Historjjálaš rájáidrasttildeaddji ovttasbargu sámi kulturárbbi suodjaleapmin

Sajosii Anárii ledje boahtán sámit miehtá Sámi Ruoššas, Suomas, Ruoŧas ja Norggas ja velá lassin Davviriikkain ministeriija virgeolbmot, musealágádusa virgeolbmot ja Unesco čálligotti virgeolmmoš.

– Sápmelaččat leat okta álbmot njeallje riikkas, lea dárbu ovttasbargui ja oktasaš meannudeapmái, mii guoská min oktasaš ávnnahis ja ávnnaslaš kulturárbbi, álggahii Suoma Sámedikki ságadoalli  Tiina Sanila-Aikio konfereanssas.

– Ávnnaslaš kulturárbbi suodjaleapmin leat earret eará našuvnnalaš lágat, muhto go lea sáhka ávnnahis kulturárbbi birra, de máŋgii leat fámoheamit dilis, jus livččii dárbu suodjalit árbevirolaš dieđu, joatká Sanila-Aikio linnjemiid dárbbus, njuolggadusat gii oamasta dahje geat oamastit árbevirolaš dieđu, gii hálddaša dahje geat hálddašit dan, makkár eavttuiguin diehtu ávkkástallojuvvo jnv.

– Bealistan háliidan deattuhit giela dán oktavuođas, go giella lea guovddáš reaidu dán máhttosirdimis buolvvas bulvii – girjemáhttu lea dehálaš, muhto dán oktavuođas lea dat geavatlaš máhttu mas maid lea njálmmálaš árbevierru – guovddážis,  deattuha Norga Sámedikki presideanta Aili Keskitalo.

– Dál  leat ná viidát čoahkkanan miehtá Sámi, de lea dál historjjálaš vejolašvuohta bargagoahtit dán guvlui ja guorragoahtit dán bálgá mii sáhtášii leat ávkin ja suodjalussan midjiide ja min maŋisbohttiide – lea miellagiddevaš guorahallat ahte livččii go vejolaš ásahit oktasaš ehtalaš njuolggadusaid mat livččii midjiide veahkkin suodjalan barggus?, árvala Keskitalo.

– Min geatnegasvuohta lea nannet máhtu ja dahkat olbmuide geat dahket kulturárbbiin  vejolažžan bargan daid bargguid, Ruoŧa Sámedikki ovddasteaddji Marina Nilsson Ederlöv doalvu dearvvuođaid Ruoŧa Sámedikki politihkkáriidda konfereanssas.

Sámi parlamentáralaš ráđđi (SPR) lea váldán doaibmaplánii 5.5.2018 – 15.9.2019 Davviriikkalaš sámi njálmmálaš árbevirolaš kultuvrra ovddasvástáduslaš ja ehtalaččat beaktilis geavaheami ja suodjaleami njuolggadusaid prinsihpalaš čállima.

Guovddáš ulbmilin lea hábmet oktasaš vuođu sámi dáidda- ja kultursektorii, mii guoská sámi ealli njálmmálaš árbevieru ovddasvástáduslaš ja ehtalaččat beaktilis geavaheami ja suodjaleami. Sámekultuvra galgá seailut ealli kultuvran, nu ahte nanusmahttit dan dahjege ovddidit ja dorvvastit sámi ealli njálmmálaš árbevieru, sámi dáidaga ja dáiddáriid boahttevuođa, giela ja árbevirolaš ealáhusaid.

Urbánbeaivvi konfereansa lihkostuvai bures ja čokkii sullii 200 guldaleaddji báikki nála goabbat beaivve, lassin velá ledje 35-50 dihtoroktavuođa striima bokte.

Giitu sáhkavuoruid dolliide, konfereanssa oassálastiide ja lágideddjiide!

Liŋka govaide konfereanssas.

Lassidieđut

Riitta Orti-Berg, Suoma Sámediggi, riitta.orti-berg(at)samediggi.fi,  +358 40 840 0383

Eanodaga gielda ja Sámediggi čielggadit dárbbu giellabeassedoibmii Eanodagas

Sámediggi ohcá jahkásaččat oahpahus- ja kulturministeriijas stáhtadoarjaga sámi kultur- ja giellabeassedoaimma váras. Giellabeassedoaimma bokte leat ealáskahttán ja nanosmahttán sámegielaid ja sámi kultuvrra iešguđetge guovlluin Suomas. Dál sámeguovllus doibmet logi giellabeasi ja njeallje eará sajiin Suomas. Dain leat ovcci davvisámegillii, golbma anárašgillii ja guokte nuortalašgillii. Eanodagas davvisámegielat giellabeassi lea leamaš oassin gieldda árrabajasgeassinfáladaga jagi 2018 álggu rájes.

