Lah-uv perustum kesipargoin Sämitiggeest škovlim- já oppâmateriaaltoimâttuvâst?
Sämitigge pálkkáát keessiv 2018 seesoongpargeid aanaar-, nuortâ- já orjâlâškielâ materiaalpargoid. Jis jieh lah ovdil porgâm kesipargen Sämitiggeest, puávtáh uuccâđ kesipargo meiddei hárjuttelleen. Hárjuttellee pargo iähtun lii tot, et uážžu jieijâs oppâlájádâsâst hárjuttâllâmtorjuu.
Jis lah perustum porgâđ kesipargoin Sämitiggeest, te vuolgât riijjâ uuccâm 15.2.2018 räi čujottâssân info@samediggi.fi. Lasetiäđuh: hannu.kangasniemi(at)samediggi.fi .
Uuccâm puáhtá vuolgâttiđ meiddei poostâ mield čujottâssân:
Sämitigge
Škovlim- já oppâmateriaaltoimâttâh
Sajos
99870 Aanaar
Tubetteijee Mansikkka puátá škovliđ säminuorâid
Tubetteijee Mansikkka puátá Anarân škovliđ säminuorâid já uásálist meid Säminuorâi taaiđâtábáhtusân, mii uárnejuvvoo cuáŋuimáánu 12. peeivi Vuáčust. Taaiđâtábáhtus tubettemteeman lohtâseijee škovlim uárnejuvvoo tuorâstuv 15. 2. tme 13.00 – 14.00 Saijoos auditoriost. Tilálâšvuotâ lii ávus puohháid, kiäh láá perustum.
Mansikkka muštâl suu syergist já movtijdit nuorâid eelliđ ruokkâdávt já ávusmieláin. Oovdânpyehtim maŋa sun västid kuldâleijei koččâmuššáid.
Tábáhtus vuolgâttuvvoo njuolgist neeti peht já vyerkkejuvvoo škovlimkiävtu várás. Vuolgâttâs puáhtá čuávvuđ čujottâsâst: http://sogku.fi/live . Vuolgâttâs ääigi palvâlusâst tuáimá meid chat, mon peht puáhtá koijâdiđ Mansikkast suu oovdânpyehtim ääigi.
Mansikkka (Maiju Voutilainen)
tuáimá Säminuorâi taaiđâtábáhtus tubettem suojâleijen sehe videokišto tuámárin. Mansikkka lii tääl ohtâ pivnohumos tubetteijee Suomâst. Sun lii fijnâ stiijlâ lifestyle-vaikutteijee, kote räähist taiđuu já muoti já moovtásk sierâlágán stijlâkeččâlmijn. Maiju addel jieijâs jienâ kulluđ. Taam mield sun lii-uv finnim maaŋgâid tubdâstâsâid, ko lii kieđâvuššâm ruokkâdávt meid vaigâdub aašijd. Ášálij sahâvuárui lasseen Maiju máttá meid makkuuttiđ suu jieijâs lieggâ vuovijn.
Tábáhtusâst adeluvvojeh meid lasetiäđuh, moh lahtâseh Säminuorâi taaiđâtábáhtus tubettemteeman.
Škovlimtábáhtus olášutmist västid Säämi máttááttâskuávdáá Arktâsâš pedagogiik -haahâ oovtâstpargoost Sämitiggijn. Lasetiäđuh škovlimtábáhtusâst: kalle.sulkamo(at)sogsakk.fi
Säminuorâi taaidâtábáhtus 2018 šlaajah láá muusik já “tubettem”
Säminuorâi taiđâtábáhtus lii Anarist 12.4.2018 já šlaajah láá muusik sehe tubettem. Ubâ tábáhtus teema lii Nuorâ Kulttuur -teema mield “Jieččân jienâ”.
Mikkelist 25.-27.5.2018 uárnejuvvoo Nuorâ Kulttuur tábáhtus SOUNDS, moos Anarist väljejuvvojeh säminuorâi ovdâsteijeeh.
Tubettem olášutmân uásálist meid SMK Virtualškoovlâ Arktisâš pedagogik -haahâ. Tot uárnee ääšist ohtâsii káidusškovlim máttáátteijei já uáppei. Škovliimist lii fáárust tobdos tubetteijee, kote addel ravvuid já oonâid uáppei jieijâs videoid. Tärkkilub tiäđuh vuolgâttuvvojeh ive aalgâst.
Lasetiäđuh täst.
Sämitigge almoot uuccâmnáál oppâmateriaalvuávájeijee toimâ
Sämitigge almoot uuccâmnáál oppâmateriaalvuávájeijee meriáigásâš toimâ. Oppâmateriaalvuávájeijee pargoid kuleh ei. oppâmateriaalprojektij jođettem-, valmâštâllâm- já toimâttempargoh, uásálistem ihásii budjet já oppâmateriaalprojektij valmâštâlmân já olášutmân.
Sämitigge almoot uuccâmnáál
OPPÂMATERIAALVUÁVÁJEIJEE MERIÁIGÁSŠ TOIMÂ
Pargo álgá 1.3.2018 teikâ sopâmuš mield já pištá 31.12.2018 räi. Oppâmateriaalvuávájeijee pargosaje lii Sajosist, Anarist. Oppâmateriaalvuávájeijee pargoid kuleh ei. oppâmateriaalprojektij jođettem-, valmâštâllâm- já toimâttempargoh, uásálistem ihásii budjet já oppâmateriaalprojektij valmâštâlmân já olášutmân.
Asâttâs miäldásâš tohálâšvuotâiähtun lii pargo vaattâm škovlim já lasseen váttoo sämikielâ táiđu (sämitiggeest adelum asâttâs 1727/1995). Pargo miänástuvvee hoittám váátá šiev sämikielâ kirjálii já njálmálii mättim, máttááttâssyergi tubdâm já kiärgusvuođâid ovdediđ digitaallij materiaalij pyevtittem. Pargo tahhoo iänááš šleđgâlij toimâttâhohjelmijguin, te tai šiev haldâšem lii iähtun pargoi hoittáámist.
Pälkki meriduvvoo Sämitige pálkkááttemvuáháduv vátávâšvuotâtääsi I já ton IV luoka mield (vuáđupälkki 2 466,87 eurod/mp). Vuáđupäälhi lasseen máksojeh 24 % sämikuávlu lase já pargohárjánem mield miärášuvvee hárjánemlaseh. Ucâmušâid škovlim- já pargotuođâštusâiguin kalga toimâttiđ Sämitige čäällimkoodán 15.2.2018 tme 16.00 räi čujottâsân Sajos, 99870 Aanaar.
Lasetiäđuid tooimâst adelává škovlimčällee Ulla Aikio-Puoskari 010 839 3112 já oppâmateriaalčällee Hannu Kangasniemi, puh 050 3641 385. Sämitige tooimân puáhtá uápásmuđ internetčujottâsâst www.samediggi.fi.
Anarist 04.01.2018 Sämitigge/ škovlim- já oppâmateriaallävdikodde
Sämitige puhelinnummeer lii kiddâ 27.-29.12.2017.
Sämitige puhelinnummeer lii kiddâ 27.-29.12.2017.
Saamelaiskäräjien puhelinvaihde on kiinni 27.-29.12.2017.
Sámedikki telefonguovddáš lea gitta 27.-29.12.2017.
Sää’mtee’gg te’lfonkõõskõs lij kidd 27.-29.12.2017.
Sämitigge tuáivut luho 100-ihásii Suomân
Sämitigge tuáivut luho 100-ihásii Suomân. Pyeri jiečânâsvuođâpeivi!
Saamelaiskäräjät onnittelee 100-vuotiasta Suomea. Hyvää itsenäisyyspäivää!
Sääʹmteʹǧǧ tuäivat leekk 100-ekksaž Lääʹddjânnma. Šiõǥǥ jiõččnažvuõttpeeiʹv!
Sámediggi sávvá lihku 100-jahkásaš Supmii. Buori iehčanasvuođabeaivvi!
Sämitiggelaavâ uđâsmittem vuálgá joton
Riehtiministeriö lii asâttâm toimâkode, mon toimân lii valmâštâllâđ sämitiggeest adelum laavâ uđâsmittem. Toimâkode pargo vuáđuduvá vuáđuvuoigâdvuođáid, eres vuáđulaavâ asâttem kenigâsvuođáid já Suomâ aalmugijkoskâsáid olmoošvuoigâdvuotâkenigâsvuođáid sehe OA algâaalmugij vuoigâdvuođâi julgáštâsân.
Toimâkode saavâjođetteijen tuáimá alemuu haldâttâhrievti presidenttin iivij 1993–2012 toimâm riehtitiettuu tuáhtár Pekka Hallberg.
Lasseen asâttuvvoo parlamentaarlâš čuávvumjuávkku tuárjuđ laavâ nubástusâi valmâštâllâm. Čuávvumjuávhu toimân lii sirdeđ ovdâskodejuávhoid tiäđu laavâ valmâštâlmist, ovdediđ savâstâllâm sehe čuávvuđ já árvuštâllâđ toimâkode pargo.
Toimâkode ulmen lii finniđ oovtâmielâlii iävtuttâsis valmâšin cuáŋuimáánu 2018 loopâ räi. Tárguttâs lii, ete lahânubástusah šaddeh vuáimán tuárvi ääigild ovdil čuávuvijd, ive 2019 sämitiggevaaljâid.
Lasetiäđuh:
Hovdâ Johanna Suurpää, Riehtiministeriö, puh. 02951 5053, ovdânommâ.suhânommâ@om.fi
Ráđádâllee virgeolmooš Yrsa Nyman, Riehtiministeriö, puh. 02951 50293, ovdânommâ.suhânommâ@om.fi
Saavâjođetteijee Tiina Sanila-Aikio, Sämitigge, puh. 050 300 1780, ovdânommâ.suhânommâ@samediggi.fi
Lasetiäđuh haavâst: http://oikeusministerio.fi/hanke?tunnus=OM077:00/2017
Iävtut jeessân sämitige nuorâirááđán 2018-2019
| Sämitige ohtâvuođâst tuáimá nuorâirääđi. Rääđi váldupargon lii ovdediđ säminuorâi kielâlâš já kulttuurlâš vuoi-gâdvuođâid sehe nanodiđ säminuorâi identiteet nuorâipargo pehti. Lasseen rääđi šadda valmâštâllâđ taid sämitige iävtuttâsâid, alguid, ciälkkámušâid já eres peleväldimijd, moh kyeskih säminuorâid.Rááđán väljejuvvojeh vittâ eidusâš jeessân sehe sijjân juáhážân persovnliih värijesâneh. Jesâneh kalgeh leđe 18–28-ihásiih aktiivliih säminuorah. Lasseen väljejuvvojeh vittâ pissoo äššitobdee. Äššitobdeejesâneh kalgeh leđe valjiidijn 15–17-ihásiih. Rääđi jesâneh iä taarbâš leđe tige jesâneh, iäge sij taarbâš aassâđ sämikuávlust. Meid sämikielâ eeni-kielân ij lah velttidmettum, mut sämikielâ táiđu lii tuáivuttettee. Nuorârääđi valjiimist šadda válduđ vuotân, et jesâneh ovdâsteh ubâ sämikuávlu sehe jieškote-uv kielâjuávhuid nuuvt pyereest ko máhđulâš.
Nuorâirääđi taha sämitige stiivrân iävtuttâs jesânijn, kiäh väljejuvvojeh, já lopâlii miärádâs taha sämitige čuákkim. Pyehtivetteđ iävtuttiđ jieijâd mielâst nuorâirááđán hiäivulijd 18–28-ihásijd aktiivlâš säminuorâid já äššitobdeejesânin hiäivulijd 15–17- ihásijd nuorâid. Iävtuttâsâid vuáđustâsâidiskuin puáhtá vuolgâttiđ šleđgâpostáin kaisa.tapiola-lansman(at)samediggi tâi poostâ pehti Nuorâirááđi, PB 41, 99981 Utsjoki dehe Nuorâirááđi, Sajos, 99870 Inari 13.11.2017 räi. Lasetiäđuid uážžuvetteđ nuuvt haalijddijn nuorâičällest, +358 50 382 51 79. |
Sämitige ovdâsteijeeh sämitiggelaavâ nubásmittem valmâštellee toimâkoddeest já parlamentaarlii čuávvumjuávhust
Sämitige stivrâ nomâttij ovdâsteijeid sämitiggelaavâ nubásmittem valmâštellee toimâkoodán sehe parlamentaarlâš čuávvumjuávkun čuákkimistis 9.10.2017.
Stivrâ nomâttij sämitiggelaavâ nubásmittem valmâštellee toimâkoodán Tiina Sanila-Aikio (väriovdâsteijee Petra Magga-Vars), Tuomas Aslak Juuso (väriovdâsteijee Pentti Pieski) já Kalle Varis (väriovdâsteijee Pekka Sammallahti) sehe äššitobdee-oovdânpyehten Oula Antti Labba. Stivrâ nomâttiđ parlamentaarlâš čuávvumjuávkun äššitobdeejesânin Pentti Pieski já värijesânin Heikki Palto.
Riehtiministeriö já Sämitigge ráđádâllii sämitiggelaavâ uđâsmitmist riehtiminister Antti Häkkäs joođeetmáin 6.9.2017. Ráđádâlmij puáđusin soppii sämitiggelaavâ uđâsmittem jotonpiejâmist vuáđuvuoigâdvuođâi já Suomâ aalmugijkoskâsij olmoošvuoigâdvuođâi raamij siste.
Ko 6.9.2017 tollum sämitiggelaavâ 9 § miäldásii ráđádâllâm tärhistum pevdikirje ij lamaš stiivrâ čuákkimist uáinimnáál, te stivrâ meridij lasseen sämitiggelaavâ uđâsmittem algâttem iähtun, ete ráđádâllâm pevdikirje kalga leđe tärhistum västidiđ ráđádâllâm, vâi sämitiggelaavâ uđâsmittem puáhtá algâttiđ, Sämitige saavâjođetteijee Tiina Sanila-Aikio tiädut.
Riehtiministeriö ulmen lii asâttiđ toimâkodde valmâštâllâđ tárbulijd nubástusâid sämitiggeest adelum laahân (974/1995) sehe asâttiđ haahân kulen čuávvumjuávhu. Uđâsmittempargo algâttuvvoo nuuvt jotelávt ko máhđulâš. Toimâkoddeest lii saavâjođetteijee, jeessân já värijeessân jieškote-uv haldâttâspiäláduvvâst sehe kulmâ jeessân já värijeessân Sämitiggeest.
Čuávvumjuávhu pargon lii tuárjuđ sämitiggeest adelum laavâ nubástusâi valmâštâllâm sehe sirdeđ ovdâskoddejuávhoid olmâáigásii tiäđu laavâ valmâštâlmist sehe ovdediđ äššitobdee já olesváldálii savâstâllâm fáádást. Čuávvumjuávkku kalga čuávvuđ já árvuštâllâđ sämitiggeest adelum laavâ nubástus valmâštâllâm várás asâttum toimâkode pargo. Čuávvumjuávhust lii jeessân já värijeessân jieškote-uv ovdâskoddejuávhust sehe äššitobdeejeessân já värijeessân Sämitiggeest.
Lasetiäđuid addel Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi