Mánát ja nuorat oassálastet oahppamateriála báddenbargguide
Sámekulturguovddážis báddenstudios lea suoidnemánus hušša, go mánát ja nuorat oassálastet digitála oahppamateriála ja eará mánáidgirjjiid báddenbargguide. Mánáid ja nuoraid jienat báddejuvvojit Gea-girjeráiddu nuppi luohká digitála oahppamateriálii ja Bluppe-mánáidgirjjiide.
Dán vahkus báddenbargui oassálaste Mihkku Laiti, Áilu Laiti ja Niillas Laiti Ohcejogas. Mihkku lea leamašan báddemis mielde juo moadde jagi dassái Gea 1- digimateriálas. Dán gease son neaktá earret eará Bluppe-mánáidgirjjiin oahpes guovžžačivgga. – Dáppe lea somá bargat, mojohallá Mihkku. Áilu ja Niillas beasaiga iskat jietnarollabarggu vuosttaš háve. Áilu jietnanevttii Gea-oahppagirjji váldopersovnna Biette. – Álggos orui vehá gelddolaš, muhto lei áibbas somá, Áilu. Annukka Hirvasvuopio-Laiti lea hui movtta go su bártnit oassálaste báddenbargui. Su dieđu mielde bártnit leat hárjehallan vuorrosániid ovttas áhčiin hui viššalit.
Báddenbarggu bokte mánát ja nuorat besset oahpásmuvvat geavatlaččat oahppamateriála ráhkadeapmái. Dát addá maid neaktinvásáhusaid ja seammás dat sáhttá maid arvvosmahttit sin iešguđegelágan báddenprošeavttaide maŋŋeleappos. Vaikko bádden lea dárkilis ja hástaleaddji bargu, deháleamos lea liikká movttegis miella. – Mánát leat leamašan hui čeahpit ja duostilat, muitala digimateriála báddejeaddji ja giehtačállosa čálli Solja Magga.
Materiála jietnaneavttáriid válljedettiin maid davvisámegiela iešguđet suopmanat viggojuvvojit váldit vuhtii nu bures go vejolaš. – Báddenbarggut leat almmatge easkka álgán, nu ahte buot oruhiidda eai leat vel jietnaneavttárat, guoigala Solja Magga.
Lassedieđut:
Prošeaktabargi Solja Magga, solja.magga(at)samediggi.fi