Giellabeassi lea gielalaš vehádahkii dahje álgoálbmogii gullevaš mánáide oaivvilduvvon árrabajásgeassin, man ulbmilin lea sirdit mánáide giela, man váhnemat eai sáhte sirdit ruovttus obage dahje doarvai. Sámegielat giellabeasis buot doaibma lea álggu rájes dušše sámegillii, giellabesiin geavahuvvo giellabeassemetoda. Giela oahppet árgabeaivvi dilalašvuođain ja lunddolaččat bargguid bokte. Giellabeassi lea beaktileamos vuohki sirdit giela mánáide ruovttu olggobealde. Giellabesiid viggamuššan lea bajasgeassit mánáid šaddat ođđa giellahupmin ja giela sirdin. Sámegiella ovdana giellabeasis mána agi ja eará giellabirrasa mielde juogo nubbin eatnigiellan dahje unnimusat nana nubbi giella. Doaimma ulbmilin lea maid nanosmahttit máná identitehta ja oahppat dovdat sámekultuvrra.

Doaibma ollašuhtto nu ahte vuollel skuvlaahkásaččaide ordnejuvvo sámegielat árrabajasgeassin ja skuvlalaččaide dárbbu mielde eahketbeaivedoaibma. Giellabeassedoaimma plánema váras Eanodaga gielda ja Sámediggi čielggadit sámebearrašiid dárbbu ja dáhtu searvat giellabeassedoaibmii Eanodaga gielddas čávčča 2018 rájes.

Mii bivdit daid bearrašiid, geat leat beroštuvvan giellabeassedoaimmas, vástidit elektrovnnalaš Webropol-jearahallamii bearjadaga 8.6.2018 radjái. Jearahallan gávdno suomagillii ja davvisámegillii dán čujuhusas:

http://www.webropolsurveys.com/kielipesa.net

 

Lassidieđut

Sámedikki gielladorvočálli Anne Kirste Aikio: anne-kirste.aikio@samediggi.fi, 040 707 5626

Sámedikki giellabeassekordináhtor Annika Pasanen: annika.pasanen@samediggi.fi, 040 662 4741

Eanodat gieldda árrabajasgeassinstivrejeaddji Taina Ketola: taina.ketola@enontekio.fi, 040 569 4114

Nuoraidráđđi, SSN ja SRK bovdejit sámenuoraid soabadankomišuvnna ságastallandilálašvuhtii Anárii 9.6.

Nuoraidráđđi, Suoma Sámenuorat rs ja stáhtaráđi kansliija bovdejit sámenuoraid soabadankomišuvnna ságastallandilálašvuhtii Anárii 9.6. d. 11–14. Boađe ságaškuššat eará nuoraiguin makkár vejolaš sámiid soabadankomišuvdna galggalii leat! Álgoálbmogiid duohtavuođa- ja soabadankomišuvdnaproseassain lea ulbmilin dutkat ja čalmmustahttit olles álbmogii kollektiivvalaččat čuohcán vearredaguid. Makkár oaivilat dus leat proseassa birra? Searvva donnai rabas ja eahpeformála ságastallamii! Juos searvvat skype bokte, bidjal dieđu nuoraidčálli Kaisa Tapiola-Länsmanii tel. 050 38 25 179.

GEASA? Sámenuoraide

GOAS? Lávvardaga 9.6. d. 11–14

GOS? Parlamentasále Solju, Sajos, Anár dahje skype

 

BOVDEHUS

SAJOSA SOLJUI ANÁRIS LÁVVARDAGA 9.6.2018 D. 11 – 14

Suoma ráđđehus lea golggotmánu 19. beaivve 2017 almmuhan, ahte dat álggaha sámiid áššiid guoski soabadanproseassa válmmastalláma. Evttohus proseassa álggaheapmái lea boahtán Sámedikkis.

Stáhtaráđi kansliija ja vuoigatvuohtaministeriija ovttasbarggus Suoma Sámedikkiin leat guorahallámin govt ásaheapmi ja ieš vejolaš sámiid duohtavuohta- ja soabadankomišuvdna (DSK) Suomas galggalii leat. Vejolaš komišuvnna mandáhtas, namás dahje komisárain ii leat dahkon vel aktage mearrádus. Sámiid gullán ja vuhtiiváldin leat proseassa vuođđun ja eaktun. Stáhta háleda dal gullát sámiid oaiviliid, jurdagiid, háluid ja baluid komišuvnna ektui rabas ságastandilalasvuođain miehta Sámi ja stuorimus gávpogiin Suomas.

Deaivvadeamiid geavatlaš ortnemis veahkin leat iešguđet searvvit miehta Sámi ja sámisearvvit stuorit gávpogiin. Dilálasvuođaid giella lea davvisámigiella dávvisámigielat guovlluin. Anárašgielat ja nuortalašgielat guovlluin giella lea dulkaveahkin anáraš- ja nuortalašgiella dan mielde, gos deaivvadeapmi ortnejuvvo. Gait dilálasvuođain giellan lea maid suomagiella.

Álgoálbmogiidda guoski duohtavuohta- ja soabadankomišuvdnaproseassain lea ulbmilin dutkat ja čalmmustahttit olles álbmogii kollektiivalaččát čuohzán vearredaguit. Kollektiiva vearredaguin leat leamas, ja leat, iešguđetlágán váikuhusat ovttaskas olbmui.

Maid komišuvdna galggalii Du mielas gieđahallat? Leatgo Dus oaivilat proseassa birra? Jus leat, de sáhtat iežat oaivila muitalit rabas deaivvadeamis njálmmalaččat dahje čalalaččat. Jus it beasa boahtit deaivvadeapmai de sáddes oaivilat e-poasttas čujuhussii: sapmi@vnk.fi maŋemusta geassemánu 29. beaivve. Komišuvdna, mas livčče sihke ovttaskas olbmuid ja stuorit servodaga dohkkeheapmi ja luohttámuš, sáhtálii leat rievdadeamin miellaguottuid ja veahkehit buoret boahteáigái.

Guovvamánu 10. beaivve 2018 ortnejuvvui Anáris seminára, gos riikaidgaskasas guossit muitaledje vásahusaid juo čađahuvvon DSK-proseassain – buriid, heajuid ja divrras oahpuit maid berre váldit vuhtii vai proseassas šaddálii nu buorre go vejolaš. Seminára lea oaidninláhkai interneahtas Stáhtaráđi kansliija YouTube-kanálas.

Lassidieđut

Sierraáššedovdi Anni-Kristiina Juuso, stáhtaráđi kansliija, t. +358 50 525 7704.

Kaisa Tapiola-Länsman, Sámedikki nuoraidčálli, t. +358 50 382 5179, kaisa.tapiola-lansman@samediggi.fi

Sámediggi giittii Oahpahusráđđehusa ovttasbarggus

Sámediggi giittii Oahpahusráđđehusa buori ovttasbarggus ja sámeoahpahusa ovddideami duvdimis. Oahpahusráđđehus lea almmuhan sámiid ja sámi kultuvrra iežas temán eurohpalaš kulturárbejahkái 2018. Sápmelaččat ja sámeoahpahus ledje vuossárgga 28.5. fáddán Oahpahusráđđehusas ordnejuvvon Unna Skábmagovat -dáhpáhusas.

Sámedikki ja Oahpahusráđđehusa ovttasbarggus leat leamaš máŋggat ođđa áššit maŋimuš jagiin. Oahpahusráđđehus lea juo guhká ruhtadan sámegielat oahppamateriálabarggu. Sámediggi ollašuhttii ovttasbarggus Oulu universitehtain jagis 2015 Sámi giellalávgun skuvllas -oahpaheaddjiid dievasmahttinskuvlejumi, man Oahpahusráđđehus ruhtadii. Ovttasbargu sámi giellalávgunoahpahusa gieđahalli temágirjji olis joatkkašuvvá ain ja girji almmuhuvvo dán jagi.

Sámi giellalávgunoahpahus/ guovttegielat oahpahus oaččui ávkki skuvlenfitnus. Giellalávgunluohkká doaibmá juo Ohcejotnjálmmis. Giela riggodahtti oahpahus addojuvvo Eanodaga Heahtás. Oulus, Anáris, Roavvenjárggas ja Soađegili girkosiiddas leat plánat giellalávgun- dahje guovttegielat oahpahusa álggaheamis. Pasila vuođđoskuvla Helssegis álggaha sámi-suoma-guovttegielat oahpahusa boahtte čavčča.

Sámediggi ja Oahpahusráđđehus leat ovttasbargan maid giellabajásgeassimis ja diehtojuohkimis. Sámiid álbmotbeaivve 6.2.2017 rahppokuvvojedje oktasašbargun ođasmahttojuvvon oktavuohta.com -siiddut, mat fállet sámedieđu oahpahussii. Ovttasbargu joatkkašuvvá ain siidduid doaimmahemiin ja ovddidemiin iešguđet oahppaávdnasiidda heihevuvvon oahppamateriálan.

Sámediggi ja Oahpahusráđđehus leat maiddái ovttas kárten sámeoahppiid sámegielaid gáiddusoktavuođaid geavaheaddji pilohttaprošektii, mii galggašii beassat johtui čakčat 2018. Ohcejoga gielda jođiha prošeavtta, man čuvgehuslávdegoddi gieđahallá prošeavtta johtui bidjama čoahkkimistis geassemánu 7. beaivve.

Sámediggi lea váldán ovttasvástádusa maid oahppaplána- ja árabajásgeassinplána vuođuštusaid jorgaleamis sámegielaide. Sámegielat áššegirjjit leat almmuhuvvon Oahpahusráđđehusa fierbmesiidduin.

Oahpahusráđđehusa oaivehoavda Olli-Pekka Heinonen galledii Anáris skábmamánus 2017 ja oahpásnuvai Sámedikki doaimmaide ja sámeoahpahussii. Čakčat Sámediggi oažžu guossin sámeoahpahusas vástideaddji virgeolbmuid ja Oahpahusráđđehusa Poiju-fierpmádaga, mii ovddida giella- ja kulturjoavkkuid oahpahusa Suomas.

Unna Skábmagovat -dáhpáhussii oassálastii Sámedikkis skuvlenčálli Ulla Aikio-Puoskari, Sámi oahpahusguovddážis rektor Eeva-Liisa Rasmus-Moilanen ja goahkka Anne Tervaniemi. Filbmakomissára Liisa Holmberg ja doaimmajođiheaddji Sunná Nousiniemi International Sámi Film Instituhtas buvttiiga dáhpáhussii sámi oanehisfilmmaid ráiddu. Dasa lassin dáhpáhussii oassálastii Skábmagovat -filbmafestivála dáiddalaš jođiheaddji Jorma Lehtola.

Lassidieđut

Skuvlenčálli Ulla Aikio-Puoskari, t. 010 839 3112, ulla.aikio-puoskari(at)samediggi.fi

Soabadanproseassa ságastallandilálašvuođaid áigetávval

Stáhta gullá dál sámiid jurdagiid, sávaldagaid, fuolaid ja evttohusaid soabadanproseassa birra rabas ságastallandilálašvuođain Sámeguovllus ja stuorámus gávpogiin Suomas. Dáppe gávnnat áigetávvala nannejuvvon ságastallandilálašvuođain.

ČEAVETJÁVRI maŋ 8.5. dmu 18-21, Nuortalašdállu, ságastallandilálašvuohta lágiduvvo ovttasbarggus Nuortalaškulturvuođđudusain.

LISMÁ maŋ 15.5. dmu 15-18, Susanna Näkkäläjärvi dálus, ságastallandilálašvuohta lágiduvvo ovttasbarggus Lismmá gililaččaiguin.

NJELLIM ga 16.5. dmu 10-13, Njellima gilidálus, ságastallandilálašvuohta lágiduvvo ovttasbarggus anárašgiela ságastallankurssain.

AVVIL ga 16.5. dmu 18-21, Matkahuolto Kuuputti, ságastallandilálašvuohta lágiduvvo ovttasbarggus Avvila skuvllaid davvisámegielat vánhemiiguin.

ANÁR du 17.5. dmu 18-21, Siidda Gámme, ságastallandilálašvuohta lágiduvvo ovttasbarggus SámiSosteriin ja Suoma boazosámit rs:in.

ANÁR be 18.5. dmu 18-21, Siidda Gámme, ságastallandilálašvuohta lágiduvvo ovttasbarggus Aanaar sämmiliih rs:in.

AVVIL lá 19.5. dmu 12-15, Ortodoksasearvegotti searvegoddedállu, ságastallandilálašvuohta lágiduvvo ovttasbarggus Njellim-Keväjärvi nuortalašráđiin.

AVVIL lá 19.5. dmu 16-19, Anára gieldda váldostivrasále, ságastallandilálašvuohta lágiduvvo ovttasbarggus Inarinmaan Lapinkyläyhdistys rs:in.

AVVIL so 20.5. dmu 18-21, Anára gieldda váldostivrasále, ságastallandilálašvuohta lágiduvvo ovttasbarggus Anarâšâh rs:in (Inarinsaamelaiset ry).

ÁŊŊEL vu 21.5. dmu 18-21, Vullebáiki, ságastallandilálašvuohta lágiduvvo ovttasbarggus Áŋŋela gililaččaiguin.

LEAMMI maŋ 22.5. dmu 17-20, Ahkun Tupa, ságastallandilálašvuohta lágiduvvo ovttasbarggus Anára Sámisearvi rs:in.

GUHTTUR ga 23.5. dmu 14:30 – 17, Inga-Saara Magga viesus

VUOHCCU ga 23.5. dmu 18-21, Mokta-viessu (Luuhkatie 10 e 9), ságastallandilálašvuohta lágiduvvo ovttasbarggus Vuohccu samiid searvi rs:in ja SámiSosteriin.

ROAVENJARGA du 24.5. dmu 17-19, MLL doaibmasadji (Pirkkakatu 2, MLL Perhetoimintakeskus), ságastallandilálašvuohta lágiduvvo ovttasbarggus Roavvenjárgga sámi searvi MII rs:in.

OULU vu/ma 4.6.2018 dmu 17– 20, Aleksinkulma, Iso Hansa ( Aleksanterinkatu 9), ovttasbargoguoibmin Oulu Samit searvi

TAMPERE maŋ/di 5.6.2018 dmu 18-20, Kulttuuritalo Laikku, kokoustila Syrjä (Keskustori 4), ságastallandilálašvuohta lágiduvvoo ovttasbarggus Sis-Suoma Sámisearvi Barbmu rs:in.

Dilálašvuođat lágiduvvojit maiddái Eanodagas ja Giehtaruohttasis, ja gávpogiin nugo Roavvenjárggas, Oulus, Tamperees, Jyväskyläs ja Helssegis. Ságastallandilálašvuođaid geavatlaš ordnemiin ja čoahkkái bovdemiin veahkkin leat guovlluin doaibmi searvvit sihke báikkálaš áššedovdit.

Stáhtaráđi kansliija ja vuoigatvuođaministeriija ovttasbarggus Sámedikkiin leat kártemin mo soabadanproseassa (komišuvdna) galggašii ollašuhttit ja makkárat ieš proseassas vástideaddji sorjjasmeahttun komišuvnna bargu ja čoahkkáibidju galggašedje leat. Komišuvnna, mii vejolaččat ásahuvvo, mandáhtas, namas dahje čoahkkáibijus eai leat dahkkon vel mearrádusat.

Suoma ráđđehus lea 19.10.2017 almmuhan, ahte álggaha sámeáššiid gieđahalli soabadanproseassa. Dan vuođđudeamis ráđđehus lea ságastallan ovttas Sámedikkiin. Álgga prosessii lea boahtán Sámedikkis.

Lassidieđut: sierraáššedovdi Anni-Kristiina Juuso, stáhtaráđi kansliija, t. +358 50 525 7704.

Midjiide šaddá ođđa Lappi – Johtinplána beaivemearit Sámeguovllus

OĐĐA LAPPI -johtinplána beaivemearit Sámeguovllus:

Soađegilis, Anáris, Ohcejogas ja Eanodagas ordnejuvvo beaivvi áigge sámegielat dilálašvuohta, gos lea maid dulka mielde. Báikki alde leat maiddái davvisámegielat bargit. Sáhtát ságastallat sámegielat bálvalusaid válmmaštallin sihke sámegielat prošeaktabargiiguin ja jearrat ođastusa birra.

Mán/Vuo 28.5. Soađegilis

Dis/Maŋ 29.5. Anáris

Gas 30.5. Ohcejogas

Duo 31.5. Eanodagas

Geahča dárkkit prográmma:

www.lapinmaakunta.fi/uusilappi ja gielddadálu almmuhantávvalis.

 

Midjiide šaddá ođđa Lappi

Ovtta Lappi šaddadeapmái dárbbašuvvo olles eanagoddi!

Eanagotte- ja sode-ođastus leat stuorra ođastusat, mii guoská maid du. Mii, ođastusa válmmaštallit, johtit miehtá Lappi miesse-geassemánus 2018 muitaleamen eanagotteođastusa birra ja guldaleamen du.

Boađe ságastallat minguin njunnálagaid ja váikkut dasa, mo ihtáža Lappi doaibmá! Vuolábealde gávnnat johtinbáikkiid ja beaivemeriid.

Dahkat seammás maid jearahallama, man ulbmilin lea čoaggit dieđuid Lappi eanagotti ássiin sosiála- ja dearvvašvuođabálvalan-vásáhusain, bálvalandárbbuin ja vuordámušain eanagotti bálvalanlohpádusa čállima várás. Sáhtát vástidit gažadeapmái maid interneahtas ja dat jorgaluvvo iešguđege sámegillii.

Mii lea eanagotte- ja sode-ođastus ja manin dat dahkkojuvvo?

Eanagotte- ja sode-ođastusain sihkkarastit, ahte buohkain lea boahttevuođas buori kvalitehta ja dásseveardásaš almmolaš bálvalusat juohke sajes riikkas.

Ođastus váikkuha buohkaid 180 000 lappilačča bálvalusaide.

Ođastus guoská sullii 9 000 olbmo barggu min eanangottis.

Boahttevaš eanagottis lea mearkkašahtti doaimmat

Eanagoddi vástida jagi 2020 rájes earret eará sosiála- ja dearvvašvuođafuolahusas, bargo- ja fitnodatbálvalusain, šibitdoavttirfuolahus, sadjásašvuođabálvalusain, eanagottelávvemis ja gádjundoaimmain.  Lassin eanangotti ordnenvástui sirdašuvvet ovdamearkan guovlluid ovdáneapmi, johtalusa plánen, birasdearvvašvuođafuolahus sihke eanangotti identitehta ja kultuvrra ovddideapmi.

Mo bálvalusat boahttevuođas buvttaduvvo?

Eanagoddi ordne bálvalusaid iešguđege vuogi mielde, ássiid dárbbuid mielde ja lahka olbmuid. Bálvalusat ođastuvvojit digitálalažžan dakkár áššiin, maiguin dat lea heivvolaš.

Ođđa doaibmanvuogit váldojuvvojit atnui ja ássiid váikkuhanvejolašvuođat bálvalusaid ovddideamis lassánit.

Váikkut!

Gii mearridan du bálvalusain? Geavat iežat jiena historjjálaš vuosttas eanagotteválggas!

Lassidieđut:

Plánjjeadji Sarita Kämäräinen, sarita.kamarainen(at)samediggi.fi/ +358 40 724 8224

www.lapinmaakunta.fi

Sámediggeláhkadoaibmagoddái evttohuvvo lasseáigi

Riekteministeriija ásahan sámediggeláhkadoaibmagotti doaibmabadji nogai cuoŋománu loahpas. Riekteministeriija lea goittotge ráđđádallama boađusin mearridan evttohit doaibmagotti doaibmabáji guhkideami borgemánu loahpa rádjai. Maiddái Sámedikki ságadoalli Tiina Sanila-Aikio evttoha seamma Sámedikki stivrii.

Lassedieđut:

Sámedikki ságadoalli Tiina Sanila-Aikio, 050 3001 780

Riekteministeriija Johanna Suurpää, 050 5209 320

Sámi njálmmálaš árbevieruid konfereansa 23.-24.5.2018 Sajosis #urbánbeaivvit

Konfereanssa guovddáš ulbmilin lea hábmet oktasaš vuođu sámi dáidda- ja kultursektorii, mii guoská sámi ealli njálmmálaš  árbevieru ovddasvástáduslaš ja ehtalaččat beaktilis geavaheami ja suodjaleami. Sámekultuvra galgá seailut ealli kultuvran nu ahte ahte nanusmahttit dan dahjege ovddidit ja dorvvastit sámi ealli njálmmálaš árbevieru, sámi dáidaga ja dáiddáriid boahttevuođa, giela ja árbevirolaš ealáhusaid. Dieđuid ja prográmma gávnnat dás.

Konfereansa lea rabas buohkaide ja konferenssa sáhttá čuovvut live stream bokte čujuhusas www.sogku.fi/live.

Oasálastinmáksu: 20,00 € (konfereansa- ja kulturprográmma, gáfet ja beaivemállásat). Kulturprográmma sisttisdoallá konsearttaid, čájáhusaid, čájálmasaid ja filmmaid.

