Sámiid árbevirolaš ealáhusaid dálá dilli Suomas – Biodiversitehtasoahpamuša čuovvunindikáhtoriid duogášdieđut –raporta gárvvis

/in /by

Sámedikki ollášuhttán prošeavtta ulbmilin lei čielggadit sámiid árbevirolaš ealáhusaid dili ja ovdáneami. Prošeavttas háliduvvui oažžut diehtu árbevirolaš sámeealáhusain bargiid mearis ruovttuguovllus Suomas sihke diehtu ruovttuguovllus orru sámiid ealáhusráhkadusas. Prošeakta doarju Suoma riikkaidgaskasaš geatnegasvuođaid ollašuhttima biodiversitehtasoahpamuša oasil ja lasiha dálá dieđu sámekultuvrra ja sámeealáhusaid dilis Suomas. Proševtta bohtosiid sáhttá atnit ávkin go ovddiduvvo sámeealáhusaid guoski láhkaásaheapmi ja hálddahus.

Prošeavtta álggus kártejuvvojedje jearahallanskoviin árbevirolaš ealáhusain ožžojuvvon dietnasat, daidda geavahuvvon áigi, ealáhusaid mearkkášumit vástideaddjiide sihke boahtteáiggioidnosat. Vástadusaid analyseremis deaddu lei sámiid ruovttuguovllu bohtosiid guorahallamis.

Prošeavtta boađusin šattai raporta, masa leat čohkkejuvvon prošeavtta ovdáneapmi, metodat, materiála ja bohtosat. Bohtosiin čielggai ee. ahte árbevirolaš ealáhusain ožžojuvvui mearkkašahtti dienas dušše boazodoalu oasil. Árbevirolaš ealáhusaid mearkkašupmi oassin sámiid eallinvuogi ja kultuvrra bođii ovdan čielgasit ja sámiid iešmearridanvuoigatvuohta árbevirolaš ealáhusain atnojuvvui boahttevuođas dehalažžan.

Prošeavtta ollašuhttin ja oasseruhtadeaddjin lei Sámediggi ja váldoruhtadeaddjin lei eana- ja meahccedoalloministeriija.

Prošeavtta loahpparaportta sáhttá lohkat dáppe.

Lassidieđuid prošeavttas ja raporttas addá Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Dánssa ja sámeduoji ávvudoalut johtui Eanodagas

/in /by

Ivdnás árbevirolaš sámeduojit, luhkát, ođđa ivnniid ja heivehusaid ožžon Sámi gávttit. Logit ja logit bohtosat luovvi barggus, ođđa sámi design. Bohcco čoarvvit, rissit, duhppejuvvon lottit ja bohccot. Ođđalágan diŋggat muoras, dávttiin ja kággásiin. Sámi musihkka ja dánsunčájalmasat ovdaoahpahusahkásaččaid rájes gitta logahatnuoraide. Dát visot dahket Sámenuoraid dáiddadáhpáhusa odne 4.5. Heahtá skuvlaguovddážis.

Dáhpáhussále dievai maŋimuš nurkki mielde gaskabeai áigge go badjel 400 sámemáná ja -nuora ovttas fuolaheaddjiiguin ja oahpaheaddjiiguin devde aiddo divvojuvvon lihkadansále. Dáhpáhussii bohte linjábiillaiguin maid Sámediggi lei ordnen. Linjábiillat fievrridedje oassálastiit Deanuleagi mielde, duoddariid badjel, dievaid rastá, buot aibmoguovlluin Ohcejoga rájes gitta Roavvenjárgii.
Heahtá skuvlaguovddážis ordnejuvvon Sámenuoraid dáiddadáhpáhusa prográmmas leat dánsunčájáhusat, sámi dujiid čájáhus ja eahketbeaikonsearta. Konsearttas loaiddastit Eanodaga ja Čeavetjávrri skuvlalaččat ja – diehttelas- sámenuoraid sruorra násttit Amoc ja Ailu Valle.
Dáhpáhussii oassálastet oktiibuot 14 dánsunčájalmasa, main leat oktiibuot sullii 80 dánsejeaddji. Nuoraid ráhkadan duojit leat oaidnimis dáhpahusbáikái ceggejuvvon čájáhusas.
Sámenuoraid dáiddadáhpáhusat leat ordnejuvvon 1970-logu rájes. Dáhpáhus lea sámegillii ja dan ordneba ovttasbarggus Heahtá skuvla ja Sámediggi.
Sámenuoraid dáiddadáhpáhusas válljejuvvojit sámenuoraid ovddasteaddjit riikkaviidosaš MOVES-dáhpáhussii, mii ordnejuvvo Roavvenjárggas 26.-28.5.2017. Buoremus dánsunprográmmat bálkášuvvojit stipeanddaiguin. Stipeanddat juhkkojuvvojit maiddái čeahpimus sámedujiid duddjon nuoraide. Dáhpáhusa lea vejolaš čuovvut Instagramis: #sndd17 .

Lisätietoja:

Xia Torikka Tuottaja
040 641 1533
Ulla Aikio-Puoskari
Koulutus- ja oppimateriaalitoimiston päällikkö
040 767 3101 tai 010 839 3112