Sämikielâi uáppeemereh lasanii moonnâm luuhâmive 2015-2016 ohtsis 55 uáppee verd. Anarâškielâst uáppeemeeri lasanij 11, nuorttâlâškielâst 7 já orjâlâškielâst 39. Sämmilij päikkikuávlu kieldâin uáppeemeeri lasanij ohtsis 34 já päikkikuávlu ulguubeln 21. Uáppeemeeri lasanij vuáđumáttááttâsâst ohtsis 65 uáppee verd. Luvâttuvâst sämikielâi uáppeemeeri kiäppánij luvvijn.

Sämikielâlâš máttááttâs finnejii sämmilij päikkikuávlust ohtsis 199 vuáđumáttááttâs uápped, sist 170 orjâlâškielân já 29 anarâškielân. Orjâlâškielân lâi máttááttâs jyehi neelji sämmilij päikkikuávlu kieldâst. Anarâškielâlâš máttááttâs uáppeeh lijjii puohah Aanaar kieldâst. Sämikielâlâš máttááttâs uáppeemeeri lasanij 14 uáppee verd oovdeb ivveest. Säämi ubâlâš uáppeemeeri lasanij Iänuduv kieldâst kuovttijn, Aanaar kieldâst kuuđáin, Suáđikylá kieldâst 20 já Ucjuv kieldâst kuuđáin uáppein.

Sämikielâi aamnâsmáttááttâs finnejii ohtsis 459 uápped, sist 368 finnejii máttááttâs sämmilij päikkikuávlu kieldâin já 93 päikkikuávlu kieldâi ulguubeln. Ohtsis 61 vuáđumáttááttâs já luvâttuv uápped finnejii päikkikuávlu kieldâi ulguubeln sämikielâ aldâmáttááttâs já 32 káidusmáttááttâs.

Päikkikuávlu kieldâi ulguubeln lii máhđulâš finniđ kyehti tiijme ohhoost vuáđumáttááttâs tievâsmittee kielâmáttááttâs. Uáppein, kiäh finnejii máttááttâs päikkikuávlu kieldâi ulguupiälásijn luvâttuvâin, lâi máhđulâš čođâldittiđ táválijd sämikielâlâš kuursâid eenikielâ já kirjálâšvuotâ sehe vieres kielâ oppâamnâsijn.

Päikkikuávlu kieldâi ulguubeln sämikielâ uáppeeh lijjii Espoost, Kiemâst, Helsigist, Janakkalast, Joensuust, Jyväskyläst, Oulust já Oulu kuávlust, Ruávinjaargâst, Sallast, Sievist, Tamperest, Tuárnusist já Vantaast.

Keejâ säämi oles máttááttâsstatistik 2015-2016 täst.