Dáhpáhusat konfereanssa áigge

23.5.2018 dmu 12:10

  • Duodječájáhusaid rahpan – Ellos duodji!
  • Fia Kaddik: Oanehiskursa datneárppu batnimis

23.5.2018 dmu 17:45 – 19:30 Kulturprográmma

  • Niillas Holmberg 6. diktagirjji almmustahttin
  • Niillas Holmberg: Divttaid lohkan ja juoigan
  • Inga Wictoria Påve: Muitaleapmi govaid birra

24.5.2018 klo 20:00 – 21:00 Eahketprográmma, Film night with Skábmagovat

Seminárat

21.-22.5.2018

Sámi árbevirolaš musihka seminára  (bovdejuvvon oasálastiide)

Semináras suokkardallojit sámi árbevirolaš musihkkii laktáseaddji rievttit, oktavuođat ja geatnegasvuođat
Lágideaddji: Lappi universitehta ja Sámediggi

Oktavuohtaolmmoš: Piia Nuorgam,  RDM ja nákkosgirjedutki
piia.nuorgam(at)ulapland.fi /+358 44 3131 320

22.5.2018 dmu 12:00 – 17:30, Sajos

Mo suddjet duoji?  

Gulahallanseminára duoji suddjema birra (rabas buohkaide).
Lágideaddji: Sámiráđđi

Dieđiheapmi ja dieđut: www.saamicouncil.net

Ellen Berit Dalbakk, Duodjemearkka prošeaktajođiheaddji, kmr@saamicouncil.net/ +47 99796 947

Oktavuohtadieđut
Milja Guttorm, konfereansakoordináhtor/ leanadáiddar, Taike – Dáidaga ovddidanguovddáš; milja.guttorm@taike.fi+358 295 330 865

Riitta Orti-Berg; Suoma Sámediggi; riitta.orti-berg@samediggi.fi +358 40 840 0383
Susanne Idivuoma; Ruoŧa Sámediggi; susanne.idivuoma@sametinget.se +46 980 780 48
Silja Somby; Norgga Sámediggi; silja.somby@samediggi.no +47 78 48 42 30

Konfereanssa ordnejit davviriikalaš ovttasbargun; Suoma, Ruoŧa ja Norgga Sámedikkit, Sámi Dáiddárráđđi, Sámiráđđi, Sámi Duodji-Sameslöjdstiftelsen, ja Taike – Dáidaga ovddidanguovddáš

 

Govva: Kirsi Suomi

Johtti nuoraidlatnja čakčat Sámiid ruovttuguvlui

Vistebiillas nuoraidlatnjan rievdaduvvon Walkers-biila dahjege wauto bálvala sámiid ruovttuguovlu nuoraid boahtte čakčamánus juovlamánnui. Johtti nuoraidbargun háliidit olahit nuoraid, geat ásset viidát.

Wauto konseapta lea oktageardán: mannat dohko, gos nuorat leat ja buktit dorvvolaš rávesolbmuid sin asttuáigái. Fállun leat káfet, kortespealut ja rávesolbmuid háleštansearvi. Dárbbu mielde nuorra oažžu maiddái čiekŋalut rávvema iežas eallindillái.

Wauto oamasta ja dan doaimma koordinere Aseman Lapset ry. Sámiid ruovttuguovllus doaimmas fástida Sámedikki nuoraidráđđi ja dat ollašuhtto ovttasbarggus Eanodaga, Ohcejoga ja Anára gielddain. Doaimmas leat mielde maid sámegielat eaktodáhtolaččat.

Sámiid ruovttuguvlui boahtti Wauto lea okta nealljis Suomas johtti Wautos ja dan doaibmasadjin lea earenoamážit Lappi ja eará Davvi-Suopma. Ovdalgo dat boahtá Sápmái dat lea doaibman Gihttelis, Soađegilis ja Oulu guovllus.

– Sámedikki nuoraidráđis lea áigumuššan ovddidit Wauto bokte sámegielat nuoraidbarggu, daningo oktage gielda ii dan dal ordne. Lea dehálaš, ahte sámenuorain lea vejolašvuohta geavahit eatnigiela maid astoáiggis, muitala nuoraidráđi ságádoalli Risten Mustonen.

– Álgojagi vásáhusaid vuođul Wauto heive hui bures doaimmaige Lappi unna gilážiin ja guhkes mátkkiin. Wauton leat deaivvadan nu gieldaguovddážiid go unnit gilážiid nuoraid, main máŋgasat eai beasa muđuid mielde nuoraidbargui. Nuorat leat čielgasit návddašan Wautos ja dorvvolaš ollesolbmuid mieldeorrumis, muitala Wauto-koordináhtor Niilo Karjalinen Aseman Lapset searvvis.

