Láhkahámus ođđa sámediggeláhkan ovdánan lávdegottiid gieđahallamii

/in /by

Láhkahámus ođđa sámediggeláhkan lea bárrásiin Sámedikki lávdegottiid gieđahallamis. Cealkámušaid addináigi nogai suoidnemánu loahpas ja dan olis bohte measta 50 cealkámuša virgeoapmahaččain, servviin ja ovttaskas olbmuin. Sámedikki čoahkkin gieđahallá láhkahápmosa čoahkkimis čakčamánu 14. beaivve.

Láhkahámus ođđa sámediggeláhkan doaimmahuvvui cealkámušaid várás geassemánus ja mearreáigi cealkámušaide lei suoidnemánu 27. beaivi. Áigemearis cealkámušat bohte measta 50 sierra doaibmis.

– Lean duđavaš addojuvvon cealkámušaid stuorra mearrái, ja giittánge buohkaid, geat leat addán cealkámušaid. Lea hirbmat miellagiddevaš beassat čohkket cealkámušain boahtán máhcahagain oppalašgova. Sámedikki siskkáldas gieđahallan álgá lávdegottiin nu ahte ovdána álgočavčča áigge Sámedikki dievasčoahkkimii”, dadjá justa bargui jahkeluomus máhccan Sámedikki ságajođiheaddji Tiina Sanila-Aikio.

Sámediggeláhkahápmosis addojuvvon cealkámušain eanaš oasi sáhtát lohkat cealkámušbálvalusaid neahttasiidduin. Lassin oassi cealkámušain lea almmustahtton vuoigatvuohtaministeriija siidduin.

Láhkahápmosa gieđahallama ovdáneapmi Sámedikkis:

  • Lávdegottit addet iežaset cealkámuša stivrii 16.8. rádjai
  • Stivra gieđahallá láhkahápmosa čoahkkimiin 17.8. ja 31.8.
  • Sámediggelága 9 §:s dárkkuhuvvon ráđđádallan vuoigatvuohtaministeriijain 20.8.
  • Sámedikki čoahkkin gieđahallá láhkahápmosa čoahkkimis 14.9.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi