báikegottis ságastallandilálašvuohta, gos stivra deaivvada guovllu sámiiguin, muitala čoahkkáigeassun stivraáigodaga doaimmain ja fállá eahpevirggálaš vejolašvuođa ságastallat áigeguovdilis áššiin.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Oahpa sisteduoji vearbbaid davvisámegillii!

Dieđátgo mot olmmoš bargá go vajulda? Naba go šalmmasta? Leago sátni loaskut oahpis dutnje? Galle sáni dáin dovdet ovddežis? Sisteduddjon-video bokte oahpat sámiid mávssolaš sisteduodjesániid.

Sisteduodje-videoi giehtačállosa lea bargan Rauna Vieltojärvi ja son maid duddjo videos. Govvema ja editerema lea bargan Eeva Mäkinen. Video lea buvttadan Sámedikki skuvlen- ja oahppamateriáladoaimmahat. Video sáhttá geavahit ovdamearkka dihte sámeduoji oahpahusas, davvisámegiela eatnigiela ja vierisgiela oahpahusas.

Video sáhtát geahččat dáppe: https://youtu.be/MJ0ZeEVMwlk

Davvisámegiela alfabehtafilmmaš gárvvásmuvai

 

Davvisámegiela alfabehtii láidesteaddji filmmaš lea gárvvásmuvvan. Bustávafilmmažis ohcat ja ovdanbuktit davvisámegiela alfabehta. Guđege bustávas addojuvvo ovdamearkasátni. Filmmaža lea buvttadan Skuvlen- ja oahppamateriáladoaimmahat, ja buohkat geain lea dasa beroštupmi, ožžot geavahit filmmaža friddja.

Giehtačállosa lea čállán Solja Magga ovttas doaimmahaga eará geassebargiiguin, ja filmmaža lea govven ja editeren Eeva Mäkinen.

Doaimmahat lea ráhkadeame bustávafilmmažiid maiddái anáraš- ja nuortalašgiela bustávain. Filmmažat lea juo govvejuvvon, ja dat gárvánit čakčat. Guđege giela alfabehtafilmmažat beaiváduvvojit maŋŋeleappos vel Oahpahusráđđehusa ja Sámedikki oktasaš Oktavuohta-neahttaaviisii.

Liŋka alfabehtafilmmažii: https://youtu.be/Prjluz93ZCc

Lassedieđut

Skuvlen- ja oahppamateriáladoaimmahat