Ovttasbargoguimmiide ja mediai ordnejuvvo fierpmádat- ja diehtojuohkindilálašvuođa duorastaga 24.5. dmu 14-16 Avvilis nuoraidlatnja Stönös. Báikki ala oččot boahtit buohkat, geat leat beroštuvvan doaimmas.

 

Lassedieđut:

Wauto doaimmas sámiid ruovttoguovllus:

Kaisa Tapiola-Länsman, Sámedikki nuoraidčálli, 050 382 5179

kaisa.tapiola-lansman@samediggi.fi

 

Wauto doaimmas almmolaččat:

Niilo Karjalainen, Wauto-doaibmavástideaddji, Aseman Lapset ry, tel. 040 575 9364

niilo.karjalainen@asemanlapset.fi

 

www.asemanlapset.fi

www.facebook.com/autowauto

 

Aseman Lapset rs. lea jagis 1990 vuođđuduvvon politihkalaččat ja oskkoldatlaččat čatnasmeahttun riikkaviidosaš searvi. Searvvi vuođđobargun lea ovddidit mánáid, nuoraid, bearrašiid ja olles servodaga burešbirgejumi sihke eastadit hilggohallama.

Walkers-doaibma lea Aseman Lapset searvvis ráhkaduvvon ovddalgihtii eastadan nuoraidbargu, mii vuođđuduvvá dorvvolaš, eaktodáhtolaš rávesolbmuid nuoraide addin áigái.

Wauto-doaibma lea oassi Aseman Lapset rs Walkers On Wheels-fitnu. Fitnu lea ruhtaduvvon RAY:s boahtti ruđain oahpahus- ja kulturministeriija sierradoarjjan. Davás boahtti biila lea searvvi goalmmát, ja dat lea skáhppojuvvon Suomen Lions-lihtu skeŋkenváriin, guokte eará biila fas Eevi ja Eemil Tannisa säätiö ruhtadeamin. Fitnus leat njeallje biilla sierra sajiin Suomas ja dárkkuhussan lea fitnet johtti nuoraidbarggu vuogi bissovažžan sierra guovlluide.

Sámi parlamentáralaš ráđi (SPR) ságajođihanvuorru sirdašuvvá Norggas Ruŧŧii 15.5.

Sámi parlamentáralaš ráđđi (SPR) doallá dievasčoahkkima 15.5.2018 Kárášjogas. Sámediggi Norggas lea jođihan Sámi parlamentáralaš ráđi 22.9.2016 rájes 15.5.2018 rádjai. Presideantadoaimma leaba Vibeke Larsen ja Aili Keskitalo juogadan. SPR ságajođihanvuorru lea 16.5.2018 rájes Ruoŧa Sámedikkis. Bargu bistá uhcimusat 16 mánu ovddasguvlui.  Áigodaga sáhttá guhkidit dárbbu mielde. Sámediggi Suomas joatká jođiheami dan maŋŋá.

Suoma Sámedikki ovddasteaddjit dievasčoahkkimis 15.5.2018:

Tiina Sanila-Aikio
Tuomas Aslak Juuso
Petra Magga-Vars (Aslak Holmbergga várrelahttu)
Pentti Pieski
Heikki Paltto
Neeta Jääskö

Sámi párlamentáralaš ráđi bargoortnega § 3 vuođul árvala oktasašstivra čuovvovaš áššelisttu:

SPR ášši 1/18 – Čoahkkima vuođđudeapmi (nammačuorvun, ođđa válljejuvvon lahtuid nannen, gohččuma ja áššelistu dohkkeheapmi, čoahkkinjođiheaddji válljen)

SPR ášši 2/18 – Stivrra doaibmadieđáhus

SPR ášši 3/18 – Sámi parlamentáralaš ráđi doaibmaplána

SPR ášši 4/18 – Sámi parlamentáralaš ráđi nuoraidpolitihkalaš ráđđi muitala iežaset doaimmas

SPR ášši 5/18 – Jiekŋameara ruovdegeaidnoprošeakta – SPR cealkámuš

SPR ášši 6/18 – Sámi parlamentáralaš ráđi čoahkkinplána 2018/2019

SPR ášši 7/18 – Sámi parlamentáralaš ráđi jođiheami molsun

SPR ášši 8/18 – Čoahkkima loahpaheapmi

Sámi parlamentáralaš ráđđi (SPR) lea Suoma, Norgga ja Ruoŧa Sámedikkiid gaskasaš parlamentáralaš ovttasbargoorgána. Ruošša sámeorganisašuvnnat oassálastet ovttasbargui dárkojeaddjin SPR:s.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi