Kielâpiervâltooimâ stivrimjuávhu čokkânij já ornijdij

/in , /by

Sämitigge lii povdim čuákán sämmilâš kulttuur- já kielâpiervâltooimâ läjijdeijee kieldâid já seervijd vuossâmuu kielâpiervâltooimâ stivrimjuávhu teivâdmân. Stivrimjuávkku lii tääl ornijdum, já savâstâllâm kielâpiervâltooimâ háástuin, luhostuumijn já äigikyevdilis ovdedemtáárbui pirrâ. Stivrimjuávhu saavâjođetteijen tuáimá Sämitige säämi kielârääđi saavâjođetteijee Neeta Jääskö. Stivrimjuávkku valjij koskâvuođâstis värisaavâjođetteijen Rauni Äärelä-Vihriälä.

– Čuákkimist čonâsijm ohtâsâš uulmán ovdediđ sämmilâš kulttuur- já kielâpiervâltooimâ já lääččiđ sämipárnái kielâiäláskitmán noonâ já torvolii pirrâs, muštâl stivrimjuávhu saavâjođetteijee Neeta Jääskö.

Sämitigge meridij juovlâmáánu 2017 olesčuákkimist stivrimjuávhu vuáđđudmist, já sämmilâš kulttuur- já kielâpiervâltooimâ läjijdeijee kieldah já seervih láá  nomâttâm toos jieijâs ovdâsteijeid. Stivrimjuávhu toimâpaje lii neelji ive, já tot tuáimá Sämitige kielârääđi vyelni rävvejeijee organin. Mieldi láá Sämitigge čuákánpovdejeijen, Ucjuuvâ kieldâ, Aanaar kieldâ já Anarâškielâ servi, Suáđikylá kieldâ, Iänuduv kieldâ, Oulu já Ruávinjaargâ kavpugeh já City-Sámit rs.

Lasetiäđuh:

Má. kielâpiervâlstivrejeijee Annika Pasanen, puh. 010 839 3119, annika.pasanen(at)samediggi.fi

Kesikumikampanja kondomeh meid kuulmâ sämikielân

/in /by

Sämitige nuorâirääđi teeman lii taan ive seksuaaltiervâsvuotâääših. Teeman kulen nuorâi kooskâst tubdum Kesikumikampanja kondomeh jurgâluvvojeh kuulmâ Suomâst sarnum sämikielân. Meid kampanjan kullee Rähistâllâmmiäštár -seksuaaltiervâsvuotâkoijâdâllâm puáhtá čođâldittiđ sämikielân.

Kesikumikampanja maainâst nuoráid kondom kevttim tergâdvuođâst. Kampanja muštoot, ete puohâin kolgâččii leđe siämmááh seksuaalvuoigâdvuođah já vuolgâsajeh kevttiđ estim sehe finniđ tiäđu torvolii estimist.

Sämikielâliih Kesikumih láá finniimist nuorâirääđi ornim tábáhtusâin sehe algâalmugij muusiktábáhtus Ijâttes Iijâst.

Kampanjast láá mieldi YleX, Suomâ Ruopsis Ristâ, Aalmuglitto, Puurâsseervih já Suáldátpäikkilitto. Sosiaal- já tiervâsvuotâministeriö tuárju kampanja. Kampanja ääigi juáhhojeh 220 000 kesikumih sierâ tábáhtusâin.

Kove: Ive 2017 kesikumikampanja, Aalmuglitto.

Lasetiäđuh:

Kaisa Tapiola-Länsman, 050 382 5179, kaisa.tapiola-lansman@samediggi.fi

Sari Hälinen, sari.halinen@vaestoliitto.fi

 

Meriáigásii proojeektpargee Säämi muusikkuávdážân

/in /by

Pargo álgá 4.6 já pištá 31.8.2018 räi. Proojeektpargee pargoid kuleh el. säämi muusikkuávdáá išedeijen toimâm sehe Ijâttes ijjâ- algâaalmugij muusikfestivaal išepyevtitteijee pargoh. Pargo miänástuvvee hoittám išedeh hiäivulâš škovlim, sämikielâ táiđu sehe kelijdeijee eŋgâlâskielâ táiđu. Proojeektpargee pälkki miärášuvá Suomâ sämitige pálkkááttemvuáháduv vátávâšvuođâtääsi VII/I mield (vuáđupälkki 1 755,62 eurod/mp). Vuáđupäälhi lasseen máksojeh 24 % sämikuávlu lase já pargohárjánem mield miärášuvvee hárjánemlaseh. Proojeektpargee toimâsaje lii säämi kulttuurkuávdáš Sajosist.

Ucâmušâid lahtosijdiskuin kalga toimâttiđ sämitige čäällimkoodán 11.5.2018 tme 16.00 räi čujottâsân Sajos, 99870 Aanaar. Lasetiäđuid pargoost addel säämi muusikkuávdáá vuávájeijee Oula Guttorm p. 050 574 2765, oula.guttorm(at)samediggi.fi. Sämitige tooimân puáhtá uápásmuđ nettičujottâsâst www.samediggi.fi já Ijâttes ijjâ- algâaalmugij muusiktábáhtusân čujottâsâst: www.ijahisidja.fi

Anarist 17.4.2018 Sämitigge

Puáđi savâstâllâđ äigikyevdilis aašijn Vuáčun 23.4.

/in , /by

Sämitige stivrâ uárnee čuákkimis ohtâvuođâst savâstâllâmtilálâšvuođâ Vuáču škoovlâst vuossaargâ 23.4.2018 tme 18-20. Tilálâšvuođâ tárguttâs lii teivâđ kuávlu sämmilijguin já adeliđ máhđulâšvuođâ savâstâllâđ äigikyevdilis aašijn.

Sämitige toimâvuávám-budjet 2018 mield stiivrâ čuákkimeh uárnejuvvojeh máhđulâšvuođâi mield Ucjuuvâst, Vuáčust, Helsigist, Iänuduv Käresavonist já Anarist. Čuákkimij ohtâvuođâst uárnejuvvoo päikkikoddeest savâstâllâmtilálâšvuotâ, mast stivrâ tiäivá kuávlu sämmilijguin, muštâl uánihávt stivrâpaje tooimâin já addel epivirgálub máhđulâšvuođâ savâstâllâđ äigikyevdilis aašijn.

– Mij ornijm vuosmuš savâstâllâmtilálâšvuođâ uáivikaavpugkuávlu sämmiláid kuovâmáánust Helsigist. Mii ulmen lii, ete savâstâllâmtilálâšvuođah nanodeh sämisiärváduv já Sämitige koskâsii savâstâllâm ohtsij aašij ovdedem pyerrin, Sämitige saavâjođetteijee Tiina Sanila-Aikio tiädut.

Čuávuvâš savâstâllâmtilálásvuotâ uárnejuvvoo Vuáču škoovlâst 23.4.2018 tme 18-20.  

– Mun tuáivuttâm Vuáču kuávlu sämmilijd tiervâpuáttim vaaljâpaje nube savâstâllâmtilálâšvuotân. Puáttee tilálâšvuođâid mij almottep talle ko toh láá äigikyevdiliih, Sanila-Aikio looppât.

Lasetiäđuid:

Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi

 

Säminuorâi taaiđâtábáhtus tubettem-kišto vuoitij Elle-Máárjá Siltala Avelist já muusikkišto Oarjánieiddat Iänuduvvâst

/in , , /by
Luuvâ lase

Säminuorâi taaiđâtábáhtus aalgij – mieldi paijeel 400 uásálisted, 10 muusikjuávkkud já 35 tube-videod

/in , , /by

Säminuorâi taaiđâtábáhtus lii onne 12.4.2018 Anarist. Šlaajah láá muusik sehe tubettem. Ubâ tábáhtus teema lii Nuorâ Kulttuur -teema mield “Jieččân jienâ”. Mikkelist 25.-27.5.2018 uárnejuvvoo Nuorâ Kulttuur tábáhtus SOUNDS, moos Anarist väljejuvvojen säminuorâi ovdâsteijeeh.

Tábáhtusân lii almottâttâm mieldi paijeel 400 uásálisted, 10 muusikjuávkkud já 35 tube-videod. Uásálisteeh puátih sämikuávlu lassen ain Tampere rääjist. Tubettem-kišto tuámárin tuáimih tubetteijee Mansikka (Maiju Voutilainen), Aleksi Ahlakorpi já Xia Torikka. Muusik-kišto tuámarin tuáimih Niillas Holmberg, Anna Lumikivi já Heli Aikio.

Taaiđâtábáhtus njuolgâ vuolgâttâs puáhtá čuávvuđ čujottâsâst: sogku.fi/live  

Taaiđâtábáhtus puáhtá čuávvuđ meid Instagram-kovepalvâlusâst, tubdâlduvah láá #sndd18 já #ylesndd18.  

Keejâ peeivi ohjelm: https://www.samediggi.fi/2018/04/11/saminuorai-taaidatabahtus-12-4-2018-ohjelm/?lang=an

Suotâs taaiđâtábáhtus peeivi puoh uásálisteid!  

Čuávu äigikyevdilijd aašijd Sämitige some-kanavijn

/in /by

Sämitige virgálijn Facebook– já Twitter-siijđoin tun peesah čuávvuđ Sämitige äigikyevdilijd tábáhtusâid, tooimâ, uáivilijd sehe haavâid.

– Sosiaallii media siijđoi tárguttâs lii ovdediđ tiäđufinnim Sämitiggeest. Mij halijdep pyehtiđ Sämitige tooimâ aldeláá sämmilij aargâ, Sämitige saavâjođetteijee Tiina Sanila-Aikio iätá.

Meid Sämitige uđđâ nettisiijđoh láá almostittum já sijđoid pyevtittuvvoo ubâ paje uđđâ siskáldâs. – Siijđoh peividuvvojeh ohtânmaanoost vâi mij pastep palvâliđ pyerebeht siijđoi kevtteid já finnip tiäđui kavnâm njyebžilubbon, juátká Sämitige má. viestâdemčällee Johanna Alatorvinen.

Sämitige viestâdemstrategia

Sämitigge tuhhiittij čuákkimstis 19.6.2017 viestâdemstrategia. Strategia ulmen lii stivriđ já ovdediđ Sämitige viestâdem. Viestâdem uđđâ vyevih tarbâšuvvojeh, ko suulân 65 % Suomâ sämmilijn ääsih sämikuávlu ulguubeln. Lasseen viestâdem ovdedem lii velttidmettum Sämitige tooimân já toos, ete sämikoččâmušah iteh olmâ äššiohtâvuođâin.

Viestâdemstrategia miäldásii ávus já pehtilis viestâdem prinsiipin lii ovdediđ almos sämikoččâmuššáid kyeskee tiäđu, šiev haldâttuv já sämmilij máhđulâšvuođâ vaiguttiđ sijjân kyeskee miärádâstohâmân. Sämitigge kiävttá viestâdmist ärbivuáválij kanavij lasseen meid sosiaallii media kanavijd aktiivlávt.

Sämitigge lii čujottâm ruuđâid  sehe luáttámušulmuid já pargeid čuosâttum viestâdemškovlim orniimân ive 2018 budjetist. Lasseen Sämitigge lii pálkkááttâm meriáigásii viestâdemčällee. Viestâdemčällee algâttij pargostis njuhčâmáánust 2018 já suu pargon lii vuáváđ, čuávvuđ, olášuttiđ já koordinistiđ Sämitige viestâdem.

www.facebook.com/saamelaiskarajat/

www.twitter.com/Saamelaiskaraja

Lasetiäđuh:

Sämitige viestâdemčällee Johanna Alatorvinen puh. 040 553 493, johanna.alatorvinen(at)samediggi.fi

Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi

Lahtoseh: 

Sämitige vaaljâlävdikodde almoot uuccâmnáál VAALJÂLÄVDIKODE ČÄLLEE meriáigásii pargo

/in , /by

Sämitige vaaljâlävdikodde almoot uuccâmnáál

VAALJÂLÄVDIKODE ČÄLLEE

meriáigásii pargo ááigán 1.6.2018-31.12.2019. Vaaljâlävdikode toimâsaje lii sämikulttuurkuávdáš Sajosist, Anarist. Čällee pargon lii vaaljâlävdikode vuálásâžžân valmâštâllâđ já olášuttiđ vaaljâid sehe toimâđ vaaljâlävdikode oovdânpyehten já čällen čuákkimijn.

Siäđusvuáđustâslâš tohálâšvuotâvátámâššân lii pargo vaattâm škovlim já sämikielâ táiđu (asâttâs 1727/95). Pargo miänástuvvee hoittám iššeed hiäivulâš ollâškovlâtođhos sehe haaldâtlij pargoi já sämmiláid kyeskee vuoigâdvuođâlij aašij tubdâm. Pälkki meriduvvoo sämitige pálkkááttemvuáháduv vátávâšvuotâtääsi III/I-III – IV/II mield (vuáđupälkki 3064,92-2596,52 eurod /mp).

Ucâmušâid lahtosijdiskuin kalga toimâttiđ sämitige čäällimkoodán 9.5.2018 tme 15:00 räi čujottâsân Saamelaiskäräjien vaalilautakunta, Sajos, 99870 Inari. Lasetiäđuid pargoost addel vaaljâlävdikode saavâjođetteijee Janne Näkkäläjärvi, šleđgâpostâ: janne.nakkalajarvi(at)gmail.com. Sämitige tooimân puáhtá uápásmuđ nettičujottâsâst www.samediggi.fi

Anarist 9.4.2018, Sämitige vaaljâlävdikodde