Sämitigge ij tuhhiittâm oovdânpyehtimhammiittâs sämitiggelaavâ nubásmitmân
/
Vijđes savâstâllâm maŋa Sämitige čuákkim hilgoi haldâttâs oovdânpyehtimhammiittâs sämitiggelaavâ nubásmitmân. Čuákkim jienâstij miärádâsâst kulmii. Majemužžân jienâstii stiivrâ iävtuttâsâst hilgođ oovdânpyehtimhammiittâs já Jan Saijets iävtuttâsâst vaattâđ toohâđ nubástusâid oovdânpyehtimhammiittâsân puáđusin 11 – 8 (ohtâ kuárus jienâ).
Sämitiggelaavâ hástuseh sehe nubástustáárbuh láá maaŋgâin oosijn lamaš tiäđust joba laavâ asâttem rääjist. Sämitige prioriteettin lii lamaš jo maaŋgâ vaaljâpaje uđâsmittiđ laavâ Sämitiggeest. – Mij kijttep sämitiggelaavâ nubásmittem valmâštâllâm toimâkode pargostis sehe puoh peelijd, moh láá uásálistám laavâ uđâsmitmân, aalgât saavâjođetteijee Tiina Sanila-Aikio vuáđustâsâin oovdânpyehtimhammiittâs hilgom uásild.
– Sämitiggelaavâ puáhtá anneeđ sämmilij vuáđulaahân. Tot lii sämmilij suvereniteet symbol sehe mij jieččân kielân já kulttuurân kyeskee jiešhaldâšem vuáđu. Sämisiärvádâh já Sämitige lävdikodeh láá lahâhammiittâs uáinim maŋa adelâm noonâ uáinu laavâ siskáldâs tehálumosijn vááijuvvuođâin nuuvt staatân ko meid Sämitige stiivrân, juátká Sanila-Aikio.
Lahâoovdânpyehtim tehálumoseh hástuseh lijjii 3 § vuáimánšoddâm sirdem, 26 § njuolgimlävdikode čuákánpieijâm já nomâttemvyehi, 9 § sänihäämi sehe 10 § čuákánpieijâm. Luuvâ puoh vuáđustâsâid täst (suomâkielân).
Sämitige čuákkim ráđádâlâi kuhháá ovdil miärádâstoohâm
Sämitige stivrâ oovdânpuovtij čuákkimân lahâoovdânpyehtim hilgom, ko tot oonij, ete sämitiggelaavâ 9 § miäldásâš ráđádâllâmkenigâsvuotâ ij olášum ääšimiäldásávt. Oovdânpyehtim finnij kuhes ráđádâlmij maŋa čuákkimist kulmâ vuástáiävtuttâs: 1) Anu Avaskari iävtuttâs tuhhiittiđ sämitiggelaavâ nubástusâiguin, 2) Pentti Pieski iävtuttâs tuhhiittiđ lahâoovdânpyehtim já 3) Jan Saijets iävtuttâs vaattâđ toohâđ nubástusâid oovdânpyehtimhammiittâsân. Čuákkim meridij jienâstiđ iävtuttâsâi oornig miäldásávt, Sämitige stiivrâ iävtuttâs hilgođ lahâhammiittâs lâi vuáđuiävtuttâssân.
Vuossâmuu jienâstem vuoitij Pentti Pieski iävtuttâs tuhhiittiđ lahâoovdânpyehtim jienâiguin 3 – 5 (kuárus 12). Nube jienâstem vuoitij Jan Saijets iävtuttâs vaattâđ toohâđ nubástusâid oovdânpyehtimhammiittâsân jienâiguin 3 – 7 (kuárus 10). Kuálmád já majemuu jienâstem vuoitij stiivrâ iävtuttâs hilgođ lahâoovdânpyehtim jienâiguin 11 – 8 (kuárus 1).
Sämitige čuákkim meridij jienâstem maŋa hilgođ sämitiggelahâoovdânpyehtim. Miärádâsâst spiekâsteijee uáivil kuođđii Kari Kyrö, Anu Avaskari, Pigga Keskitalo já Pentti Pieski. Lasseen Tiina Sanila-Aikio piivdij lahteđ pevdikiirján vuáđustâsâid oovdânpyehtimhammiittâs hilgom uásild.
| Jienâstem 1 | Jienâstem 2 | Jienâstem 3 | |
|---|---|---|---|
| Aikio Jouni | Kuárus | Kuárus | Jaa |
| Avaskari Anu | Jaa | Kuárus | Jaa |
| Feodoroff Veikko | Kuárus | Ei | Ei |
| Hetta Jouko | Kuárus | Kuárus | Jaa |
| Holmberg Aslak | Kuárus | Ei | Ei |
| Juuso Tuomas Aslak | Kuárus | Ei | Ei |
| Jääskö Neeta | Kuárus | Ei | Ei |
| Keskitalo Pigga | Jaa | Kuárus | Jaa |
| Kustula Kirsti | Ei | Kuárus | Jaa |
| Kyrö Kari | Jaa | Kuárus | Jaa |
| Magga Ulla-Maarit | Kuárus | Kuárus | Jaa |
| Magga-Vars Petra | Kuárus | Kuárus | Jaa |
| Nuorgam Anne | Kuárus | Ei | Ei |
| Paltto Heikki | Kuárus | Ei | Ei |
| Pieski Pentti | Ei | Jaa | Ei |
| Saijets Janne | Kuárus | Ei | Ei |
| Sanila Tanja | Meddâl | Meddâl | Meddâl |
| Sanila-Aikio Tiina | Kuárus | Kuárus | Jaa |
| Sara Magreta | Ei | Kuárus | Jaa |
| Sujala Antti | Ei | Jaa | Jaa |
| Tapiola Nilla | Ei | Jaa | Kuárus |
| Jienâstem puáđus | Jaa 3, Ei 5 Kuárus 12 Meddâl 1 | Jaa 3, Ei 7 Kuárus 10 Meddâl 1 | Jaa 11, Ei 8 Kuárus 1 Meddâl 1 |
Lasetiäđuh:
Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi
