Sää´mte´ǧǧ va´ll’jad kõskkstes vä´lddveârlaž saaǥǥjåå´đteei vaalpââiääi´jas. Saaǥǥjåå´đteei tuâjjan lij jåå´đted sää´mtee´ǧǧ politiikklaž tuåimmjumuužž da ee´ttkâ´stted Lää´ddjânnam saa´mid naroodlaž da meeraikõskksaž õhttvuõđi âânnmõõžži beä´lnn.

Tuåimmpââiee´jji 2008-2011 sää´mtee´ǧǧ riâššõõttâmsååbbar va´ll’jii Aanrest 9.2.2008 saaǥǥjåå´đteejan Klemetti Näkkäläjääu´r:

  Tuâǥǥaž

Leäm Enontekiö Vuontisjääu´r ååraž sää´mooumaž da šõddâm tâ´vvsää´m puäʒʒhåiddkulttuurest. Puk muu piârrjest liâ vuässõõttâm ǩii mä´htt âstt da vuässâ´tte veâlâinn puäʒʒhåiddtuõjju. Sää´m ǩiõtt-tuâjjä´rbbvuõtt lij muu piârri pirr ravvsânji juõ´ǩǩpeivvsaž jie´llmest. Mu´nne lij tuõ´đi vää´znai, što muu määccaǩ da sää´mpihttsid lij raajjâm mu´nne õõldâs ooumaž da leäm leklvaž stattuužžâst, ku roodnairuåđään beä´lnn lij seillam ǩiõtt-tuâjjsilttõs. Škoou´l’jem beä´lnn leäm kulttur-antropologi di lââ´ssen leäm spraavdõõttâm še sää´mǩiõl da sää´mkulttuur pââibu juä´tkktu´tǩǩõõzz (FL).

Ouddâl ânn’jõž tuâj, kåå´tt mu´st åå´n lij, leäm tuõjjstõõllâm tu´tǩǩee´jen määŋgain jee´res õllškooulin da tu´tǩǩeemstrooi´tlin. Tu´tǩǩeemškoou´l’jumuužžâst lij leämmaž mu´nne pue´rr vuâđđ ânn’jõž saaǥǥjåå´đteeituâjjan diõtt, ku tät tuâj ouddlâ´stt eža jiânnai ǩee´rjtemtuâjaid, tu´tǩǩeempu´httem vuâđđõõttmõõžž da veiddsõs ä´ššobbvuõđi vaaldšumuužž. Tu´tǩǩeemobje´ktten lij leämmaž da lij veâlâinn sää´m puäʒʒhåidd, puäʒʒhåiddämmatsa´nnõs da pirrõskõskkvuõtt. Saaǥǥjåå´đteeipââ´j äi´ǧǧen leäm ǩiččlõõttâm vaalmštõõllâd kulttur-antropologia voudda kuulli ǩeânccjõõttâmǩee´rj, da tuäivam vuäǯǯad tõn valmmša ta´nni.