Sámediggi ii dohkkehan hámusevttohusa sámediggelága nuppástuhttimis
/
Viiddis ságastallama maŋŋá Sámedikki dievasčoahkkin hilggui ráđđehusa hámusevttohusa sámediggelága nuppástuhttimis. Čoahkkimis jienastuvvui mearrádusas golbmii. Maŋimužžan jienastuvvui stivrra evttohusas ahte hámusevttohusa galgá hilgut ja Jan Saijetsa evttohusas ahte galgá eaktudit ahte hámusevttohussii dahkkojuvvojit nuppástusat jienain 11-8 (okta guoros jietna).
Sámediggelága hástalusat sihke nuppástuhttindárbbut leat leamaš máŋggaid áššiid buohta dieđus juoba lága ásaheami rájes. Sámedikki prioritehtan lea leamaš jo máŋgga válgabaji áigge ođasmahttit Sámediggelága. – Mii giitit sámediggelága nuppástusa válmmaštallan doaibmagotti sin barggus sihke buot earáid, geat leat oassálastán lága ođasmahttimii, álggaha ságajođiheaddji Tiina Sanila-Aikio iežas ákkastallama hámusevttohusa hilguma oasil.
– Sámediggelága sáhttá doallat sápmelaččaid vuođđoláhkan. Dat lea sápmelaččaid suverenitehta symbola sihke iežamet giela ja kultuvrra guoski iešstivrejumi vuolggasadji. Sámesearvvuš ja Sámedikki lávdegottit leat láhkahápmosa oaidnima maŋŋá addán nana oaivila lága sisdoalu eanemus mearkkašahtti váilevašvuođain nu stáhtii go Sámedikki stivrii, joatká Sanila-Aikio.
Láhkaevttohusa mearkkašahtti hástalusat ledje 3 §:a fápmuiboahtima sirdin, 26 §:a vuigenlávdegotti čoahkku ja namuhanvuohki, 9 §:a sátnehápmi sihke 10 §:a čoahkku. Loga ákkastallama ollásit dáppe.
Sámedikki dievasčoahkkin ráđđádalai guhká ovdal mearrádusdahkama
Sámedikki stivra evttohii čoahkkimii láhkahápmosa hilguma, dainnago dat geahččai, ahte sámediggelága 9 §:a mieldásaš ráđđádallangeatnegasvuohta ii ollášuvvan áššáigullevaččat. Evttohus oaččui guhkes ráđđádallamiid maŋŋá golbma vuosteevttohusa: 1) Anu Avaskari evttohus dohkkehit sámediggelága nuppástusaiguin, 2) Pentti Pieski evttohus dohkkehit láhkaevttohusa ja 3) Jan Saijets evttohus galgá eaktuđit ahte hámusevttohussii dahkkojuvvojit nuppástusat. Čoahkkin mearridii jienastit evttohusaid ortnega mielde, Sámedikki stivrra evttohus hilgut láhkahápmosa lei vuođđoevttohussan.
Vuosttas jienastusa vuittii Pentti Pieski evttohus dohkkehit láhkaevttohusa jienain 3 – 5 (guoros 12). Nuppi jienastusa vuittii Jan Saijets evttohus eaktuđit dahkat nuppástusaid hámusevttohussii jienain 3 – 7 (guoros 10). Goalmmát ja maŋimuš jienastusa vuittii stivrra evttohus hilgut láhkahápmosa jienain 11 – 8 (guoros1).
Sámedikki dievasčoahkkin mearridii jienastusa maŋŋá hilgut sámediggeláhkaevttohusa. Mearrádussii sierra oaivila guđđe Kari Kyrö, Anu Avaskari, Pigga Keskitalo ja Pentti Pieski. Dán lassin Tiina Sanila-Aikio bivddii laktit beavdegirjái ákkastallamiid hámusevttohusa hilguma oasil.
| Jienastus 1 | Jienastus 2 | Jienastus 3 | |
|---|---|---|---|
| Aikio Jouni | Guorus | Guorus | Jaa |
| Avaskari Anu | Jaa | Guorus | Jaa |
| Feodoroff Veikko | Guorus | Ei | Ei |
| Hetta Jouko | Guorus | Guorus | Jaa |
| Holmberg Aslak | Guorus | Ei | Ei |
| Juuso Tuomas Aslak | Guorus | Ei | Ei |
| Jääskö Neeta | Guorus | Ei | Ei |
| Keskitalo Pigga | Jaa | Guorus | Jaa |
| Kustula Kirsti | Ei | Guorus | Jaa |
| Kyrö Kari | Jaa | Guorus | Jaa |
| Magga Ulla-Maarit | Guorus | Guorus | Jaa |
| Magga-Vars Petra | Guorus | Guorus | Jaa |
| Nuorgam Anne | Guorus | Ei | Ei |
| Paltto Heikki | Guorus | Ei | Ei |
| Pieski Pentti | Ei | Jaa | Ei |
| Saijets Janne | Guorus | Ei | Ei |
| Sanila Tanja | Eret | Eret | Eret |
| Sanila-Aikio Tiina | Guorus | Guorus | Jaa |
| Sara Magreta | Ei | Guorus | Jaa |
| Sujala Antti | Ei | Jaa | Jaa |
| Tapiola Nilla | Ei | Jaa | Guorus |
| Äänestyksen tulos | Jaa 3, Ei 5 Guorus 12 Eret 1 | Jaa 3, Ei 7 Guorus 10 Eret 1 | Jaa 11, Ei 8 Guorus 1 Eret 1 |
Lassidieđut:
Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi
